ata o fetu i le atulaulau

27 Tesema–2 Ianuari

Mose 1; Aperaamo 3

“O La’u Galuega ma Lo’u Mamalu Lenei”

Ao e faitau i mea na fetalai atu ai le Atua ia Mose ma Aperaamo, mafaufau e uiga i mea atonu o le a fetalai atu ai o Ia i tamaiti o loo e aoaoina. E mafai faapefea ona e fesoasoani ia latou lagona Lona alofa mo i latou?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O nisi taimi e mafai e se pese ona fesoasoani i tamaiti e manatua ai mea latou te aoaoina. Ta pe hamu ni nai nota o le “O Au o se Atalii o le Atua” (Tusipese a Tamaiti, 2), ma tuu atu i tamaiti e mate le pese. Fesoasoani i tamaiti e mafaufau i auala e faia e o latou matua po o isi e “tago mai [ia i latou], savali mai [ia i latou],” ma “ina nei [o latou] sese.”

aikona o le aoao atu

Aoao atu le Aoaoga Faavae: Tamaiti Laiti

Mose 1:1–4, 6

O au o se atalii o le Atua.

O le a se mea ua e aoaoina mai le Mose 1: 1–4, 6 e uiga i le lua sootaga ma le Tama Faalelagi? E mafai faapefea ona e fesoasoani i tamaiti ia malamalama i le uiga o le avea ma se atalii o le Atua?

Gaoioiga e Mafai Ona Fai

• Faitau atu i tamaiti le fetalaiga a le Atua ia Mose: “O oe lava o loʻu atalii” (Mose 1: 4). Valaaulia se tamaitiiti e sau i luma o le vasega, ma fai atu i tamaiti e fai faatasi ma oe, “[Igoa o se tamaitiiti], o oe o se atalii o le Atua.” Toe fai le fuaitau mo tamaiti taitasi uma i le vasega.

• Faaali atu ni ata o tamaiti, ma fesili i le vasega pe o tamaiti uma nei o ni fanau a le Atua. Faamamafa atu o tagata uma o fanau a le Atua. Tuu atu tamaiti e auauai e tilotilo i le faʻata, ma molimau atu o i latou foi o fanau a le Atua.

• Usu faatasi ma tamaiti le “O Au o se Atalii o le Atua” (Tusipese a Tamaiti, 2). Tuu atu ia i latou e valivali le itulau o le gaoioiga mo lenei vaiaso, ma faaaoga e toe faamanatu ai upumoni o loo aoao mai i lenei pese.

  Iesu Keriso i luga o fetu

  Keriso ma le Foafoaga, saunia e Robert T. Barrett

Aperaamo 3:22–28

Sa ou ola faatasi ma le Tama Faalelagi ae ou te lei fanau mai.

O le iloaina e uiga i lo tatou muai olaga e mafai ona musuia ai i tatou e faia filifiliga e faavae i upumoni e faavavau. Ao e suesue i le Aperaamo 3:22–28, mafaufau pe faapefea ona e aoaoina tamaiti e uiga i lo latou faasinomaga e faavavau.

Gaoioiga e Mafai Ona Fai

• Faaaoga le “About the Old Testament” (i le Tala o le Feagaiga Tuai) e aoao ai tamaiti i lo tatou muai olaga. A maeʻa, valaaulia tamaiti e toe faamatala atu le tala ia te oe. Aisea na auina mai ai i tatou e le Tama Faalelagi iinei i le lalolagi? Fesoasoani i tamaiti ia maua se tali ao e faitau atu ia i latou le Aperaamo 3:25.

• Usu faatasi ma tamaiti se pese e uiga i le fuafuaga a le Atua mo i tatou (e pei o le “O Le a Ou Mulimuli I Le Fuafuaga a le Atua” [Tusipese a Tamaiti, 86]). Fesoasoani ia latou malamalama i upumoni e faavavau ua aoaoina i upu.

