aikona o manatu

Manatu e Nofouta i Ai

O le Feagaiga

I le Feagaiga Tuai atoa, o le a tele lava ina e faitau ai i le upu feagaiga. O aso nei e masani lava ona tatou mafaufau i feagaiga o ni folafolaga paia ma le Atua, ae i le lalolagi anamua, o feagaiga sa avea foi ma se vaega taua o fegalegaleaiga ma le tasi ma le isi. Mo lo latou saogalemu ma le ola, sa manaomia e tagata ona mafai ona talitonuina e le tasi le isi, ma o feagaiga sa o se auala lea e faamausaliina ai lena talitonuina.

O lea la, ina ua fetalai le Atua ia Noa, Aperaamo, po o Mose e uiga i feagaiga, sa Ia valaauina i latou ia ulu atu i se sootaga o le talitonuina faatasi ma Ia. O se tasi o faataitaiga sili ona lauiloa o se feagaiga i le Feagaiga Tuai, o le feagaiga lea na osia e le Atua ma Aperaamo ma Sarai—ona toe faafouina lea ma e na tupuga mai ia i laua o Isaako ma Iakopo (lea na igoa foi ia Isaraelu). E masani ona tatou ta’ua o le feagaiga faa-Aperaamo, e ui lava i le Feagaiga Tuai sa ta’ua ai lava “o le feagaiga.” O le a e iloa ai o le Feagaiga Tuai e faatatau lava i le tala i tagata o e na manatu o i latou lava o suli o le lenei feagaiga—o tagata o le feagaiga.

O le feagaiga faa-Aperaamo o loo faaauau pea ona ta’ua i aso nei, aemaise lava i le Au Paia o Aso e Gata Ai. Aisea? Ona o i tatou foi o tagata o le feagaiga, tusa lava pe o tatou o ni suli moni o Aperaamo, Isaako ma Iakopo pe leai (tagai i le Kalatia 3:27–29). Ona o le mafuaaga lea, e taua ai le malamalama po o le a le feagaiga faa-Aperaamo ma pe faapefea ona faaaoga ia i tatou i aso nei.

O le A le Feagaiga faa-Aperaamo?

Na manao Aperaamo ia “avea o se soo sili atu o le amiotonu” (Aperaamo 1:2), o le mea lea na valaaulia ai o ia e le Atua i se sootaga o se feagaiga. E le o Aperaamo na muamua i ai lenei manaoga, ma e le o ia foi na muamua maua se feagaiga. Na ia saili mo “faamanuiaga o tamā” (Aperaamo 1:2)—faamanuiaga na tuuina atu e ala i le feagaiga ia Atamu ma Eva ma mulimuli ane ia i latou na saili i ia faamanuiaga ma le filiga.

O le feagaiga a le Atua ma Aperaamo na folafolaina atu ai ni faamanuiaga matagofie: o lo latou tofi o le laueleele, o ni fanau se toatele, o le mauaina o sauniga o le perisitua, ma se igoa o le a faamamaluina e augatupulaga e mulimuli mai. Ae o le taulaiga o lenei feagaiga sa le na o faamanuiaga o le a maua e Aperaamo ma lona aiga ae o faamanuiaga foi o le a i ai i fanau uma a le Atua. “E manuia foi oe,” ua fetalai mai ai le Atua, “e manuia foi ia te oe o aiga uma o le lalolagi” (Kenese 12:2–3).

Na tuuina atu ea e lenei feagaiga ia Aperaamo, Sarai ma i latou o e tupuga mai ai se tulaga aloaia i le fanau a le Atua? Ua na’o i le faauigaga o se avanoa e faamanuia ai isi. O le aiga o Aperaamo e tatau ona latou “tauaveina i o latou lima lenei auaunaga ma le Perisitua i atunuu uma,” faasoa atu “faamanuiaga lava o le Talalelei, o faamanuiaga ia o le olataga, o le ola faavavau lava” (Aperaamo 2:9, 11).

O lenei feagaiga o le faamanuiaga lea na mo’omo’o i ai Aperaaamo. Ina ua [ia] mauaina, na faapea ifo Aperaamo i lona loto, “Ua saili atu lau auauna ia te oe ma le naunau lava; o lenei ua ou maua oe” (Aperaamo 2:12).

