O Noa, lona aiga, manu, le vaa, ma se nuanua

Atatusi o Noa o loo tuua le vaa, saunia e Sam Lawlor

31 Ianuari–6 Fepuari

Kenese 6–11; Mose 8

“Ma Sa Faapea ona Maua e Noa le Alofa Tunoa i Fofoga-Silasila o le Alii”

O le aoao e uiga i manu i totonu o le vaa o Noa ma le ‘Olo maualuga o Papelu e mafai ona malie mo tamaiti. Ae ia manatua o nei tala ua fuafuaina e aoao atu ai upumoni e faavavau. Mafaufau ma le agaga tatalo i upumoni e finagalo le Atua e aoaoina e tamaiti.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ae e te lei amata aoao atu tala i totonu o le Kenese 6–11 ma le Mose 8 i tamaiti, tuu atu se avanoa e aoao ai e le tasi le isi i mea ua latou iloa e uiga ia Noa ma le vaa po o le ‘Olo o Papelu.

aikona o le aoao atu

Aoao atu le Aoaoga Faavae: Tamaiti Laiti

Kenese 6:14–22; 7–8; Mose 8:16–30

O le mulimuli i le perofeta o le a faamanuiaina ai aʻu ma loʻu aiga.

A o aoao tamaiti e mulimuli i le perofeta, o le a faamanuiaina ai i latou ma puipuia saogalemu ai faaleagaga, e pei foi ona sa puipuia saogalemu le aiga o Noa mai le Lolo.

Gaoioiga e Mafai Ona Fai

• I au lava upu, faamatala le tala ia Noa ma le vaa (tagai “Noa ma Lona Aiga,” i Tala o le Feagaiga Tuai; tagai foi “Mulimuli i le Perofeta,” Tusipese a Tamaiti, 58, fuaiupu 3). Fesoasoani i tamaiti e faatino vaega o le tala—mo se faataitaiga, e ala i le faafoliga e faaaoga se mea faigaluega e fau ai le vaa po o le savali e pei o manu e ulu atu i le vaa.

• Faitau atu i tamaiti le Mose 8:19–20, ma faamamafa atu le mea sa poloaiina e le Alii ia Noa e fai. Fesoasoani i tamaiti ia malamalama o Noa o se perofeta ma sa laveaiina lona aiga mai le Lolo aua sa latou mulimuli ia te ia. Fesili atu i tamaiti pe latou te iloa o ai lo tatou perofeta o loo i ai nei. Faaali atu sona ata, ma fesoasoani i tamaiti e taʻu lona igoa.

• Aumai i le vasega ni ata po o mea faitino e faaalia ai aoaoga a le perofeta o i ai nei, e pei o tusitusiga paia po o se ata o se malumalu. Tuu atu i tamaiti e auauai e filifili se aitema ma taʻu le mea latou te iloa e uiga i ai. Faamatala ia i latou le mea e faatatau i ai le aitema. Uunaia i latou e tusi se ata o i latou lava o loo usiusitai i mea na aoao mai e le perofeta. Tuu atu lau molimau i faamanuiaga o le mulimuli i le perofeta.

Kenese 9:15–16

O le a tausia e le Atua Ana folafolaga ia i tatou.

E taua mo tamaiti ona iloa e tausia e le Atua Ana folafolaga, aemaise lava a o latou sauni e osifeagaiga ma Ia pe a latou papatiso.

Gaoioiga e Mafai Ona Fai

• Valaaulia tamaiti e tusi ni ata o le nuanua. Faitau atu ia i latou le Kenese 9:15–16, ma fai atu i ai e faalogo mo le upu manatua. Valaaulia tamaiti e uu i luga a latou nuanua i soo se taimi latou te faalogo ai i le upu. Faamatala atu o nuanua o ni faamanatu o folafolaga ua faia e le Atua ia i tatou.

• Talanoa ma le fanau e uiga i nisi o folafolaga a le Atua—mo se faataitaiga, e mafai ona tatou toe foi atu i le Tama Faalelagi pe afai tatou te mulimuli ia Iesu Keriso po o le, o le a auina mai e le Atua le Agaga Paia e faamafanafana ia i tatou. Tuu atu lau molimau e tausia e le aunoa e le Atua Ana folafolaga.

• Faaaoga ni ata e taʻu atu ai i tamaiti e uiga i feagaiga tatou te osia ma le Atua, e pei o ata o se tamaitiiti o loo papatisoina, o le faamanatuga, ma se malumalu (tagai Tusi Ata o le Talalelei, nu. 104, 108, 120).

Kenese 11:1–9

E pau lava le auala e oo atu ai i le lagi o le mulimuli lea ia Iesu Keriso.

Na manatu tagata o Papelu e mafai ona latou oʻo atu i le lagi e ala i le fauina o se olo nai lo o le ola i le talalelei a Iesu Keriso. E mafai faapefea ona e fesoasoani i tamaiti ia malamalama o le mulimuli i le Faaola e na o le pau lea o le ala e toe foi ai i lo tatou Tama Faalelagi?

Gaoioiga e Mafai Ona Fai

• Faamatala atu le tala o le Olo o Papelu i au lava upu, pe faitau foi le tala o loo maua i le “O le Olo o Papelu” (i Tala o le Feagaiga Tuai). Faamalosiau i tamaiti e fesoasoani ia te oe e ala i le faasoa mai o mea latou te iloa e uiga i le tala.

  atatusi o le olo o Papelu

  Atatusi o le Olo o Papelu, saunia e David Green

• Tuu i tamaiti e fau se olo mai poloka po o isi mea faitino. Ona faaali atu lea i tamaiti se ata o le Faaola, ma fesili atu ia i latou po o le a le auala e toe foi atu ai i le Tama Faalelagi—fausia o se olo po o le mulimuli ia Iesu Keriso? Valaaulia tamaiti e faamatala mai mea e mafai ona latou faia e mulimuli ai i le Faaola.

aikona o le aoao atu

Aoao atu le Aoaoga Faavae: Tamaiti Matutua

Kenese 6:14–22; 7–8; Mose 8:16–30

O le mulimuli i le perofeta o le a faamanuiaina ai aʻu ma loʻu aiga.

