Atatusi o Repeka, saunia e Dilleen Marsh

21–27 Fepuari

Kenese 24–27

Ua Faafouina le Feagaiga

Ao e faitauina le Kenese 24–27 ma sauni e aoao atu, mafaufau i tamaiti o loo i lau vasega. O a ni mea e manaomia ona latou aoaoina? O le fea o nei gaoioiga o le a ‘anoa ia i latou? E faavae i o latou manaoga, e mafai ona e fetuutuunaia nisi o gaoioiga o loo maua iinei po o gaoioiga o loo maua i le Sau, Mulimuli Mai ia te Au—Mo Tagata Taitoatasi ma Aiga.

Tusi Faamaumau Ou Lagona Uunai

Valaaulia le Fefaasoaai

I lalo o nofoa o tamaiti taitasi, tuu ai se fesili e uiga i se mea na tupu po o le mataupu faavae o loo i le Kenese 24–27. Tuu i tamaiti e tali i fesili pe a latou mafaia, pe valaaulia foi i latou e faalogo mo tali i le taimi o le lesona.

Aoao atu le Aoaoga Faavae: Tamaiti Laiti

Kenese 24:10–21

E mafai ona ou agalelei atu i isi.

Sa faagaeetia le auauna a Aperaamo i le maoaʻe o le agalelei na faaalia e Repeka ia te ia i le ofoina atu o vai e le gata ia te ia ae o ana kamela foi e 10. O lana faataitaiga e mafai ona avea ma faamanatu mo le fanau ia agalelei i taimi uma i isi.

O se vaipuna i Peresepa anamua, lea na eli vaieli ai Aperaamo ma Isaako.

Gaoioiga e Mafai Ona Fai

• Faaali atu le ata o Repeka o loo i le itulau o le gaoioiga o lenei vaiaso. Faailoa atu faamatalaga auiliili i le ata ao e aoteleina le tala i le Kenese 24:10–21, lea na faaali atu ai e Repeka le agalelei i le auauna a Aperaamo. Ia faailoa atu o ana upu ma gaoioiga o le agalelei o le faailoga lea o Repeka, o ia lea na finagalo le Atua e faaipoipo i le atalii o Aperaamo o Isaako. Fai atu i tamaiti e faafoliga o i latou o le auauna na taunuu atu ma ana kamela po o Repeka o loo aumaia ni vai mo i latou. Tuu atu ia i latou fuaitau e tauloto mai mau faitau, e pei o le “So’u inu … sina vai” (fuaiupu 17) ma le “Ou te utufia foi ma au kamela” (fuaiupu 19). Aisea e taua ai ona tatou agalelei i isi?

• Faamatala atu se tala e uiga i le auala na faaalia ai e le Faaola le agalelei i se tasi. Valaaulia nisi o tamaiti e faasoa mai o latou lava aafiaga o le faaalia o le agalelei.

• Fautuaina ni tulaga e mafai ai e se tamaitiiti ona faaalia le agalelei, e pei o le taaalo ma ni uo po o le feiloai ma se tagata fou i le aʻoga. Fesili i tamaiti pe o le a se mea latou te faia ina ia agalelei ai i nei tulaga.

• Usu faatasi ma tamaiti se pese e faatatau i le agalelei, e pei o le “Aoao Mai Ia Ou Savali I Le Malamalama” po o le “O Loo Ou Taumafai e Avea e Pei o Iesu” (Tusipese a Tamaiti, 70, 40). Valaaulia tamaiti e faalogo mo le upu “agalelei” (po o se upu talitutusa) ma tutū pe a latou faalogo i ai. E mafai faapefea ona tatou faaali atu le agalelei i isi? O le itulau o gaoioiga o lenei vaiaso e mafai ona fesoasoani i le talanoaga lenei.

Kenese 25:29–34

E mafai ona ou filifilia mea e sili ona taua.

Ona o Esau o le tamaitiiti ulumatua i lona aiga, sa tatau ona ia maua ni tiutetauave ma faamanuiaga faapitoa, ua taʻua o le tofi o le ulumatua. I le tasi aso na fia ai Esau, na ia faatauina atu lona tofi o le ulumatua i lona uso o Iakopo mo se meaai. O lenei tala e mafai ona aoao ai tamaiti, e tatau ona tatou filifilia mea e tumau nai lo o mea e le tumau le faamalieina.

Gaoioiga e Mafai Ona Fai

• Aumai i le vasega ni mea faitino e mafai ona fesoasoani e faamatala ai le tala ia Esau lea na faatau atu lona tofi ulumatua, e pei o se ipu faaofuofu ma se ata o se tasi o loo mauaina se faamanuiaga faaleperisitua. Valaaulia tamaiti e faaaoga ia mea faitino a o latou taʻu atu ia te oe mea latou te iloa e uiga i le tala. “Iakopo ma Esau” (i Tala o le Feagaiga Tuai) e mafai ona fesoasoani. Faitau faatasi le Kenesi 25:34, ma faamatala atu, po o ai lava e i ai le tofi o le ulumatua, o le a i ai ni faamanuiaga ma ni matafaioi faapitoa e tausi le lautele o le aiga.

• Faaali atu i tamaiti ni ata se lua: o le tasi o se mea e sili lona taua faaleagaga (pei o se malumalu) ma le tasi o se mea e aumaia ai na’o le fiafia le tumau (pei o se taaloga, meataalo, po o se mea suamalie). Fai atu ia i latou e filifili po o fea le mea o le a sili ona fesoasoani tatou te toe foi atu ai i lo tatou Tama Faalelagi. Toe fai i isi ata.

