“Manatu e Nofouta i Ai: Faitauina o le Feagaiga Tuai,” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)

“Manatu e Nofouta i Ai: Faitauina o le Feagaiga Tuai,” Sau, Mulimuli Mai ia te A’u—Mo Tagata Taitoatasi ma Aiga: 2022

Manatu e Nofouta i Ai

Faitauina o le Feagaiga Tuai

Saili le Tāua Patino

Pe a e mafaufau i lou avanoa e su’esu’e ai le Feagaiga Tuai i lenei tausaga, o le a sou lagona? Naunau? Le mautinoa? Fefe? O na lagona uma e tatau ona i ai. O le Feagaiga Tuai o se tasi lea o tusitusiga aupito leva i le lalolagi, ma e mafai ona avea ma mea fiafia pe tau faafefe foi. O nei tusitusiga e aumaia mai aganuu anamua lea e mafai ona foliga mai e le masani i ai ma o isi taimi e ese pe le nofolelei foi i lagona. Ae peitai o nei tusitusiga, tatou te vaai ai i tagata ua i ai aafiaga e pei ona masani i ai, ma tatou te maitauina ai autu o le talalelei o loo molimau i le paia o Iesu Keriso ma Lana talalelei.

Ioe, o tagata e pei o Aperaamo, Sara, Hana, ma Tanielu na ola i ni olaga, i se isi itu, na matua ese mai i o tatou olaga. Ae sa latou oo foi i aafiaga o le olioli faaleaiga ma feeseeseaiga faaleaiga, taimi o le faatuatua ma taimi o le le mautonu, ma manuia ma toilalo—e pei ona tatou oo uma i ai. Ae o le mea sili ona taua, sa latou faaaogaina le faatuatua, salamo, osia feagaiga, ma maua ni aafiaga faaleagaga, ma sa le fiu i a latou taumafaiga e usitai i le Atua.

Afai o e tau mafaufau pe mata e mafai e oe ma lou aiga ona maua se faatauaina patino i le Feagaiga Tuai i lenei tausaga, ia manatua na maua e le aiga o Liae ma Sarai. Na faasoa atu e Nifae tala e uiga ia Mose ma aoaoga mai ia Isaia ina ua manaomia e ona uso se faamalosiauga po o se faasa’oga po o se manatu. Ina ua fai mai Nifae, “Ua fiafia lo’u agaga i tusitusiga paia” (2 Nifae 4:15), sa talanoa o ia e uiga i tusitusiga paia ia ua avea nei ma vaega o le Feagaiga Tuai.

Saili le Faaola

Afai o e tau mafaufau pe mafai e oe ma lou aiga ona latalata atili atu ia Iesu Keriso e ala lea i le suesueina o le Feagaiga Tuai, ia manatua na valaaulia e le Faaola lava Ia i tatou ina ia faia faapea. Ina ua fetalai atu o Ia i taitai o tagata Iutaia, “O tusi … o loo molimau ia te au” (Ioane 5:39), sa fetalai o Ia e uiga i tusitusiga ua tatou ta’ua o le Feagaiga Tuai. Ina ia maua le Faaola i mea e te faitauina, e tatau ona e mafaufau loloto ma le onosai ma saili le taitaiga faaleagaga. O nisi taimi o mea e faasino ia te Ia e foliga mai e tuusao tonu lava, e pei ona i ai i le folafolaga a Isaia “Aua ua fanau mai mo i tatou le tama, ua foaiina mai mo i tatou le atalii … e igoa foi o ia … O le Alii o le Filemu” (Isaia 9:6). I nisi nofoaga, e tele ina tau le iloa le faatusaina o le Faaola, e ala i faailoga ma mea e talitutusa—mo se faataitaiga, e ala i le faamatalaina o taulaga e osi i manu vaefa (tagai i le Levitiko 1:3–4) po o le tala i le faamagaloina e Iosefa o ona uso ma le faasaoina o i latou mai le oge.

Afai e te sailia le faatuatua tele atu i le Faaola ao e suesue i le Feagaiga Tuai, o le a e maua. Atonu o le a avea lea ma manulauti o au suesuega i lenei tausaga. Tatalo ina ia taialaina e le Agaga oe ina ia maua ma taulai atu i fuaitau, tala, ma valoaga o le a aumaia latalata atili ai oe ia Iesu Keriso.