O loo tuputupu ae tamaiti i se lalolagi amioleaga, i nisi o itu ua tutusa ai ma le lalolagi i le taimi o Noa. O le mea na tupu ia Noa, e mafai ona tuu atu ai ia i latou le mautinoa e mafai ai ona latou maua le saogalemu faaleagaga a o latou mulimuli i le perofeta.

Gaoioiga e Mafai Ona Fai

• Fesoasoani i tamaiti e filifili ni fuaiupu mai le Kenese 6:14–22; 7–8 e mafai ona latou faaalia i se ata tusi. Faaaoga a latou ata e aoao atu ai ia i latou le tala ia Noa. Fai i tamaiti e faasoa mai ni mea na latou aoaoina mai le tala.

• Faaali atu se ata o Noa (tagai Tusi Ata o le Talalelei, nu. 7–8), ma le perofeta o loo i ai nei. Fesoasoani i tamaiti e sue i le Mose 8:16, 19–20, 23–24 e saili ai mea na aoao atu e Noa o loo aoao mai pea lava e o tatou taitai o le Ekalesia i aso nei. E faapefea ona faamanuiaina i tatou pe a tatou usiusitai i ia aoaoga?

• Faasoa atu se mea na aoao mai e lo tatou perofeta o loo i ai nei talu ai nei. Fai atu i tamaiti e tusi se mea na aoao mai e le perofeta i luga o fasi pepa, ma fesoasoani ia i latou e faatulaga ia fasi pepa i le mamanu o se vaa. E faapefea ona pei nei aoaoga o le vaa na fausia e Noa?

Kenese 9:15–17

E tatau ona tatou manatua a tatou feagaiga.

A tatou papatiso, tatou te osifeagaiga ma le Atua e usitai i Ana poloaiga. I le Kenese 9:15–17, o le nuanua ua faailoaina o se faamanatu o le feagaiga a le Atua. O nei fuaiupu e mafai ona musuia ai tamaiti e saili ni auala e manatua ai a latou feagaiga ma le Atua.

Gaoioiga e Mafai Ona Fai

• Faaali atu i tamaiti sau mea o i ai e faamanatu atu ai ia te oe se mea taua i lou olaga, e pei o se mama faaipoipo, o se ata, po o se api talaaga. Tuu atu i tamaiti e faasoa mai a latou lava faataitaiga. Faitau faatasi le Kenese 9:15–17 (tagai foi Faaliliuga Iosefa Samita, Kenese 9:21–25 [i le faaopoopoga i le Tusi Paia]). O le a le mea e finagalo le Tama Faalelagi tatou te mafaufau i ai pe a tatou vaai i se nuanua?

• Faamanatu atu i tamaiti feagaiga na latou osia ina ua latou papatiso ma latou te faafouina i taimi uma latou te tagofia ai le faamanatuga (tagai Mosaea 18:8–10; Mataupu Faavae ma Feagaiga 20:77, 79). Tuu i tamaiti e tusi se ata pe fatu se mea e faamanatu ai ia i latou a latou feagaiga.

Kenese 11:1–9

E pau lava le auala e oo ai i le lagi o le mulimuli lea ia Iesu Keriso.

E ui ina e le o taumafai tagata i aso nei e fau ni olo ia tau i le lagi, o le toatele o loo taumafai ia maua le filemu ma le fiafia i le mulimuli i ala e ese mai le ala na faatuina e Iesu Keriso. E faafefea ona e faaaogaina le tala o le Olo o Papelu e aoao ai lenei mataupu faavae?

Gaoioiga e Mafai Ona Fai

• Fai i tamaiti e faasoa mai ni mea latou te iloa e uiga i le tala o le Olo o Papelu (tagai Kenese 11:1–9). E tusa ai ma le Helamana 6:28, aisea na fau ai e tagata o Papelu le olo? Aisea e avea ai le fausia o lenei olo o se auala sese e tau atu i le lagi? O le a se fautuaga tatou te avatu i tagata o Papelu?

• Valaaulia tamaiti e suesue le 2 Nifae 31:20–21 ma le Helamana 3:28 e maua ai le auala sao e tau ai i le lagi. Tuu atu lau molimau e uiga i le Faaola o Iesu Keriso.

aikona o le aoaoina

Uunaia le Aoaoina i le Aiga

Valaaulia tamaiti e mafaufau i ni auala latou te aoao atu ai o latou aiga e uiga i tala na latou aoaoina i le Peraimeri. Mo se faataitaiga, e mafai ona latou faaaoga ata na latou tusia po o le itulau o le gaoioiga mo lenei vaiaso.

Faaleleia o Lo Tatou Aoao Atu

Saili ia malamalama i tamaiti o loo e aoaoina. Ao e aoaoina tamaiti, ia taulai faapitoa atu i a latou fesili, o latou manatu faaalia, ma tala po o mataupu e foliga mai e faapitoa le anoa ia i latou. O le iloa o nei mea o le a fesoasoani ia te oe e taulaʻi atu ai i o latou manaoga.

itulau o gaoioiga: o le mulimuli i le perofeta o le a faamanuiaina ai aʻu ma loʻu aiga