Ata tusi o Aperaamo ma Sarai, saunia e Dilleen Marsh

7–13 Fepuari.

Kenese 12–17; Aperaamo 1–2

“Avea o se Soo Sili Atu o le Amiotonu”

A o e faitau e uiga ia Aperamo ma Sarai (lea na toe igoa mulimuli ia Aperaamo ma Sara) ma lo la aiga, mafaufau pe faapefea ona musuia oe e ala i a latou faataitaiga. Tusi faamaumau ou lagona uunai e uiga i mea e mafai ona e faia “ia avea ai ma se soo sili atu o le amiotonu” (Aperaamo 1:2).

Tusifaamaumau Ou Lagona Uunai

Ona o le feagaiga na faia e le Atua ma ia, ua faaigoaina ai Aperaamo o le “tamā o le au faatuatua” (Mataupu Faavae ma Feagaiga 138:41) ma “o le uo a le Atua” (Iakopo 2:23). E faitau miliona tagata i aso nei ua latou faaaloalogia o ia o le latou tuaa e tupuga sao mai ai, ae o isi ua vaetamaina i lona aiga e ala i le liliu mai i le talalelei a Iesu Keriso. Ae o Aperaamo lava ia na sau mai i se aiga sa faaletonu—o lona tamā, o le na lafoaia le tapuaiga moni a le Atua, sa taumafai e ositaulagaina Aperaamo i atua sese. E ui lava i lenei mea, ae o le naunautaiga o Aperaamo o le “ia avea ai ma se soo sili atu o le amiotonu” (Aperaamo 1:2), ma o le tala o lona olaga ua faaalia ai na faamamaluina e le Atua lona naunautaiga. O le olaga o Aperaamo ua fai ma molimau e faapea, e tusa lava po o le a le talaaga sa i ai o le aiga o le tagata, e mafai ona faatumulia le lumanai i le faamoemoe.

Manatu mo Suesuega Faaletagata Lava Ia o Tusitusiga Paia

Aperaamo 1:1–19

O le a faamanuia au e le Atua ona o lo’u faatuatua ma manaoga amiotonu.

E pei o le toatele o i tatou, na ola Aperaamo i se siosiomaga amioleaga, ae sa manao lava o ia ia amiotonu. Na aoao mai e Peresitene Dallin H. Oaks le taua o le i ai o manaoga amiotonu: “E pei lava ona taua le lafoaia o manao uma i le agasala, e sili atu foi mea e manaomia e le ola e faavavau. Ina ia ausia lo tatou taunuuga e faavavau o le a tatou mananao ma galulue mo uiga lelei e manaomia e avea ai ma se tagata e faavavau. … Afai e foliga mai e faigata tele lenei mea—ma e mautinoa lava e le faigofie mo soo se tasi o i tatou—ona tatau lea ona tatou amata i se manao mo sea uiga lelei, ma ole atu i lo tatou Tama Faalelagi alofa mo se fesoasoani i o tatou lagona [tagai i le Moronae 7:48]” (“Manao,” Liahona, Me 2011, 44–45). A o e faitau i le Aperaamo 1:1–19, mafaufau pe o faapefea ona faaalia e nei fuaiupu le mea na aoao mai e Peresitene Oaks. Atonu o le a fesoasoani fesili e pei o nei:

• O le a le mea na manao ma sailia e Aperaamo? O le a le mea na ia faia e faaali atu ai lona faatuatua?

• O a ni ou manaoga? E i ai se mea e te lagona e tatau ona e faia e faamamā ai ou manaoga?

• O a ni luitau na feagai ma Aperaamo ona o ona manaoga amiotonu? Na faapefea ona fesoasoani le Atua ia te ia?

• O le a se savali o i ai i nei fuaiupu mo i latou e le mananao tagata o o latou aiga ia amiotonu?

Tagai foi i le Mataio 7:7; “Deliverance of Abraham” (vitio), ChurchofJesusChrist.org; “Educate Your Desires, Elder Andersen Counsels” (ChurchofJesusChrist.org).

Aperaamo 2:10–11

O ai e aofia ai i le feagaiga faa-Aperaamo?

Ina ua osia e le Alii Lana feagaiga ma Aperaamo, sa Ia folafola atu o lea feagaiga o le a faaauau i e e tupuga mai ia Aperaamo, po o le “fanau,” ma o le “mo le toatele o le a taliaina lenei talalelei o le a … faitauina au fanau” (Aperaamo 2:10–11). O le uiga o lea mea, o folafolaga o le feagaiga faa-Aperaamo e faatatau lea i tagata o le Ekalesia i aso nei, pe o latou o ni tagata na fananau moni mai ia Aperaamo po o ni tama fai i le aiga e ala i le papatisoga ma le liua mai i le talalelei a Iesu Keriso Kalatia 3:26–29; Mataupu Faavae ma Feagaiga 132:30–32). Ina ia faitauina o le fanau a Aperaamo, e tatau i se tagata ona usitai i tulafono ma sauniga o le talalelei.

Kenese 12:1–3; 13:15–16; 15:1–6; 17:1–8, 15–22; Aperaamo 2:8–11

O le feagaiga faa-Aperaamo ua manuia ai au ma lo’u aiga.