tusitusiga a perofeta anamua — Perofeta o le Feagaiga Tuai, Judith Mehr

Faasaosaoina Faalelagi

Aua ne’i e manatu e tuuina mai e le Feagaiga Tuai se talafaasolopito mae’ae’a ma sa’o o le tagata soifua. E le o le mea lena na taumafai uluai tusitala ma i latou na tuufaatasia e fatu. O lo latou atugaluga tele o le aoao mai lea o se mea e uiga i le Atua—e uiga i Lana fuafuaga mo Lana fanau, e uiga i le avea ma Lona nuu o le feagaiga, ma le pe faapefea ona maua le faaolataga pe a tatou le tausia a tatou feagaiga. O nisi taimi sa latou faia ai e ala i le faamatalaina o mea na tutupu i le talafaasolopito e pei ona sa latou malamalama i ai—e aofia ai ma tala mai olaga o perofeta tautaua. O le Kenese o se faataitaiga lea o lenei mea, e pei foi o tusi o Iosua, Faamasino ma le Tupu 1 ma le 2. Ae o isi tusitala o le Feagaiga Tuai sa lei taulai atu lava e tusitusi faa-talafaasolopito. Nai lo o lena, na latou aoao atu e ala i galuega o faatufugaga e pei o solo ma tusi faitau. O le Salamo ma le Faataoto e i totonu o le vaega lenei. Ona i ai lea o upu taua a perofeta, mai le Isaia i le Malaki, o e na ta’uina atu le upu a le Atua i Isaraelu anamua—ma, e ala mai i le vavega o le Tusi Paia, o loo talanoa mai pea ia i tatou i aso nei.

Na silafia ea e nei perofeta, fatusolo ma e na tuufaatasia, o a latou upu o le a faitauina e tagata i le lalolagi atoa i le faitau afe o tausaga mulimuli ane? Tatou te le iloa. Ae tatou te maofa ona o le mea tonu lava lea ua tupu. E tulai mai atunuu ma toe pauu, na faoa aai, na soifua mai tupu ma toe maliliu, ae na tumau pea le Feagaiga Tuai nai lo i latou uma, mai lea augatupulaga i lea augatupulaga, mai lea tusiupu i lea tusiupu, mai lea faaliliuga i lea faaliliuga. E moni e i ai nisi o mea na leiloloa pe toe suia, ae peitai o le tele o mea na faasaosaoina faavavega.¹

O nai mea laiti nei ia nofouta i ai a’o e faitauina le Feagaiga Tuai i lenei tausaga. Atonu na faasaosaoina e le Atua nei tusitusiga anamua ona o loo Ia silafia oe ma le mea o loo tupu ia te oe. Atonu ua Ia saunia se savali faaleagaga mo oe i nei upu, o se mea o le a faalatalata atili atu ai oe ia te Ia ma atinae ai lou faatuatua i Lana fuafuaga ma Lona Alo Pele. Atonu o le a Ia taitaia oe i se fuaitau po se malamalamaaga manino o le a faamanuiaina ai se tasi e te iloa—o se savali e mafai ona e faasoa atu i se uo, se tagata o le aiga, po o se uso o le Au Paia. E tele lava avanoa! Pe le manaia ea lena mea e mafaufau i ai?

O tusi i le Feagaiga Tuai

I le tele o lomiga faaKerisiano o le Feagaiga Tuai, o loo ese le faatulagaina o tusi mai le faiga na faavasega ai i le taimi muamua na tuufaatasia ai i le tuufaatasiga e tasi. A o faavasega la e le Tusi Paia faaEperu ia tusi i ni vaega se tolu—o le tulafono, perofeta ma tusitusiga—o le tele o Tusi Paia faaKerisiano o loo faavasegaina ai tusi i ni vaega se fa: tulafono (Kenese–Teuterenome), talafaasolopito (Iosua–Eseta), tusi o solo (Iopu–Pese a Solomona) ma perofeta (Isaia–Malaki).

Aisea e taua ai nei vaega? Aua o le iloaina o le ituaiga o tusi o loo e suesueina e mafai ona fesoasoani e te malamalama ai i le auala e suesue ai.

O se mea lenei e te nofouta i ai a o amata ona e faitaua “o le tulafono,” po o tusi muamua e lima o le Feagaiga Tuai. O nei tusi, e faapea na tusia e Mose, atonu na ui atu i lima o le toatele o tusiupu ma tagata na tuufaatasia i le aluga o taimi. Ae, o tusi a Mose o upu musuia ia a le Atua, e ui lava ina—pei o soo se galuega a le Atua na auala mai i tagata—i ai le lē atoatoa o le tagata ola (tagai Mose 1:41; Mataupu Faavae o le Faatuatua 1:8). O upu a Moronae, e faatatau i faamaumauga paia o le Tusi a Mamona lea sa ia fesoasoani e tuufaatasia, e fesoasoani tele ii: “Afai o i ai ni sese, o sese ia o tagata; o le mea lea, aua le taʼuleagaina mea a le Atua” (itulau ulutala o le Tusi a Mamona). I se isi faaupuga, o se tusi o tusitusiga paia e le manaomia ona sao mai i mea sese a le tagata ina ia avea ai ma afioga a le Atua.