Aperaamo ma Sara

Ata tusi o Aperaamo ma Sara, na saunia e Dilleen Marsh

7–13 Fepuari

Kenese 12–17; Aperaamo 1–2

“Avea o se Soo Sili Atu o le Amiotonu”

Manatua e le manaomia—pe mafai foi—ona faia mea uma o loo i lenei otootoga. Tuu atu i le Agaga e taitaia oe i mataupu faavae ma gaoioiga o le a sili ona anoa i tamaiti o loo e aoaoina.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O aiga o tamaiti o loo e aoaoina na valaaulia e aoao e uiga ia Aperaamo ma Sara i le vaiaso ua tuanaʻi. Tuu atu i tamaiti se avanoa e faasoa mai ai se mea latou te iloa e uiga ia Aperaamo po o Sara.

aikona o le aoao atu

Aoao atu le Aoaoga Faavae: Tamaiti Laiti

Aperaamo 1:18; 2:8

E mafai ona taitai au e Iesu Keriso i le lima.

Sa manao Aperaamo e amiotonu e ui ina sa amioleaga tagata o lona aiga. Ma sa fetalai mai le Alii ia te ia, “o le a Ou taitai oe i loʼu lima” (Aperaamo 1:18). E pei lava ona sa folafola le Atua e fesoasoani ia Aperaamo, e mafai ona Ia taitaia tamaiti e te aoaoina pe a latou mananao e filifili le mea saʻo.

Gaoioiga e Mafai Ona Fai

• Faitau atu i tamaiti le Aperaamo 1:18 ma le 2:8, ma valaaulia tamaiti e faalogologo mo se vaega o le tino o loo ta’ua i nei fuaiupu e lua. O le a faapeī se lagona pe a taitai i tatou e Iesu Keriso i le lima po o le puipuia e Lona aao i tatou? Molimau atu e taitai i tatou e Iesu ala i le taitaiina o i tatou e Lona Agaga.

• Faaaoga le “Aperaamo ma Sara” (i Tala o le Feagaiga Tuai) e fesoasoani i tamaiti ia malamalama o tagata sa siomia Aperaamo sa latou faia mea leaga, ae sa manao Aperaamo e fai le mea saʻo ma sa fesoasoani le Alii ia te ia. E faapefea ona fesoasoani mai le Tama Faalelagi ma Iesu Keriso ia i tatou pe a tatou taumafai e filifili le mea saʻo? Usu se pese e faatatau i lenei mataupu faavae, pei o le “Aoao Mai Ia Ou Savali I Le Malamalama” (Tusipese a Tamaiti,70).

• Faaali atu ni ata o le Faaola (tagai Tusi Ata o le Talalelei, nu. 38, 39, 40, ma le 41), ma fesoasoani i tamaiti ia vaai i mea na Ia faia i Ona aao. O a ni mea e mafai ona tatou faia i o tatou lima e fesoasoani ai i isi?

Kenese 13:5–12

E mafai ona avea au o se faatupu filemu.

Ina ua feeseeseai leoleo o manu a Aperaamo ma leoleo o manu a Lota i le fanua sa fafaga ai a latou lafumanu, sa fautua atu e Aperaamo se vaifofo na maua ai le filemu. E mafai ona e faaaogaina lenei faataitaiga e musuia ai tamaiti e avea ma tagata faatupu filemu.

Gaoioiga e Mafai Ona Fai

• Faasoa atu i tamaiti le tala mai le Kenese 13:5–12, ma valaaulia i latou e faatino. Ia auauai tamaiti e faafoliga o Aperaamo, lona uso a Lota, ma tausi lafumanu. Fautua atu ni auala e mafai ona latou mulimuli ai i le faataitaiga a Aperaamo o le avea ma se e faatupuina le filemu, e pei o le auauai i se mea taalo pe a taaalo ma se uo. Valaaulia i latou e faatino nei faataitaiga.

• Faitau le Mataio 5:9, ma faamatala atu e finagalo Iesu ia avea i tatou ma e faatupuina le filemu. Fesoasoani i tamaiti e mafaufau i ni mea e mafai ona latou faia e avea ai ma tagata faatupu filemu i le aiga pe faatasi foi ma a latou uo. Valaaulia i latou e tusi se ata o i latou lava o loo avea ma e faatupuina le filemu. Fai atu i tamaiti e faasoa mai o latou lagona pe a avea i latou ma tagata faatupu filemu pei o Iesu Keriso.

Kenese 15:1–6; 17:1–8; Aperaamo 2:9–11

E taua le tausia o a’u folafolaga.

O le aoao e uiga i le feagaiga na faia e le Atua ma Aperaamo ma Sara, e mafai ona fesoasoani i tamaiti ia malamalama ai i le uiga o le tausia o folafolaga. E mafai foi ona fesoasoani ia i latou e saunia e osia ma tausia feagaiga.

Gaoioiga e Mafai Ona Fai

• Fesili i tamaiti pe latou te iloa po o le a le folafolaga po o le feagaiga. Valaaulia i latou e faasoa mai ni aafiaga i le taimi na latou faia ai se folafolaga po o se tasi na faia se folafolaga ia i latou. Afai e fesoasoani, faasoa atu ni a oe lava faataitaiga. Fesoasoani i tamaiti ia malamalama na folafola atu Aperaamo ma Sara e usitai i le Atua. Filifili ni nai fuaitau mai le Kenese 15:1–6; 17:1–8; Aperaamo 2:9–11 e faasoa mai ai nisi o faamanuiaga na folafola mai e le Atua ia i la’ua. Atonu e aofia ai le “Aperaamo e, aua e te fefe; o a’u nei o lou talita,” “Ua ou faia oe ma tupuaga o nuu e tele,” po o le “O le a manuia ai aiga uma o le lalolagi.”

