O Mose o loo faauuina Iosua

Ata tusi o Mose o loo faauuina Iosua, saunia e Darrell Thomas

23–29 Me

Iosua 1–8; 23–24

“Ia Faamalosi ma Lototele”

Ao e suesue i le tusi o Iosua, mafaufau pe mafai faapefea ona faateleina lou faatuatua ia Iesu Keriso i mea e te aoaoina e uiga i le [fanauga] a Isaraelu.

Tusifaamaumau Ou Lagona Uunai

Sa tele ni tupulaga na mavae, ae sa lata foi ina faataunuuina le folafolaga a le Alii: sa toe o se aga ona mautofi lea o le fanauga a Isaraelu i le nuu o le folafolaga. Ae i lo latou ala sa tu ai le Vaitafe o Ioritana, o papuipui o Ieriko, ma se nuu amioleaga ae malolosi o e na teena le Alii (tagai i le 1 Nifae 17:35). Na le gata i lena, ua leai lo latou taitai peleina o Mose. O le tulaga atonu na alai ona lagona e ni isi o Isaraelu le vaivai ma le matatau, ae na fetalai le Alii, “Ia e faamalosi ma lototele.” Aisea na tatau ai ona latou manatu faapea? Sa le ona o lo latou lava malosi—pe o le [malosi] foi o Mose po o Iosua—ae ona “o Ieova lou Atua o loo ia te oe i mea uma e te alu i ai” (Iosua 1:9). A i ai o tatou lava vaitafe e sopoia ma papuipui e aumai i lalo, e mafai ona tutupu mea matagofie i o tatou olaga, aua “e faia e Ieova o vavega i o [tatou] luma” (Iosua 3:5).

Mo se vaaiga aoao o le tusi o Iosua, tagai i le “Joshua, book of” i le Bible Dictionary.

Learn More image

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Iosua 1:1–9

O le a faatasi le Atua ma a’u pe afai ou te faatuatua ia te Ia.

Vaai faalemafaufau pe na ono faapeī mo Iosua le valaauina e suitulaga ia Mose. Maitau i le fetalaiga a le Alii i le Iosua 1:1–9 e faamalosiau ai o ia. Mafaufau i luitau faigata lua te faafeagai; o le a se mea o i nei fuaiupu e avatua ia te oe le lototele?

Atonu e malie le manatua o le igoa Iosua (Yehoshua po o Yeshua i le faaEperu, o lona uiga “laveai mai Ieova.” Ma o le igoa Iesu e sau mai le Iosua. O lea la, ao e faitau e uiga ia Iosua, mafaufau pe faapefea e lana misiona ona taitai atu le fanauga a Isaraelu i le nuu o le folafolaga, ona faamanatu atu ia te oe le misiona a le Faaola.

Tagai foi Ann M. Dibb, “Ia Outou Lototetele,” Liahona, Me 2010, 114–16.

Iosua 2

O le faatuatua ma galuega, e tau fai alagatatau mo le faaolataga.

O le au Kerisiano anamua sa latou vaai ia Raava o se faataitaiga o le mana o le faatuatua ma galuega (tagai i le Eperu 11:31; Iakopo 2:25). Ao e faitau i le Iosua 2, mafaufau i le matafaioi o le faatuatua ma galuega a Raava i le laveaiina o ia lava, lona aiga, ma le au matavao Isaraelu. O le a se mea ua aoao atu e lenei mea ia te oe e uiga i le ala e uunaia ai e lou faatuatua ia Keriso ma au galuega ia oe lava ma isi?

Atonu e te fiafia i le iloa o Raava o se tuaa faatasi a le Tupu o Tavita ma Iesu Keriso (tagai i le Mataio 1:5). O a ni lesona e ono mafai ona tatou aoao mai i lenei mea?

Raava

Raava i lona faamalama. Faatalitali mo le Folafolaga, saunia e Elspeth Young.

Iosua 3--4

E mafai ona ou iloa “vavega” a le Atua pe a ou faatuatua ia Iesu Keriso.

Ua finagalo le Alii ia “iloa e nuu uma o le lalolagi e malosi le aao o Ieova” (Iosua 4:24). Ao e faitau i le Iosua 3–4, mafaufau loloto pe faapefea ona e iloa e malosi le aao o le Alii. Na faapefea ona faia e le Alii ni “vavega” i lou olaga? (Iosua 3:5). E mafai faapefea ona e oo—pe iloa—iloa soo na vavega? (mo se faataitaiga, tagai i le Iosua 3:17).

