“16–22 Me. Teuteronome 6–8; 15; 18; 29–30; 34: ‘Ne’i Galo ia te Oe o Ieova’” Sau, Mulimuli Mai ia te A’u—Mo Tagata Taitoatasi ma Aiga: Feagaiga Tuai 2022 (2021)
“16–22 Me. Teuteronome 6–8; 15; 18; 29–30,” Sau, Mulimuli Mai ia te A’u—Mo Tagata Taitoatasi ma Aiga: 2022
Ata vali o Mose i luga o le Mauga o Nepo, © Providence Collection/licensed from goodsalt.com
16–22 Me
Teuteronome 6–8; 15; 18; 29–30; 34
“Ne’i Galo ia te Oe o Ieova”
Na poloaiina e Mose le fanauga a Isaraelu e aoao atu fetalaiga a le Alii i a latou fanau (tagai i le Teuteronome 6:7). A’o e suesue i le Teuteronome i le vaiaso lenei, ia saili ni auala e faasoa atu ai mea e te aoaoina i tagata o lou aiga.
Tusifaamaumau Ou Lagona Uunai
O le amataga o le auaunaga a Mose sa amatalia i luga o se mauga, ina ua fetalai atu le Atua ia te ia mai i se laau talatala na mu (tagai i le Esoto 3:1–10). Sa faamaeaina foi i luga o se mauga, i le silia ma le 40 tausaga mulimuli ane, ina ua tuuina atu e le Atua ia Mose se vaaiga itiiti o le nuu o le folafolaga mai le tumutumu o le Mauga o Nepo (tagai i le Teuteronome 34:1–4). Na faaalu e Mose lona olaga i le sauniaina o le fanauga a Isaraelu e ulu atu i lena nuu o le folafolaga, ma o loo tusifaamaumauina i le tusi o Teuteronome ana faatonuga, faamanatu, apoapoaiga ma auganiga faaiu ia Isaraelu. O le faitauina o ana upu ua manino ai o le faamoemoega moni o le auaunaga a Mose—o le sauniuniga sa manaomia e tagata—sa le faatatau i le ola saogalemu i le vaomatua, faatoilaloina o malo, po o le atinaega o se nuu. Sa faatatau i le aoao ia alofa i le Atua, usitai ia te Ia, ma tumau le tuuto faamaoni ia te Ia. O le sauniuniga lena tatou te manaomia uma ina ia mafai ona ulu atu i le nuu o le folafolaga o le ola faavavau. E ui la ina sa le’i tuvae Mose i le “nuu o tafe ai le suasusu ma le meli” (Esoto 3:8), ae ona o lona faatuatua ma le faamaoni, sa ia ulu atu ai i le nuu o le folafolaga lea ua saunia e le Atua mo i latou uma o e mulimuli ia te Ia.
Mo se vaaiga aoao i le Teuteronome, tagai i le “Teuteronome” i le Bible Dictionary.
Manatu mo Suesuega Faaletagata Lava Ia o Tusitusiga Paia
Teuteronome 6:4–7; 8:2–5, 11–17; 29:18–20; 30:6–10, 15–20
E finagalo le Alii ia ou alofa atu ia te Ia ma lo’u loto atoa.
I ana aoaoga faaiu, na faamanatu atu ai e Mose i le fanauga a Isaraelu, “Na ia te oe Ieova lou Atua i ona tausaga e fagafulu; e leai lava se mea ua e mativa ai,” na faapena foi a o i ai i le vaomatua (Teuteronome 2:7). O lenei la ua ulu atu Isaraelu i le nuu o le folafolaga, ma “aai tetele ma le lelei [latou] te lei faia, o fale foi e tutumu i mea lelei uma na [latou] le faatutumuina” (Teuteronome 6:10–11), na popole Mose o le a latou faamaaa o latou loto ma faagalo le Alii.
Mafaufau i le tulaga o lou lava loto ao e mafaufau i le fautuaga a Mose. Atonu e te manao e taulai atu i fuaiupu nei ma tusi i lalo ou lagona uunai:
O le a se mea e mafai ona e faia e taofi ai lou loto mai le faamaaaina ma ia alofa atu i le Alii ma lou loto atoa? O le a se sootaga o e vaaia i le va o le Teuteronome 6:5–6 ma le Mataio 22:35–40? (tagai foi i le Levitiko 19:18).
Tagai foi Dieter F. Uchtdorf, “O Se Faananau mo le Aiga,” Liahona, Nov. 2017, 21–24.
“Ne’i Galo ia te Oe o Ieova.”
O le tele o le augatupulaga a Isaraelu o e o le a ulu atu i le nuu o le folafolaga sa le’i molimauina mala i Aikupito pe na sopoia le Sami Ulaula. Na iloa e Mose o i latou—ma augatupulaga i le lumanai—o le a manaomia ona manatua vavega a le Atua ma tulafono a le Atua pe afai na tumau pea ona avea ma nuu o le Atua.
O le a le fautuaga o tuuina mai e Mose i le Teuteronome 6:4–12, 20–25 e mafai ona fesoasoani e te manatua ai mea tetele ua faia e le Atua mo oe? O le a se mea ua musuia oe e fai ina ia mafai e le afioga a le Alii ona “i ai i lou loto”? (fuaiupu 6).
