3–9 Ianuari

Kenese 1–2; Mose 2–3; Aperaamo 4–5

“Na Faia e le Atua le Lagi ma le Lalolagi i le Amataga”

E tusa lava pe sa e faitau muamua e uiga i le Foafoaga, ae e tele lava mea e mafai ona aoao mai i tusitusiga paia. Tatalo mo le taitaiga mai le Agaga Paia e fesoasoani ina ia e maua ai se malamalamaaga fou.

Tusifaamaumau Ou Lagona Uunaia

Ona o le lalolagi o loo siomia ai i tatou e matagofie ma mamalu, e faigata ai ona vaai faalemafaufau i le lalolagi a o “soona nunumi, ma gaogao,” “gaogao ma tuufua” (Kenese 1:2; Aperaamo 4:2). O le mea e tasi ua aoao mai e le tala o le Foafoaga ia i tatou o le, e mafai ona faia e le Atua se mea mataina mai i se mea sa le’i faatulagaina. E aogā le manatua o lena mea pe a foliga mai e gaogaosa le olaga. O le Tama Faalelagi ma Iesu Keriso o Foafoa, ma e le’i mae’a la Laua galuega fatufatuai ia i tatou. E mafai ona La’ua faasusuluina mai le malamalama i taimi pogisa o o tatou olaga. E mafai ona La’ua fausiaina ni ele’ele mausali i le totonugalemu o sami sousou o le olaga. E mafai ona La’ua faatonuina elemene, ma afai tatou te usitai ia la La’ua upu e pei ona usitaia e elemene, e mafai ona La’ua liliuina i tatou i ni foafoaga matagofie na faamoemoeina e avea ai i tatou. O se vaega lena o le uiga o le foafoaina i le faatusa o le Atua, ia pei o Ona foliga (tagai i le Kenese 1:26). Ua ia i tatou le gafatia e avea ai faapei o Ia, o ni tagata faaeaina, faamamaluina, faaselesitila.

Mo se vaaiga aoao o le tusi o Kenese, tagai i le “Genesis” i le Bible Dictionary.

Manatu mo Suesuega Faaletagata Lava Ia o Tusitusiga Paia

Kenese 1:1–25; Mose 2:1–25; Aperaamo 4:1–25

I lalo o le taitaiga a le Tama Faalelagi, na foafoaina ai e Iesu Keriso le lalolagi.

Na saunoa Elder D. Todd Christofferson, “O a lava faamatalaga auiliili o le faagasologa o le foafoaga, ua o tatou iloa e le o se mea na faafuasei ae sa faatonutonu ina e le Atua ma faatinoina e Iesu Keriso” (“Aisea e Faaipoipo Ai? Aisea e Fai ai se Aiga,” Liahona, Me 2015, 51). E ui ina tele mea tatou te le o iloa e uiga i le auala tonu na foafoaina ai le lalolagi, ia mafaufau loloto i mea ua e aoaoina e uiga i le Foafoaga mai mea ua faaalia mai e le Atua i le Kenese 1:1–25; Mose 2:1–25; ma le Aperaamo 4:1–25. O a ni mea ua e maitauina e talitutusa i nei tala? O a ni mea ua e maitauina e eseese? O ni ou lagona o i ai e uiga i le Tama Faalelagi ma Iesu Keriso a o e faitau e uiga i le Foafoaga?

Tagai foi Mataupu Faavae ma Feagaiga 101:32–34.

Foafoaga, saunia e Joan Hibbert Durtschi

Kenese 1:27–28; 2:18–25; Mose 3:18, 21–25; Aperaamo 5:14–19

O le faaipoipoga i le va o se alii ma se tamaitai ua faauuina e le Atua.

“Na faatasia Atamu ma Eva i le faaipoipoga mo le taimi nei ma le faavavau atoa e ala i le mana [o le] peristua e faavavau” (Russell M. Nelson, “Lessons from Eve,” Ensign, Nov. 1987, 87). Aisea e taua ai le iloa o lenei upumoni? Mafaufau loloto i lenei mea ao e faitau i le Kenese 1:27–28; 2:18–25; Mose 3:18, 21–25; ma le Aperaamo 5:14–19. Afai e te fia iloa atili e uiga i faaipoipoga i totonu o le fuafuaga a le Atua, faitau ma mafaufau loloto i punaoa o loo lisi atu i lalo. O a ni mea ua uunaia oe e nei punaoa e fai e faaleleia atili ai lau faaipoipoga po o le saunia ai mo le faaipoipoga i le lumanai?

Tagai foi i le Mataio 19:4–6; 1 Korinito 11:11; Linda K. Burton, “O Le A Tatou O A’e Faatasi i Luga,” Liahona, Me 2015, 29–32; “O Le Aiga: O Se Folafolaga i le Lalolagi,” ChurchofJesusChrist.org.

