9–15 Me

Numera 11–14; 20–24

“Aua Lava Ne’i Outou Fouvale ia Ieova, Aua Foi Tou te Matatau”

O le otootoga lenei o loo faatauaina ai nisi o le tele o mataupu faavae taua i le tusi o Numera. Ia nofouta foi i isi atonu e fesoasoani le Agaga ia e iloa.

Tusifaamaumau Ou Lagona Uunai

E tusa lava pe savavali, e le masani ona alu se 40 tausaga e malaga ai mai le vao o Sinai e agai atu i le nuu o le folafolaga i Kanana. Ae o le umi lena na manaomia e le fanauga a Isaraelu, e le ina ia uia ai le mamao faalelaufanua ae ia uia ai le mamao faaleagaga: o le mamao i le va o tagata sa latou i ai ma tagata na manaomia i latou e le Alii ia avea ai, o Lona nuu o le feagaiga.

O loo faamatala e le tusi o Numera ni isi o mea na tutupu i le aluga o na tausaga e 40, e aofia ai lesona na manaomia ona aoaoina e le fanauga a Isaraelu a’o le’i ulufale atu i le nuu o le folafolaga. Sa latou aoao e uiga i le faamaoni i auauna filifilia a le Alii (tagai i le Numera 12). Sa latou aoao e uiga i le faatuatuaina o le mana o le Alii, e tusa lava pe foliga mai le lumanai e leai se faamoemoe (tagai i le Numera 13–14). Ma sa latou aoaoina o le leai o se faatuatua po o le le faatuatuaina e aumaia ai le afaina faaleagaga, peitai e mafai ona latou salamo ma vaai atu i le Faaola mo le faamalologa (tagai i le Numera 21:4–9).

Tatou te pei uma lava o Isaraelu i ni isi o itu. Tatou te iloa uma lava le faapeī o le i ai i totonu o se togavao faaleagaga, ma o lesona lava ia sa latou aoaoina e mafai ona fesoasoani e saunia ai i tatou e ulufale atu i lo tatou lava nuu o le folafolaga: o le ola faavavau faatasi ma lo tatou Tama Faalelagi.

Mo se vaaiga aoao o le tusi o Numera, tagai i le “Numbers” i le Bible Dictionary.

Manatu mo Suesuega Faaletagata Lava Ia o Tusitusiga Paia

Numera 11:11–17, 24–29; 12

O faaaliga e avanoa mo tagata uma, ae e taitai e le Alii Lana Ekalesia e ala i Lana perofeta.

I le Numera 11:11–17, 24–29, maitau le faafitauli na feagai ma Mose ma le tali na fautuaina atu e le Atua. O le a lou manatu i le uiga o le tala a Mose ina ua ia fai mai e manao “ia fai ma perofeta le nuu uma o Ieova”? (fuaiupu 29). Ao e mafaufau loloto i nei fuaiupu, mafaufau i upu nei mai ia Peresitene Russell M. Nelson: “O finagalo moni ea le Atua e fetalai atu ia te oe? Ioe! … “Oi, e matua anoanoai mea e finagalo lou Tama o i le Lagi ia e iloa” (“Faaaliga mo le Ekalesia, Faaaliga mo o Tatou Olaga,” Liahona, Me 2018, 95).

Ae ui i lea, o le fai mai e mafai e tagata uma ona avea ma se perofeta e le faapea ai e mafai e i latou uma ona taitai le nuu o le Atua i le ala sa fai ai e Mose. O le mea na tupu o loo tusifaamaumauina i le Numera 12 ua faamanino ai lenei mea. Ao e faitau i lenei mataupu, o a ni lapataiga e te tau i ai? O le a se mea e te lagona e finagalo le Alii ia e malamalama i ai e faatatau i faaaliga faaletagata lava ia ma le mulimuli i le perofeta?

Tagai foi i le 1 Nifae 10:17; Mataupu Faavae ma Feagaiga 28:1–7; Dallin H. Oaks, “O Laina e Lua o Fesootaiga,” Liahona, Nov. 2010, 83–86.

Numera 13–14

Faatasi ai ma le faatuatua i le Alii, e mafai ai ona i ai lo’u faamoemoe mo le lumanai.

Ao e faitau i le Numera 13–14, taumafai e tuu oe lava i le tulaga o [fanauga] a Isaraelu. Aisea e te manatu na latou mananao ai e “toe foi atu i Aikupito”? (Numera 14:3). E te faapei o i latou o e na manatu i itu leaga e uiga i le ulufale atu i le nuu o le folafolaga? E faapefea ona e faamatalaina le isi “loto” sa i ai ia Kalepo? (Numera 14:24). O le a se mea e faagaeetia ai oe e uiga i le faatuatua o Kalepo ma Iosua, ma e mafai faapefea ona e faaaogaina a laua faataitaiga i tulaga e feagai ma oe?

Tagai foi i le Aoaoga a Peresitene o le Ekalesia: Gordon B. Hinckley (2016), 75–76.

