“24–30 Ianuari. Mose 7: ‘Sa Taʼua e le Alii Lona Nuu o Siona,’” Sau, Mulimuli Mai ia te Aʼu—Mo Tagata Taitoatasi ma Aiga: Feagaiga Tuai 2022 (2021)
“24–30 Ianuari. Mose 7,” Sau, Mulimuli Mai ia te A’u—Mo Tagata Taitoatasi ma Aiga: 2022
Alofa le Tasi i le Isi saunia e Emma Donaldson Taylor
24–30 Ianuari
Mose 7
“Sa Taʼua e le Alii Lona Nuu o Siona”
A o e faitau ma mafaufau loloto i le Mose 7, tusifaamaumau ou lagona uunai. O le faia o lea mea, e faaalia ai lou faatauaina o le taitaiga mai le Alii ma o loo e manao e maua pea le tele o Ana taitaiga.
Faamaumau i lalo Ou Lagona Uunai
I le talafaasolopito atoa, na taumafai ai tagata ia ausia mea na ausia e Enoka ma lona nuu: o le fausia o se nuu e leai se mativa po o ni sauaga. I le avea ai ma nuu o le Atua, e i ai foi ia i tatou lenei manao. Tatou te ta’ua lea o le fausia o Siona, ma e aofia ai—e faaopoopo atu i le tausia o e matitiva ma le faalauiloaina o le filemu—osia o feagaiga, nonofo faatasi i le amiotonu, ma ia tasi le tasi ma le isi faapea ma Iesu Keriso, “le Tupu o Siona” (Mose 7:53). Ona o loo faaauau pea le galuega o le faatuina o Siona i o tatou aso nei, e aoga le fesili, Sa faapefea ona faia e Enoka ma lona nuu? Sa faapefea ona “tasi o latou loto ma tasi le mafaufau” (Mose 7:18) e ui lava ina sa siomia i latou e le amioleaga? Faatasi ai ma le tele o faamatalaga auiliili ua tuuina mai e le Mose 7 ia i tatou e uiga ia Siona, ae o se mea e faapitoa le taua mo le Au Paia o Aso e Gata Ai atonu o lenei: O Siona ua le na o se aai—o se tulaga o le loto ma le agaga. O Siona, e pei ona aoao mai le Alii “o e ua loto mamā” (Mataupu Faavae ma Feagaiga 97:21). Atonu la o le auala sili e fausia ai Siona, o le amata lea i o tatou lava loto ma aiga.
Manatu mo Suesuega Faaletagata Lava Ia o Tusitusiga Paia
O taumafaiga a Enoka o se mamanu lea mo le fausiaina o Siona i o tatou lava olaga.
Ona o le Mose 7 o se faamaumauga o le ala na fausia ai ma le manuia e e na mulimuli i le Atua ia Siona, e mafai foi ona faatonu ma musuia ai i tatou i aso nei a o tatou taumafai e faia lea lava mea e tasi. Mafaufau e faaaoga se siata faapenei e tusifaamaumau ai mea e te aoaoina e uiga ia Siona mai le Mose 7:16–21, 27, 53, 62–69.
|
Fuaiupu |
O le a se mea ua e aoaoina e uiga ia Siona? |
O le a se mea o loo fautua mai e lenei aoaoga e uiga i au taumafaiga e fausia Siona? |
|---|---|---|
Fuaiupu | O le a se mea ua e aoaoina e uiga ia Siona? O tagata o Siona sa “tasi o latou loto ma tasi le mafaufau.” | O le a se mea o loo fautua mai e lenei aoaoga e uiga i au taumafaiga e fausia Siona? E manaomia ona tatou lotogatasi o ni aiga ma se Ekalesia. |
Fuaiupu | O le a se mea ua e aoaoina e uiga ia Siona? “O Siona, i le aluga o le taimi, ua aveina aʼe i le lagi.” | O le a se mea o loo fautua mai e lenei aoaoga e uiga i au taumafaiga e fausia Siona? O le fausiaina o Siona o se faagasologa e faifaimalie. |
E tatau i le nuu o le Atua ona taumafai ia “tasi o latou loto ma tasi le mafaufau.”
O le Mose 7:18–19 o loo lisiina ai ni uiga taua o tagata ua ta’ua e le Atua o Siona. Aisea e te manatu e alagatatau ai nei uiga i le fausiaina o Siona? E faapefea ona ese Siona, e pei ona faamatalaina i lenei mataupu, mai isi vaega po o faalapotoptoga aufaatasi i le lalolagi. A o e mafaufau loloto i le fesili lenei, atonu e te mafaufau foi i upu nei a Iesu Keriso i le fuaiupu 53: “O A’u o le Mesia, o le Tupu o Siona.” O le a le uiga o le avea o Iesu Keriso ma o tatou Tupu? E faapefea ona feasoasoani o Ia ia i tatou e atinae uiga o Siona?
Tagai foi i le Filipi 2:1–5; 4 Nifae 1:15–18; Mataupu Faavae ma Feagaiga 97:21; 105:5.
E tatau ona tatou taumafai ia “tasi o tatou loto ma tasi le mafaufau” (Mose 7:18).
O le a le mea na tupu i le nuu o Enoka?
