mauga

O se mauga i Aikupito sa masani ona talitonuina o le Mauga o Sinai.

18–24 Aperila

Esoto 18-20

“Matou te Faia Lava Mea Uma Ua Fetalai Mai Ai Ieova”

Na aoao mai Sister Michelle Craig e faapea, “I le avea ai ma soo faamaoni a [Iesu Keriso], e mafai ona e maua musumusuga ma faaaliga faaletagata lava ia, e ogatusa ma Ana poloaiga, e faapitoa ia te oe” (“Gafatia Faaleagaga,” Liahona, Nov. 2019, 21). Tusifaamaumau ma galue e tusa ai ma le musumusuga e te maua ao e faitau i le Esoto 18–20.

Tusifaamaumau Ou Lagona Uunai

O le malaga a le fanauga a Isaraelu mai Aikupito e agai atu i le auvae Mauga o Sinai na faatumulia i vavega—o faaaliga e le mafai ona teenaina o le mana, alofa ma le alofa mutimutivale e le mafaatusalia o le Alii. Ae peitai, sa faapolopolo e le Alii ia faamanuiaga mo i latou na o atu i tua atu o le faasaolotoina o i latou mai Aikupito ma le faamalieina o lo latou fia aai ma le fia feinu faaletino. Na finagalo o Ia ia avea i latou ma Lona nuu o le feagaiga, Lana “oloa taua,” ma se “nuu paia” (Esoto 19:5–6). I aso nei, o faamanuiaga o lenei feagaiga ua faasafua i tua atu o se atunuu po o se nuu e tasi. E finagalo le Atua i Ana fanau uma ia avea ma Lona nuu o le feagaiga, ia “matua faalogo mai i [Lona] leo, ma tausiusi i [Lana] feagaiga” (Esoto 19:5), ona e faaali atu e Ia Lona alofa mutimutivale “i afe o tupulaga o e alofa mai ia te [Ia], ma tausi mai i [Ana] poloaiga” (Esoto 20:6).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Esoto 18:13–26

E mafai ona ou fesoasoani e “tauave le avega” o le faia o le galuega a le Alii.

A o e faitau i le fautuaga na maua e Mose mai lona tamā faaletulafono o Ietero, mafaufau loloto pe mafai faapefea ona avea oe faapei o nei “tagata faamaoni” (o isi taimi e faaliliuina o tagata “faatuatuaina”) e pei ona faamatalaina i le fuaiupu 21. E faapefea ona e fesoasoani e “tauave le avega” a ou taitai faale-Ekalesia? (fuaiupu 22). Mo se faataitaiga, mata e faapefea ona faatatau lenei fautuaga i au taumafaiga faaleauaunaga?

Masalo e te mafaufau foi pe o avea oe, i nisi taimi, o Mose, i le taumafai e fai ni mea se tele naua. Faamata e faapefea ona faatatau le fautuaga a Ietero ia te oe ?

Tagai foi i le Mosaea 4:27; Henry B. Eyring, “O Lē Tuuina Atu le Tausiga,” Liahona, Nov. 2012, 121–24.

O se alii o loo faatalofa ma se tamaitai

O le auauna atu i isi o se tasi lea o auala e mafai ona tatou saofaga ai i le galuega a le Alii

Esoto 19:3–6

O le nuu o le feagaiga a le Alii o se oloa taua lea ia te Ia.

Mafaufau po o le a le uiga ia te oe o le avea ma “se oloa taua” a le Alii (Esoto 19:5). Na tuuina mai e Peresitene Russell M. Nelson se faamalamalamaga e tasi o le lenei fuaitau: “I le Feagaiga Tuai, o le upu Eperu lea e faaliliu mai ai le taua o le segullah, o lona uiga ‘meatotino taua,’ po o le ‘oloa.’ … Mo i tatou ina ia iloa e auauna a le Alii o ona tagata taua o se faaviiviiga aupito maualuga lea” (Children of the Covenant,” Ensign, May 1995, 34). E faapefea ona faatosinaina le ala e te ola ai i le iloa o lou tausia o feagaiga e fai ai oe ma “oloa taua”?

Tagai foi i le Gerrit W. Gong, “O Le I Ai i Feagaiga,” Liahona, Nov. 2019, 80–83.

Esoto19:10–11, 17

O aafiaga paia e manaomia ai sauniuniga.

Na fetalai atu le Alii ia Mose e manaomia ona saunia le fanauga a Isaraelu ae latou te lei “fetaiai ma le Atua” (Esoto 19:10–11, 17) ma tausia feagaiga ma Ia (tagai i le Esoto 19:5). O a ni mea e te faia e saunia ai mo ni aafiaga paia i lou olaga, e pei o le auai atu i le malumalu po o le tagofia o le faamanatuga? O le a le mea e mafai ona e faia ina ia atoatoa ai au sauniga mo nei aafiaga? Mafaufau i isi gaoioiga faaleagaga e manaomia ai sauniuniga, ma mafaufau loloto po o le a se aafiaga o au sauniuniga i le ituaiga aafiaga e te maua.

