Sili Atu nai lo le Parataiso, tusia e Kendal Ray Johnson

17–23 Ianuari

Kenese 5; Mose 6

“Ia Aoao Saoloto atu Ia Mea i Lau Fanau”

A o e faitau ma manatunatu loloto i le Kenese 5 ma le Mose 6, tusifaamaumau uunaiga faaleagaga e te maua. O a ni savali e te maua e taua ia te oe ma lou aiga?

Faamaumau Ou Lagona Uunaia

O le tele lava o le Kenese 5 o se lisi o augatupulaga e i le va o Atamu ma Eva ma Noa. Tatou te faitau ai i le tele o igoa, ae e le tele ni mea tatou te iloa e uiga ia i latou. Ona tatou faitau lea e uiga ia Enoka, e ono augatupulaga mai ia Atamu, o lē o loo faamatalaina i le faaupuga faaoso fia iloa ae e lemafaamalamalamaina lenei: “Na la feoa’i foi o Enoka ma le Atua: ua le iloa foi e ia; aua na avea o ia e le Atua” (Kenese 5:24). E mautinoa lava o loo i ai se tala i tua o lena mea. Ae peitai, e aunoa ma nisi faamalamalamaga atili, ua faaauau pea le lisi o augatupulaga.

O le mea e faafetai ai, o le Mose 6 ua faaali mai ai faamatalaga auiliili o le tala e uiga ia Enoka—ma o se tala maoae lava. Tatou te aoao ai e uiga i le lotomaualalo o Enoka, ona le mautonu, o le agavaa na vaaia e le Atua ia te ia, ma le galuega maoae na ia faia o se perofeta a le Atua. Tatou te maua ai foi se ata manino e uiga i le aiga o Atamu ma Eva a o faagasolosolo mai i augatupulaga. Tatou te faitau ai e uiga i le “puleaga tele” a Satani faapea foi ma matua o e na aoaoina a latou fanau i “ala uma o le Atua” ma e uiga i “tagata tala’i o le amiotonu” o e sa “tautatala ma vavalo atu” (Mose 6:15, 21, 23). E faapitoa le taua o mea ua tatou aoaoina e uiga i aoaoga faavae na aoao atu e nei matua ma e na talai atu: faatuatua, salamo, papatisoga, ma le mauaina o le Agaga Paia (tagai i le Mose 6:50–52). O lena aoaoga faavae, e pei o le perisitua o loo aumaia faatasi ai, “sa i ai i le amataga [ma] o le a i ai foi i le iuga o le lalolagi” (Mose 6:7).

Manatu mo Suesuega Faaletagata Lava Ia o Tusitusiga Paia

Mose 6:26–36

O le perofeta o se tagatavaai

A o e suesue i le Mose 6:26–36, o le a se mea ua e aoaoina e uiga i mata, pouliuli, ma le vaai? I taimi o Enoka, o ai sa le mafai ona “vaai mamao”? Aisea na le mafai ai e nei tagata ona vaaia le upumoni? O le a le mea na mafai ona vaaia e Enoka? O le se mea na faatupuina lou faatuatua e faapea, o perofeta i ona po nei o ni tagatavaai? (tagai i le fuaiupu 36; Taiala i Tusitusiga Paia, “Tagatavaai,” scriptures.ChurchofJesusChrist.org).

Mose 6:26–47

E valaauina i tatou e le Atua e fai Lana galuega e ui lava i o tatou faaletonu.

E le o se mea e le masani ai lo tatou lagona o le lofituina i mea ua valaauina i tatou e le Alii e fai. E oo lava ia Enoka na i ai foi ona lagona faapena ina ua valaauina o ia e le Atua e fai ma perofeta. A o e faitauina le Mose 6:26–36, vaavaai pe aisea na lagona ai e Enoka le lofituina ma o le a foi le mea na fetalai le Atua e tuu atu ai ia te ia le lototele. I fuaiupu 37–47, vaavaai mo ni auala na lagolagoina ai e le Atua ia Enoka ma musuia ai o ia e fai Lana galuega (tagai foi Mose 7:13). Atonu e te fatusatusaina le aafiaga o Enoka ma aafiaga o isi perofeta na lagonaina le le atoatoa, e pei o Mose (tagai i le Esoto 4:10–16), Ieremia (tagai i le Ieremia 1:4–10), Nifae (tagai i le 2 Nifae 33:1–4), ma Moronae (tagai i le Eteru 12:23–29). O le a sou lagona, o le a se mea e finagalo le Atua e te aoaoina mai i nei mau e uiga i le galuega ua Ia tuuina mai e te faia?

Tagai foi i le Iakopo 4:6–8.

Mose 6:48--68

O le aoaoga faavae o Keriso e totonugalemu i le fuafuaga o le faaolataga a le Atua.

