Atamu ma Eva o loo savavali faatasi

Atamu ma Eva, saunia e Douglas M. Fryer

10–16 Ianuari

Kenese 3–4; Mose 4–5

O Le Pa’ū o Atamu ma Eva

A o e suesueina le Kenese 3–4 ma le Mose 4–5, mafaufau po o le a se mea o loo taumafai le Alii e aoao atu ia te oe. Tusifaamaumau nei upumoni ma ou lagona uunai, ma manatunatu i ai i le aluga o le vaiaso.

Tusifaamaumau Ou Lagona Uunai

I le taimi muamua, o le tala i le Pa’ū o Atamu ma Eva na foliga mai o se faalavelave tuga. Na tuliesea Atamu ma Eva mai le Faatoaga matagofie o Etena. Sa lafoai i laua i se lalolagi e le mavae ai le tiga, faanoanoa, ma le oti (tagai i le Kenese 3:16–19). Ma sa vavaeeseina mai i laua mai lo la Tama Faalelagi. Ae ona o upumoni ua toefuataiina mai e ala i le Perofeta o Iosefa Samita i le tusi a Mose, ua tatou iloa ai o le tala ia Atamu ma Eva o le mea moni, o le tala o le faamoemoe—ma o se vaega taua o le fuafuaga a le Atua mo Lana fanau.

Sa matagofie le Faatoaga o Etena. Ae na manaomia e Atamu ma Eva se mea e sili atu nai lo o ni siosiomaga matagofie. Sa la’ua manaomia—ma tatou te manaomia uma—se avanoa e tuputupu a’e ai. O le tuua o le Faatoaga o Etena sa o le laasaga muamua lea e agai atu i le toe foi atu i le Atua ma iu ai ina avea faapei o Ia. O lona uiga, o le fetaiai ma mea faafeagai, faia o mea sese, aoao e salamo, ma le faatuatuaina o le Faaola, o lana Togiola ua mafai ai ona agai i luma ma le “olioli o le togiolaina o i taʼua” (Mose 5:11). A e faitau la i le pa’ū o Atamu ma Eva, aua e te taulai i mea e foliga mai o ni faalavelave matuia ae taulai i avanoa—e le o le parataiso lea na aveesea mai ia Atamu ma Eva, ae o le mamalu o le la filifiliga lea ua mafai ona tatou mauaina.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Kenese 3:1–7; Mose 4; 5:4–12

O le Pa’ū sa o se vaega talafeagai o le fuafuaga a le Atua e togiola ai Lana fanau.

O le Pa’ū o Atamu ma Eva na oo mai ai le oti faaletino ma le oti faaleagaga i le lalolagi Na oo mai ai foi ma faigata, faanoanoa ma le agasala. O nei mea uma e foliga mai o ni mafuaaga ia e le fiafia ai i le Pa’ū. Ae o le Pa’ū sa o se vaega o le fuafuaga a le Tama Faalelagi e togiola ma faaeaina ai Lana fanau e ala i le “taulaga a le Toatasi na Fanaua e le Tamā” (Mose 5:7). A o e suesue i le Kenese 3:1–7; Mose 4; 5:4–12, o a ni upumoni e te maua e fesoasoani e te malamalama ai i le Pa’ū ma le auala e faatoilaloina ai e le Togiola a Keriso? Atonu o le a fesoasoani fesili e pei o nei:

• Na faapefea ona aafia Atamu ma Eva i le Pa’ū? E faapefea ona aafia ai au?

• Aisea na faia ai e Atamu ma Eva ia taulaga? O a mea na fai ma faailoga o na taulaga? O le a se mea e mafai ona ou aoaoina mai i upu a le agelu o loo i nei fuaiupu?

• Aisea na “fiafia” ai Atamu ma Eva ina ua uma lo la Pa’ū? O le a se mea ua ou aoaoina mai lenei tala e uiga i le fuafuaga a le Atua e togiola au e ala mai ia Iesu Kersio?

Ona o le Tusi a Mamona ma isi faaaliga o aso e gata ai, ua tatou maua ai se malamalamaaga uiga ese e uiga i le Pa’ū. Mo se faataitaiga, mafaufau i le mea na aoao atu e le perofeta o Liae i lona aiga e uiga ia Atamu ma Eva i le 2 Nifae 2:15–27. O faapefea ona faamanino e aoaoga a Liae le mea na tupu i le Faatoaga o Etena ma feasoasoani tatou te malamalama ai i le mafuaaga na ala ai ona taua?

Tagai foi i le 1 Korinito 15:20–22; Mosaea 3:19; Alema 12:21–37; Mataupu Faavae ma Feagaaiga 29:39–43; Mataupu Faavae o le Faatuatua 1:3; Dallin H. Oaks, “O Le Fuafuaga Sili,” Liahona, Me 2020, 93–96; Dallin H. Oaks, “Faafeagai o Mea Uma,” Liahona, Me 2016, 114–17; Jeffrey R. Holland, “Pe a Faatasia le Faamasino Tonu, Alofa ma le Alofa Mutimutivale,” Liahona, Me 2015, 104–6.

