ata o fetu i le vanimonimo

27 Tesema–2 Ianuari

Mose 1; Aperaamo 3

“O La’u Galuega Ma Lo’u Mamalu Lenei”

Ao e faitauina le fetalaiga a le Atua ia Mose ma Aperaamo, mafaufau loloto po o le a Sana fetalaiga e ono fai atu foi ia te oe.

Tusifaamaumau Ou Lagona Uunai

O le Tusi Paia o loo amataina i upu nei “na faia e le Atua le lagi ma le lalolagi i le amataga” (Kenese 1:1). Ae o le a le mea na i ai muamua ao le’i i ai lenei “amataga”? Ma aisea na foafoa ai e le Atua nei mea uma? Na tauala mai i le Perofeta o Iosefa Samita, ua faamalamalama mai ai e le Alii nei fesili.

Mo se faataitaiga, sa Ia tuuina mai ia i tatou se faamaumauga o se faaaliga lea na vaai ai Aperaamo i lo tatou olaga o ni agaga “ae le’i i ai le lalolagi” (tagai Aperaamo 3:22–28). Na tuuina mai foi e le Alii ia i tatou se faaliliuga musuia po o le toe iloiloga o mataupu muamua e ono o le Kenese, ua taua o Tusi a Mose—lea e le o amataina i le “i le amataga.” Ae, o loo amataina i se aafiaga na maua e Mose lea o loo tuuina mai ai ni anotusi o tala lauiloa o le Foafoaga. Faatasi, o nei tusitusiga paia o aso e gata ai, o se vaega lelei lea e amata ai lo tatou suesueina o le Feagaiga Tuai aua o loo tautalagia ai nisi o fesili faavae e mafai ona fuafua ai la tatou faitauga: O ai le Atua? O ai i tatou? O le a le galuega a le Atua, ma o le a la tatou vaega i ia? O mataupu amata o le Kenese e mafai ona vaaia o le tali a le Alii i le talosaga a Mose: “Ia e alofa mutimutivale mai i lau auauna, E, le Atua e, ma taʼu mai ia te aʼu e uiga i le lalolagi lenei, ma e o nonofo ai, ma le lagi foi, ona malie ai lea o lau auauna” (Mose 1:36).

Learn More image

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mose 1

I le avea ai ma se atalii o le Atua, ua i ai so’u faasinomaga paia.

Na aoao mai Peresitene Dieter F. Uchtdorf, “O le tele o le fenumiai tatou te oo i ai i lenei olaga, e sau mai le le malamalama po o ai i tatou” (“O le Ataata i Totonu o le Vai” [faeasaite a le Ofisa o Aoga a le Ekaesia mo le talavou matutua, 1 Nov. 2009], ChurchofJesusChrist.org). Ua silafia e le Tama Faalelagi lenei mea, ma e faapena foi Satani. O le savali muamua a le Atua ia Mose na aofia ai upumoni “o oe lava o lo’u atalii” ma “ua tusa oe ma La’u Toatasi na Fanaua” (Mose 1:4, 6). I le faafeagai, sa ta’ua e Satani ia Mose ua na o se “atalii o le tagata” (Mose 1:12). O le a faapefea ona ese lou olaga ma au faaiuga pe afai e te manatu ifo ia te oe e pei ona manao Satani e te manatu ai, o se “atalii [po o se afafine] o le tagata”? Ua faapefea ona faamanuiaina lou olaga i lou iloaina ma manatuaina o oe o se atalii o le Atua?

O a ni fuaiupu po o ni fuaitau i le Mose 1 e tuu atu ai ia te oe se lagona o lou taua faalelagi?

O Iesu Keriso i le lotolotoi o fetu

O Keriso ma le Foafoaga, saunia e Robert T. Barrett

Mose 1:12–26

E mafai ona ou teena faatosinaga a Satani.

E pei ona faaali manino mai i le Mose 1 , o aafiaga mamana faaleagaga, e le tuusaunoa ai i tatou mai faaosoosoga. O le mea moni, o se tasi o auala a Satani, o le faaosooso lea o i tatou ia tatou masalosalo i na aafiaga po o mea na tatou aoao mai ai. Ao e faitau i le tali a Mose ia Satani i fuaiupu 12–26, o le a se mea ua e aoaoina e mafai ona fesoasoani e te tumau faamaoni ai i le molimau ua e mauaina? O le a se mea e fesoasoani ia te oe e teena ai isi faaosoosoga a Satani? (tagai, mo se faataitaiga, fuaiupu 15 ma le 18).

E faavae i mea ua e aoaoina, e mafai ona e faia ai se fuafuaga mo le tetee atu i faaosoosoga a Satani. Mo se faataitaiga, e mafai ona e faaumaina le faamatalaga lenei “Pe a faaosoosoina a’u e , o le a ou .”

Tagai foi Mataio 4:1–11; Helamana 5:12; Gary E. Stevenson, “Aua e te Faaseseina A’u,” Liahona, Nov. 2019, 93–96; “O A’u O Se Atalii o le Atua” (vitio), ChurchofJesusChrist.org.

