Love One Another, saunia e Emma Donaldson Taylor

24–30 Ianuari

Mose 7

“Sa Ta’ua e le Alii Lona Nuu o Siona”

Amata au tapenaga i le faitauina o le Mose 7. O leSau, Mulimuli Mai ia te A‘u—Mo Tagata Taitoatasi ma Aiga e mafai ona fesoasoani e te malamalama ai i lenei mataupu, ma o manatu o i lalo e mafai ona tuuina atu ai ia te oe manatu i auala e aoao atu ai i tamaiti.

Tusi Faamaumau Ou Lagona Uunai

Valaaulia le Fefaasoaai

Faaalu ni nai minute e tuu atu i tamaiti latou te toe faamanatu faatasi ma oe mea latou te iloa e uiga i le perofeta o Enoka—e aofia ai soo se mea na latou aoaoina i le lesona o le vaiaso ua teʻa. Afai e fesoasoani, faaali atu se ata mai le otootoga o le vaiaso lenei i le Sau, Mulimuli Mai ia te A’u—Mo Tagata Taitoatasi ma Aiga.

Aoao atu le Aoaoga Faavae: Tamaiti Laiti

Mose 7:18

E finagalo le Atua ina ia tatou alolofa le tasi le isi.

O nei fuaiupu o loo faamatala mai ai uiga o tagata o Siona. E mafai faapefea ona e fesoasoani i tamaiti ina ia amata ona atiina ae nei uiga?

Gaoioiga e Mafai Ona Fai

• Faasoa atu le tala i le nuu a Enoka mai le “Enoka le Perofeta” (i le Tala o le Feagaiga Tuai), pe tuu i tamaiti e faamatala le tala i a latou lava upu e faaaoga ai le ata o Enoka o loo i totonu o le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga. E mafai foi ona tou usuina ma tamaiti le fuaiupu lona lua o le “Mulimuli i le Perofeta” (Tusipese a Tamaiti, 58) e toe faamanatu ai le tala.

• Fesoasoani i tamaiti e mafaufau i gaoioiga e faatatau i le fuaitau “tasi o latou loto ma tasi le mafaufau” (Mose 7:18). Faamatala atu o lenei fasifuaitau o lona uiga sa alolofa ma agalelei tagata o Enoka i le tasi ma le isi. Valaaulia i latou e faaaoga le itulau o gaoioiga i lenei vaiaso e tusi ai se ata o se auala latou te faaali atu ai le alofa.

• Usu se pese e faatatau i le alofa o le tasi i le isi, e pei o le “A i ai i le Aiga le Alofa” (Viiga, nu. 181). Aumai ni ata e faaalia ai fuaitau autu i le pese e fesoasoani ai i tamaiti i le aoaoina o upu. Fai atu i tamaiti e faasoa mai ni auala latou te faaali atu ai le alofa i le tasi ma le isi i le Peraimeri ma i o latou aiga. Ona tuu atu lea latou te faatino o latou manatu.

E tatau ona tatou taumafai ina “ia tasi le loto ma tasi le mafaufau” (Mose 7:18).

Mose 7:28–33

E alofa le Atua i Ana fanau.

E mafai ona e fesoasoani i tamaiti ia iloa o le Tama Faalelagi ma Iesu Keriso e alolofa tele ia i tatou ma mea tatou te faia.

Gaoioiga e Mafai Ona Fai

• Fesoasoani i tamaiti e mafaufau i mea e maua ai e le Tama Faalelagi le fiafia. Faitau faatasi ma tamaiti le Mose 7:28 , ma faamatala atu sa faanoanoa le Tama Faalelagi ona sa matua amioleaga tagata (tagai fuaiupu 32–33).

• Tuu atu i tamaiti e tusi se foliga fiafia i le tasi itu o se pepa ma se foliga faanoanoa i le isi itu. Taʻu mai ni nai amioga lelei, e pei o le faia o se tatalo, ma nisi o mea le lelei, e pei o le faia o se pepelo, ma fai i tamaiti e tuu i luga le foliga fiafia po o le foliga faanoanoa e faaali atu ai po o a ni lagona o le Tama Faalelagi ma Iesu Keriso e uiga i filifiliga taitasi.

• Valaaulia tamaiti e taaalo i se taaloga latou te faatino ai mea latou te mafai ona faia e maua ai e le Tama Faalelagi le fiafia. Fai atu i isi tamaiti e mate mai le mea o loo latou faia. Fetufaai ma tamaiti uma se mea na e vaaia o latou faia e fiafia ai le Tama Faalelagi.

Mose 7:59–67

E toe afio mai Iesu i le lalolagi.

I lana faaaliga, na vaai ai Enoka i aso e gata ai, e aofia ai le Afio Mai Faalua o le Faaola. E faapefea ona e fesoasoani i tamaiti e tulimatai atu i le Afio Mai Faalua?

Gaoioiga e Mafai Ona Fai

• Fai atu i tamaiti e mafaufau faapea, o le a sau se malo faapitoa e asiasi mai ia i latou. O a ni mea o le a latou faia e sauniuni ai mo le asiasiga? Faasoa atu fetalaiga a le Alii ia Enoka o loo i le Mose 7:60: “[O le a] faapea lava ona Ou alu atu i aso e gata ai.” O a ni auala e mafai ona tatou sauniuni ai mo Iesu e toe afio mai?