Ona ua ia i tatou le tusi a Mose, ua tatou iloa ai na aoaoina e le Atua Ana fanau i le ala e maua ai le faamagaloga ma le togiolaina talu mai lava le amataga. I tusitusiga paia, o nei aoaoga e ta’ua i nisi taimi o aoaoga faavae o Keriso (tagai i le 2 Nifae 31:13–21). A o e suesue i le Mose 6:48–68, saili mo le mea e tatau ona tatou iloa ma faia ina ia faaolaina ai. Atonu e aogā le tusi o lau oe lava aotelega o mea na aoao mai e Enoka. Aisea e taua ai le iloa o nei upumoni na aoaoina mai lava talu mai le vaitaimi o Atamu ma Eva? O le a se mea ua musuia oe e fai o se taunuuga o lou suesueina o nei aoaoga?

Mose 6:51–62

“Ia aoao saoloto atu ia mea i lau fanau.”

Na aoaoina Atamu ma Eva i upumoni taua o le talalelei a Iesu Keriso. Ae o afioga a le Atua i le Mose 6:27–28 ua faamanino mai ai o augatupulaga e i luma atu o Enoka, o le toatele o tagata sa lei toe ola ai i na upumoni. Na finagalo le Alii e toe fuatai mai e Enoka upumoni na leiloloa—faatasi ai ma poloaiga na uluai tuuina atu ia Atamu: “Ia aoao saoloto atu ia mea i lau fanau” (Mose 6:58). A o e faitau i le Mose 6:51–62, o le a se mea ua e iloa e uiga ia Iesu Keriso? O le a se mea ua e maua o le a faapitoa le taua i le tupulaga faia’e? O le a se mea e mafai ona e faia e fesoasoani e tuufaasolo atu ai nei upumoni i augatupulaga o le lumanai?

E tatau i matua ona aoao atu le talalelei ia latou fanau.

Manatu mo Suesuega Faaleaiga o Tusitusiga Paia ma Afiafi Faaleaiga

Kenese 5; Mose:5–25, 46.O le faitau e uiga i le “tusi faamanatu” lea na tausia e le aiga o Atamu ma Eva, e ono musuia ai lou aiga e faia sa outou lava tusi faamanatu. Talanoa o se aiga po o a ni mea tou te mananao ia aofia ai. Atonu o loo i ai ni a outou ata, tala po o pepa o faamatalaga mai le talafaasolopito o le tou aiga. Atonu foi tou te filifili ia aofia ai mea o loo tutupu i le tou aiga i le taimi nei. O a ni mea o le a taua i augatupulaga o le lumanai? E mafai foi ona outou soalaupule i ni auala e mafai e fuaitau “e ala i le agaga o musumusuga” (Mose 6:5) ma le “ata na tuu mai e tamatamaiaao o le Atua” (Mose 6:46) ona taialaina a outou taumafaiga. Mafaufau e sefe faamatalaga mai le tou tusi faamanatu i le FamilySearch.org.

Mose 6:53–62.E faapefea ona tatou taliina le fesili a Atamu o loo maua i le Mose 6:53? O a ni tali ua tatou maua i fuaiupu 57–62?

Mose 6:59O le a le uiga o le “toe fanauina … i le malo o le lagi”? O a ni mea e mafai ona tatou faia ina ia faaauau ai pea ona tatou toe fanauina i o tatou olaga atoa? Mo se fesoasoani, tagai i le Alema 5:7–14, 26; Taiala i Tusitusiga Paia, “Toe Fanauina, Fanau i la le Atua” scriptures.ChurchofJesusChrist.org; David A. Bednar, “[Faatumauina] Pea le Faamagaloina o a Outou Agasala” (Liahona, Me 2016, 59–62).

Mose 6:61.O le a se mea ua tatou aoaoina e uiga i le Agaga Paia mai lenei fuaiupu?

Mose 6:63.O a nisi o mea o loo “ua molimau [ia Keriso]”? (tagai foi i le 2 Nifae 11:4). Mafaufau e valaaulia tagata o le aiga e faasoa mai se mea o latou vaaia “i le lagi i luga” po o “luga o le lalolagi” ua fesoasoani latou te aoao ai e uiga ia Iesu Keriso. Mo se faataitaiga, e faapefea ona faamanatu mai e laau, maa, po o le la ia i tatou e uiga i le Faaola? O le a se mea o aoao mai e faalaniga “vai ola” ma le “areto o le ola” ia i tatou e uiga ia te Ia?? (Joane 4:10–14; 6:35).

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ou te Alu i Mea e te Tofia,” Viiga, nu. 270.

Faaleleia o Suesuega Faaletagata Lava Ia

Vaavaai mo faatusa. I tusitusiga paia, o mea faitino po o mea e tutupu e masani ona fai ma sui po o faatusa o upumoni faaleagaga. O nei faatusa e mafai ona faatamaoaigaina ai lou malamalama i aoaoga faavae. Mo se faataitaiga, o le a se mea e te aoaoina mai i faatusa o mata ma le eleele o loo i le Mose 6:35?

O Atamu ma Eva o Loo Aoao le La Fanau, saunia e Del Parson