O fuaitau “aveina a’e” (Mose 7:21, 23), “siitia a’e” (Mose 7:24), “segia a’e” (Mose 7:27), ma le “ua sola” (Mose 7:69) e faatatau ia Siona ma le nuu o Enoka na liua ma aveina a’e i le lagi. O tagata ua liuaina “ua suia ina ia latou le oo i tiga po o le oti” a o avea o ni tagata ola (Guide to the Scriptures, “Translated Beings,” “Zion,” scriptures.ChurchofJesusChrist.org; tagai foi i le 3 Nifae 28:4–9, 15–18, 39–40).
Ua tutulu le Atua mo Lana fanau.
O nisi tagata e vaai atu i le Atua o se tagata e mamao ese ma e leai ni [Ona] aafiaga faalelagona i mea e tutupu ia i tatou. Ae na vaai Enoka i se faaaliga o tutulu le Atua ona o lana fanau A o e faitau i le Mose 7:28–40, vaavaai mo le mafuaaga na tutulu ai le Atua. I le vaega na totoe o le faaaliga a Enoka, o loo faamatalaina i le Mose 7:41–69, o a ni faamaoniga e te maua o le Atua e “alofa mutimutivale ma agalelei e faavavau”? (Mose 7:30; tagai i fuiaiupu 43, 47, ma 62 mo ni faataitaiga).
I aso e gata ai o le a faapotoptoina e le Atua Ona tagata filifilia.
O le fuaiupu 62 o loo faamatala mai ai mea e tutupu i aso amulī. Mafaufau po o a uiga o fuaitau pei o nei: “o le a Ou auina atu i lalo mai le lagi le amiotonu,” “o le a Ou auina atu le upumoni i fafo mai le eleele,” “o le a Ou faia ia tafi le lalolagi i le amiotonu ma le upumoni e pei o se lolo.” O a ni mea ua aoao mai e nei fuaitau e uiga i galuega a le Atua i aso e gata ai?
Manatu mo Suesuega Faaleaiga o Tusitusiga Paia ma Afiafi Faaleaiga
-
Mose 7:18–19.Ina ia fesoasoani i tagata o le aiga e vaai faalemafaufau i le uiga o le “tasi le loto,” atonu e mafai ona e faia se fatu pepa ona otioti lea i ni fasi paso ia tofu tagata uma o le aiga ma se fasi paso e tasi. E mafai ona tusi e tagata o le aiga o latou igoa i luga o a latou fasi paso ona galulue lea ma le tasi ma le isi e tuu faatasi le fatu. A o faauma le paso e mafai ona tou talanoa e uiga i mea tou te fiafia ai e uiga i tagata taitoatasi o le aiga.
-
Mose 7:28–31, 35.O le a se mea tatou te aoaoina e uiga i le Atua mai i nei fuaiupu?
-
Mose 7:32.Aisea na tuuina mai ai e le Atua ia i tatou le faitalia? O le a se mea atonu e te ta’u atu i se tagata o lē ua manatu o tulafono a le Atua ua faatapulaa ai lo tatou faitalia. O le faitauina o le 2 Nifae 2:25–27 e ono faaopoopo atu ai i lenei talanoaga.
-
Mose 7:59–67.A o faitau e lo outou aiga le Mose 7:59–67, taumafai e faailoga pe tusi i lalo ni mea na ta’u atu e le Alii ia Enoka e uiga i aso e gata ai—mo se faataitaiga, o le a “faapotopoto mai i fafo [Lana] au filifilia” (fuaiupu 62) ma o le i ai “puapuaga tetele i totonu o e ua amioleaga” (fuaiupu 66). E faapefea ona i ai lo tatou faatuatua ma le faamoemoe e ui i le amioleaga i aso e gata ai? O se vaega o lenei talanoaga, mafaufau e faitau upu nei mai ia Elder Ronald A. Rasband: “Ia faamalosi, uso e ma tuafafine. Ioe, ua tatou ola i taimi faigata, ae pe a tatou tumau ai i luga o le ala o feagaiga, e le tatau ona tatou fefefe. Ou te faamanuiaina outou a o outou faia, o le a outou le atuatuvale i taimi ua tatou ola ai po o faafitauli e oo mai ia te outou. Ou te faamanuiaina outou ina ia filifili e tutu i nofoaga paia ma ia le masii ese. Ou te faamanuiaina outou ina ia talitonu i folafolaga a Iesu Keriso, o loo soifua o Ia, ma o loo Ia vaavaaia i tatou, popole mo i tatou, ma tu i o tatou autafa” (“Aua le Atuatuvale,” Liahona, Nov. 2018, 21).
Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese fautuaina: “A i ai i le Aiga le Alofa,” Viiga, nu. 181.
Faaleleia o Lo Tatou Aoao Atu
Ia mataala. A o e mataituina mea o loo tutupu i olaga o lau fanau, o le a e maua ai avanoa sili ona lelei e aoao atu ai. O manatu faaalia ma fesili a lau fanau i le aso atoa e mafai foi ona aliae ai ni avanoa e aoao atu ai. (Tagai i le Aoao Atu i le Ala a le Faaola,16.)
O Le Nuu o Siona ua Liuaina, saunia e Del Parson