Kenese 2:2–3; Mose 3:2–3; Aperaamo 5:2–3

Na faamanuiaina ma faapaiaina e le Atua le Aso Sapati

Na faapaia e le Atua le aso Sapati, ma ua Ia fetalai mai ia tatou tausia lona paia. Na aoao mai Elder David A. Bednar, “O le Sapati o le taimi o le Atua, o se taimi paia ua vaetofiaina patino mo tapuaiga ia te Ia ma mo le mauaina ma le manatuaina o Ana folafolaga silisili ma taua” (“O Mea Silisili Ese ma le Taua,” Liahona, Nov. 2017, 92). E mafai faapefea ona e faaaogaina lenei faamatalaga ma le Kenese 2:2–3; Mose 3:2–3; po o le Aperaamo 5:2–3 e faamatala atu ai i se tasi le pogai ua e filifili ai e faamamalu le aso Sapati? O faapefea ona faamanuiaina oe e le Alii ona o le tausia o Lona ia paia?

Tagai foi i le Isaia 58:13–14; Mataupu Faavae ma Feagaiga 59:9–13; “The Sabbath Is a Delight” (vitio), ChurchofJesusChrist.org.

Manatu mo Suesuega Faaleaiga o Tusitusiga Paia ma Afiafi Faaleaiga

Kenese 1:1–25; Mose 2:1–25; Aperaamo 4:1–25.E mafai faapefea ona e faia le aoao e uiga i le Foafoaga ia mālie mo lou aiga? E mafai ona e ave lou aiga i se suesuega i fafo mo ituaiga o mea na foafoaina i periota eseese o le tala o le Foafoaga, e pei o fetu, laau, po o manu vaefa. Atonu foi e te faaalia atu ni ata o mea na foafoaina i periota taitasi ma valaaulia tagata o le aiga e tuu ata i le faasologa pe a uma ona faitau faatasi se tasi o tala o le Foafoaga. O le a se mea ua aoao mai e nei foafoaga ia i tatou e uiga i le Tama Faalelagi ma Iesu Keriso?

Kenese 1; Mose 2; Aperaamo 4.O se tasi o auala e taulima ai le tala o le Foafoaga, o le valaaulia lea o lou aiga e su’e i le Kenese 1 po o le Mose 2 pe faafia ona ta’u e le Atua mea sa ia faia ua “lelei.” O le a se mea o loo fautuaina mai e lenei mea i le auala e tatau ona tatou taulimaina ai foafoaga a le Atua—e aofia ai i tatou lava? O le a se mea tatou te aoaoina mai i le auala o loo faaupuina ai nei mea na tutupu i le Aperaamo 4?

Kenese 1:26–27; Mose 2:26–27; Aperaamo 4:26–27.Aisea e taua ai le iloa na foafoaina i tatou i le faatusa o le Atua? E faapefea ona aafia ai le ala tatou te manatu ai ia i tatou lava, isi, ma le Atua?

Afai e i ai sau fanau laiti, atonu e te manao e faitau faatasi le Mose 2:27 ma fai se taaloga faigofie: Faaali atu se ata o faaalia ai le Tama Faalelagi ma Iesu Keriso e pei o le ata 90 i le Tusi Ata o le Talalelei (2009), ma fai atu i tagata o le aiga e auauai e faasino atu i se itutino o le Tama Faalelagi po o Iesu Keriso. Ona tusi lea o isi tagata o le aiga i le itutino lava lena e tasi i o latou tino.

Kenese 1:28; Mose 2:28; Aperaamo 4:28.“O le poloaiga a le Atua i Lana fanau ia fanafanau ma uluuluola ai le lalolagi, ua faamalosia ma faatumauina” (“O Le Aiga: O Se Folafolaga i le Lalolagi,” ChurchofJesusChrist.org). E mafai e tagata o le aiga ona faatino faataitai pe faapefea ona faamalamalama atu o tatou talitonuga e uiga i lenei poloaiga ia i latou o e le iloa lenei upumoni po o e e ese o latou talitonuga.

Kenese 1:28; Mose 2:28; Aperaamo 4:28.O le a le uiga o le ia “pule … [i] meaola uma e fetolofi i le eleele”? (tagai foi Mataupu Faavae ma Feagaiga 59:16–21). E mafai faapefea ona faataunuu e lo tatou aiga lo tatou tiutetauave o le tausia lelei o le lalolagi?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “E Alofa Lo’u Tama Faalelagi Ia Te A’u,” Tusipese a Tamaiti, 16.

Faaleleia o Lo Tatou A’oa’o Atu

Faaaoga mau i o tatou olaga. A uma ona faitau se fuaitau o se mau, valaaulia tagata o le aiga e faaaoga i o latou olaga. Mo se faataitaiga, e faapefea ona faatatau le Mose 3:1–3 i lo tatou faamamaluina o le Sapati i vaiaso taitasi? (Tagai Aoao Atu i le Ala a le Faaola, 21.)

O le Foafoaga, saunia e Annie Henrie Nader