O Ieova o loo faaali atu ia Mose ma toeaina o Isaraelu

Atatusi o Ieova o loo faaali atu ia Mose ma toeaina e 70 o Isaraelu, saunia e Jerry Harston

25 Aperila–1 Me

Esoto 24; 31–34

“Ta te O Atu Lava ma A’u”

E le o mataupu faavae anoa uma o loo i tusitusiga paia e mafai ona faamamafaina atu i otootoga nei. Faalogo i le agaga e fesoasoani ia e taulai atu i upumoni e te manaomia.

Tusifaamaumau Ou Lagona Uunai

Sa i ai se pogai e faamoemoe ai o le a tumau le faamaoni o le fanauga a Isaraelu i le Atua ina ua uma ona Ia faaalia mai Lana tulafono ia i latou (tagai i le Esoto 20–23). E ui lava ina sa latou muimui ma masalosalo i le taimi ua tuanai, ina ua faitau atu e Mose le tulafono i le auvae o le Mauga o Sinai, sa latou osia loa le feagaiga lenei: “O mea atoa uma ua fetalai mai ai Ieova matou te faia lava, ma faalogo i ai” (Esoto 24:7). Ona valaauina lea e le Atua ia Mose i luga o le mauga, ma fetalai atu ia te ia e fau se falefetafa’i “ou te nofo ai faatasi ma i latou” (Esoto 25:8; tagai i le mataupu 25–30).

Ae a’o i ai Mose i le tumutumu o le mauga e aoao ai le ala e mafai ai e Isaraelu ona faaafio le Atua ia i latou, sa i ai Isaraelu i le pito i lalo o le mauga i le faiga o se tupua auro e tapuai ai. Na faatoa uma lava ona latou tautino atu ia “aua ne’i fai ni atua ese,” peitai sa latou “vave o ese” mai poloaiga a le Atua (Esoto 20:3; 32:8; tagai foi i le Esoto 24:3). Sa o se o ese na faateia ai, ae ua tatou iloa mai aafiaga o le faatuatua ma le tautino o nisi taimi e mafai ona faatoilaloina e le le onosai, fefe, po o le masalosalo. A o tatou sailia le mafutaga a le Alii i o tatou olaga, e faamalosiau le iloa sa lei fiu le Alii i a Isaraelu anamua ma o le a Ia le fiu foi ia i tatou—ona o Ia e “alofa mutimutivale ma alofa fua, e telegese lona toasa, ae tele le alofa ma le faamaoni” (Esoto 34:6).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Esoto 24:1–11

O a’u feagaiga e faaalia ai lo’u naunau e usitai i le tulafono a le Atua.

Ao e faitau i le Esoto 24:3–8 e uiga i le osifeagaiga a Isaraelu e usitai i le tulafono a le Atua, atonu e liliu atu ou mafaufauga i feagaiga ua e osia ma le Atua. O feagaiga a Isaraelu na aofia ai sauniga e ese mai mea ua manaomia e le Atua i aso nei, ae masalo e te maitauina ni vaega e tutusa ai, ae maise lava pe a e mafaufau i upumoni e faavavau ua faatusaina ai nei sauniga.

Mo se faataitaiga, o fuaiupu 4, 5, ma le 8 o loo ta’ua ai se fata faitaulaga, taulaga i manu, ma le toto. O a ni mea e mafai ona faatusaina i ai nei mea, ma e faapefea ona faatatau i au feagaiga? E mafai faapefea e au feagaiga ona fesoasoani e te faia ai “mea atoa uma ua fetalai mai ai Ieova”? (fuaiupu 7).

Tagai foi i le Mose 5:4–9; Becky Craven, “Faaeteete faasaga i le Faasamasamanoa,” Liahona, Me 2019, 9–11.

Esoto 32–34

O le agasala o le liliu ese lea mai le Atua, ae ua Ia ofoina mai se ala e toe foi atu ai.

E ala i le mafaufau loloto ia Isaraelu ma le ala na matuai vave “leaga lava i latou” (Esoto 32:7) e ala i le solia o a latou feagaiga, e mafai foi ona tatou aloese mai mea sese faapena. Ao e faitau i le Esoto 32:1–8, taumafai e tuu oe lava i le tulaga o Isaraelu—o loo e i le togavao, ua 40 aso talu na alu Mose, e te le iloa pe toe foi mai o ia, ae po o afea foi, ma o loo taoto i lou lumanai se fevaevaeaiga ma sa Kanana e uiga i le nuu o le folafolaga (tagai foi i le Esoto 23:22–31). E te manatu, aisea na mananao ai Isaraelu i se tupua auro? Aisea na matuai matuia ai le agasala a Isaraelu? Atonu e faaosofia oe e nei fuaiupu ia e mafaufau loloto i auala atonu e faaosoosoina ai oe e tuu lou faatuatuaga i se tasi po o se mea e ese mai i le Faaola. E i ai se mea na e lagona le musuia ai o oe e fai ina ia mafai ona e tuu atoa le Alii e faamuamua i lou olaga? O le a se mea ua musuia ai oe e uiga i le augani a Mose i le Alii i le Esoto 33:11–17?