O le a faapefea ona e tuufaasolo atu lou faatuatua i augatupulaga o le lumanai?
Tagai foi i le Teuteronome 11:18–21; Gerrit W. Gong, “Manatua Pea o Ia,” Liahona, Me 2016, 108–11; Bible Dictionary, “Frontlets or phylacteries.”
O le fesoasoani i e limavaivai e aofia ai lima agaalofa ma loto naunau.
O le Teuteronome 15:1–15 o loo aumaia ai fautuaga e uiga i le fesoasoani i e matitiva ma limavaivai, e aofia ai nisi o faiga fitoitonu e le o mulimulitaia i aso nei. Ia maitau mea o loo aoao mai e nei fuaiupu i le pogai e tatau ai ona tatou fesoasoani i e matitiva ma le ala e taua ai i le Alii o tatou uiga faaalia e uiga i le fesoasoani ia i latou. O le a se mea o e lagona e finagalo le Alii ia e aoaoina mai nei fuaiupu e faatatau i le auauna atu i isi?
Tagai foi Russell M. Nelson, “O Le Poloaiga Lona Lua ma le Sili,” Liahona, Nov. 2019, 96–100.
O Iesu Keriso o le Perofeta o le a tulai a’e e faapei o Mose.
O Peteru, Nifae, Moronae ma le Faaola Lava Ia na saunoa uma i le valoaga i le Teuteronome 18:15–19 (tagai i le Galuega 3:20–23; 1 Nifae 22:20–21; Iosefa Samita—Talafaasolopito 1:40; 3 Nifae 20:23). O le a se mea e te aoaoina e uiga i le Faaola mai nei fuaiupu? O a ni auala e “pei [ai]” le Faaola o Mose? (Teuteronome 18:15).
O Iesu Keriso o le perofeta e faapei o Mose.
O le a le mea na tupu ia Mose?
E ui fai mai le Teuteronome 34:5–8 na maliu Mose, ae o le malamalama o aso e gata ai ua faamaninoina ai sa liuaina o ia, pe sa suia ina ia le mafai ona tigaina o ia i le tiga po o le oti seia oo ina toetu (tagai i le Alema 45:18–19; Bible Dictionary, “Moses”; Guide to the Scriptures, “Translated Beings,” scriptures.ChurchofJesusChrist.org). Sa alagatatau ia Mose ona liuaina ona sa manaomia ona i ai sona tina faaletino ina ia mafai ona ia tuuina atu ki o le perisitua ia Peteru, Iakopo, ma Ioane i luga o le Mauga o Liua (tagai i le Mataio 17:1–13).
Manatu mo Suesuega Faaleaiga o Tusitusiga Paia ma Afiafi Faaleaiga
-
Teuteronome 6:10–15.O nei fuaiupu e ono uunaia ai tagata o lou aiga e mafaufau i ni auala ua faamanuiaina ai lou aiga. E mafai faapefea ona tatou mulimuli i le fautuaga “ne’i galo ia te oe o Ieova”? (Teuteronome 6:12). Atonu tou te mananao e tusifaamaumau tou lagona e uiga ia outou faamanuiaga, masalo i totonu o se apitalaaga po o luga o le FamilySearch.
-
Teuteronome 6:13,16; 8:3.Na fesoasoani nei fuaiupu i le Faaola i le aluga o se taimi taua i Lona soifuaga; ina ia iloa pe faapefea, faitau faatasi le Mataio 4:1–10. O a ni fuaitau o mau na fesoasoani ia i tatou i taimi o puapuaga?
-
Teuteronome 7:6–9.Fai se mea e fesoasoani ai i tagata o lou aiga ia lagona le faapitoa, e pei o le saunia o se taumafa e sili ona fiafia i ai. Ona outou faitauina lea o le Teuteronome 7:6–9 ma talatalanoa i mea tou te manatu o le uiga o le ia fai “[se nuu faapitoa]” (fuaiupu 6) i le Alii.
-
Teuteronome 29:12–13.O le talanoa e uiga i le Teuteronome 29:12–13 e tuuina atu ai se avanoa mo tagata o lou aiga e talatalanoa ai i feagaiga o le a latou faia pe ua faia ma le Tama Faalelagi. O le a le uiga o le avea ma nuu o le Atua? E faapefea e a tatou feagaiga ona “faatumauina [tatou] … e fai ma nuu [o le Atua]”? (fuaiupu 13).
Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese fautuaina: “Ou Te Fia Ola i le Talalelei,” Tusipese a Tamaiti,72.
Faaleleia Suesuega Faaletagata Lava Ia
Sailia ou lava malamalamaaga faaleagaga. O lenei otootoga o loo fautuaina atu ai fuaitau ma mataupu faavae e taulai i ai, ae aua nei avea lena ma mea e faatapulaa ai au suesuega. A o e suesue, atonu e te iloa ai se mataupu faavae e le o ta’uaina ii. Ia tuu le Agaga e taiala oe i mea e manaomia ona e a’oa’o i ai.
Ua Faasino Atu e le Alii ia te Ia le Nuu Uma Lava, saunia e Walter Rane