Sara ma Isaako, saunia e Scott Snow

14–20 Fepuari

Kenese 18–23

“E I Ai Ea Se Mea e Faigata ia Ieova?”

A o e saili e faamalie manaoga o tamaiti o loo e aoaoina, mafaufau i manatu mo tamaiti matutua ma tamaiti laiti i lenei otootoga.

Tusi Faamaumau Ou Lagona Uunai

Valaaulia le Fefaasoaai

Ina ia fesoasoani i tamaiti e faasoa mai mea ua latou iloaina e uiga i le Kenese 18–23, faaali atu ata o se tasi pe sili atu o mea na tutupu mai nei mataupu, ma fai i tamaiti e faasoa mai soo se mea latou te manatua e uiga i le tala.

Aoao atu le Aoaoga Faavae: Tamaiti Laiti

Kenese 18:9–14; 21:1–7

E mafai ona ou talitonuina le Atua e tausi ana folafolaga.

E ui lava ina sa folafola mai le Atua o le a maua e Sara ma Aperaamo se atalii, a o faasolosolo ina matutua i laua, na foliga mai ailoga a faataunuuina le folafolaga. E faafefea ona e faaaogaina lenei tala e fesoasoani ai i tamaiti ia faatuatua o le a tausia pea e le Atua ana folafolaga?

Gaoioiga e Mafai Ona Fai

• Otooto le folafolaga a le Atua ia Aperaamo ma Sara o le a maua se la tama ma le faataunuuga o lenei folafolaga (tagai Kenese 17:15–19; 18:9–14; 21:1–7). Pe valaaulia se ulugalii o le uarota e fai ni lavalava e pei o Aperaamo ma Sara ma faamatala la laua tala. Fesoasoani i tamaiti ia malamalama na matutua tele Aperaamo ma Sara mo le mauaina o se fanau. Fesili atu ia i laua le fesili mai le Kenese 18:14, “E i ai ea se mea e faigata ia Ieova?” Molimau atu e mafai e le Alii ona faataunuu Ana folafolaga, e tusa lava pe foliga mai e le mafai.

• Fai atu se folafolaga i tamaiti o le a e faataunuuina i le faaiuga o le vasega (mo se faataitaiga, o le a e faatagaina i latou e valivali se ata). Ao faagasolo le vasega, faamanatu ia i latou lau folafolaga, ona faataunuu lea. Faamalamalama atu e tausia e le Alii i taimi uma Ana folafolaga.

• Fesoasoani i tamaiti e faasoa mai se taimi na tatau ai ona latou faatalitali mo se mea sa latou matua mananao lava i ai. Faatasi ma tamaiti, usu se pese e molimau i folafolaga a le Atua, pei o le “Tausi Poloaiga” (Tusipese a Tamaiti 68). Fesoasoani i tamaiti ia iloa mea na folafola mai e le Atua ia i tatou pe a tatou faamaoni.

• Faaali atu se ata o se papatisoga po o le faamanatuga (tagai Tusi Ata o le Talalelei, nu. 103, 104, 107, 108). Fesoasoani i tamaiti e aoao e uiga i folafolaga tatou te faia ma le Atua, ma le mea ua folafola mai e le Atua, pe a tatou papatiso ma aai i le faamanatuga. (Tagai Faamaoni i le Faatuatua, 23–25.)

Kenese 22:1–14

Na usitai Aperaamo i le Alii.

Sa matua faigata lava mo Aperaamo le mulimuli i le poloaiga e osi le taulaga i lona atalii. Mafaufau loloto pe mafai faapefea ona e faaaogaina tatau lenei tala e faamalosiau ai i tamaiti ia usitai i le Atua tusa lava pe faigata pe latou te le iloa atoatoa mafuaaga o Ana poloaiga.

Gaoioiga e Mafai Ona Fai

• Faaali atu se ata o Aperaamo ma Isaako (tagai otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga), ma faaaoga e faamatala ai le tala ia Aperaamo ma Isaako (tagai foi “Aperaamo ma Isaako,” i Tala o le Feagaiga Tuai). Faaali atu se ata o Iesu Keriso, ma talanoa i tamaiti i le ala e mafai ai e le tala ia Aperaamo ma Isaako ona faamanatu mai ia i tatou le taulaga a le Tama Faalelagi ma Iesu Keriso na faia mo i tatou.

• Taaalo i se taaloga faigofie e manaomia ai le mulimuli o le fanau i faatonuga. Mo se faataitaiga, o faatonuga e mafai ona taitai atu ai i se ata o le Faaola o loo nanā i totonu o le potuaoga. O a nisi o mea ua finagalo le Tama Faalelagi tatou te faia? Fesoasoani i tamaiti ia malamalama o le tausia o Ana poloaiga o le a fesoasoani tatou te toe foi atu ai e mau faatasi ma Ia ma Iesu Keriso.

Aoao atu le Aoaoga Faavae: Tamaiti Matutua

Kenese 18:9-14; 21:1-7

E faataunuu e le Alii Ana folafolaga, e tusa lava pe foliga mai e le mafai.

Sa taʻu atu ia Aperaamo ma Sara o le a maua se la tama, ae sa foliga mai e le mafai—sa 100 tausaga o Aperaamo, ae 90 tausaga o Sara (tagai Kenese 17:17). Na faataunuuina e le Atua Lana folafolaga, ma o lenei tala e mafai ona fesoasoani i tamaiti o loo e aoaoina e faamalosia ai o latou faatuatua i folafolaga a le Atua mo i latou.

