Noa, lona aiga, meaola, o le vaa ma se nuanua

Ata o Noa ua tuua le vaa, na saunia e Sam Lawlor

31 Ianuari–6 Fepuari

Kenese 6–11; Mose 8

“Sa Faapea Ona Maua e Noa le Alofa Tunoa i Fofoga-Silasila o le Alii”

O tala o loo i tusitusiga paia e masani ona aoao mai ia i tatou le tele o lesona faaleagaga. Ao e faitau e uiga i le Lolo Tele ma le Olo o Papelu, saili musumusuga pe faapefea ona faatatau nei tala ia te oe.

Tusifaamaumau Ou Lagona Uunai

Ua musuia augatupulaga o tagata faitau Tusi Paia i le tala ia Noa ma le Lolo. Ae o i tatou o e o loo ola i aso e gata ai e i ai se mafuaaga faapitoa e taulai atu ai i ai. Ina ua aoao mai e Iesu Keriso le auala e tatau ona tatou vaavaai atu ai mo Lona Afio Mai Faalua, sa Ia fetalai mai, “Ae e pei ona sa i ai i aso o Noa, o le a faapea foi ona i ai i le afio mai o le Atalii o le Tagata” (Iosefa Samita—Mataio 1:41). Ma le isi, o fuaitau o loo faamatala ai aso o Noa, e pei o le “eleelea” ma “tumu i le faasaua,” e mafai ona faigofie ona faamatala ai o tatou taimi (Kenese 6:12–13; Mose 8:28). O le tala i le Olo o Papelu ua talafeauga foi i o tatou aso, ma lona faamatalaga o le faamaualuga sosoo ai ma le le mautonu ma le fevaevaeai o le fanau a le Atua.

E ese le taua o nei tala mai anamua, e le gata ina faaali mai ai ia i tatou le faifaipea o le amioleaga i le aluga o le talafaasolopito. Ae o le mea e sili ona taua, ua latou aoao mai ia i tatou le mea e fai i ai. “Sa faapea ona maua e Noa le alofa tunoa i fofoga-silasila o le Alii” (Mose 8:27) e ui lava ina sa siomia o ia i le amioleaga. Ma sa liliu atu le aiga o Iareto ma lona uso i le Alii ma sa taitai ese i latou e le Alii mai le amioleaga i Papelu (tagai Eteru 1:33–43). Afai o loo tatou tau manatunatu pe faapefea ona puipuia i tatou lava ma o tatou aiga i o tatou lava taimi o le eleelea ma le faasaua, o loo tele ni mea tatou te aoao ai mai i tala ua [tatou] masani ai o loo i ai i nei mataupu.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Kenese 6; Mose 8

E i ai le saogalemu faaleagaga i le mulimuli i le perofeta a le Alii.

Faafetai i le talalelei toefuataina, ua tatou iloa ai mea e tele e uiga ia Noa nai lo o mea o loo maua i le Feagaiga Tuai. O le faaliliuga musuia a Iosefa Samita o le Kenese 6, o loo maua i le Mose 8, ua faaalia ai o Noa o se tasi o perofeta maoae a le Atua. Sa faauuina o ia ma auina atu e talai le talalelei a Iesu Keriso, sa savavali ma talanoa o ia ma le Atua, ma sa filifilia o ia e toe faatuina le fanau a le Atua i le lalolagi ina ua uma le Lolo (tagai foi i le Aoaoga a Peresitene o le Ekalesia: Iosefa Samita [2007], 104, 201). O le a se mea ua e aoaoina e uiga i perofeta mai aafiaga a Noa?

Ao e faitau e uiga i aso o Noa, atonu e te maitaua ai ni mea e talitutusa ai ma o tatou aso. Mo se faataitaiga:

• Mose 8:18, 20–21, 23–24 (teenaina o auauna a le Atua)

• Mose 8:21 (faatuutuu ma le faalelalolagi)

• Mose 8:22 (mafaufauga ma manatu faatiapolo)

• Mose 8:28 (mea eleelea ma le faasaua)

O a ni mea o loo aoao mai e perofeta i aso nei e uiga i le talalelei a Iesu Keriso e mafai ona e saogalemu ai i le lalolagi i aso nei. Ao e faitau i aafiaga a Noa, o le a se mea ua musuia oe e te mulimuli ai i perofeta a le Alii o aso nei.

Tagai foi i le Mosaea 13:33; Mataupu Faavae ma Feagaiga 21:4–7.

Kenese 9:8–17

O faailoga po o faatusa e fesoasoani tatou te manatua ai a tatou feagaiga ma le Alii.

O feagaiga o le talalelei e mafai ona faailoa mai i se faailo, faatusa, po o “faailoga” (Kenese 9:12). Mo se faataitaiga, mafaufau pe faapefea ona faamanatu atu e le falaoa ma le vai o le faamanatuga po o le vai o le papatisoga ia upu moni paia e faatatau i au feagaiga. E tusa ai ma le Kenese 9:8–17, o le a le mea e mafai ona faamanatu atu e se nuanua ia te oe? O le a se mea ua faaopoopo atu e le Faaliliuga a Iosefa Samita, Kenese 9:21–25 (o loo i le faaopoopoga o le Tusi Paia) i lou malamalama? Aisea e finagalo ai le Alii ia e manatua o Ia ma feagaiga ua e osia?