• Faaali atu ata o taimi na faaali mai ai le Faaola i tagata (tagai Tusi Ata o le Talalelei, nu. 60, 82, 83, ma le 84). O a mea a tagata o loo fai i ata? Faamata o a ni lagona o tagata ina ua latou feiloai ia Iesu? Tuu atu i tamaiti e faasoa mai o latou lagona e uiga i le vaai atu ia Iesu pe a toe afio mai o Ia.

• Usu se pese e uiga i le Afio Mai Faalua o le Faaola, e pei o “Pe A Ia Toe Afio Mai” (Tusipese a Tamaiti, 46), ma fesili atu i tamaiti pe o le a so latou manatu pe o le a faapeī pe a toe afio mai Iesu.

Aoao atu le Aoaoga Faavae: Tamaiti Matutua

Mose 7:18–21, 62–63, 68–69

E mafai ona tatou lotogatasi e pei ona sa i ai tagata o Siona.

A o e faitau e uiga ia Siona, manatunatu i faataitaiga o le lotogatasi ua e vaaia. E mafai faapefea ona e fesoasoani i tamaiti ia aoao e lotogatasi e pei o sa i ai le nuu o Enoka?

Gaoioiga e Mafai Ona Fai

• Fai i tamaiti e vaavaai mo upu o loo faamatalaina ai le nuu o Enoka, ua taʻua foi o Siona, a o latou faitauina le Mose 7:18. Tusi upu nei o ni ulutala i le pito i luga o le laupapa, ma valaaulia tamaiti e tusi, i lalo o ulutala taitasi, mea e mafai ona latou faia ia avea atili ai e pei o le nuu o Enoka. A maeʻa ona latou faasoa mai, fesili i tamaiti pe faapefea ona latou faia o latou aiga ia pei o Siona. Atonu latou te maua ni nai manatu i totonu o le 4 Nifae 1:15–18.

• Fai atu i tamaiti e faitau pe faafia ona i ai le upu “Siona” i le Mose 7:18–21, 62–63, 68–69. Soo se taimi e vaaia ai le upu, fesoasoani i tamaiti e faailoa mai po o fai mai e a le fuaiupu e uiga ia Siona (tagai foi i le Guide to the Scriptures, “Zion,” scriptures.ChurchofJesusChrist.org). E mafai faapefea ona avea atili i tatou e pei o tagata o loo faamatalaina i nei fuaiupu?

• Faaaoga le itulau o gaoioiga o le vaiaso lenei e fesoasoani ai i tamaiti e mafaufau i auala e mafai ai ona avea i latou ma e e “tasi le loto ma le mafaufau” (tagai Mose 7:18).

Mose 7:28–37

E tutulu le Atua mo Lana fanau.

E mafai faapefea ona e fesoasoani i tamaiti ia iloa e manatu alofa mai le Atua ia i tatou ma a tatou gaoioiga?

Gaoioiga e Mafai Ona Fai

• Fesili i tamaiti po o le a le mea e mafua ai ona tutulu le Atua (tagai Mose 7:28–31). Valaaulia tamaiti e suesue i le Mose 7:32–33, 37 mo tali. O a ni mea o loo aoao mai e nei fuaiupu ia i tatou e uiga i lagona o le Atua i Ana fanau? E faapefea ona taou iloa e alofa le Atua ia i tatou? Faasoa atu lau molimau i le alofa o le Atua mo i tatou.

• Togi atu se ato pi po o se polo i se tamaitiiti. Fai atu ia te ia e faauma le fuaitau “E mafai ona ou faafiafiaina le Atua e ala i le …” ona togi atu lea o le mea faitino lena i se isi tamaitiiti. Toe fai seia tofu uma tamaiti ma se avanoa.

Mose 7:60–67

O le a toe afio mai Iesu Keriso i aso e gata ai.

A o e faitau e faatatau i le Afio Mai Faalua i le Mose 7:60–67, mafaufau i auala e aoao ai tamaiti e uiga i ai i se auala fiafia.

Gaoioiga e Mafai Ona Fai

• Faitau faatasi le Mose 7:60–67, ma fesoasoani i tamaiti e faailoa mai mea na fetalai le Alii o le a tupu i aso e gata ai. Fesili atu ia i latou po o fea o nei mea latou te tulimatai atu i ai ma pe aisea.

• Valaaulia tamaiti e talanoa i se taimi na latou faatali ai mo se tasi e asiasi mai pe toe foi mai i le aiga. Na faapeī lagona o tamaiti? O le a se mea sa latou faia e sauniuni ai? E faapefea ona tatou saunia e toe vaai i a Iesu?

• Faaali atu se ata o le Afio Mai Faalua o le Faaola (mo se faataitaiga, tagai Tusi Ata o le Talalelei, nu. 66). Tuu i tamaiti e tusi a latou lava ata o le Afio Mai Faalua, e faatatau i mea na latou faitauina i le Mose 7:60–67.

Uunaia le Aoaoina i le Aiga

E mafai faapefea ona e fautuaina tamaiti ma o latou aiga e faaauau ona aoao mai le Feagaiga Tuai i le fale? Mo se faataitaiga, e mafai e tamaiti ona faasoa atu se mea na latou tusia pe valivali i le Peraimeri o se vaega o se lesona o le afiafi faaleaiga.

Faaleleia o Lo Tatou Aoao Atu

Fesoasoani i tamaiti ia sagisagi mai. “Ao e aoaoina tamaiti, faataga i latou e fau, tusi ata, valivali, tusitusi, ma fatufatu. O nei mea e sili atu nai lo na o ni gaoioiga malie—e taua i le aoaoina” (Aoao Atu i le Ala a le Faaola,25).