ata o le lalolagi ma le masina

3–9 Ianuari

Kenese 1–2; Mose 2–3; Aperaamo 4–5

“Na Faia e le Atua le Lagi ma le Lalolagi i le Amataga”

Ao e suesue i le Kenese 1–2, Mose 2–3, ma le Aperaamo 4–5, mafaufau i tamaiti o loo e aoaoina, ma mafaufau loloto po o a upumoni e mafai ona e fesoasoani ai ia i latou e malamalama ai mai nei mataupu.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tamaiti e faasoa mai se mea na faia e le Tama Faalelagi ma Iesu Keriso latou te loto faafetai ai. E mafai ona maua ni o latou manatu e ala i le faaali atu i ai o ata mai le otootoga mo lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga .

aikona o le aoao atu

Aoao atu le Aoaoga Faavae: Tamaiti Laiti

Mose 2

O Iesu na foafoaina le lalolagi.

O le iloa e uiga i le Foafoaga e mafai ona fesoasoani i tamaiti ia lagona ai le alofa o le Atua ma faateleina ai lo latou talisapaia mo le lalolagi. E mafai faapefea ona e faia le aoao e uiga i le Foafoaga ma se vaega musuia?

Gaoioiga e Mafai Ona Fai

• Faaali i tamaiti ata o mea e faatusa i vaega eseese o le Foafoaga (e pei ona faamatalaina i le Mose 2; tagai foi “Jesus Christ Creates the Earth,” i Tala o le Feagaiga Tuai), ma fesoasoani i tamaiti e mafaufau i taga e ogatasi ma ata. Mo se faataitaiga, e mafai ona fai se moto e faailoa ai eleele matutu pe talotalo o latou lima e pei o peau o le vai (tagai Mose 2:9–10). Faasoa atu lau molimau, na faia e Iesu Keriso nei mea aua e alofa o Ia ma le Tama Faalelagi ia i tatou.

• Usu faatasi se pese e faatatau i mea uma na foafoaina e Iesu Keriso mo i tatou, e pei o le “E Matagofie le Lalolagi” (Tusipese a Tamaiti, 123). Fai atu i tamaiti e tusi ni ata o foafoaga o loo faamatalaina i le pese.

  ie soʻoso’o o loo faaalia ai vaega eseese o le foafoaga

  Foafoaga, saunia e Joan Hibbert Durtschi

Mose 2:26–27

Na foafoaina a’u i le faatusa o le Atua.

A malamalama tamaiti o i latou na faia i le faatusa o le Atua, o le a latou atiaʻeina se lagona migao ma le faaaloalo mo o latou lava tino ma tino o isi.

Gaoioiga e Mafai Ona Fai

• Fesoasoani i tamaiti e toe fai le “o Aʼu, o le Atua, na foafoaina le tagata i loʼu lava faatusa” mo ni nai taimi (Mose 2:27). Faamatala atu na faia e le Tama Faalelagi o tatou tino ina ia foliga i Lona tino. Valaaulia tamaiti e faasino i vaega o o latou tino ao e tauina o latou igoa, pe usu se pese e faatatau i o tatou tino, e pei o le “Ulu, Tauau, Tuli, ma Tamaivae” (Tusipese a Tamaiti,129a).

• Valaaulia ia tamaiti e faatino mea e mafai ona latou faia i o latou tino, a o mate mai e isi tamaiti le mea o loo latou faia. Valaaulia ia tamaiti e faasoa mai pe aisea latou te faafetai ai mo o latou tino.

• Tusi se auivi o se tino i se pepa, ma fai se paso e ala i le otiina i ni vaega. Tufa atu ia vaega, ma tuu atu i tamaiti e galulue faatasi e tuufaatasi vaega ina ia faatulaga ai se tino. Fai atu i tamaiti e faasoa mai ni mea e mafai ona latou faia i vaega taitasi. Faasoa atu lau molimau, o o tatou tino na faia i le faatusa o le Atua.

Mose 3:2–3

O le aso Sapati e paia.

O fanau o e atiina ae se mausa o le tausia o le aso Sapati ia paia a o latou laiti, o le a sili atu ona tausia lenei poloaiga pe a oo ina pisi le olaga ma sili atu ona faigata.

Gaoioiga e Mafai Ona Fai

• Faitau le Mose 3:2–3, ma fai atu i tamaiti e faalogo mo mea na faia e le Atua i le aso lona fitu. Aumai ata (pe fai ni ata tusi faigofie) o mea tatou te faia i le Aso Sa e fai ai o se aso paia faapea ma mea tatou te faia i isi aso. Tuu atu i tamaiti e faavasega ia ata i ni faaputuga se lua, e tasi mo le Aso Sa ma le tasi mo isi aso. Molimau atu i le pogai e taua ai le tausia o le paia o le aso Sapati.

• I ni nai aso a o lei faia le vasega, valaaulia se tasi o tamaiti ma ona matua e o mai saunia e faasoa mai ni mea latou te faia i o latou aiga e tausia ai le paia o le aso Sapati. Valaaulia isi tamaiti e faasoa mai mea e fai e o latou aiga.

aikona o le aoao atu

Aoao atu le Aoaoga Faavae: Tamaiti Matutua

Mose 2

Na foafoaina e Iesu Keriso le lalolagi i lalo o le taitaiga a le Tama Faalelagi.

