O Mose ma le Laau Talatala Mumu, saunia e Harry Anderson

21–27 Mati

Esoto 1–6

“Ua Ou Manatua Foi La’u Feagaiga”

Amata au suesuega i se tatalo, ma ole atu mo le fesoasoani ina ia maua savali o loo i le Esoto 1–6 e talafeagai i lou olaga ma lau auaunaga i le malo o le Atua.

Tusifaamaumau Ou Lagona Uunai

O le valaaulia e nonofo i Aikupito na faasaoina moni ai lava le aiga o Iakopo. Ae ina ua mavae le fia selau o tausaga, sa faapea ona faapologaina ma sauaina i latou na tupuga mai ai e se farao fou “o lē na te lei iloa Iosefa” (Esoto 1:8). Atonu e faigofie i tagata Isaraelu ona tau manatu pe aisea na faatagaina ai e le Atua lenei mea e tupu ia i latou, o Lona nuu o le feagaiga. Pe sa Ia manatuaina le feagaiga na Ia osia ma i latou? Pe sa avea pea ea i latou ma Ona nuu? Pe na mafai ona Ia silafia le tele o lo latou puapuagatia?

Atonu e i ai ni taimi na e lagonaina ai le fia faia o ni fesili faapena. Atonu e te tau mafaufau, Po o silafia ea e le Atua mea ia ma te feagai? Po o mafai ea ona Ia lagona au aioiga mo se fesoasoani? O le tala o loo i le Esoto i le laveaiina o Isaraelu mai Aikupito e tali manino ai fesili faapena: E le mafai ona galo i le Atua Lona nuu. Na te manatuaina Ana feagaiga ma i tatou ma o le a faataunuuina i Lana lava taimi ma [i Lana lava] ala (tagai Mataupu Faavae ma Feagaiga 88:68). Ua Ia tautino mai, “Ou te faaolaina mai foi outou i le lima faaloaloa.” “O au lava o Ieova, o lo outou Atua, o le aumaia outou i lalo o [a outou] avega mamafa” (Esoto 6:6–7).

Mo se vaaiga aoao o le tusi o Esoto, tagai i le “Exodus, book of” i le Bible Dictionary.

Manatu mo Suesuega Faaletagata Lava Ia o Tusitusiga Paia

Esoto 1–2

O Iesu Keriso o lo’u Laveai.

O se tasi o autu aupito taua i le tusi o Esoto o le i ai lea i le Atua o le mana e faasaoloto ai Lona nuu mai faiga saua. O le faapologaina o tagata Isaraelu e pei ona faamatalaina i le Esoto 1 e mafai ona vaaia o se faailoga o le nofo pologa lea tatou te feagai uma ai lava ona o le agasala ma le oti (tagai 2 Nifae 2:26–27; 9:10; Alema 36:28). Ae o Mose, o lē na laveaia tagata Isaraelu, e mafai ona vaaia o se ituaiga po o se faatusa, o Iesu Keriso (tagai i le Teuteronome 18:18–19; 1 Nifae 22:20–21). Faitau le Esoto 1–2 ma mafaufau i nei faatusatusaga. Atonu e te maitauina mo se faataitaiga, o Mose ma Iesu na faasaoina mai le oti ao avea ma tamaiti laiti (tagai i le Esoto 1:22–2:10; Mataio 2:13–16) ma sa o laua faaaluina ni taimi i le vao ao lei amataina a laua galuega (tagai i le Esoto 2:15–22; Mataio 4:1–2). O a nisi malamalamaaga loloto e te aoaoina mai le Esoto e uiga i le faapologaina faaleagaga? ma e uiga i le laveaiina e le Faaola?

Tagai foi i le D. Todd Christofferson, “Togiola,” Liahona, Me 2013, 109–12.

Mose i le Vaoutuutu, © Providence Collection/licensed from goodsalt.com

Esoto 3-4

E tuuina atu e le Atua le mana ia i latou ua Ia valaauina e fai Lana galuega.

Ua tatou iloa i aso nei o Mose o se perofeta ma se taitai maoae. Ae peitai, sa lei vaai Mose ia te ia lava i le ala lena, i le taimi muamua na valaauina ai o ia e le Alii. Sa mafaufau Mose “O ai ea au nei, ou te alu atu ai ia Farao?” (Esoto 3:11). Ae peitai, na silafia lelei e le Alii le tagata moni na i ai Mose—ma le tagata e mafai ona avea ai o ia. A o e faitau i le Esoto 3–4, maitau le ala na faamautinoa atu ai le Alii ia Mose ma tali atu i ona atugaluga. O a ni mea e te maua i nei mataupu e ono mafai ona musuia ai oe i taimi e te lagona ai le le atoatoa? E faapefea ona faamanuia e le Alii ia Ana auauna i le faateleina o le mana e fai ai Lona finagalo? (tagai Mose 1:1–10, 24–39; 6:31–39, 47). O anafea na e vaaia ai o fai e le Atua Lana galuega e ala atu ia te oe po o nisi foi?