E ui i le matuia o le agasala a Isaraelu, o loo aofia foi i le tala lenei se savali o le alofa mutimutivale ma le loto faamagalo o le Atua. O le a se mea o aoao atu e le Esoto 34:1–10 ia te oe e uiga i le Faaola? E faapefea ona faamanatu e faatinoga a Mose i le avea ai ma sui o Isaraelu ia mea na faia e Iesu Keriso mo tagata uma lava? (tagai i le Esoto 32:30–32; Mosaea 14:4–8; 15:9; Mataupu Faavae ma Feagaiga 45:3–5).

Faaliliuga Iosefa Samita, Esoto 34:1–2 (i le faaopoopoga i le Tusi Paia)

O le a le eseesega i le va o seti papa maa e lua ia na fai e Mose?

Ina ua alu ifo Mose mai le mauga, sa ia aumaia le tulafono sa tusia i luga o papa maa. Ae ina ua tau mai ua solia e Isaraelu la latou feagaiga, sa tata’e e Mose ia papa maa (tagai i le Esoto 31:18; 32:19). Mulimuli ane, na poloaiina ai e le Atua ia Mose e fai se isi seti o papa maa ma toe avatu i le mauga (tagai i le Esoto 34:1–4). O le Faaliliuga a Iosefa Samita, Esoto 34:1–2 (i le faaopoopoga i le Tusi Paia) ua faamanino mai ai o le seti muamua o papa maa na aofia ai sauniga o le “faatulagaga paia,” a le Atua po o le Perisitua Mekisateko. O le seti lona lua na aofia ai “le tulafono o se poloaiga faaletino.” Sa o le tulafono maualalo ane lea sa faaaogaina e le “perisitua maualalo” (tagai i le Mataupu Faavae ma Feagaiga 84:17–27), lea sa fuafuaina e tapena ai Isaraelu mo le tulafono maualuga atu ma le perisitua maualuga atu ina ia mafai ona latou ulufale atoa atu i le afioaga o le Atua.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Esoto 31:12–13, 16–17.A uma ona faitau nei fuaiupu, atonu e mafai ona talatalanoa lou aiga i le fesili a Peresitene Nelson e uiga i o tatou amioga i le Sapati.: “O le a le faailoga o le a avatu i le Alii e faaali atu ai lou alofa mo Ia?” (“O Le Sapati o se Aso Fiafia,” Liahona, Me 2015, 130). E mafai e lou aiga ona fai ni faailoga e tuu solo i le tou fale e faamanatu ai ia te outou auala o le a outou faaali atu ai le alofa mo le Alii i le Sapati. (Tagai foi i le vitio tuufaatasi “Sabbath Day—At Home” [ChurchofJesusChrist.org].)

o tagata o loo savavali i luma o le falelotu

O le faamamaluga o le Sapati, e faaali atu ai lo tatou alolofa mo le Alii.

Esoto 32:1–8.Ina ia fesoasoani i lou aiga e talanoaina auala na liliu ese ai Isaraelu mai le Atua, mafaufau e fatu auala i luga o le fola (pe sue se auala e lata atu i lou fale). A o savavali i le ala, e mafai e tagata o le aiga ona talanoa e uiga i faaosoosoga tatou te feagai e liliu ese ai “i le ala na poloai [mai ai le Alii].” E mafai faapefea ona tatou tumau i le ala? Afai ua tatou se ese, e mafai faapefea ona tatou toe foi atu i ai? E faapefea ona fesoasoani le Faaola ia i tatou?

Esoto 32:26.Ina ua maua Isaraelu o tapuai i se tupua, sa fesili Mose, “O ai se ‘au ma Ieova?” E faapefea ona tatou faaalia ua tatou i ai i le ‘au a Ieova?

Esoto 33:14–15.E mafai ona faasoa e tagata o le aiga ni aafiaga i se taimi na latou lagonaina ai mea na folafolaina atu e le Atua ia Mose: “Ta te o atu lava ma a’u; ou te avatua foi le mapusaga mo oe.” E mafai ona outou usuina se viiga e uiga i lo tatou faalagolago i le Atua, e pei o le “Afio Mai!” (Viiga, nu. 92).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Who’s on the Lord’s Side?” Hymns, no. 260.

Faaleleia o Lo Tatou Aoao Atu

Valaaulia le Agaga. Mafaufau i auala e faatosinaina ai e musika paia, galuega o faatufugaga, ma faaaliaga o le alofa le siosiomaga faaleagaga i totonu o le tou aiga a o e aoao atu i lou aiga (tagai i le Aoao Atu i le Ala a le Faaola, 15).

O Mose o loo taeiina papamaa

Tapuaiga i le Tama’i Povi, saunia e W. C. Simmonds