Numera 21:4–9

Afai ou te vaai atu ma le faatuatua ia Iesu Keriso, e mafai ona Ia faamaloloina a’u faaleagaga.

Na silafia e perofeta o le Tusi a Mamona le tala ua tusifaamaumauina i le Numera 21:4–9 ma malamalama i lona taua faaleagaga. O le a se mea ua faaopoopo mai e le 1 Nifae 17:40–41; Alema 33:18–22; ma le Helamana 8:13–15 i lou malamalamaaga e uiga i lenei tala? Ao e suesue i nei fuaitau, mafaufau e uiga i le faamalologa faaleagaga o loo e faamoemoe i ai. Na tatau ia Isaraelu ona “[vaai] i le gata apamemea” (Numera 21:9) ina ia malolo ai. O le a se mea ua musuia oe e fai ina ia atili atoatoa ai lou “vaai atu ai i le Alo o le Atua ma le faatuatua”? (Helamana 8:15).

Tagai foi i le Ioane 3:14–15; Mataupu Faavae ma Feagaiga 6:36; Dale G. Renlund, “E Tele Mea e Manuia Ai,” Liahona, Me 2019, 70–73.

Sa faamaloloina Isaraelu e ala i le tetepa a’e i le gata apamemea.

Numera 22–24

E mafai ona ou mulimuli i le finagalo o le Atua, e tusa lava pe taumafai isi e tauanau a’u e ‘aua.

Ina ua iloa e Palako, o le tupu o Moapi, na latalata atu Isaraelu, sa valaau atu o ia ia Palaamo, o se tagata sa lauiloa i le faaleoina atu o faamanuiaga ma fetuu. Sa manao Palako ia ona faavaivai Isaraelu e ala i le fetuuina o i latou. Maitau le ala na taumafai ai Palako e tauanau Palaamo (tagai i le Numera 22:5–7, 15–17), ma mafaufau e uiga i faaosoosoga lua te feagai ia faasagatau atu ai i le finagalo o le Atua. O le a se mea ua faagaeetia ai oe e uiga i tali a Palaamo Numera 22:18, 38; 23:8, 12, 26; 24:13?

O le mea e faanoanoa ai, e foliga mai na iu lava ina gauai atu Palaamo i le malosi o le [tauanau] ma faalataina ai Isaraelu (tagai i le Numera 31:16; Iuta 1:11). Mafaufau loloto i auala e mafai ona e tumau faamaoni ai i le Alii e ui lava i tauanauga malosi mai isi.

Manatu mo Suesuega Faaleaiga o Tusitusiga Paia ma Afiafi Faaleaiga

Numera 11:4–6.Pe e tutusa ea o tatou uiga i uiga na faaalia e Isaraelu i le Numera 11:4–6? E mafai faapefea ona fesoasoani le fautuaga o loo i le Mataupu Faavae ma Feagaiga 59:15–21?

Numera 12:3.Na faapefea ona faaalia e Mose na “matuā agamalu” lava o ia i le Numera 12 po o i isi mau na e faitau i ai? Atonu e te toe faamanatua le faamalamalamaga a Elder David A. Bednar o le agamalu i lana savali “Agamalu ma Maulalo i le Loto” (Liahona, Me 2018, 30–33) po o le “Meek, Meekness” i le Guide to the Scriptures (scriptures.ChurchofJesusChristorg). O a ni mea ua tatou aoao i ai e uiga i le ala e mafai ona faateleina ai lo tatou agamalu? O a ni faamanuiaga e mafai ona oo mai ao tatou faia lea mea?

Numera 13–14.E mafai e ni tagata se toalua (pe sili atu) o lou aiga ona faafoliga e “matamata” (Numera 13:17) i se isi itu o le tou fale e pei o le nuu lea o le folafolaga. Ona latou tuuina mai lea o se lipoti e faatatau i le Numera 13:27–33 po o le Numera 14:6–9. O le a se mea ua tatou aoaoina e uiga i le faatuatua mai lipoti eseese e lua o loo i nei fuaiupu? E mafai faapefea ona tatou faapei atili o Iosefa ma Iakopo?

Numera 21:4–9.A uma ona faitau le Numera 21:4–9, faatasi ai ma le 1 Nifae 17:40–41; Alema 33:18–22; ma le Helamana 8:13–15, e mafai ona fai e lou aiga se gata pepa po o le kelei ma tusi ai luga po o luga o se pepa nisi o mea faigofie e mafai ona outou faia e “vaai ae i luga ma le faatuatua i le Alo o le Atua” (Helamana 8:15).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Iesu, a Mafaufau ia Oe,” Viiga, nu. 76.

Faaleleia o Lo Tatou Aoao Atu

Fesoasoani i lou aiga e atiina ae le ola tutoatasi faaleagaga. “Nai lo o le tuuina atu o faamatalaga, fesoasoani i [tagata o lou aiga] ia iloa upumoni o le talalelei mo i latou lava i tusitusiga paia ma upu a perofeta” (Teaching in the Savior’s Way, 28).

Mose ma le Gata Apamemea, saunia e Judith A. Mehr