Mose 1:39

E finagalo le Tama Faalelagi ia ou toe mau faatasi ma Ia.

Ua faapefea ona faamanuiaina lou olaga i upumoni o loo i totonu o le Mose 1:39 ? O le a se mea e mafai ona e faia e fesoasoani ai i tamaiti ia latou mauaina foi na faamanuiaga?

Gaoioiga e Mafai Ona Fai

• Faasino atu i fasifuaitau “o laʻu galuega [lenei]” ma le “ola e faavavau” i le Mose 1:39, ma fesoasoani i tamaiti e toe fai ia fuaitau. Taʻu i tamaiti e uiga i le galuega o loo e faia i aso uma. Aoao i latou o le galuega a le Tama Faalelagi o le fesoasoani ia tatou maua le ola e faavavau, o lona uiga o le avea e pei o Ia ma toe mau faatasi ma Ia.

• Valaaulia se matua e sau i le vasega ma talanoa pe o a ni ona lagona pe a toe foi mai se tamaitiiti i le fale ina ua uma ona toesea mo sina taimi (mo se faataitaiga, i le aʻoga po o se misiona), pe faamatala ni ou lagona na i ai i nei aafiaga. Faaaoga lenei faataitaiga e aoao ai tamaiti i le finagalo o le Tama Faalelagi ia tatou toe foi atu ia te Ia.

aikona o le aoao atu

Aoao atu le Aoaoga Faavae: Tamaiti Matutua

Mose 1:4, 30, 37–39; Aperaamo 3:22–28

O au o se atalii o le Atua, ma e finagalo o Ia e fesoasoani mai ina ia ou toe foi atu ia te Ia.

O leMose 1:4, 37–39 ma le Aperaamo 3:22–28 o loo aoao atu ai ni upumoni taua e uiga i lo tatou sootaga ma le Atua ma Lona faamoemoega mo le auina mai o i tatou i le lalolagi. Mafaufau loloto pe o le a faapefea ona e fesoasoani i tamaiti ia iloa nei upumoni.

Gaoioiga e Mafai Ona Fai

• Faitau faatasi ma tamaiti le Mose 1:4, 37–39 ma le Aperaamo 3:24–25. Tuu atu ia i latou ni avanoa e fai ai fesili ma faasoa mai ni upu po o ni fuaitau e fiafia i ai mai nei fuaiupu. O a ni mea ua tatou aoao mai nei fuaiupu e uiga i le Tama Faalelagi? e uiga ia i tatou lava?

• Faaali i tamaiti ni ata o nisi o foafoaga e tele a le Tama Faalelagi. Faitau le Mose 1:30, ma faamatala atu sa fesili Mose i le Atua e uiga i le faamoemoega o nei foafoaga. Fesoasoani i tamaiti e saili i totonu o le fuaiupu 39 mo le tali a le Atua. Molimau atu o le faamoemoe o le Atua, ia fesoasoani i tamaiti taitoatasi ina ia maua le ola e faavavau.

• Fesoasoani i tamaiti e mafaufau i tulaga latou te filifili ai pe tatau pe leai ona latou “faia mea uma o soo se mea e poloaiina ai i latou e le Alii lo latou Atua” (Aperaamo 3:25). Tuu latou e faataitai pe talanoaina ni tali talafeagai i na tulaga. E mafai faapefea e le Faaola ona fesoasoani ia i tatou pe a tatou faia se filifiliga sese?

Mose 1:12–26

E mafai ona ou tetee atu i faaosoosoga a Satani.

Ao e suesue i le Mose 1:12–26, vaavaai mo mea na faia e Mose e tetee ai Satani. E mafai faapefea e le faataitaiga a Mose ona fesoasoani i tamaiti pe a latou feagai ma faaosoosoga?