E mafai ona e faaaogaina le Mose 2 e fesoasoani i tamaiti ia iloa na foafoaina ma le iloa le lalolagi o se vaega o le fuafuaga a le Atua. Ao e faitau i nei mataupu, o a ni manatu e oʻo mai i lou mafaufau e mafai ai ona fesoasoani e faamalosia molimau a tamaiti e uiga i le Foafoaga?

Gaoioiga e Mafai Ona Fai

• Fesoasoani i tamaiti e mafaufau i taimi na latou faia ai se mea e ala i le mulimuli i faatonuga a se isi tagata. Mo se faataitaiga, atonu na latou faia se kuka ao mulimulitai i le fua faatasi ma se tasi o matua po o se tei e taialaina i latou. Tusi O ai na foafoaina le lalolagi? i luga o le laupapa, ma valaaulia tamaiti e sue le tali i totonu o le Mose 2:1. Na foafoaina e Iesu Keriso le lalolagi i lalo o le taitaiga a le Tama Faalelagi.

• Tuu atu i tamaiti taitasi se fuaiupu mai i le Mose 2 e faatatau i se tasi o aso o le foafoaga, ma fai i ai e tusi se ata o mea na foafoaina e le Tama Faalelagi ma Iesu i lena aso. Fai atu i tamaiti e uu a latou ata ma tutu i le faatulagaga o aso o le Foafoaga, ona valaaulia lea o tamaiti taitasi e aoao atu i isi tamaiti o le vasega mea na tutupu i le aso na tofia ai i latou. O le a se mea e mafai ona tatou aoao e uiga i le Tama Faalelagi ma Iesu Keriso mai le tala o le Foafoaga?

Mose 2:26–27

Na faia Atamu ma Eva i le faatusa o le Atua.

O le a tuuina atu e le lalolagi i fanau le tele o ni savali sese e uiga i o latou tino. O le aoaoga faavae o loo i le Mose 2:26–27 o se uunaiga mamana lea mo le faaaloalo ma le tausiga mo o tatou tino.

Gaoioiga e Mafai Ona Fai

• Faitau faatasi le Mose 2:26–27. O a mea ua aoao mai e nei fuaiupu e uiga i o tatou tino? Faaali le vitio “God’s Greatest Creation” (ChurchofJesusChrist.org), pe fai le taaloga “O Lou Tino O se Malumalu” (Uo, Aok. 2019, 24–25). E mafai foi ona tou faitauina faatasi upusii talafeagai mai le savali a Peresitene Russell M. Nelson “O Lou Tino: O se Meaalofa Maoa’e e Faapelepele” (Liahona, Aok. 2019, 2–7) lea o le a fesoasoani i tamaiti ia lagona le loto faafetai i le Tama Faalelagi mo o latou tino.

• Tusi se ata o se tino i luga o le laupapa, ma valaaulia tamaiti e filifili se vaega o le tino ma tusi i autafa pe aisea latou te faafetai ai mo lena mea. Faaali atu lou agaga faafetai mo lou tino, ma molimau atu na faia i tatou i le faatusa o le Atua.

Kenese 2:2–3

O le aso Sapati e paia.

O tamaiti atonu e tatau ona faamatala i a latou uo le pogai latou te tausia ai le Aso Sa e ese mai i isi aso. O leKenese 2:2–3 o loo aoao mai ai le pogai ua avea ai le aso Sapati o se aso paia. O le a se mea e mafai ona e faia e fesoasoani ai i tamaiti ia malamalama lelei ma faamatala lenei aoaoga faavae?

Gaoioiga e Mafai Ona Fai

• E faapefea ona faaali atu e le tausia o le aso Sapati ia paia lo tatou alolofa ma le faaaloalo mo le Tama Faalelagi ma Iesu Keriso? Fesoasoani i tamaiti e faatino ni mea na tutupu lea latou te faamatala atu ai i se uo le mafuaaga ua latou filifili ai e fai mea i le Aso Sa e faamamaluina ai le Tama Faalelagi ma Iesu. Fautua atu ia latou faaaogaina le Kenese 2:2–3 i a latou faamatalaga.

• Tuu atu ni nai minute i tamaiti e tusi ai se lisi o ni mea se tele e mafai ona latou mafaufau i ai e mafai ona latou faia e avea ai le Sapati ma se aso paia. Valaaulia ia tamaiti e faasoa mai a latou lisi, ma uunaia i latou e faaopoopo i a latou lisi a o faasoa mai e isi ni fautuaga latou te lei mafaufau i ai. Fautua atu i tamaiti e ave ia lisi i le fale ma ia latou toe vaavaai i ai pe a latou manaomia ni manatu o mea lelei e fai i le Sapati.

aikona o le aoaoina

Uunaia le Aoaoina i le Aiga

Fesoasoani i tamaiti ia mafaufau pe faapefea ona latou faia se gaoioiga i o latou aiga e pei o le gaoioiga sa e faia i le vasega. Atonu e te manao e fesoasoani ia i latou e tusi se faamatalaga e faamanatu ai ia i latou lava.

Faaleleia o Lo Tatou Aoao Atu

Fesoasoani i tamaiti e faailoa lo latou fatufatuai. Pe a fau, tusi, pe valivali e tamaiti se mea e fesootai ma le tala po o le mataupu o loo latou aoaoina, e masani lava ona latou manatuaina lelei. Uunaia i latou e faaaoga a latou foafoaga e aoao ai o latou aiga. (Tagai Aoao Atu i le Ala a le Faaola,25.)

itulau o gaoioiga: O Iesu Keriso sa foafoaina le lalolagi