Ona o tagata uma o le Ekalesia o loo aofia i le feagaiga faa-Aperaamo, atonu e te manao e faaalu se taimi e mafaufau loloto ai pe aisea e taua ai lenei feagaiga i lou olaga. Tusifaamaumau ou manatu e uiga i fesili nei:

E mafai faapefea ona faamanuiaina a’u ma lo’u aiga i folafolaga o loo maua i le Aperaamo 2:8–11 ? (tagai foi i le Kenese 12:1–3; 13:15–16).

O le a se mea ou te aoaoina e uiga i le feagaiga faa-Aperaamo mai le Kenese 15:1–6; 17:1–8, 15–22?

O le a se mea ua musuia a’u e fai e fesoasoani ai e faataunuu le folafolaga e faapea, “o le a manuia ai aiga uma o le lalolagi”? (Aperaamo 2:11).

Atonu e te mafaufau o nisi o faamanuiaga faalelalolagi na folafolaina ia Aperaamo ma Sara, e pei o le mautofi i se nuu o le folafolaga ma le avea ma matua o se fanau toatele, e i ai ni mea faavavau e talitutusa ai. O nei [folafolaga] e aofia ai le mautofi i le malo selesitila (tagai i le Mataupu Faavae ma Feagaiga 132:29) ma le faaipoipoga e faavavau faatasi ma fanau e faavavau (tagai i le Mataupu Faavae ma Feagaiga 131:1–4; 132:20–24, 28–32). Na aoao mai ai Peresitene Russell M. Nelson e faapea, “I totonu o le malumalu tatou te maua ai o tatou toe faamanuiaga, o ni fanau a Aperaamo, Isaako, ma Iakopo” (“O Le Faapotopotoina o Isaraelu Ua Faataapeapeina,” Liahona, Nov. 2006, 80).

Tagai foi i le Faaliliuga a Iosefa Samita, Kenese 15:9–12; 17:3–12 (i le faaopoopoga o le Tusi Paia); Bible Dictionary, “Aperaamo, feagaiga a”; “Manatu e Nofouta i Ai: O le Feagaiga,” i le punaoa lenei.

Manatu mo Suesuega Faaleaiga o Tusitusiga Paia ma Afiafi Faaleaiga

Kenese 13:5–12.O le a le mea na fai e Atamu e fausia ai le filemu i lona aiga? Atonu e mafai e lou aiga ona faataitai ona fai ma tagata e faatupuina le filemu e pei o Aperaamo i le faia o ni tala faatino o le auala e foia ai ni feeseeseaiga e ono tulai mai i lou aiga.

Kenese 13:16; 15:2–6; 17:15–19.E mafai faapefea ona e fesoasoani i lou aiga ina ia malamalama i le folafolaga a le Alii o loo i nei fuaiupu—e ui lava ina sa le’i i ai se fanau a Aperaamo ma Sara i lena taimi, ae o le a faatoateleina le la fanau e pei o le efuefu o le eleele, fetu o le lagi, po o le oneone o le matafaga? (tagai foi i le Kenese 22:17). Atonu foi e mafai ona e faaali atu i lou aiga se apa o loo i ai ni oneone, vaai i fetu, pe faaaoga le ata o loo avatu ai i le otootoga lenei. E mafai faapefea ona tatou talitonuina folafolaga a le Atua e ui lava ina foliga mai e faigata ona taunuu?

Kenese 14:18–20.O le a se mea ua tatou aoaoina e uiga ia Mekisateko mai le Faaliliuga a Iosefa Samita, Kenese 14:25–40? (i le faaopoopoga o le Tusi Paia; tagai foi i le Alema 13:13–19). E mafai faapefea ona tatou “[faatuina] le amiotonu” e pei ona sa faia e Mekisateko? (fuaiupu 36). O le a se isi mea e uiga i le auaunaga a Mekisateko ua musia ai i tatou?

Ua Faamanuia e Mekisateko ia Aperamo saunia e Walter Rane

Kenese 16.O le faitau e uiga ia Akara e mafai ona avea o se avanoa e talanoa ai i auala e fesoasoani mai ai le Alii ia i tatou pe a tatou lagona le agaleagaina o i tatou. Atonu e te manao e faailoa atu o “Isamaeli” o lona uiga “ua faafofogaina e le Atua.” O anafea na tatou lagona ai na faafofoga ma fesoasoani mai le Alii ina ua tatou lagonaina le agaleagaina o i tatou? (tagai i le Kenese 16:11).

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou Te Fiaola i le Talalelei,” Tusipese a Tamaiti,72.

Faaleleia o Lo Tatou Aoao Atu

Ia avanoa ma maua gofie. O nisi o avanoa aupito lelei o le aoao atu e amata i se fesili po o se atugaluga i le loto o se tagata o le aiga. Ia faailoa atu i tagata o le aiga e ala i au upu ma faatinoga o loo e naunau e faalogo atu ia i latou. (Tagai i le Aoao Atu i le Ala a le Faaola,16.)

Na folafola mai le Atua o fanau a Aperaamo ma Sara o le a pei o le tele o “fetu o le lagi” (Kenese 22:17). Mafaufau Loloto i le Folafolaga a le Atua, saunia e Courtney Matz.