Aisea e te manatu na manaomia e Isaraelu ona faapaia i latou lava ae latou te lei sopoia le Vaitafe o Ioritana? O le a se taua ua e iloa i le mea moni e faapea, na vaeluaina e vaitafe ina ua uma “ua fufui i le auvai o vae o faitaulaga”? (Iosua 3:13, 15).

Mo isi mea taua na tutupu i le Vaitafe o Ioritana, tagai i le 2 Tupu 2:6–15; 5:1–14; ma le Mareko 1:9–11. Ao e mafaufau loloto i nei mau, o a ni sootaga ua e vaaia i le va o nei mea na tutupu?

Tagai foi Gérald Caussé, “Pe O Ofoofogia Pea Ea ia te Oe?” Liahona, Me 2015, 98–100; “Exercise Faith in Christ” (vitio), ChurchofJesusChrist.org.

Iosua 6–8

O le usiusitai e aumai ai le mana o le Atua i lo’u olaga.

O nei mataupu e nafa ma taua i laueleele o Ieriko ma Ai. Ao e faitau i ai, mafaufau i ala o loo e tau ai ma faaosoosoga i lou lava olaga (mo se faataitaiga, tagai i le Iosua 7:10–13). O le a se mea ua e aoao ai e uiga i le ala e mafai ona fesoasoani ai le Atua ia te oe ma mea e manaomia ona e faia ia maua ai Lona mana. Mo se faataitaiga, o le a se mea ua faagaeetia ai oe e uiga i faatonuga a le Alii mo le aveina o Ieriko? (tagai i le Iosua 6:1–5). Atonu o le tala i le Iosua 7 o le a musuia ai oe e iloilo pe “ua ia te oe le mea ua faatoina” i lou olaga e tatau ona e aveesea (Iosua 7:13).

Iosua 23–24

“Pipii atu ia Ieova lo outou Atua”.

Ina ua uma ona vaevaeina le nuu o le folafolaga i ituaiga e sefululua o Isaraelu (tagai i le Iosua 13–21), sa tuuina atu e Iosua ia i latou ana aoaoga mulimuli. Ao e faitau i nei aoaoga i le Iosua 23–24, atonu e te tausia se lisi o lapataiga, fautuaga, ma faamanuiaga folafolaina e te tau i ai. A mafaufau i mea uma na oo i ai Isaraelu, aisea ua e manatu na filifili ai Iosua e ta’u atu nei mea ia i latou i le faaiuga o lona olaga? O a ni mea ua e maua e musuia ai oe e “pipii atu ia Ieova?”? (Iosua 23:8).

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Iosua 1:8O le a se mea o fautua mai e lenei fuaiupu e uiga i le auala e tatau ona tatou faia ai a tatou suesuega o tusitusiga paia, faaletagata lava ia ma o se aiga? O faapefea ona faia e tusitusiga paia o tatou “ala ia manuia” ma aumaia ia i tatou “manuia”?

Iosua 4:3, 6–9.A uma ona faitau i le mea na finagalo le Alii e fai e Isaraelu i maa mai le Vaitafe o Ioritana, e mafai e lou aiga ona talanoa i nisi o mea tetele ua faia e le Alii mo outou. Ona e tuu atu lea i tagata taitoatasi o le aiga se maa ma valaaulia i latou e tusi ai se faaupuga po o se ata o se mea ua faia e le Alii mo i latou.

Iosua 6:2–5.Atonu o le a fiafia lou aiga e faatino ia faatonuga na tuuina atu e le Alii ia Isaraelu ina ia mafai ona manumalo ai ia Ieriko. O le a se mea e finagalo le Alii tatou te aoaoina mai lenei tala?

Iosua 24:15.A uma ona faitau le fuaiupu lenei, e mafai e tagata o le aiga ona faasoa ni aafiaga lea na latou filifili e auauna ai i le Alii e ui lava sa faigata. Aisea e taua ai le faia o le filifiliga e auauna ia te Ia “i le aso nei” nai lo o le faatali e filifili seia tupu se mea? E mafai faapefea ona tatou lagolago i tagata o le tatou “aiga” a o tatou taumafai e “auauna ia Ieova”?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Filifili Tau o Mea Tonu,” Viiga, nu. 149.

Faaleleia o Lo Tatou Aoao Atu

Tuu atu pea lava pea lau molimau. O lau molimau faamaoni e uiga i upumoni e mafai ona uunaia malosi ai lou aiga. E le tau teuteuina pe faaumiumi. E sili atu ona mamana se molimau pe a tuusao ma mai i le loto. (Tagai Aoao Atu i le Ala a le Faaola,11.)

O Papupuni o Ieriko ua pau

Na faapau e le Alii papupuni o Ieriko. © Providence Collection/licensed from goodsalt.com