Manatu e Nofouta i Ai

O le Aiga o Isaraelu

I se mea o le togavao i sasa’e o Kanana, na faatalitali ai Iakopo ma le popole i le la feiloaiga ma lona uso masaga o Esau. O le taimi mulimuli na vaai ai Iakopo ia Esau, e tusa ma le 20 tausaga na muamua atu, sa taufaamatau ane ai Esau na te fasiotia o ia. Na alu le po atoa o fagatua Iakopo i le togavao, i le sailia o se faamanuiaga mai le Atua. O le iuga o le faatuatua, finafinau ma le naunautai o Iakopo, na tali mai ai le Atua i ana tatalo. O le po lena na suia ai le igoa o Iakopo ia Isaraelu, o se igoa o lona uiga “na ia finau ma le Atua” (Kenese 32:28, vaefaamatalaga b; tagai foi i le Kenese 32:24–32).¹

O tafatafa o le Vai o Iapoka, na maua ai e Iakopo le igoa o Isaraelu.

O le taimi muamua lea ua vaaia ai le igoa Isaraelu i le Tusi Paia, ma o se igoa na tumau ai i le tusi atoa ma le talafaasolopito atoa. Sa le’i umi ae le na o se toatasi se tagata na faasino i ai le igoa. E sefululua atalii o Isaraelu, ma o i latou na tupuga mai ai ua taua faatasi o le “aiga o Isaraelu,” o “ituaiga o Isaraelu,” o le “fanauga a Isaraelu,” po o “tagata Isaraelu.”

I le gasologa o le talafaasolopito, na lagona e le fanauga a Isaraelu le taua tele o lo latou tupuga mai i se tasi o ituaiga e sefululua o Isaraelu. O lo latou tupuaga sa o se vaega taua o lo latou faasinomaga i le feagaiga. Na folafola mai e le Aposetolo o Paulo o ia “o le ituaiga o Peniamina” (Roma 11:1). Ina ua auina atu e Liae ona atalii i Ierusalema e aumai papatussi apamemea, o le tasi o mafuaaga ona sa i ai i papatusi “se gafa o ona tamā” (1 Nifae 5:14; tagai foi 1 Nifae 3:3). Na iloa ai e Liae o ia e tupuga mai ia Iosefa, ma o le malamalama o lana fanau i lo latou sootaga i le aiga o Isaraelu na faamaonia le taua tele ia i latou i tausaga na mulimuli mai (tagai i le Alema 26:36; 3 Nifae 20:25).

I le Ekalesia i aso nei, atonu e te faalogo ai e uiga ia Isaraelu i faaupuga e pei “o le faapotopotoina o Isaraelu.” Tatou te pepese e uiga i le “Faaola o Isaraelu,” o le “Faamoemoe o Isaraelu,” ma le “Outou Faifeau o Isaraelu.”² I nei vaega, tatou te le na ona talanoa pe pepese e uiga i le malo anamua o Isaraelu po o le atunuu ua ta’ua i aso nei o Isaraelu. Ae o loo tatou faatatau atu ia i latou o e ua faapotopotoina mai malo o le lalolagi i le Ekalesia a Iesu Keriso. O loo tatou faatatau atu i tagata o ē tumau i le Atua, o ē saili ma le filiga i Ana faamanuiaga, ma ē e ala mai i le papatisoga, ua avea ma Lona nuu o le feagaiga.

O lou faamanuiaga faapeteriaka ua folafola mai ai lou sootaga i se tasi o ituaiga o le aiga o Isaraelu. O lena mea e sili atu nai lo na o se fasi faamatalaga manaia o le talafaasolopito o aiga. O le avea ai o se vaega o le aiga o Isaraelu, o lona uiga, o loo i ai sou sootaga o le feagaiga ma le Tama faalelagi ma Iesu Keriso. O lona uiga o oe, e pei foi o Aperaamo, na fuafuaina lava e avea “o se manuia” i le fanau a le Atua (Kenese 12:2; Aperaamo 2:9–11). O lona uiga, i upu a Peteru, o “outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai; ina ia outou ta’uta’u atu ona lelei na ia valaau ia te outou nai le pouliuli e oo i lona lava malamalama e matua ofo ai” (1 Peteru 2:9). O lona uiga o oe o se tasi na “finau ma le Atua” a o e faamamaluina au feagaiga ma Ia.

Faamatalaga

1. E i ai foi isi uiga mo le igoa Isaraelu, e aofia ai “E pule le Atua” po le “E tau pe finau le Atua.”

2. Viiga, nu. 5, 5, ma le 198.

Atatusi o le gafa o le aiga o Iakopo, saunia e Keith L. Beavers