Atatusi o Repeka na saunia e Dilleen Marsh

21–27 Fepuari

Kenese 24–27

Ua Faafouina le Feagaiga

A o e faitau i le Kenese 24–27, ia taulai atu i malamalamaaga loloto e te maua. Tatalo ina ia e iloa pe faapefea ona fetaui mataupu faavae e te maua i lou olaga.

Tusifaamaumau Ou Lagona Uunai

O le feagaiga a le Atua ma Aperaamo na aofia ai le folafolaga e faapea, e ala mai ia Aperaamo ma ana fanau “o le a manuia ai aiga uma o le lalolagi” (Aperaamo 2:11). E le o se folafolaga lena e mafai ona faataunuuina i se augatupulaga se tasi: i le tele o itu, o le Tusi Paia o le tala lea i le faataunuuga faifaipea e le Atua o Lana folafolaga. Ma sa Ia amataina i le faafouina o le feagaiga ma le aiga o Isaako ma Repeka. E ala mai i o laua aafiaga, ua tatou iloa ai se mea e uiga i le avea ma se vaega o le feagaiga. O a laua faataitaiga ua tatou aoao ai e uiga i le agalelei, onosai, ma le talitonu i faamanuiaga folafolaina a le Atua. Ma ua tatou aoao ai, e sili atu le taua o le lafoai o “mea” faalelalolagi (Kenese 25:30) ina ia mafai ona [tatou] maua faamanuiaga a le Atua mo i tatou lava ma a tatou fanau mo augatupuaga a sau.

Manatu mo Suesuega Faaletagata Lava Ia o Tusitusiga Paia

Kenese 24

O le faaipoipoga e taua i le fuafuaga e faavavau a le Atua.

Ua toatele naua tagata ua le faatauaina le faaipoipoga pe manatu foi ua o se avega mamafa. Ae sa ese se manatu na i ai a Aperaamo—ia te ia, o le faaipoipoga a lona atalii o Isaako, sa o se mea e maualuga lona taua. Aisea e te manatu na matua taua ai lea mea ia te ia? Ao e faitau i le Kenese 24, mafaufau i le taua o le faaipoipoga i le fuafuaga o le faaolataga a le Alii. Atonu foi e te faitau i le savali a Elder D. Todd Christofferson “Aisea e Faaipoipo Ai, Aisea e Fai Ai Se Aiga” (Liahona, Me 2015, 50–53) ma mafaufau pe aisea e avea ai “se aiga e fausia i luga o le faaipoipoga o se alii ma se tamaitai e maua ai se faatulagaga sili mo le fuafuaga a le Atua ia lauusiusi” (itulau 52).

O fesili pei o nei e ono fesoasoani e te mafaufau ai i isi mataupu faavae taua o loo i lenei mataupu.

Kenese 24:1–14. O le a le mea na fai e Aperaamo ma lana auauna ina ia faaaofia ai le Alii i a laua taumafaiga e saili se avā a Isaako?

Kenese 24:15–28, 55–60. O a ni uiga e te maua ia Repeka e te manao e faataitai i ai.

O a nisi malamalamaaga loloto e te maua?

Tagai foi i le Mataupu Faavae ma Feagaiga 131:1–4; “O Le Aiga: O Se Folafolaga i le Lalolagi,” ChurchofJesusChrist.org.

Kenese 25:29–34

E mafai ona ou filifili i le va o le faamalieina i le taimi lava lea ma mea e sili atu le taua.

I le aganuu faa-Aperaamo, o le atalii matua o se aiga, e masani ona ia mauaina se vaega o le tulaga faaletaitai ma le faamamaluga, na ta’ua o le tofi o le ulumatua. O le atalii lenei na te mauaina se tofi tele atu mai ona matua, faatasi ai ma tiutetauave e tele atu mo le tausiga o le lautele o le aiga.

Ao e faitau i le Kenese 25:29–34, mafaufau pe aisea atonu na malie ai Esau e lafoai lona tofi o le ulumatua e faafesuiai ai mo se meaai. O a ni lesona ua e maua mo oe lava i lenei tala? Mo se faataitaiga, o i ai se “mea” o loo taofiofia oe mai faamanuiaga e sili ona taua ia te oe. O le a se mea o loo e faia e taulai atu ai ma talisapaia nei faamanuiaga?

Tagai foi i le Mataio 6:19–33; 2 Nifae 9:51; M. Russell Ballard, “O le Mea e Sili Ona Taua E Sili Atu Foi Ona Umi,” Liahona, Nov. 2005, 41–44.

Kenese 26:1-5

Na toe faafouina le feagaiga faa-Aperaamo e ala mai ia Isaako.

O le feagaiga na osia e le Atua ma Aperaamo sa fuafuaina ia faaauauina e ala atu i augatupulaga e tele, o le talatuu la a Aperaamo ma Sara o le tausia o le feagaiga o le a manaomia ona tuufaasolo ifo ia Isaako, Iakopo, ma isi tamaitai ma alii faatuatua o latou fanau. A o e faitau i le Kenese 26:1–5, vaavaai mo ni isi o faamanuiaga o le feagaiga na ta’ua e le Atua. O le a se mea e te aoaoina e uiga i le Atua mai nei fuaiupu?

