O Atamu ma Eva i fafo o le Faatoaga o Etena

Better then Paradise [Sili Atu nai lo le Parataiso], saunia e Kendal Ray Johnson

17–23 Ianuari

Kenese 5; Mose 6

“Ia Aoao Saoloto Atu Nei Mea i Lau Fanau”

O au sauniuniga e aoao atu e amata ao e suesue i le Kenese 5 ma le Mose 6. A o e faia lea mea, faalogo mo musumusuga mai le Agaga Paia e uiga i mea e tatau ona aoaoina e tamaiti.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

I luga o ni fasi pepa, tusi ai ni upu autu lea e mafai ona fesoasoani i tamaiti ia manatua ai se mea sa latou aoaoina i le fale i lenei vaiaso po o i se lesona Peraimeri ua te’a. Tuu atu i tamaiti e auauai e filifili soo se upu. A uma ona filifili se upu, fai atu i soo se tamaitiiti e faasoa mai se mea na latou aoaoina e uiga i lena upu.

aikona o le aoao atu

Aoao atu le Aoaoga Faavae: Tamaiti Laiti

Mose 6:27, 31–34

E mafai ona fesoasoani mai le Atua ia te a’u e fai mea faigata.

Ina ua valaauina Enoka e talai atu le talalelei, sa popole o ia ina ne’i ona toilalo. Peitai sa fesoasoani le Atua ia te ia e faia ni mea maoae.

Gaoioiga e Mafai Ona Fai

• Fai atu i tamaiti e faasoa mai se taimi na talosagaina ai i latou e faia se mea sa faigata pe na taufaafefe mo i latou. Faasoa atu le tala o le valaauina o Enoka e avea ma se perofeta, o loo maua i le Mose 6:27, 31–34 (tagai foi i le “Enoka le Perofeta,” i Tala o le Feagaiga Tuai). Faamamafa atu, e ui sa le’i lagona e Enoka le saunia e avea ma se perofeta, ae sa folafola atu le Atua o le a fesoasoani ia te ia. Fesoasoani i tamaiti ia malamalama i nisi o auala e fesoasoani ai le Atua ia i tatou pe a faatonuina i tatou e faia ni mea faigata.

• Faasoa atu ni faataitaiga faatusipaia o ni taimi na fesoasoani ai le Atua i tagata e faia ni mea faigata—mo se faataitaiga, Noa na fauina le vaa, Tavita na tau ma Koliata, Amona na puipuia le lafu a le tupu, po o Samuelu le sa Lamana o loo talai atu. (Mo ata ma mau faasino, tagai Tusi Ata o le Talalelei, nu. 7, 19, 78, 81.) Faasoa atu se aafiaga o se taimi na fesoasoani ai le Alii ia te oe e fai se mea faigata.

Mose 6:52

Ua aoaoina au e le talalelei i le auala e toe foi atu ai i le Tama Faalelagi.

Na aoaoina Atamu e le Atua i mea e tatau ona tatou faia e toe foi atu ai ia te Ia—ia faatuatua, salamo, papatiso, ma maua le meaalofa o le Agaga Paia. E mafai faapefea ona e fesoasoani i tamaiti ia aoao atili e uiga i nei mea?

Gaoioiga e Mafai Ona Fai

• Sue pe tusi ni ata e fai ma sui o le faatuatua, salamo, papatisoga, ma le meaalofa o le Agaga Paia (tagai i le itulau o le gaoioiga mo lenei vaiaso). Tuu ata i se laina ia tau atu i se ata o Iesu Keriso. Faitau le Mose 6:52 i tamaiti, ma fai atu ia i latou e tutu i autafa o le ata sa‘o pe a latou faalogo i upu o loo faaalia i le ata (i lenei fuaiupu, o le upu “talitonu” o loo faaaogaina mo le “faatuatua”).

• Usu ni pese o aoao ai mataupu faavae o loo i le Mose 6:52, e pei o le “Faatuatua,” “Fesoasoani Mai Ia Te A‘u Tama Pele” (fuaiupu 2) “Pe A Ou Papatiso,” ma le “O Le Agaga Paia” (Tusipese a Tamaiti, 52, 53, 56). Fesoasoani i tamaiti ia malamalama o le faia o mea o loo aoaoina mai i pese o le a fesoasoani ia i tatou e toe foi atu ai i le Tama Faalelagi.

Mose 6:58

E finagalo le Tama Faalelagi i matua e aoao a latou fanau.

Mai le taimi o Atamu ma Eva, na poloaiina matua e aoao a latou fanau i le talalelei. E faapefea ona e faamalosia tamaiti ina ia faalogo ma mulimuli i aoaoga amiotonu a o latou matua?

Gaoioiga e Mafai Ona Fai

• Faitau atu le Mose 6:58 i tamaiti, ma faaali atu le ata o Atamu ma Eva o loo i totonu o le otootoga o lenei vaiaso i le Sau, Mulimuli Mai ia te A‘u—Mo Tagata Taitoatasi ma Aiga. Fesoasoani i tamaiti e toe fai le fuaitau “aoao saoloto atu nei mea i lau fanau.” Faamatala atu e finagalo le Atua i matua uma e mulimuli ia Atamu ma Eva i le aoaoina o a latou fanau e uiga ia Iesu Keriso ma Lana talalelei. Fesili i tamaiti po o le a se mea latou te faia pe a aoao atu e o latou matua po o isi ia i latou le talalelei.