Mo nisi faamatalaga e uiga i le olaga ma le galuega a Mose, tagai i le “Mose” i le Bible Dictionary po o le Guide to the Scriptures.

Esoto 5–6

O faamoemoega a le Alii o le a faataunuuina i Lana lava taimi.

E ui lava ina sa lototoa Mose e alu atu i luma o Farao, e pei lava ona poloaiina ai e le Atua, ma fai atu ia te ia e faasaoloto tagata Isaraelu, peitai, sa musu Farao. O le mea moni, na atili ai ona ia faafaigataina olaga o tagata Isaraelu. Atonu na tau manatunatu Mose ma tagata Isaraelu pe aisea na le taunuu ai ia mea, e ui lava ina sa faia e Mose mea na faatonuina ai o ia e le Atua e fai (tagai i le Esoto 5:22–23).

Na i ai ea se taimi na e manatua ai sa e faia le finagalo o le Atua, ae e te lei vaaia le manuia lea sa e faamoemoeina. Iloilo le Esoto 6:1–8, ma vaai mo le mea na fetalai le Alii e fesoasoani ia Mose ia finafinau ai. Sa faapefea ona fesoasoani le Alii ia te oe ina ia e finafinau i le faia o Lona finagalo?

Esoto 6:3

O ai Ieova?

O Ieova o le tasi lea o suafa o Iesu Keriso ma e faatatau i le Faaola i le muai olaga. O le Faaliliuga a Iosefa Samita o loo faamanino mai ai o perofeta o Aperaamo, Isaako ma Iakopo na latou iloa le Alii i le suafa lea (tagai Esoto 6:3, vaefaamatalaga c). E masani lava, pe a vaaia le faaupuga “le Alii” i le Feagaiga Tuai, o lona uiga e faatatau i a Ieova. I le Esoto 3:13–15, o le faalagiga “O A’U” o se tasi foi lena o faasinoga ia Ieova (tagai foi Mataupu Faavae ma Feagaiga 38:1; 39:1).

Manatu mo Suesuega Faaleaiga o Tusitusiga Paia ma Afiafi Faaleaiga

Esoto 1–2.Sa i ai ni nai tamaitai na faia ni matafaioi taua i le fuafuaga a le Atua e faafaileleina se faaola mo tagata Isaraelu. E mafai ona outou faitau o se aiga e uiga i tina faatosaga o Sepela ma Pu’a (Esoto 1:15–20); le tina o Mose, o Iokapeta, ma lona tuafafine o Miriama (Esoto 2:2–9; Numera 26:59); o le afafine o Farao (Esoto 2:5–6, 10); ma le toalua o Mose o Sepora (Esoto 2:16–21). Sa faapefea ona faalauteleina e nei tamaitai le fuafuaga a le Atua? E faapefea ona faamanatu mai e o latou aafiaga ia i tatou le misiona a Iesu Keriso? E mafai foi ona tatou aoina mai ni ata o tamaitai o le tou aiga ma tuaa ma faasoa atu ni tala e uiga ia i latou. Ua faapefea ona faamanuiaina i tatou e tamaitai amiotonu? O le savali a Peresitene Russell M. Nelson “O Se Talosaga i O’u Tuafafine” (Liahona, Nov. 2015, 95–98) e mafai ona faaopoopo atu i la outou talatalanoaga.

Esoto 3:1–6.Ina ua latalata atu Mose i le laau talatala mumu, na faatonuina o ia e le Alii e aveese ona seevae o se faailoga o le faaaloalo. E faapefea ona tatou faaalia le faaaloalo i nofoaga paia? Mo se faataitaiga, o le a se mea e mafai ona tatou faia e avea ai o tatou fale ma se nofoaga paia e mafai ona afio ai le Agaga o le Alii? E mafai faapefea ona tatou faaali atu lo tatou faaaloalo sili atu i isi nofoaga paia?

Esoto 4:1–9.Na tuuina atu e le Alii ia Mose le mana e faatino ai vavega se tolu e fai ma faailoga e ta’u atu ai i le fanauga a Isaraelu o Ia na auina atu Mose. O a ni mea o loo aoao mai e nei faailoga ia i tatou e uiga ia Iesu Keriso?

Esoto 5:2.O le a se uiga mo i tatou o le “iloa” o le Alii? E faapefea ona tatou iloaina o Ia? (mo se faataitaiga, tagai i le Alema 22:15–18). E faapefea e lo tatou sootaga ma Ia ona aafia ai lo tatou manao e usitai ia te Ia? (tagai foi i le Ioane 17:3; Mosaea 5:13).

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Faaaloalo o le Alofa Lea,” Tusipese a Tamaiti, 12.

Faaleleia o Lo Tatou Aoao Atu

Ia tausia se api talaaga o suesuega. Atonu e te iloa le aoga o le faaaoga o se api talaaga po o se tamai api e tusi ai i lalo mafaufauga, manatu, fesili, po o lagona uunai e oo mai a’o e suesue.

Ua Maua Mose i le Vaoutuutu e le Afafine o Farao, saunia e George Soper