Eva o loo uuina se fualaau aina

Tuua o Etena, saunia e Annie Henrie Nader

Kenese 3:16; Mose 4:22

O le a le uiga o le [faamatalaga], o Atamu e “pule ia” Eva?

O lenei fasifuaitau o le mau, o nisi taimi e sese ai le faauigaga e faapea, e ta’uamiotonuina se tane i le faia faalealofa o lana avā. I o tatou aso, ua aoao mai perofeta a le Alii e faapea, o se tane e tatau ona pule faamalumalu i lona aiga i le amiotonu, e tatau ona ia vaai i lana avā o se paaga tutusa (tagai i le “O Le Aiga: O Se Folafolaga i le Lalolagi” [ChurchofJesusChrist.org]). Na faamalamalama mai e Elder Dale G. Renlund ma Sister Ruth Lybbert Renlund e faapea, o se tane amiotonu “o le a saili e auauna atu; o le a ia talia le sese ma saili le faamagaloga; o le a vave ona ia tuuina atu le viia; o le a magafagafa i mea e mananao i ai tagata o le aiga; o le a ia lagona le mamafa o le tiutetauave o le tuuina atu o ‘mea e manaomia o le olaga ma le puipuiga’ mo lona aiga; o le a ia taulimaina lana avā i le faaaloalo ma le migao tele. … O le a ia faamanuiaina lona aiga” (O le Perisitua Mekisateko: Malamalama i le Aoaoga Faavae, Ola i Mataupu Faavae [2018], 23).

Mose 5:4–9, 16–26

O le a talia e le Atua a’u taulaga pe a ou ofoina atu ma le loto i ai ma le usiusitai.

Na aoaoina e Atamu ma Eva o taulaga e osi i manu o se faatusa lea o le Togiola a Keriso, ma sa la “faailoa atu mea uma i o laua atalii ma afafine” (Mose 5:12). A o e suesue i le Mose 5:4–9, 16–26, mafaufau i uiga faaalia eseese o o la atalii e toalua, o Kaino ma Apelu, e faatatau i nei taulaga. Aisea na talia ai e le Alii le taulaga a Apelu ae le o Kaino?

O a ni ituaiga taulaga ua finagalo ai le Alii mai ia te oe? O i ai se mea i le Mose 5:4–9, 16–26 ua suia le ala e te mafaufau ai i na taulaga?

Tagai foi i le Salamo 4:5; 2 Korinito 9:7; Ominae 1:26; 3 Nifae 9:19–20; Moronae 7:6–11; Mataupu Faavae ma Feagaiga 97:8; Jeffrey R. Holland, “Faauta i le Tamai Mamoe a le Atua,” Liahona, Me 2019, 44–46.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Kenese 3; Mose 4.O le a se mea e mafai ona e faia e fesoasoani ai i lou aiga ina ia malamalama atili i le Pa’ū o Atamu ma Eva? E mafai ona e kopiina ata mai le “Atamu ma Eva” (i le Tala o le Feagaiga Tuai) ma oti ese. Ona outou galulue faatasi lea e tuu ata i le faasologa a o outou talanoa i aafiaga o Atamu ma Eva. Aisea na alagatatau ai le Pa’ū i le fuafuaga o le faaolataga a le Tama Faalelagi? O le matamata i le vitio “The Fall” (ChurchofJesusChrist.org) e mafai ona fesoasoani e tali ai le fesili lea.

Mose 4:1–4.O le a se mea ua tatou aoaoina e uiga i le Atua, Iesu Keriso ma Satani mai fuaiupu nei? Aisea ua taua tele ai le faitalia i le fuafuaga a le Atua, na faapea ona manao ai Satani e faatamaia?

Mose 5:5–9.O le a le mea na poloai le Atua ia Atamu ma Eva e fai ina ia fesoasoani ia i laua e mafaufau ai i le Faaola? O le a le mea ua tuuina mai e le Atua ia i tatou e fesoasoani ina ia tatou mafaufau ai i le Faaola?

Mose 5:16–34.O le a le uiga o le tatou avea ma “leoleo o lo’u uso”? E mafai faapefea ona tatou tausia lelei le tasi ma le isi, o se aiga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Filifili le Ala Sa’o,” Tusipese a Tamaiti, .

Faaleleia o Suesuega Faaletagata Lava ia

Faaaoga fesoasoaniga mo le suesueina o tusitusiga paia. A o e suesue i tusitusiga paia, faaaoga vaefaamatalaga, Topical Guide, Bible Dictionary, Taiala i Tusitusiga Paia, ma isi fesoasoani mo suesuega ina ia maua ai nisi malamalamaaga loloto fou.

agelu o loo asiasi ia Atamu ma Eva

Similitude, saunia e Walter Rane