• Fesoasoani i tamaiti e faafetaui ata o i latou i o latou matua po o ni ata o tamai manu i manu matutua. E faapefea ona fesoasoani matua i a latou fanau? O a mea latou te aoao atu ia i latou? Fai i tamaiti e tusi ni ata o o latou aiga i taimi e aoao ai e matua ia tamaiti, e pei o le faitauina faatasi o tusitusiga paia, tatalo faatasi, pe aai faatasi.

  o le aiga o loo suesue i tusitusiga paia

  E tatau i matua ona aoao atu le talalelei ia latou fanau.

aikona o le aoao atu

Aoao atu le Aoaoga Faavae: Tamaiti Matutua

Mose 6:26–34

E mafai e le Tama Faalelagi ona fesoasoani ia te au e fai mea faigata.

E ui lava ina sa lagona e Enoka lona le atoatoa, ae na fesoasoani le Atua ia te ia e faataunuu Lona valaauina o se perofeta. E mafai foi e le Atua ona fesoasoani i tamaiti o loo e aoaoina e faia mea faigata.

Gaoioiga e Mafai Ona Fai

• Faitau faatasi ma tamaiti le Mose 6:26–34 . Aisea na lagona ai e Enoka e le mafai ona ia folafolaina atu le talalelei? (tagai Mose 6:31). Na faapefea ona fesoasoani le Atua ia Enoka? (tagai Mose 6:32–34; 7:13).

• Valaaulia tamaiti e taʻu mai ni mea faigata e fai i nisi taimi e tamaiti o le latou tupulaga (e pei o le faaumaina o se meaaoga mo le aʻoga, agalelei i se tasi e agaleaga, pe taʻu le mea saʻo pe a latou faia se mea sese). Fesoasoani i tamaiti e saili fuaitau i totonu o le Mose 6:32–34 e mafai ona fesoasoani ia i latou. Fai i tamaiti e faamatala se taimi na fesoasoani ai le Atua ia i latou e faia se mea faigata. Ia faasoa atu foi au oe lava aafiaga.

Mose 6:50–62

O le faatuatua, salamo, papatisoga, ma le mauaina o le Agaga Paia e saunia ai aʻu e toe foi atu i le Atua.

Sa aoao e Atamu ma Enoka o la tagata i muai mataupu faavae ma sauniga o le talalelei: o le faatuatua, salamo, papatisoga, ma le mauaina o le meaalofa o le Agaga Paia (tagai foi Mataupu Faavae o le Faatuatua 1:4). O le a se mea e mafai ona e faia e fesoasoani ai i tamaiti ia malamalama i le taua o nei mataupu faavae ma sauniga i o latou olaga?

Gaoioiga e Mafai Ona Fai

• Fai atu i nisi o tamaiti e faitau le Mose 6:52, 57 e maua ai mataupu faavae ma sauniga o le talalelei o loo taʻua i le mataupu faavae o le faatuatua lona fa.

• Tusi le mataupu faavae o le faatuatua lona fa i luga o le laupapa, ma valaaulia tamaiti e faitau i ai. Ona tapē lea o se upu e tasi pe lua, ma fai i ai e toe faitau, ma faatumu upu o loo misi mai o latou manatuaga. Toe fai le faiga lea seia aoaoina e tamaiti le mataupu faavae o le faatuatua.

• Valaaulia tamaiti e tusi se tautalaga puupuu e faatatau i le faatuatua, salamo, papatisoga, po o le mauaina o le meaalofa o le Agaga Paia—o se mea e mafai ona latou faasoa atu i o latou aiga. O lauga uma e mafai ona aofia ai se mau, se aafiaga, ma se molimau. O le lauga e mafai foi ona faamatalaina ai le auala e fesoasoani ai le mataupu faavae ia tatou toe foi atu i le Tama Faalelagi.

Mose 6:57–58

O matua e nafa ma le aoaoina o a latou fanau.

E faatuatuaina e le Atua matua e avea ma faiaoga muamua o le talalelei i o latou aiga. E faapefea ona e faamalosia tamaiti e lagolago o latou matua i lenei matafaioi?

Gaoioiga e Mafai Ona Fai

• Fai i se tamaitiiti e faitau le Mose 6:58. O le a le poloaiga na tuuina atu e le Tama Faalelagi i matua i lenei fuaiupu? Faaali atu se ata o Atamu ma Eva o loo aoao le la fanau (tagai otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga), ma tuu atu i tamaiti e talanoaina mea o latou vaaia i le ata. Uunaia i latou e talanoa e uiga i mea taua o le talalelei ua latou aoaoina mai o latou aiga.

• Fesoasoani i tamaiti e tusi ni a latou tusi faafetai i o latou matua pe fuafua nisi auala faigofie e faaali ai lo latou agaga faafetai mo o latou matua. Usu se pese e faatatau i aiga, e pei o le “O Loo Tautalagia Iinei Le Alofa” (Tusipese a Tamaiti, 102). E mafai faapefea ona tatou fesoasoani i o tatou matua e faatupu se siosiomaga alofa i totonu o tatou aiga?

aikona o le aoaoina

Uunaia le Aoaoina i le Aiga

E mafai faapefea ona e fesoasoani i tamaiti ia faaauau le aoaoina i fafo atu o le vasega? E mafai ona e fautuaina i latou e manatua le tala ia Enoka pe a latou feagai ma se mea faigata i lenei vaiaso.

Faaleleia o Lo Tatou Aoao Atu

Faaaoga itulau o gaoioiga. A o valivali e tamaiti itulau o gaoioiga, iloilo mataupu faavae mai le lesona. Faitau atu upu o loo i le itulau i tamaiti pe a manaomia.

itulau o gaoioiga: ua aoao mai e le talalelei ia te aʻu le auala e toe foi atu ai i le Tama Faalelagi