Atamu ma Eva, saunia e Douglas M. Fryer

10–16 Ianuari

Kenese 3--4; Mose 4--5

O Le Pa’ū o Atamu ma Eva

Mafaufau i tamaiti o loo e aoaoina ao e suesueina le Kenese 3--4 ma le Mose 4--5. Ia gauai atu i musumusuga ma uunaiga e te maua; e mafai ona taitai atu i ni manatu fou mo aoaoga.

Tusi Faamaumau Ou Lagona Uunai

Valaaulia le Fefaasoaai

Faaali atu se ata o Atamu ma Eva (tagai otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga), ma fai atu i tamaiti e tutulai ma faasoa mai se mea latou te vaaia i le ata pe latou te manatua e uiga i le tala.

Aoao atu le Aoaoga Faavae: Tamaiti Laiti

Kenese 3; Mose 4

Na mulimuli Atamu ma Eva i le fuafuaga a le Tama Faalelagi.

Fesoasoani i tamaiti ia malamalama i le mea na tupu i le Faatoaga o Etena ma pe na faapefea ona fesoasoani e faataunuu le ata o le faaolataga a le Atua. O a faamanuiaga tatou te maua ona o filifiliga na fai ae Atamu ma Eva?

Gaoioiga e Mafai Ona Fai

• Ina ia aotele le tala o le Pa’ū o Atamu ma Eva, faaaoga “Atamu ma Eva” (i Tala o le Feagaiga Tuai). Fesoasoani i tamaiti ia malamalama o le filifiliga a Atamu ma Eva e aai i le fua o le laau o se vaega o le fuafuaga a le Tama Faalelagi.

• Tuu atu i tamaiti taitoatasi se ata e faatusa i se mea mai le tala ia Atamu ma Eva (e pei o se laau, o se gata, o se togalaau, po o Iesu Keriso). Fai atu ia i latou e uu i luga a latou ata i le taimi sa’o ao e faamatalaina le tala ma faitau fuaitau mai le Mose 4. E mafai ona fesoasoani le itulau o gaoioiga mo lenei vaiaso.

  

  Tuua o Etena, saunia e Annie Henrie Nader

Mose 4:1-4

E mafai ona ou filifilia le mea sa’o.

I le Mose 4:3, tatou te aoao ai na “saili [Satani] e faaumatia le faitalia a le tagata, lea na tuu atu e A’u, o le Alii le Atua ia te ia.” E faapefea ona e fesoasoani i tamaiti e maua le loto faafetai mo le faitalia e filifili ai i le lelei ma le leaga?

Gaoioiga e Mafai Ona Fai

• Talanoa atu i tamaiti e uiga i nisi o filifiliga na e faia i le asō, ma fesoasoani ia i latou e mafaufau i filifiliga ua latou faia. Faitau atu ia i latou mai le Mose 4:3: “Le faitalia a le tagata, lea na tuu atu e A’u, o le Alii le Atua ia te ia.” Ia faamalamalama atu ua aoao mai le fuaiupu lenei, ua tuuina mai e le Atua ia i tatou le faitalia e fai ai filifiliga. Faaali atu lou loto faafetai ona ua mafai ona e filifilia le mea sa’o, ma molimau atu e mafai foi e tamaiti ona filifili e fai le mea sa’o.

• Faasoa atu ni nai faataitaiga faigofie o se tamaitiiti o loo faia se filifiliga sa’o po o se filifiliga sese, ma fesili atu i tamaiti e faailoa mai po o sa’o pe sese le filifiliga (atonu latou te tutu i luga, uu i luga ni faailoga, pe sii i luga o latou lima). Faasoa atu lau molimau o le a fesoasoani le Tama Faalelagi ia i tatou e filifili le mea sa’o, ma valaaulia tamaiti e faasoa mai foi o latou lagona.

• Fesoasoani i tamaiti e mafaufau i filifiliga sa’o e mafai ona latou faia e mulimuli ai ia Iesu Keriso. Usu faatasi se pese e faatatau i le faiga o filifiliga sa’o, e pei o le “Filifili Le Ala Sa’o” (Tusipese a Tamaiti,82). Taʻu atu i tamaiti e uiga i se taimi na e faia ai se filifiliga sa’o, ma talanoa pe na faapeī ou lagona ona o lau filifiliga.

Mose 5:4, 8

E mafai ona ou tatalo i le Tama Faalelagi.

O a mea e manaomia ona iloa e tamaiti o loo e aoaoina e uiga i le tatalo? O a ni mea na e maua i nei fuaiupu e mafai ona fesoasoani ia i latou?

Gaoioiga e Mafai Ona Fai

• Faitau le Mose 5:4 i tamaiti. Fesoasoani ia i latou ia malamalama ina ua tuua e Atamu ma Eva le Faatoaga o Etena, na le mafai ona la toe mafuta ma le Tama Faalelagi, ae na mafai ona la tatalo atu ia te Ia. Faamatala atu tatou te tatalo i le Tama Faalelagi i le suafa o Lona Alo, o Iesu Keriso (tagai Mose 5:8). O a ni mea e mafai ona tatou fai atu ai i le Tama Faalelagi i a tatou tatalo?

• Fai i tamaiti e faaali atu ia te oe taga o mea latou te faia pe a latou tatalo. E mafai foi ona e faaalia se ata o se tasi o loo tatalo (tagai Tusi Ata o le Talalelei, nu. 111–12) e aoao ai tamaiti o le punonou o o tatou ulu, piilima, ma le moeiini o o tatou mata e fesoasoani ia i tatou ia migao pe a tatou tatalo.

