Malumalu o São Paulo Pasila

2–8 Me

Esoto 35–40; Levitiko 1; 16; 19

“E Paia i le Alii”

Ao e suesue i tusitusiga paia, ia ua’i atu i uunaiga faaleagaga e te maua e uiga i auala e mafai ona e avea atili ai e pei o le Tama Faalelagi ma Iesu Keriso.

Tusifaamaumau Ou Lagona Uunai

O le Tuua o Aikupito—e ui lava i le taua ma le faavavega e pei ona sa i ai lena mea—sa le’i ausia atoatoa ai faamoemoega o le Atua mo le fanauga a Isaraelu. E oo lava i le faamanuiaina i le lumanai i le nuu o le folafolaga sa le’o o le faamoemoega autu lea a le Atua o i latou. O nei mea sa na o ni laasaga agai atu i le mea tonu na finagalo ai le Atua mo Lona nuu: “Ia paia outou: aua o a’u o Ieova lo outou Atua e paia lava a’u” (Levitiko 19:2). Na faapefea ona taumafai le Atua e fai ia paia Lona nuu ae na leai se mea na latou iloa ae na’o le faatagataotauaina mo le tele o augatupulaga? Sa Ia poloaiina i latou e fai se nofoaga e paia i le Alii—o se falefetafa’i i le vao. Sa Ia tuuina atu ia i latou feagaiga ma tulafono e taiala ai a latou amioga, ma, mulimuli ane, ia suia ai o latou loto. Ma ina ua latou le atoatoa i a latou taumafaiga e tausi na tulafono, sa Ia poloaia i latou e osi taulaga i manu e faatusa i le togiola mo a latou agasala. O lenei mea atoa sa fuafua e faafaasaga atu ai o latou mafaufau, o latou loto, ma o latou olaga agai i le Faaola ma le faaolataga ua Ia ofoina mai. O Ia o le ala tonu lea i le paia, mo Isaraelu ma mo i tatou. O tatou uma ua faaaluina ni taimi i le faatagataotauaina a le agasala, ma ua valaauliaina i tatou uma e salamo—ia lafoai le agasala ae mulimuli ia Iesu Keriso, o lē na folafola mai, “E mafai ona Ou faia outou ia paia” (Mataupu Faavae ma Feagaiga 60:7).

Mo se vaaiga aoao o le tusi o Levitiko, tagai i le “Leviticus” i le Bible Dictionary.

Learn More image

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Esoto 35–40; Levitiko 19

E finagalo le Alii ia ou paia e pei ona i ai o Ia.

O le Esoto 25–31 o loo tusi faamaumau ai faatonuga a le Alii ia Isaraelu e faatatau i le ala e fau ai se falefetafa’i, lea o le a fesoasoani ai sauniga paia ia i latou ia avea ma se nuu paia. O le Esoto 35–40 o loo faamatala ai taumafaiga a Isaraelu e usitai i nei faatonuga. Ao e faitau i mataupu 35–40, vaavaai mo mea na fetalai atu le Alii i Lona nuu e tuu i totonu o le falefetafa’i, ma mafaufau loloto po o a ni mea e mafai ona fai ma sui o nei aitema ma po o a ni mea latou te fautuaina atu ia te oe e uiga i le faateleina o le paia. Ia faapitoa ona mafaufau pe faapefea ona liliu atu e nei aitema ou mafaufauga agai i le Faaola. Atonu e fesoasoani se siata faapenei ia te oe:

O a ni mea faitino na e maua?	O le a se mea e mafai ona faatusa i ai lenei mea?
O a ni mea faitino na e maua? Atolaau o le feagaiga (Esoto 37:1–9; 40:20–21)	O le a se mea e mafai ona faatusa i ai lenei mea? Mafutaga a le Atua; Ana feagiaga ma poloaiga
O a ni mea faitino na e maua? Fata faitaulaga o mea manogi (Esoto 40:26–27; tagai foi i le Esoto 30:1, 6–8)	O le a se mea e mafai ona faatusa i ai lenei mea? Tatalo o loo o a’e i le Alii
O a ni mea faitino na e maua? Tuugalamepa po o tulaga moli (Esoto 37:17–24)
O a ni mea faitino na e maua? Fata faitaulaga (Esoto 38:1–7; tagai foi i le Esoto 27:1; 29:10–14)
O a ni mea faitino na e maua? Tanoa (pesini) o le vai): (Esoto 30:17–21)

Afai ua e auai i sauniga o le malumalu, o le a se mea ua e iloa e uiga i le falefetafa’i mai le Esoto 35–40 e faamanatu atu ai ia te oe lou aafiaga iina? (tagai foi i le “Thoughts to Keep in Mind: The Tabernacle and Sacrifice”). Mafaufau loloto pe faapefea ona fesoasoani feagaiga o le malumalu e te mamalu atili ai e pei o le Tama Faalelagi ma Iesu Keriso.

Ioe, o le tau lava o le i ai i nofoaga paia e le faapea tatou te paia ai. O le Levitiko 19 o loo faamatala ai tulafono ma poloaiga na tuuina mai e le Alii e fesoasoani ai ia Isaraelu ia tuputupu a’e i le paia. O le a se mea e te maua i nei poloaiga e mafai ona fesoasoani ina ia e paia atili ai? O le a se mea ua musuia oe e fai e ola atoatoa ai i nei mataupu faavae?