• O a ni folafolaga faigofie e mafai e tamaiti ona osia ma tausia i le taimi o le vasega? Mo se faataitaiga, fai i ai e folafola atu e nonofo pea i o latou nofoa mo ni nai minute po o le teu o o latou nofoa pe a uma le vasega. Faasoa ia i latou i se taimi na e faia ai se folafolaga ma tausia, ma valaaulia i latou e faasoa atu ni o latou aafiaga. Fesoasoani ia latou malamalama o le a latou faia ni folafolaga ma le Tama Faalelagi pe a latou papatiso ma pe a latou o atu i le malumalu.

aikona o le aoao atu

Aoao atu le Aoaoga Faavae: Tamaiti Matutua

Aperaamo 1:12–17

E faafofoga ma tali mai le Tama Faalelagi i a’u tatalo.

Ina ua lamatia le ola o Aperaamo, na ia valaau i le Atua ma na laveaiina. O le fanau o loo e aoaoina atonu e i ai ni o latou lava aafiaga i le tatalo e mafai ona latou faasoa atu.

Gaoioiga e Mafai Ona Fai

• Faaali atu le ata An Angel Saves Abraham (ChurchofJesusChrist.org), ma valaaulia tamaiti e faasoa atu se mea latou te iloa e uiga i le tala o loo faaalia ai, o loo maua i le Aperaamo 1:12, 15–17. Fai atu i tamaiti e faitau nei fuaiupu ma faasoa mai ni mea ua latou aoaoina e uiga i le tatalo.

• Ia valaaulia tamaiti e faasoa mai ni aafiaga i se taimi na taliina ai e le Tama Faalelagi a latou tatalo, ma faasoa atu se tasi o ou aafiaga.

Kenese 13:5–12

E mafai ona avea au o se faatupu filemu.

Tatou te feagai uma ma tulaga e faaosooso ai tatou ia le fiafia ma finauvale. Mafaufau pe faapefea ona fesoasoani le tala ia Aperaamo ma Lota i tamaiti e avea ai ma e faatupu filemu i tulaga faapea.

Gaoioiga e Mafai Ona Fai

• Tusi le Tagata Autu, Nofoaga, Faafitauli, ma le Vaifofo i le laupapa. Valaaulia tamaiti e faitau le Kenese 13:5–12 ma faailoa vaega o le tala ua lisiina i luga o le laupapa. Fesoasoani i tamaiti e mafaufau i tulaga e mafai ona avea ai i latou ma faatupu filemu, pei o le taimi e faafinau pe taumafai ai se tasi e fusu. Ona valaaulia lea o i latou e faatino se tala o le auala e mafai ai ona avea ma faatupu filemu i na tulaga.

• Fesoasoani i tamaiti e sue ia autu “Peace” po o le “Peacemaker” i le Guide to the Scriptures (scriptures.ChurchofJesusChrist.org). Valaaulia tamaiti taitasi e filifili se mau e uiga i le filemu ma faasoa mai mea na ia aoaoina i le vasega. Fesoasoani ia i latou e mafaufau i nisi o faataitaiga o le avea o le Faaola ma faatupu filemu, e pei ona maua i le Luka 22:50–51. E mafai faapefea ona tatou mulimuli i Lana faataitaiga?

  Lota ma Aperaamo faatasi ma lafu

  Lot’s Choice, © Providence Collection/licensed from goodsalt.com

Kenese 17:1–8; Aperaamo 2:8–11

E mafai ona ou tausia feagaiga ou te osia ma le Tama Faalelagi.

O le aoaoina o tamaiti e uiga i le feagaiga na faia e le Atua ma Aperaamo ma Sara e mafai ona fesoasoani latou te mafaufau ai ia latou lava feagaiga.

Gaoioiga e Mafai Ona Fai

• Valaaulia tamaiti e faitau le Kenese 17:1–8 ma le Aperaamo 2:8–11 ma fai ni lisi se lua: o le mea na faatonuina Aperaamo e fai ma le mea na folafola mai e le Alii ia te ia. O le a se mea ua tatou aoaoina e uiga i le Alii mai nei fuaiupu?

• Faaali atu se ata o se tasi o loo papatisoina (tagai Tusi Ata o le Talalelei, nu. 103, 104). Fai atu i tamaiti e lisi folafolaga na faia e se tagata i le papatisoga ma folafolaga na faia e le Atua. Fautua atu i tamaiti e vaai i le Mosaea 18:10; Mataupu Faavae ma Feagaiga 20:37, 77, 79 mo se fesoasoani. O le a se mea tatou te faia e tausia ai feagaiga na tatou osia i le papatisoga?

aikona o le aoaoina

Uunaia le Aoaoina i le Aiga

Auina atu se tusi e o ma tamaiti i le fale e uunaia ai o latou aiga latou te maitauina ni taimi e avea ai tamaiti o ni e faatupuina le filemu, tausia folafolaga, pe faia se isi mea na outou talanoaina i le vasega.

Faaleleia o Lo Tatou Aoao Atu

E tiotio tamaiti. E i ai taimi e foliga mai, o le malosi maualuga o tamaiti e faalavelaveina mai le aoao, ae e mafai ona e faaaogaina le latou malosi lea o se vaega o lo latou aoaoina. Valaaulia i latou e faatino se tala pe fai ni taga e o faatasi ma upu o se pese po o se mau. (Tagai Aoao Atu i le Ala o le Faaola, 25–26.)

itulau o gaoioiga: e taua le tausia o a’u folafolaga