Ata tusi o Mose i luga o le Mauga o Nepo, © Providence Collection/licensed from goodsalt.com

16–22 Me

Teuteronome 6–8; 15; 18; 29–30; 34

“Ne’i Galo Ia Te Oe Ieova”

Mafaufau loloto pe faapefea ona e fetuunaia gaoioiga i lenei otootoga i manaoga o tamaiti o loo e aoaoina. Mo se faataitaiga, afai e te aoaoina tamaiti laiti, e mafai ona e fesoasoani ia latou sauniuni mo le papatisoga i le fetuunaʻiina o gaoioiga i lalo o le “Tausia o aʻu feagaiga e aumaia ai faamanuiaga silisili” i le vaega mo tamaiti matutua.

Tusi Faamaumau Ou Lagona Uunai

Valaaulia le Fefaasoaai

Ia valaaulia tamaiti e fetufaai mai ni mea na latou aoaoina e uiga ia Mose i le Peraimeri po o le fale i nai vaiaso ua tuanaʻi. Afai e manaomia, faʻaali ni ata o mea na tutupu mai le olaga o Mose e fesoasoani ia latou manatua ai. Taʻu atu ia i latou o le aso nei o le a e talanoa ai e uiga i mea na aoao atu e Mose i le iuga o lona olaga i le lalolagi.

Aoao atu le Aoaoga Faavae: Tamaiti Laiti

Teuteronome 6:5

Ou te alofa i le Alii ma lo’u loto atoa.

Na aoao e Mose le fanauga a Isaraelu e tatau ona latou alolofa i le Alii ma o latou loto atoa, agaga atoa, ma le malosi atoa. Mafaufau i ni auala e mafai ona e fesoasoani ai i tamaiti o loo e aoaoina ia faateleina lo latou alofa mo le Tama Faalelagi ma le Faaola.

Gaoioiga e Mafai Ona Fai

• Tusi i luga o le laupapa se fatu, se auivi o se tino, ma se lima malosi. Faitau le Teuteronome 6:5, ma tusi i ata a o e faitauina upu “loto,” “agaga,” ma le “malosi.” Valaaulia tamaiti e feauauai i le tusi atu i ata a o toe faitau e le vasega le mau faatasi ma oe.

• Usu se pese o loo aoao mai e uiga i le alofa o le Atua, e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16). Fesoasoani i tamaiti e saili upu i le pese e iloa ai e alofa le Tama Faalelagi ia i tatou. Fesoasoani ia latou mafaufau i ni auala e mafai ona tatou faaali atu ai ia te Ia tatou te alolofa foi ia te Ia.

Teuteronome 6:6–9

O tusitusiga paia o afioga ia a le Atua.

O le fautuaga i le Teuteronome 6:6–9 sa faatatau e fesoasoani ai i tagata Isaraelu “ne’i galo ia te i [latou] Ieova” ma Ana afioga (fuaiupu 12). E mafai faapefea ona e fesoasoani i tamaiti ia fai tusitusiga paia o se vaega o o latou olaga?

Gaoioiga e Mafai Ona Fai

• Valaaulia se tamaitiiti e nanā se kopi o tusitusiga paia i totonu o le potu ao moeiini uma tamaiti. Ona valaaulia lea o tamaiti e pupula o latou mata ma taumafai e saili ia tusitusiga paia. I le faaaogaina o fasifuaitau autu mai le Teuteronome 6: 6–9, faasoa ma tamaiti e faapea na taʻu atu e Mose i tagata Isaraelu e tuu fuaitau o mau i nofoaga latou te vaai i ai ma aoao mai ia i latou i aso uma. Fesoasoani i tamaiti e mafaufau i nofoaga i o latou fale e mafai ai ona latou tuuina i ai tusitusiga paia ina ia vaai i ai i aso uma.

• Usu se pese e faatatau i tusitusiga paia, e pei o le “Saili, Mafaufau Loloto, ma Tatalo” (Tusipese a Tamaiti,66). Faasoa atu lau molimau e faapea o tusitusiga paia o afioga ia a le Atua, ma taʻu i tamaiti le ala latou te faamanuia ai lou olaga.

O Iesu Keriso o le perofeta e pei o Mose.

Teuteronome 18:15–18

Ua aoao i tatou e perofeta e uiga ia Iesu Keriso.

Na valoia e Mose o le a afio mai Iesu Keriso ma e tatau ona tatou faalogo i upu o le a aoao mai e Iesu.

Gaoioiga e Mafai Ona Fai

• Fesoasoani i se tasi o tamaiti e faitau le Teuteronome 18:18, ma taʻu atu i tamaiti o le Perofeta e pei o Mose o le a faatu mai e le Atua o Iesu Keriso. Ina ia fesoasoani i tamaiti ia iloa auala e tutusa ai Mose ma Iesu, aumai ni ata o mea na faia e Mose ma mea na faia e Iesu Keriso, ma tuu i tamaiti e faafetaui i latou. Mo se faataitaiga, e mafai ona e aumaia ni ata o Mose ma Iesu o faauʻu isi ma aoao atu (tagai Tusi Ata o le Talalelei, nu.15, 16, 38, 39).

• Faaali atu i tamaiti se ata o lo tatou perofeta i aso nei, ma faasoa atu se mea na ia aoaoina mai e uiga i le Faaola. Valaaulia tamaiti e tusi se ata o le perofeta e faasoa ma o latou aiga.

Aoao atu le Aoaoga Faavae: Tamaiti Matutua

Teuteronome 6:6–9

E mafai ona ou tausia le afioga a le Atua i lo’u loto.