Gaoioiga e Mafai Ona Fai

• Aotele le aafiaga o Mose o loo i le Mose 1:12–26 i au oe lava upu, pe fai atu i se tasi o tamaiti e faia (tagai foi i le vitio “I Am a Son of God” [ChurchofJesusChrist.org]). Valaaulia tamaiti e suesue fuaiupu nei e iloa ai pe na mafai faapefea e Mose ona faatoilaloina Satani. (Afai latou te manaomia le fesoasoani, faasino atu i latou i fuaiupu 13, 15, 18, 20–22, 26.)

• Aumai se atigipusa o mea faigaluega (po o ata o mea faigaluega), ma faaigoa mea taitasi i se auala e mafai ai ona tatou tetee atu i faaosoosoga (e pei o le tatalo, usuina o se viiga, faitau o tusitusiga paia, pe auauna atu i isi). Tuu atu i tamaiti uma e filifili se mea faigaluega ma talanoa e uiga i se tulaga pe a fai o le gaoioiga o loo tusia i luga o le mea faigaluega e mafai ona fesoasoani ia i tatou e tetee atu ai i faaosoosoga. Faitau faatasi fuaiupu 25–26, ma molimau atu o le a fesoasoani le Atua ia i tatou pe a tatou feagai ma faaosoosoga.

Aperaamo 3:22–28

Sa ou ola faatasi ma le Tama Faalelagi ae ou te lei fanau mai.

O nei fuaiupu o loo faamatala mai ai le faaaliga a Aperaamo e uiga i lo tatou muai olaga, e mafai ona fesoasoani i tamaiti e tali ai fesili “O fea na ou sau ai?” ma le “Aisea ua ou i ai iinei?” E mafai faapefea ona e fesoasoani ia i latou ia maua tali?

Gaoioiga e Mafai Ona Fai

• I luga o le laupapa, tusi ni fesili e faatatau i le Aperaamo 3:22–28, e pei o le O le a le mea na tupu i o tatou olaga aʻo leʻi fanau mai? O ai sa i ai iina? Aisea na faia ai le lalolagi? Valaaulia tamaiti e faitau nei fuaiupu e sue ai tali.

• Afai o i ai se pepe fou i le uarota, valaaulia matua e aumai o ia i le vasega ma faasoa o latou lagona e uiga i le taliaina o lenei tamaititi i le lalolagi. (E mafai foi ona e faaalia se ata o se pepe fou.) Talanoa ma tamaiti po o fea le mea na i ai le agaga o lenei pepe aʻo leʻi sau o ia i le lalolagi. Aisea e taua ai i lenei pepe ona iloa o ia o se atalii o le Atua?

• Usu ni pese e uiga i le fuafuaga a le Atua mo i tatou, pei o “Ua Ou Iloa o Soifua Lo‘u Tama” po o le “O Le a Ou Mulimuli I Le Fuafuaga a le Atua” (Tusipese a Tamaiti, 8, 86). Fai i tamaiti e tusi ni ata e o faatasi ma upu. Tuu atu ia i latou e faaaoga a latou ata e aoao ai e le tasi le isi i upumoni mai pese.

aikona o le aoaoina

Uunaia le Aoaoina i le Aiga

Mafaufau i ni auala e mafai ai e le aoaoga na tupu i lau vasega Peraimeri ona faamalosiau, lagolagoina, pe faamalosia le aoaoina o loo tupu i fale o tamaiti. Mo se faataitaiga, e mafai ona e valaaulia tamaiti e faasoa atu le itulau o le gaoioiga i lenei vaiaso ma o latou aiga.

Faaleleia o Lo Tatou Aoao Atu

E tele auala e aoao ai tamaiti. E fiafia lava tamaiti e aoao e ala i aafiaga fou eseese. Faaaoga gaoioiga e fesoasoani latou te feoai ai, faaaoga uma o latou sane, ma faataitai ni mea fou. (Tagai i le Aoao Atu i le Ala o le Faaola, 25–26.)

activity page: I am a child of God