• Ia faasoa atu se aafiaga patino i le tatalo po o lau molimau i le tatalo. Usu faatasi se pese e faatatau i le tatalo, e pei o le “O Le Tatalo A Le Tamaitiiti” (Tusipese a Tamaiti, 6--7).

Aoao atu le Aoaoga Faavae: Tamaiti Matutua

Kenese 3; Mose 4; 5:10–11

O le Pa’ū o Atamu ma Eva sa o se vaega o le fuafuaga a le Atua.

Pe ana nonofo pea Atamu ma Eva i le Faatoaga o Etena, o le a le maua se la fanau ma o le a leai so la alualu i luma e avea ia pei o le Tama Faalelagi. Tatou te faafetai mo le la filifiliga e aai i le fua, aua o lenei filifiliga ua mafai ai ona tatou maua se olaga faitino ma le avanoa mo le ola e faavavau.

Gaoioiga e Mafai Ona Fai

• Valaaulia tamaiti e galulue faatasi e faamatala le tala o Le Pa’ū o Atamu ma Eva i a latou lava upu. Faasoa atu fuaiupu mai le Kenese 3 e fesoasoani ai ia i latou.

• Fesoasoani i tamaiti e saili i totonu o le Mose 4:22–25, 29; 5:10–11 mo taunuuga o le aai o Atamu ma Eva i le fua o le laau (tagai foi 2 Nifae 2:19–25). Aisea e avea ai le la filifiliga o se faamanuiaga ia i tatou? Na faapefea ona fesoasoani le Faaola ia i tatou e faatoilalo le agasala ma le oti?

Mose 4:1-4

O loo ia te au le mana e filifili ai.

O iloa e tamaiti o loo e aoaoina o se meaalofa taua le mafai ona filifili i le va o le saʻo ma le sese? E mafai faapefea e le tala ia Atamu ma Eva ona fesoasoani ia i latou ia talisapaia lenei meaalofa?

Gaoioiga e Mafai Ona Fai

• Mafaufau i se lesona faatino faigofie e pei o lenei e faailoa ai le taua o le faia o a tatou lava filifiliga: Valaaulia tamaiti e valivali le itulau o le gaoioiga mo lenei vaiaso, ae tuu i ai na o le tasi le lanu e faaaoga. Aisea e sili ai le i ai o filifiliga i lenei tulaga? Faitau faatasi le Mose 4:1–4 e talanoa ai le mafuaaga e taua ai filifiliga i le fuafuaga a le Atua.

• Valaaulia tamaiti e fetufaai mai se mea na latou oo i ai ina ua latou filifili i le va o le saʻo ma le sese. Tuu atu ia i latou e talanoaina taunuuga o filifiliga taitasi.

Mose 5:4–15

Ona o Iesu Keriso, ua mafai ai ona ou salamo ma toe nonofo faatasi ma le Atua.

Na auina mai e le Tama Faalelagi Iesu Keriso e laveai i tatou mai taunuuga o le Pa’ū. E ala i Lana taulaga togiola, na mafai ai ona faia e Iesu ina ia tatou toetutu mai pe a tatou oti ma faamagaloina i a tatou agasala pe a tatou salamo.

Gaoioiga e Mafai Ona Fai

• Tusi autu e lua i luga o le laupapa: Ona o Atamu ma Eva ma le Ona o Iesu Keriso. Fesoasoani i tamaiti e faailoa taunuuga o le Pa’ū a o tou faitauina faatasi le Mose 4:25; 6:48; Roma 5:12; 2 Nifae 2:22–23. Tuu i latou e tusi mea latou te aoaoina i lalo o le ulutala muamua. Ona fesoasoani lea ia i latou e faailoa mai pe na faapefea ona manumalo Iesu Keriso i le agasala ma le oti a o tou faitauina faatasi le Mose 5:8–11, 14–15; 6:59; Alema 11:42. Tuu i latou e tusi mea latou te aoaoina i lalo o le ulutala lona lua. Aisea tatou te faafetai ai mo Iesu Keriso?

• Faaali se vitio e uiga i le Togiola a le Faaola, e pei o le “Because of Him” (ChurchofJesusChrist.org). Valaaulia tamaiti e faasoa atu o latou lagona e uiga ia Iesu Keriso.

• I ni nai aso o muamua atu, fai i ni tamaiti e filifili se mau po o se pese e uiga i le Togiola a le Faaola e fetufaai atu i le vasega. Uunaia i latou e talanoa pe aisea latou te fiafia i ai. Usu faatasi se pese e tasi pe sili atu.

Uunaia le Aoaoina i le Aiga

Valaaulia tamaiti e faasoa atu le itulau o le gaoioiga o lenei vaiaso ma o latou aiga ma talanoa e uiga i faamanuiaga ua tatou maua ona o le Pa’ū o Atamu ma Eva.

Faaleleia o Lo Tatou Aoao Atu

Sailia au lava musumusuga. Aua nei vaai atu i nei otootoga o lesona e faapea o ni faatonuga e tatau lava ona e mulimuli ai a o e aoao atu. Nai lo lena, ia faʻaaogaina e avea o se punavai o manatu e faaosofia ai au lava musumusuga aʻo e mafaufau loloto i manaoga o tamaiti o loo e aoaoina. (Tagai Aoao Atu i le Ala a le Faaola,7.)