Gaoioiga e Mafai Ona Fai

• Tusi upu taitasi mai le fuaiupu muamua o le Kenese 18:14 i ni fasi pepa eseese, ma tufa atu i tamaiti taitoatasi. Ona fai atu lea i le vasega e tuu upu i le faatulagaga sa’o. Faitau faatasi ma tamaiti le Kenese 18:9-14; 21:1–7 e saili ai se faataitaiga se tasi mai olaga o Sara ma Aperaamo ina ua faia e le Alii se mea sa foliga mai e le mafai. O a ni mea tatou te aoaoina mai i le aafiaga a Sara ma Aperaamo lea e mafai ona faamalosiau ai i tatou e talitonu i folafolaga a le Atua?

• Faaali atu ni ata o tala mai tusitusiga paia na faapea ona faia ai e le Atua se mea na foliga mai e le masani ona tupu pe faigata (mo se faataitaiga, tagai Tusi Ata o le Talalelei, nu. 7, 8, 25, 26). Fai atu i tamaiti e faasoa mai ni mea o latou iloa e uiga i mea na tutupu o loo faaalia i nei ata, ma fesoasoani ia latou iloa le ala na faataunuu ai e le Alii Ana folafolaga i nei vaega taitasi. Faasoa mai pe na faapefea ona tausia e le Alii Ana folafolaga i lou olaga po o olaga o tagata e te iloa (mo ni faataitaiga o folafolaga a le Alii, tagai Malaki 3:10; Ioane 14:26–27; Mataupu Faavae ma Feagaiga 89:18–21). Tuu atu i tamaiti e faasoa mai ni faataitaiga faapena latou te iloa.

Kenese 19:15–26

E mafai ona ou sola ese mai le amioleaga.

O le tala ia Lota ma lona aiga o sosola ese mai se aai amioleaga, e mafai ona musuia ai tamaiti o loo e aoaoina ina ia sosola ese mai faatosinaga leaga i o latou olaga.

Fleeing Sodom and Gomorrah, saunia e Julius Schnorr von Carolsfeld

Gaoioiga e Mafai Ona Fai

• Aotele le Kenese 19:15–26 i le faamatala atu na nonofo le aiga o Lota i se aai amioleaga tele, ma na lapataia i latou e agelu ina ia o ese. Faitau faatasi fuaiupu 15–17, 26, ma fesoasoani i tamaiti e mafaufau i le uiga mo i latou i nei aso o le ia “sola” mai le leaga ma “aua e te tepa i tua” (fuaiupu 17).

• Faaali atu se ata o le Faaola, ma fai i tamaiti e fai se laa agai i ai ao latou faasoa mai se mea se tasi e mafai ona latou faia e sosola ese ai mai le amioleaga ma latalata atili atu ai ia Keriso.

• Talanoaina ni tulaga e mafai ai e se uo ona valaaulia tamaiti e faia se mea latou te iloa e le saʻo. E faapefea ona tatou “sosola ese” mai nei tulaga? O le a se tatou tala e fai atu i la tatou uo?

Kenese 22:1–14

Na auina mai e le Tama Faalelagi Lona Alo, o le na ositaulagaina o Ia lava mo i tatou.

Ao e aoao atu e uiga i le lotomalie o Aperaamo e osi le taulaga ia Isaako, ia e mataala i lagona o tamaiti. Faaaoga le tala lenei e fesoasoani ai i tamaiti ia faamalosia lo latou alofa ma le talisapaia o le taulaga a le Faaola.

Gaoioiga e Mafai Ona Fai

• Fesoasoani i tamaiti ia iloa le tala i le Kenese 22:1-14, faitau atu fuaiupu ia i latou, ma valaaulia i latou e tusi ni ata o mea o loo e faitauina. Aisea na faigata ai ia Aperaamo ona tausia le poloaiga a le Atua e ositaulaga Isaako? O le a se mea ua tatou aoaoina e uiga ia Aperaamo mai lenei tala?

• Faaaoga ata o Aperaamo ma Isaako ma le Faasatauroga (tagai Tusi Ata o le Talalelei, nu. 9, 57) e faatusatusa ma le tala o loo i le Kenese 22 ma le taulaga a le Faaola (tagai Mataio 27:26–37). O le a se mea e mafai ona tatou aoaoina e uiga i le Tama Faalelagi ma Iesu Keriso mai i tala ia Aperaamo ma Isaako ma le Faasatauroga?

• Faaali le vitio “For God So Loved the World” (ChurchofJesusChrist.org), pe usu faatasi se pese e faatatau i le taulaga a le Faaola, e pei o le “Na Ia Auina Mai Lona Alo” (Tusipese a Tamaiti, 20--21). Valaaulia tamaiti e talanoa i le auala ua faaalia ai le alofa o le Tama Faalelagi ia i tatou e ala i le taulaga a Iesu.

Uunaia le Aoaoina i le Aiga

Valaaulia tamaiti e faasoa ma o latou aiga e uiga i se taimi na faamanuia ai i latou e le Atua ina ua latou usitaia se tasi o Ana poloaiga.

Faaleleia o Lo Tatou Aoao Atu

Fautuaina le migao. Pe a manaomia i le taimi o le vasega, e mafai ona e faamanatu atu i tamaiti ia faaaloalo. E mafai ona e faia lenei mea e ala i le usuina lemu po o le hamuina o se pese pe faaali atu se ata o Iesu.