Kenese 26:18–25, 32–33

O Iesu Keriso o le vaieli o le vai ola.

E te ono maitauina o vaieli ma vaipuna ma isi puna o vai e i ai so latou matafaioi taua e fai i le tele o tala o le Faegaiga Tuai. E le o se mea e faateia ai, aua o le tele o nei tala na tutupu i nofoaga e matūtū tele. A o e faitau i le Kenese 26 e uiga i vaieli a Isaako, mafaufau po o le a le mea ua faatusa i ai le vai i tusitusiga paia. O a ni malamalamaaga loloto e te maua e uiga i vaieli faaleagaga o “vaiola”? (tagai i le Ioane 4:10–15). O faapefea ona e eliina ni vaieli faaleagaga i lou olaga? O faapefea ona pei le Faaola o se vaiola ia te oe? Ia manatua, na “tatanu” e le au Filisitia ia vaieli (tagai i le Kenese 26:18). O i ai se mea i lou olaga o loo tatanuina ou vaieli o le vaiola?

O se vaieli i Peresepa anamua, i le mea na eli ai e Aperaamo ma Isaako ia vaieli.

Kenese 27

Pe na sese Repeka ma Iakopo i le faaseseina o Isaako?

Tatou te le iloa mafuaaga i tua atu o le auala na faaaoga e Repeka ma Iakopo ia maua mai ai se faamanuiaga mo Iakopo. E fesoasoani le manatua o le Feagaiga Tuai e pei ona tatou mauaina nei, e le o atoa (tagai i le Mose 1:23, 41). E ono i ai ni faamatalaga o loo misi mai uluai faamaumauga o le a faamatala ai mea ia e foliga mai o loo tatou popole ai. Ae ui i lea, ua o tatou iloa o le finagalo lea o le Atua ina ia maua e Iakopo le faamanuiaga mai ia Isaako ona sa maua e Repeka se faaaliga o le a pulea e Iakopo ia Esau (tagai i le Kenese 25:23). Ina ua uma ona faailoa e Isaako ua ia faamanuiaina Iakopo ae le o Esau, sa ia faamautinoa mai o Iakopo “e manuia lava” (Kenese 27:33)—e ta’u mai ai na faataunuuina lava le finagalo o le Atua.

Manatu mo Suesuega Faaleaiga o Tusitusiga Paia ma Afiafi Faaleaiga

Kenese 24:2–4, 32–48.Na fai atu Aperaamo i se auauna faatuatuaina e saili se avā mo Isaako, ma sa osifeagaiga le auauna ma Aperaamo o le a ia faia. Sa faapefea ona faaalia e le auauna a Aperaamo lona faamaoni i le tausiaina o lana feagaiga. E mafai faapefea ona tatou mulimuli i lana faataitaiga?

Kenese 24:15–28, 55–60.E mafai ona vaavaai le tou aiga i fuaiupu nei mo uiga na faapea ona avea ai Repeka o se soa faavavau agavaa mo Isaako. Faamalosiau i tagata o le aiga e filifili se tasi o nei uiga latou te lagona e tatau ona latou atiina a’e.

Kenese 25:19–34; 27.Ina ia toe faamanatu tala i le auala na ave ai e Iakopo le tofi o le ulumatua ma le faamanuiaga ae le o Esau, e mafai ona tou tusia fuaiupu mai le “Iakopo ma Esau” (i le Tala o le Feagaiga Tuai) i ni fasipepa eseese. E mafai ona galulue faatasi tagata o le aiga e faatulaga ia fuaiupu i le faasologa sa’o.

Ao outou talanoa e uiga i le faatauina ese e Esau o lona tofi o le ulumatua, e mafai foi ona outou talanoa i mea e sili ona taua i lou aiga, e pei o a outou sootaga ma le Tama Faalelagi ma Iesu Keriso. Atonu e mafai e tagata o le aiga ona saili ni mea faitino po o ni ata e faatatau i mea latou te manatu e faavavau le taua. Tuu atu ia i latou e faamatala pe aisea na latou filifilia ai na mea.

Kenese 26:3–5.Ina ia fesoasoani i le tou aiga ia malamalama i le feagaiga faa-Aperaamo, e mafai ona e valaaulia i latou e sue folafolaga o loo faamatalaina i nei fuaiupu. Aisea e taua ai ona tatou iloa nei folafolaga i aso nei? (tagai i le “Manatu ia Nofouta i Ai: O le Feagaiga,” i le punaoa lenei).

Kenese 26:18–25, 32–33.Aisea e taua ai vaieli? E faapefea ona pei Iesu Keriso o se vai eli?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Filifili Tau o Mea Tonu,” Viiga, nu. 149.

Faaleleia o Suesuega Faaletagata Lava Ia

Tauloto se mau. Na aoao mai Elder Richard G. Scott, “O se mau ua taulotoina e avea o se uo tumau e le faavaivaia i se taimi o le olaga” (“O Le Mana o Tusitusiga Paia,” Liahona, Nov. 2011, 6).

Ua Faatau Atu e Esau Lona Tofi o le Ulumatua ia Iakopo, saunia e Glen S. Hopkinson