Tagai foi Gerrit W. Gong, “Ia Manatua Pea o Ia,” Liahona, Me 2016, 108–11.

Kenese 11:1–9

E pau lava le auala e tau atu ai i le lagi o le mulimuli lea ia Iesu Keriso.

O Papelu anamua, po o Papelonia, ua leva ona faaaogaina o se faatusa mo le amioleaga ma le faalelalolagi (tagai i le Faaaliga 18:1–10; Mataupu Faavae ma Feagaiga 133:14). A o e suesue i le Kenese 11:1–9, mafaufau loloto i malamalalamaaga loloto na tuuina mai e le perofeta o Mamona, o lē na tusia o Satani “na ia tuu i loto o tagata ia latou fausia se olo ia lava le maualuga ina ia mafai ona latou o ae ai i le lagi” (Helamana 6:28; tagai foi i fuaiupu 26–27). O a ni lapataiga ua tuuina mai e le tala o le Olo o Papelu mo oe?

Tagai foi i le Salamo 127:1.

o le olo o Papelu

Ata tusi o le Olo o Papelu, na saunia e David Green

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Kenese 6–8.E faapefea ona e faaaogaina le tala i le vaa o Noa e aoao ai lou aiga i auala e mafai ai e le mulimuli i perofeta ona puipuia i tatou ia saogalemu faaleagaga? (tagai i le “Noa ma Lona Aiga,” i Tala o le Feagaiga Tuai). Atonu e mafai e lou aiga ona galulue faatasi e fau se vaa meataalo faigofie e fai i pepa po o poloka. A o tou faitau i le Kenese 6–7, e mafai ona outou faatusatusaina le saogalemu e maua mai le vaa i le saogalemu tatou te maua i le mulimuli i le perofeta. Atonu tou te mananao e talanoa i fautuaga lata mai nei mai perofeta ma tusi ana upu tima’i i luga o le tou vaa.

O a nisi mea ua tuuina mai e le Atua e mafai ona faatusatusa i le vaa na faasaoina ai Noa ma lona aiga? O punaoa nei o loo fautuaina atu ai ni tali, e ui lava ina tele isi: 2 Nifae 9:7–13; Mataupu Faavae ma Feagaiga 115:5–6; ma le savali a Peresitene Russell M. Nelson “Avea ma Faataitaiga Lelei o le Au Paia o Aso e Gata Ai” (Liahona, Nov. 2018, 113–14).

Mose 8:17.O le a le uiga o le, “taumafai” o le Agaga o le Alii ia i tatou? (tagai i le 1 Nifae 7:14; Mataupu Faavae ma Feagaiga 1:33). O le a se taimi na i ai se tatou aafiaga o le taumafai o le Agaga ia i tatou?

Kenesa 9:8–17.Atonu e fiafia le fanau laiti e tusi se ata pe valivali se nuanua a o outou talanoa i mea ua faatusa i ai (tagai i le Faaliliuga a Iosefa Samita, Kenese 9:21–25 [i le faaopoopoga o le Tusi Paia]). Atonu foi tou te talanoa i mea e fesoasoani tatou te manatua ai a tatou feagaiga, e pei o le faamanatuga, e faapea ona fesoasoani tatou te manatua ai a tatou feagaiga o le papatisoga e mulimuli ia Iesu Keriso (tagai i le Mataupu Faavae ma Feagaiga 20:75–79).

Kenese 11:1–9.Atonu o le a fesoasoani le faitau o le Eteru 1:33–43 a o suesue lou aiga i le Kenese 11 ma aoao ai e uiga i le Olo o Papelu. O le a se mea tatou te aoao mai i le aiga o Iareto ma lona uso e mafai ona fesoasoani i lo tatou aiga ina ia maua le saogalemu faaleagaga e ui lava i le amioleaga o le lalolagi. O a ni lesona faaopoopo tatou te aoaoina mai ia Noa ma lona aiga a o latou feagai ma se luitau faapena? (tagai i le Mose 8:13, 16–30).

Mo nisi manatu mo le aoaoinao le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Mulimuli i le Perofeta,” Tusipese a Tamaiti, 110–11, (fuaiupu 3).

Faaleleia o Suesuega Faaletagata Lava Ia

Faasoa atu ou malamalamaaga loloto. A e faasoa atu se mea ua e aoaoina mai tusitusiga paia, e le gata ina e faamanuiaina ai isi ae faapea foi ona faaloloto ai lou lava malamalama. O le a se mea ua musuia oe e faasoa atu mai tusitusiga paia i lou aiga, uo, po o tagata o le uarota?

vaa o Noa

Faatusa o le vaa o Noa, saunia e Adam Klint Day