Na aoao atu Mose, e tatau ona tatou manatua le afioga a le Atua i o tatou loto, ma na ia tuuina foi i tagata Isaraelu le fautuaga e faatumau pea le afioga a le Atua i o latou luma. E faapefea ona e faamalosia tamaiti e aoao mai le afioga a le Atua i aso uma?

Gaoioiga e Mafai Ona Fai

• I luga o le laupapa, tusi upu ma fasifuaitau mai le Teuteronome 6:6–9 e taʻu mai ai le taimi ma le auala e manatua ai e tagata Isaraelu le afioga a le Atua (e pei o le nofo, savali, taʻoto, lima ma le fale). Fai atu i tamaiti e sue upu nei i fuaiupu. O le a le mea ua aoao mai e nei upu e uiga i le ala e avea ai tusitusiga paia o se vaega o o tatou olaga i aso uma? Fesili i tamaiti po o le a le mea e mafai ona latou faia e manatua ai le afioga a le Atua i o latou olaga i aso uma.

• Tuu atu i tamaiti uma se fasipepa, ma valaaulia i latou e tusi i lalo se fuaitau mai le Teuteronome 6 e taua ia i latou. Fai atu ia i latou e faasoa mai pe aisea na latou filifilia ai la latou fuaitau. Fautua atu latou te teuteuina a latou pepa ma faatautau i totonu o lo latou fale e manatua ai. Uunaia tamaiti e tusi i lalo ma faaali atu isi fasifuaitau latou te mauaina i tusitusiga paia.

Teuteronome 15:7–11

E mafai ona ou auauna atu ma le fiafia ia i latou e manaomia le fesoasoani.

O aoaoga i le Teuteronome 15:7–11 e mafai ona fesoasoani i tamaiti o loo e aoaoina ia malamalama o le fesoasoani i isi e tele atu mea e aofia ai nai lo na o taga. E tatau ona faia ma le loto malie.

Gaoioiga e Mafai Ona Fai

• Tusi o ai, aisea, ma le faapefea i luga o le laupapa. Valaaulia tamaiti e faitau le Teuteronome 15:7-11 ia iloa ai po o ai e tatau ona matou fesoasoani i ai, aisea e tatau ai ona tatou fesoasoani ia i latou, ma pe tatau faapefea ona lagona o tatou loto e faatatau i le fesoasoani. Tuu atu ia i latou e tusi i luga o le laupapa mea ua latou mauaina. Usu se pese e faamalosia ai le feau i nei fuaiupu, e pei o le “Ua Ou Faia Ea Se Lelei?” (Viiga, nu. 136).

• Fai i tamaiti e mafaufau i se tasi e mafai ona latou fesoasoani i ai—ae maise lava i o latou lava aiga. Tuu se taimi mo i latou e tusi ai i lalo ni mea o le a latou faia i lenei vaiaso e fesoasoani ai i lena tagata. Afai e mafai, fai ni fuafuaga e aapa atu o se vasega i se tasi o manaomia le fesoasoani.

Teuteronome 30:8–10

O le tausia o aʻu feagaiga e aumaia ai faamanuiaga silisili.

E pei o le fanauga a Isaraelu, tatou te manaomia pea faamanatu e ola ai i a tatou feagaiga. O le faitauina o le Teuteronome 30:8-10 e mafai ona fesoasoani ai i tamaiti ia malamalama lelei ai i le uiga o le feagaiga ma musuia i latou e tausia a latou feagaiga.

Gaoioiga e Mafai Ona Fai

• Fesili atu i tamaiti po o le a le feagaiga (pe a latou manaomia se fesoasoani, fautua atu latou te mauaina se faamatalaga i le uiga o le “Feagaiga” i le Taiala i Tusitusiga Paia [scriptures.ChurchofJesusChrist.org]). Tusi se siata e lua-koluma i luga o le laupapa ma ulutala nei: folafolaga a Isaraelu ma folafolaga a le Atua. Valaaulia tamaiti e sue le Teuteronome 30:8-10 ma faatumu le siata. (Afai e tatau ai, fesoasoani i tamaiti ia malamalama i uiga o fuaitau i le fuaiupu 9.) Molimau atu i faamanuiaga ua oo mai ia te oe mai le tausia o au feagaiga.

• Valaaulia tamaiti e lisi i luga o le laupapa folafolaga na tatou faia i le papatisoga ma folafolaga na faia e le Tama Faalelagi ia i tatou (tagai Mataupu Faavae ma Feagaiga 20:37, 77). O a ni mea tatou te mafai ona fai e manatua ai pea le Faaola ma tausi a tatou feagaiga?

Uunaia le Aoaoina i le Aiga

Valaaulia tamaiti e faafoliga o oe o se tasi o lo latou aiga, ma fai atu ia i latou e taʻu atu ia te oe se mea se tasi na latou aoaoina i le vasega i le asō. Uunaia i latou e faasoa mai mea na latou taʻuina atu ia te oe i se tasi o tagata o latou aiga pe a latou taunuu i le fale.

Faaleleia o Lo Tatou Aoao Atu

Fai fesili musuia. Fai ni fesili e valaaulia ai tamaiti e le gata i le lipotia o mea moni ae ia faasoa a latou molimau i le moni o le talalelei. Mo se faataitaiga, afai o outou talanoaina poloaiga, e mafai ona e fesili i tamaiti e faasoa mai pe na faapefea ona faamanuiaina i latou ona o le tausia o poloaiga.