“14–20 Fepuari. Kenese 18–23: ‘E I Ai Ea Se Mea e Faigata ia Ieova?’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)
“14–20 Fepuari. Kenese 18–23,” Sau, Mulimuli Mai ia te A’u—Mo Tagata Taitoatasi ma Aiga: 2022
Sara ma Isaako, saunia e Scott Snow
14–20 Fepuari
Kenese 18–23
“E I Ai Ea Se Mea e Faigata ia Ieova?”
Faitau ma mafaufau loloto i le Kenese 18–23, ma tusifaamaumau ou lagona uunai. E mafai ona e faaaogaina manatu o loo i lenei otootoga e fesoasoani i lou suesueina o mataupu nei, ma e ono musuia foi oe e te saili mo isi savali o loo i tusitusiga paia ua faafitoitonuina e le Alii mo oe.
Tusifaamaumau Ou Lagona Uunai
O le olaga o Aperaamo, na faatumulia i mea na tutupu sa le gata ina tiga, ae sa faagaeetiaina foi, o le faamaoniga o se upumoni na aoaoina e Aperaamo i se faaaliga vaaia—e faapea, ua tatou i ai i lenei lalolagi ina ia tofotofoina, “e vaai pe [tatou] te faia mea uma o soo se mea e poloaiina ai i [tatou] e le Alii lo [tatou] Atua” (Aperaamo 3:25). Pe mata o le a faamaonia e Aperaamo lava ia lona faatuatua? Pe mata o le a faaauau pea ona ia faatuatua i le folafolaga a le Atua mo se fanau toatele, e tusa lava pe sa leai se la fanau ma Sara ae ua la matutua lava? Ma ina ua fanau mai Isaako, pe mata o le a tumau pea le faatuatua o Aperaamo i se mea e lei mafaufauina—o se poloaiga ina ia ositaulaga atu lona atalii lea na folafola mai le Atua e faataunuu ai lena feagaiga? Na faamaonia le faatuatua o Aperaamo. Na talitonuina e Aperaamo le Atua, ma na talitonuina e le Atua ia Aperaamo. I le Kenese 18–23, tatou te maua ai tala mai olaga o Aperaamo ma isi, e mafai ona faaosofia ai i tatou ia mafaufau i o tatou lava gafatia e talitonu ai i folafolaga a le Atua, e sosola ese ai mai le amioleaga ma le toe tetepa ai lava i tua, ma ia talitonuina le Atua e tusa lava po o le a le [mea] e taulagaina.
Manatu mo Suesuega Faaletagata Lava Ia o Tusitusiga Paia
E faataunuu e le Alii Ana folafolaga i Lana lava taimi.
Na faia e le Alii ni folafolaga matagofie i le au faatuatua, ae peitai o nisi taimi, o tulaga o o tatou olaga e mafua ai ona tatou tau mafaufau pe mafai faapefea ona faataunuuina na folafolaga. Atonu sa i ai ni lagona faapena o Aperaamo ma Sara i nisi o taimi. O a ni mea ua e aoaoina mai i o laua aafiaga? Atonu e fesoasoani le amata o au suesuega i le toe iloiloina o mea na folafola atu e le Atua ia Aperaamo i le Kenese 17:4, 15–22. Sa faapefea ona tali atu Aperaamo ma Sara? (tagai foi i le Faaliliuga a Iosefa Samita, Kenese 17:23 [i le Kenese 17:17, vaefaamatalaga b]; Kenese 18:9–12). Sa faapefea ona tali atu le Alii e fesoasoani ia i laua ia i ai lo laua faatuatua malosi atu i Ana folafolaga? (tagai i le Kenese 18:14).
O a ni mea e te maua i nei fuaiupu e atinae ai lou faatuatua? O a nisi aafiaga—i lou olaga po o le olaga o se isi—ua faamalosia ai lou faatuatua e faapea, o le a faataunuuina e le Atua Ana folafolaga ia te oe i Lana lava taimi ma [Lana lava] ala?
Tagai foi i le Mataupu Faavae ma Feagaiga 88:68.
Ua faatonuina i tatou e le Alii ina ia tatou o ese mai le amioleaga.
O a ni lesona e te aoaoina e uiga i le sosola ese mai le amioleaga, ao e faitau e uiga ia Lota ma lona aiga? Mo se faataitaiga, o le a se mea na faagaeetia ai oe e uiga i le mea na fai mai ai le agelu ma faia e fesoasoani ai ia Lota ma lona aiga ina ia sao mai le faafanoga? (tagai i le Kenese 19:12–17). E faapefea ona fesoasoani le Alii ia te oe ma lou aiga ina ia sosola ese pe saili le puipuiga mai faatosinaga a le tiapolo i le lalolagi?
Mo nisi faamatalaga e uiga i agasala a Sotoma ma Komoro, tagai i le Esekielu 16:49–50 ma le Iuta 1:7–8.
(Tagai foi Faaliliuga a Iosefa Samita, Kenese 19:9–15 (i le faaopoopoga o le Tusi Paia).
Sosola Ese Mai Sotoma ma Komoro, saunia e Julius Schnorr von Carolsfeld
O le a le mea sese na fai e le avā a Lota?