O le afe tausaga lena ua tuanai, ae o lenei feagaiga ua toefuataiina mai i o tatou aso nei (tagai i le 1 Nifae 22:8–12). Ma o loo faataunuuina i le taimi nei i olaga o tagata o le Atua. O le mea moni, o le faataunuuina o le feagaiga ua faatupulaia le malosi i aso e gata ai, a o agaigai i luma le galuega a le Atua, i le faamanuiaina o aiga i lalolagi atoa. Ma o soo se tagata, e pei o Aperaamo, e manao e avea ma soo malosi atu o le amiotonu, o soo se tasi o loo sailia ma le filifiliga le Alii, e mafai ona avea ma se vaega o lena mea.

aiga i luma o le malumalu

O le A le Uiga o le Feagaiga faa-Aperaamo ia te Au?

O oe o se afafine/atalii o le feagaiga. Na e osia se feagaiga ma le Atua ina ua e papatiso. E te faafouina lena feagaiga i taimi uma e te tagofia ai le faamanatuga. Ma e te osia ni feagaiga paia i le malumalu. A tuu faatasi, o nei feagaiga ua avea ai oe ma tagata auai i le feagaiga faa-Aperaamo, o lona atoatoaga o loo maua i sauniga o le malumalu. E pei ona aoao mai Peresitene Russell M. Nelson, “Mulimuli ane, i totonu o le malumalu paia, e mafai ona avea ai i tatou o ni suli faatasi i faamanuiaga o se aiga e faavavau, e pei ona folafola atu ia Aperaamo, Isaako, Iakopo ma a latou fanau.”¹

E tauala atu i nei feagaiga ma sauniga, ua avea ai i tatou ma nuu o le Atua (tagai i le Esoto 6:7; Teuteronome 7:6; 26:18; Esekielu 11:20). Ua avea i tatou ma ni tagata e ese mai i le lalolagi o loo siomia ai i tatou. O a tatou feagaiga ua mafai ai ona avea i tatou o ni soo moni, ma tuuto o Iesu Keriso. “O a tatou feagaiga,” na faamalamalama mai ai e Peresitene Nelson, “e fusia ai i tatou ia te Ia ma tatou maua ai le mana faaleatua”² Ma a faamanuia e le Atua Lona nuu i Lona mana, e i ai faatasi ma le valaaulia ma le faamoemoe o le a latou faamanuia ai isi—o le a avea i latou “ma se faamanuiaga” i “aiga uma o le lalolagi” (Aperaamo 2:9, 11).

O le malamalamaaga matagofie lenei ua faamatuuina mai ia i tatou ona o le Toefuataiga o le feagaiga faa-Aperaamo e tauala mai i le Perofeta o Iosefa Samita. Afai la e te faitau e uiga i feagaiga i le Feagaaiga Tuai, aua e te mafaufau na o le sootaga a le Atua ma Aperaamo, Isaako ma Iakopo. Mafaufau foi e uiga i le lua sootaga ma Ia. A e faitau e uiga i le folafolaga o fanau e le mafaitaulia (tagai i le Kenese 28:14), aua le mafaufau tau na o le miliona o e ua valaauina Aperaamo o lo latou tamā. Mafaufau foi i le folafolaga a le Atua ia te oe e uiga i aiga e faavavau ma le faatelega e faavavau (tagai i le Mataupu Faavae ma Feagaiga 131:1–4; 132:20–24). A e faitau e uiga i le folafolaga o se eleele o le tofi, aua le mafaufau i le na o le eleele na folafolaina atu ia Aperaamo. Mafaufau foi e uiga i le taunuuga faaselesitila o le lalolagi lava ia—o le tofi na folafolaina mai i e “agamalu” o e “faatalitali ia Ieova” (Mataio 5:5; Salamo 37:9, 11; tagai foi Mataupu Faavae ma Feagaiga 88:17–20). Ma pe a e faitau e uiga i le folafolaga e faapea, o le a faamanuiaina le nuu o le feagaiga a le Atua “aiga uma o le lalolagi” (Aperaamo 2:11), aua e te mafaufau i le na o le auaunaga a Aperaamo po o perofeta o e na tupuga mai ia te ia. Mafaufau foi e uiga i le mea e mafai ona e faia—o se soo osifeagaiga a Iesu Keriso—e avea o se faamanuiaga ia i latou o loo siomiaina oe.

Faamatalaga

1. Russell M. Nelson, “Feagaiga,” Liahona, Nov. 2011, 88.

2. Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 41. Fai mai Peresitene Linda K Burton e faapea: “O le faia ma le tausia o feagaiga, o lona uiga, o le filifili ia fusia faatasi i tatou i lo tatou Tama Faalelagi ma Iesu Keriso. O le tuuto atu e mulimuli i le Faaola” (“O le Mana, Olioli, ma le Alofa i le Tausia o Feagaiga,” Liahona, Nov. 2013, 111).