Tagai foi Carol F. McConkie, “O Le Malumalu e Matagofie,” Liahona, Me 2017, 9–12; “The Tabernacle” (vitio), ChurchofJesusChrist.org; Bible Dictionary, “Holiness”; temples.ChurchofJesusChrist.org.

Esoto 35:4–36:7

Ua talosaga mai le Alii ia fai a’u taulaga ma se loto malie.

I le tausaga ina ua tuua Aikupito, o le sootaga a le fanauga a Isaraelu ma Ieova e mafai ona faamatalaina e le’i ogatusa. Ae peitai, a e faitau i le Esoto 35:4–36:7, maitau le ala na tali atu ai Isaraelu i le poloaiga e fau le falefetafa’i. O le a se mea e mafai ona e aoao mai ia Isaraelu e mafai ona fesoasoani ia lelei atili ai ona e auauna i le Alii?

Na aoao mai Peresitene Bonnie L. Oscarson: “E tatau ona iloa e tagata taitoatasi o le ekalesia le tele o le manaomiaina o ia. E tofu le tagata ma se mea taua e saofaga atu ai ma e i ai taleni ma tomai tulaga ese e fesoasoani e agai i luma lenei galuega taua” (“O Tamaitai Talavou i le Galuega,” Liahona, Me 2018, 37). Ao e faitau i le Esoto 36:1–4, mafaufau loloto i le mea ua “avatu” e le Alii i totonu ia te oe. Mafaufau e fesili atu i le Tama Faalelagi po o le a se mea ua Ia avatu ia te oe ina ia mafai ona e auai i Lana galuega.

tagata anamua o loo aumai taulaga e fau ai le falefetafa’i

Na tuuina atu e le fanauga a Isaraelu ia taulaga mo le falefetafa’i ma le “manatu i ai o lona loto” (Esoto 35:5). Ata na tusia e Corbert Gauthier, © Lifeway Collection/licensed from goodsalt.com

Levitiko 1:1–9; 16

E ala i le Togiola a Iesu Keriso, e mafai ai ona faamagaloina a’u.

O le tele o le tusi o Levitiko atonu tatou te le masani ai—taulaga i manu, sauniga e aafia ai le toto ma le vai, ma tulafono e limataitaiina ai mea auiliili ma laiti uma o le olaga. Ae o nei sauniga ma tulafono sa faamoemoe e aoao ai mataupu faavae masani—salamo, paia, ma le Togiola a le Faaola. Ina ia maua nei mataupu faavae ao e faitau i le Levitiko 1:1–9; 16, mafaufau i fesili e pei o nei: O a ni mea e mafai ona ou aoao mai nei taulaga e uiga ia Iesu Keriso ma Lana taulaga togiola? E faapefea ona pei a’u o i latou e faia nei osigataulaga? Atonu e te mafaufau e toe faamanatu le “Thoughts to Keep in Mind: The Tabernacle and Sacrifice” i le punaoa lenei ma le “Taulaga” i le Taiala i Tusitusiga Paia (scriptures.ChurchofJesusChrist.org).

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Esoto 36:1–7.I le Esoto 36:1–7, o le a se mea ua tatou aoaoina mai le ala na tali atu ai Isaraelu i le poloaiga e fau le falefetafa’i? I le avea o se aiga, e mafai ona e mafaufau i auala ua valaaulia ai i tatou e le Alii e auai i Lana galuega. E mafai faapefea ona tatou mulimuli i le faataitaiga a Isaraelu?

Esoto 40.Ao outou faitau faatasi i le Esoto 40 , e mafai ona e valaaulia tagata o le aiga e sii o latou lima i taimi uma latou te faalogo ai i se fuaitau e pei o le “e pei ona poloai mai ai o Ieova.” O a ni mea tatou te aoaoina mai lenei mataupu e faatatau i le usiusitai i le Alii?

Esoto 40:1–34.Ao e faitau e uiga i le tuufaatasiga o le falefetafa’i i le Esoto 40, e mafai ona outou galulue faatasi e faailoa ia vaega eseese o le falefetafa’i, e faaaoga ai le ata o loo avatu ai i le otootoga lenei. Ina ia faafesootai le talanoaga lenei ma le tapuai i le malumalu i o tatou aso, e mafai ona outou toe faamanatuina faatasi le “Why Latter-day Saints Build Temples” (temples.ChurchofJesusChrist.org) pe matamata le vito “Temples” (ChurchofJesusChrist.org).

Levitiko 19.E mafai e tagata o le aiga ona sue se fuaiupu i le mataupu lenei latou te lagona o le a fesoasoani ia i latou “ia paia” (Levitiko 19:2) ma faasoa atu i le aiga.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Faapaia Mai A’u,” Viiga, nu. 70.

Faaleleia o Suesuega Faaletagata Lava Ia

Vaavaai mo Iesu Keriso. O tusitusiga paia uma lava, e oo foi i le Feagaiga Tuai, e molimau ia Iesu Keriso. Ao tou faitau i le Feagaiga Tuai, mafaufau po o a ni mea e mafai e faatusa, tagata, ma mea na tutupu ona tou aoao ai e uiga i le Faaola.

falefetafa’i

O Le Falefetafa’i Anamua, saunia e Bradley Clark