• Usu faatasi ma tamaiti se pese e faatatau i le faiga o filifiliga sa’o, e pei o le “Filifili Le Ala Sa’o” (Tusipese a Tamaiti, 82) . Molimau atu e faamanuiaina i tatou ma maua le fiafia pe a tatou filifili le mea tonu.

Aoao atu le Aoaoga Faavae: Tamaiti Matutua

Kenese 24:1–28

O le a faamanuiaina aʻu pe a ou galue i le faatuatua ma faaali atu le agalelei i isi.

Sa faaalia le faatuatua o le auauna a Aperaamo e ala i le talitonuina o le taitaiga a le Atua e suʻe se avā mo Isaako. Na faaalia e Repeka le agalelei i le faiga sa ia faia ai le auauna a Aperaamo. E mafai faapefea ona e fesoasoani i tamaiti o loo e aoaoina ina ia mulimuli i faataitaiga a le auauna a Aperaamo ma Repeka?

Gaoioiga e Mafai Ona Fai

• Faitau faatasi le Kenese 24:1-28 , ma fesoasoani i tamaiti ia iloa faataitaiga o le faatuatua ma le agalelei (tagai, mo se faataitaiga, fuaiupu 12–14 ma le 17–20). Na faapefea ona faamanuiaina le auauna a Aperaamo ma Repeka e ala i le faaalia o le faatuatua ma le agalelei? Tusi i luga o le laupapa E mafai ona tatou faaalia le faatuatua e ala i le … ma le E mafai ona tatou faaalia le agalelei e ala i le … , ma valaaulia tamaiti e fautua mai ni auala e faauma ai fuaiupu nei.

• I luga o fasi pepa, tusi ai faamatalaga po o mea na faia e le auauna a Aperaamo ma mea na fai atu ai pe na faia e Repeka i le Kenese 24:1–28. Valaaulia tamaiti ia tofu uma ma le avanoa e filifili ai se fasi pepa ma galulue faatasi e mate po o ai na faia le faamatalaga pe na faia nei mea (e mafai ona latou faaaogaina mau pe a latou manaomia se fesoasoani). O le a se mea ua aoao mai e lenei tala ia i tatou e uiga i le agalelei? O le a se mea o aoao mai ai i tatou e uiga i le faatuatua? O isi faataitaiga o le agalelei ma le faatuatua o loo maua i le Kenese 24:29–33, 58–61.

• Valaaulia tamaiti e mafaufau i se gaoioiga agalelei na latou vaai i ai. Valaaulia i latou e tusi i lalo ma faasoa atu i le vasega po o o latou aiga i le fale. O a ni o tatou lagona pe a agalelei mai se tasi ia i tatou?

Kenese 25:21–34

O le a ou faatauaina mea e faavavau nai lo o mea faaletino.

Na filifili Esau e faatau atu se mea taugata tele, o lona tofi o le ulumatua, mo se mea e le taua tele, o sina falaoa ma se ipu supo. A o e faitauina nei fuaiupu, mafaufau loloto pe faapefea ona e fesoasoani i tamaiti ia faamuamua mea e taua e faavavau.

Gaoioiga e Mafai Ona Fai

• Faitau faatasi le tala ia Iakopo ma Esau i le Kenese 25:21–34. Ao e faitau, valaaulia tamaiti taitoatasi e filifili se mea e tusi ai se ata mai le tala. Ona valaaulia lea o i latou e faaaoga a latou ata e faamatala ai le tala ia latou lava upu. Afai latou te manaomia le fesoasoani ia malamalama i le uiga o le tofi o le ulumatua, uunai i latou e faitau le “Birthright” i le Taiala i Tusitusiga Paia (ChurchofJesusChrist.org). Valaaulia tamaiti e mafaufau e faapea, na fesili mai Esau mo la tatou fautuaga pe tatau ona ia faatauina atu lona tofi o le ulumatua mo le atasema; o le a se tatou tala e fai atu ia te ia?

• Faamatala e uiga i se taimi na tatau ai ona e ositaulagaina se mea lelei mo se isi mea e sili atu lona taua. Pe faaali le vitio “Continue in Patience” (ChurchofJesusChrist.org). E faapefea ona faatatau lau tala po o le tala i le vitio i le filifiliga na faia Esau i le Kenese 25:29–34? Fesoasoani i tamaiti e mafaufau i faamanuiaga e finagalo le Tama Faalelagi e tuuina atu ia i latou (e pei o se molimau malosi atu, o faamanuiaga o le malumalu, po o le ola e faavavau faatasi ma Ia). Uunaia i latou e mafaufau i mea o le a latou malilie e ositaulaga ina ia maua ai nei faamanuiaga taua.

Uunaia le Aoaoina i le Aiga

Valaaulia tamaiti e mafaufau i se sini e mafai ona latou faia mo i latou lava e faatatau i se mataupu faavae na latou aoaoina i le Peraimeri i le asō. Mo se faataitaiga, e mafai ona latou faatuina se sini ia agalelei atu i isi i le fale.

Faaleleia o Lo Tatou Aoao Atu

E fiafia tamaiti e faasoa mai mea o loo latou aoaoina. E ui ina laiti tamaiti, e mafai e i latou ona faamalolosia tagata o o latou aiga. Faamalosiau i tamaiti e faasoa atu i o latou aiga se mea sa latou aoaoina i le Peraimeri. (Tagai Aoao Atu i le Ala a le Faaola,30.)