Esoto 20

E alofa mutimutivale le Atua.

A o e faitau i le Esoto 20, mafaufau e faailoga po o le fea o Tulafono e Sefulu e te lagona o loo e usitaia, ae o le fea e te lagona e mafai ona faateleina lou usitai faamaoni i ai. E mafai ona e filifilia se tulafono se tasi e te galue i ai ona e suesue atili lea i ai e ala i le faitauina o mau e fesootai i ai (tagai i le Guide to the Scriptures i le scriptures.ChurchofJesusChrist.org) po o savali o le konafesi (tagai i vaega o autu o le conference.ChurchofJesusChrist.org). Mafaufau e faaaofia i au suesuega ia faamanuiaga e oo mai ia i latou o e usitai i le poloaiga. E faapefea ona faaalia e nei faamanuiaga le alofa mutimutivale ma le alofa o le Atua mo oe?

Tagai foi i le Carole M. Stephens, “Afai Tou te Alofa Mai ia te Au, Ia Outou Tausi i Au Poloaiga,” Liahona, Nov. 2015, 118–20.

Esoto 20:1–7

E taua le faamuamua o le Alii i lo’u olaga.

O le faitauina o le Esoto 20:1–7 e ono uunaia ai oe e mafaufau i mea e ave i ai le faamuamua i lou olaga—e mafai foi ona e lisiina i lalo. O a nisi o “atua” po o “tupua ua ta” (Esoto 20:3–4) e ono faaosoosoina oe e faamuamua nai lo le Atua? E mafai faapefea e le faamuamua o le Alii ona fesoasoani ia te oe i isi mea taua o lou olaga? O le a se mea ua musuia oe e fai ina ia faateleina ai lou taulai atu i le Tama Faalelagi ma Iesu Keriso?

Tagai foi i le Dallin H. Oaks, “Leai ni Atua Ese,” Liahona, Nov. 2013, 72–75.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Esoto 18:8–12.O le a se aafiaga o le molimau a Mose e uiga i le laveaiina e le Atua ia Ietero? O a ni mea maoae ua faia e le Alii mo lo tatou aiga? O ai e mafai ona faasoa atu i ai o tatou aafiaga? E mafai faapefea ona tatou faasaoina na aafiaga mo tupulaga o le lumanai?

Esoto 18:13–26.O nei fuaiupu e ono musuia ai lou aiga e mafaufau i auaunaga a o outou taitai i le lotoifale o le Ekalesia, e pei o le epikopo, taitai o le autalavou, po o faiaoga o le Paraimeri. O a ni o latou tiutetauave o loo i ai e foliga mai e “mafatia [mamafatu]” (Esoto 18:18) mo se tagata se toatasi na te tauaveina na o ia? O le a se mea e mafai ona tatou faia e fesoasoani ai e siia’e a latou avega?

Esoto 20:3–17.Mafaufau i se auala ’anoa e talanoaina ai o se aiga ia Tulafono e Sefulu. Mo se faataitaiga, e mafai ona e tusia tulafono o loo i le Esoto 20:3–17 i ni fasi pepa se sefulu. Ona tuu atu lea i tagata o le aiga e faatulaga i ni vaega se lua: (1) faamamaluina o le Atua ma le (2) alofa i isi (tagai foi i le Mataio 22:36–40). Mafaufau e filifili se tulafono se tasi pe lua i aso taitasi e talanoa auiliili faatasi i ai. Mo se faataitaiga, e faapefea ona faamalosia lo tatou aiga i le usitaia o le poloaiga lenei? Na faapefea ona usataia e le Faaola?

Esoto 20:12.Ina ia malamalama atili i le Esoto 10:12, atonu o le a fesoasoani pe a sue e le tou aiga le uiga o le upu “ava.” Ona fai lea e tagata o le aiga se lisi o mea e mafai ona tatou faia e ava ai i o tatou matua. E mafai ona outou usuina se pese e uiga i le ava i matua, e pei o le “E Vave Ona Ou Usitai” (Tusipese a Tamaiti,71), ma faaaoga nisi o manatu i le tou lisi e fatu ai ni fuaiupu fou o le pese.

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Tausi Poloaiga,” Tusipese a Tamaiti, 68–69.

Faaleleia o Suesuega Faaletagata Lava Ia

Sue se taimi e lelei mo oe. E masani ona faigofie atu le aoao mai tusitusiga paia pe a mafai ona e suesue i ai e aunoa ma le faalavelaveina. Sue se taimi e lelei mo oe, ma fai le measili e te mafaia e suesue ai i lena lava taimi i aso taitasi.

Mose o loo uuina papa maa

Atatusi o Mose o loo uuina Tulafono e Sefulu, saunia e Sam Lawlor