Mose 1:27–39; Aperaamo 3

O le galuega ma le mamalu o le Atua o le fesoasoani lea ia ou maua le ola e faavavau.

Ina ua mae’a le vaaia o se faaaliga o foafoaga a le Atua, sa talosaga atu Mose i le Alii: “Se’i ta’u mai ia te a’u pe aisea ua faapea ona i ai o ia mea” (Mose 1:30). O le a se mea e faagaeetia ai oe e uiga i le tali a le Alii o loo i le Mose 1:31–39?

Na maua foi e Aperaamo se aafiaga faafaaaliga, o loo tusifaamaumauina i le Aperaamo 3. O le a se mea e te maua i fuaiupu 22–26 e mafai ona fesoasoani e tali ai le talosaga a Mose?

Mafaufau e lisi isi upumoni na aoaoina e Mose ma Aperaamo i a laua faaaliga: upumoni e uiga i le Atua, e uiga ia i la’ua lava, ma e uiga i faamoemoega o foafoaga a le Atua. E faapefea e nei upumoni ona aafia ai auala e te vaai ai ia te oe lava ma le lalolagi o loo siomia ai oe?

Tagai foi i le Dieter F. Uchtdorf, “E Taua Oe ia te Ia,” Liahona, Nov. 2011, 19–22; Gospel Topics, “Muai Olaga,” topics.ChurchofJesusChrist.org.

Aperaamo 3:22–23

Na filifilia ea isi e ese mai ia Aperaamo, “ae [latou te] le’i fanau mai”?

“I le muai olaga o agaga, sa tofia ai e le Atua ni agaga faapitoa e faataunuuina ni misiona patino i le taimi o o latou soifuaga i le olaga nei. O lenei mea ua taua o le muaifaauuina. … O le aoaoga faavae o le muaifaauuina e faatatau i tagata uma o le Ekalesia, e le na o le Faaola ma Ana perofeta” (Autu o le Talalelei, “Muaifaauuina,” topics.ChurchofJesusChrist.org).

Na faapefea ona tatou maua Tusi a Mose ma Aperaamo?

O le tusi a Mose o le vaega muamua lea o le faaliliuga musuia a Iosefa Samita o le Tusi Paia. O le tusi a Aperaamo na faaalia ia Iosefa Samita i le taimi o lana galuega i faamaumauga pa’ulaau a Aikupito. O nei tusi, ua maua nei i le Penina Tau Tele, o loo tuuina mai ai le tele o faamatalaga e uiga ia Mose, Aperaamo, ma isi perofeta ia e le o maua i le Feagaiga Tuai. Ina ia aoao atili i le ala na tatou maua ai nei tusi, tagai i le “Faaliliuga a Iosefa Samita o le Tusi Paia” (Church History Topics, ChurchofJesusChrist.org/study/history/topics) ma le “Translation and Historicity of the Book of Abraham” (Gospel Topics, topics.ChurchofJesusChrist.org).

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mose 1:2–6; Aperaamo 3:11–12.E mafai ona e valaaulia tagata o le aiga e su’e ni fuaitau i le pese “O A’u o se Atalii o le Atua” (Tusipese a Tamaiti, 2–3) e faatatau i upumoni o loo aoaoina i nei mau.

Mose 1:4, 30–39.Mata o le a fiafia lou aiga e matamata i ni isi o “galuega a lima [o le Atua]”? (fuaiupu 4). Atonu e mafai ona outou faitauina nei fuaiupu i se paka po o lalo o fetu i le po. Ona outou talanoa lea pe aisea na foafoaina ai e le Atua le lalolagi ma pe o faapefea ona tatou auai i Lana “galuega ma [Lona] mamalu” (fuaiupu 39).

Mose 1:18.O a ni fautuaga e mafai ona tatou faasoa atu e fesoasoani ai i le tasi ma le isi ia “iloa le eseesega” o le Atua ma Satani? (Tagai foi i le Moronae 7:12–18; Mataupu Faavae ma Feagaiga 50:23–24.)

Aperaamo 3:24–26.E mafai ona e tuu atu i tagata o le aiga se lu’i malie ae faigata e mafai ai ona latou faamaonia e mafai ona latou mulimuli i faatonuga, pei o le faia o se vaalele pepa po o le mulimulitai i se fua [o se kuka]. E faapefea ona talitutusa lenei gaoioiga ma le faamoemoega o lo tatou olaga faitino e pei ona faamatalaina i nei fuaiupu?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O A’u o se Atalii o le Atua,” Tusipese a Tamaiti, 2–3.

Faaleleia o Suesuega Faaletagata Lava Ia

Vaavaai mo upumoni o le talalelei. I tusitusiga paia, e i ai taimi e ta’u sa’o mai ai upumoni o le talalelei; o nisi taimi e faaātaāta mai ai e ala i se faataitaiga po o se tala. Fesili ifo ia te oe lava, “O a ni upumoni e faavavau o loo aoaoina mai i nei fuaiupu?”

O Mose o loo faatonuina Satani ia aluese

Ua Faatoilalo e Mose ia Satani, saunia e Joseph Brickey