Na aoao mai Elder Jeffrey R. Holland:
“O le mea moni lava, o le mea na sese i le ava a Lota e le na o lona tepa i tua; a o lona loto sa ia manao e toe foi i tua. E foliga mai ae lei taitai ona sopoia e ia tuaoi o le aai, ua leva ona ia misia mea sa ofoina mai e Sotoma ma Komoro ia te ia. … Sa leai sona faatuatua. Sa masalosalo o ia i le gafatia e le Alii ona tuuina atu ia te ia o se mea e sili atu nai lo mea ua ia maua. …
“Mo i latou uma [o loo tuufesili] o augatupulaga uma, ou te valaau atu ‘Manatua le ava a Lota’ [Luka 17:32]. O le faatuatua e mo le lumanai. O le faatuatua e fausia i luga o le taimi ua tuanai ae le o le moomoo lava e tumau ai iina. E talitonu le faatuatua o le Atua o loo i ai ni mea se tele o loo fuafuaina mo i tatou taitoatasi ma o Keriso e moni lava o le ‘faitaulaga sili i mea lelei atali’ (Eperu 9:11)” (“O Le a Oo Mai Le Mea Sili,” Liahona, Ian. 2010, 24, 27).
O le lotomalie o Aperaamo e ositaulaga Isaako o se faatusa lea o le Atua ma Lona Alo.
Tatou te le iloa uma mafuaaga na poloaiina ai e le Atua ia Aperaamo ina ia ofo atu Isaako e fai ma taulaga; ae ua tatou iloa sa o se tofotofoga o lona faatuatua i le Atua (tagai i le Kenese 22:12–19). A o e faitau i le Kenese 22:1–19, o le a se mea ua e aoaoina mai le aafiaga a Aperaamo?
O le lotomalie o Aperaamo e ositaulaga lona atalii sa “o se faatusa o le Atua ma lona Alo e Toatasi na Fanaua” (Iakopo 4:5). A o e mafaufau loloto i mea e talitutusa i le va o le tofotofoina o Aperaamo ma le ofoina mai e le Atua le Tama o Lona Alo o se taulaga mo i tatou, o le a sou lagona e uiga i lou Tama Faalelagi?
E i ai foi mea e talitutusa i le va o Isaako ma le Faaola. Mafaufau e toe faitau le Kenese 22:1–19 , ma vaavaai mo nei mea e talitutusa ai.
Tagai foi i le “Akedah (The Binding)” (vitio), ChurchofJesusChrist.org.
Manatu mo Suesuega Faaleaiga o Tusitusiga Paia ma Afiafi Faaleaiga
-
Kenese 18:14.O i ai ni tala mai tusitusiga paia, mai talafaasolopito o lou aiga, pe mai lou lava olaga e mafai ona e faasoa atu, ua aoaoina ai oe e leai se mea e faigata tele i le Alii?
-
Kenese 18:16–33.O le a se mea ua tatou aoaoina e uiga i le ituaiga tagata e i ai Aperaamo mai nei fuaiupu? E mafai faapefea ona tatou mulimuli i lana faataitaiga? (Tagai foi Alema 10:22–23.)
-
Kenese 19:15–17.O fuaiupu nei e mafai ona fesoasoani i tagata o lou aiga e saunia ai mo taimi e manaomia ai ona latou sosola ese mai tulaga o le amioleaga. Faamata o a nisi o nei tulaga? Mo se faataitaiga, atonu tou faia se talanoaga e uiga i ala o faasalalauga le talafeagai po o le faaosoosoga ia fai ni tala fela’ua’i. E mafai faapefea ona tatou sosola ese mai i tulaga faapena?
-
Kenese 21:9–20.O le se mea e faagaeetia ai lou aiga e uiga i le auala na taulimaina ai e le Atua ia Akara ma Isamaeli ina ua tutuliese i laua e Aperaamo ma Sara?
-
Kenese 22:1–14.E mafai faapefea ona e fesoasoani i lou aiga ina ia iloa le sootaga i le va o le tala i le poloaiina e le Atua o Aperaamo ia osi le taulaga ia Isaako ma le taulaga togiola a le Faaola? E mafai ona e faaali atu ni ata o Aperaamo ma Isaako, ma le Faasatauroga (tagai i le “Aperaamo ma Isaako,” i le Tala o le Feagaiga Tuai) a o talanoa tagata o le aiga e uiga i mea talitutusa latou te iloa i le va o nei mea na tutupu. E mafai foi ona outou usuina se viiga po o se pese e uiga i le taulaga a le Faaola e pei o le “Na Ia auina mai Lona Alo” (Tusipese a Tamaiti, 20), ma vaavaai mo fuaitau o loo faamatala ai le taulaga a le Faaola.
O le a se mea ua talosagaina i tatou e ositaulaga o se aiga? O faapefea ona tatou latalata atili ai i le Atua ona o nei osigataulaga?
Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese fautuaina: “O Le Alofa o le Tamā,” Viiga, nu. 104.
Faaleleia o Suesuega Faaletagata Lava Ia
Faalogo i le Agaga. A o e suesue, ia mata’itu ou mafaufauga ma lagona, e tusa lava pe le fesootai ma mea o loo e faitauina. O na lagona uunai atonu o mea tonu lava na e finagalo le Atua ia e iloa.
Atatusi o Aperaamo ma Isaako, saunia e Jeff Ward