Nofotupu o le Tupu o Tavita, saunia e Jerry Miles Harston

20–26 Iuni

2 Samuelu 5–7; 11–12; 1 Tupu 3; 8; 11

“Lou Malo e Faatumauina e Faavavau”

A o e faitauina tusitusiga paia, e mafai e le Agaga Paia ona avatu ia te oe ni lagona ma musuia oe ia iloa le mea o le a sili ona taua i tamaiti o loo e aoaoina.

Tusi Faamaumau Ou Lagona Uunai

Valaaulia le Fefaasoaai

Fai atu i nai tamaiti e talanoa e uiga i o latou aafiaga i le faitauina o tusitusiga paia (taitoatasi, ma o latou aiga, po o le lotu). O afea ma o fea foi latou te faitauina ai tusitusiga paia? O a ni o latou lagona pe a latou faitau i tusitusiga paia? O a faamanuiaga ua latou mauaina ona o le usitaʻia o lenei tulafono?

Aoao atu le Aoaoga Faavae: Tamaiti Laiti

2 Samuelu 5:19, 23

Afai ou te manaomia se taitaiga, e mafai ona ou fesili i le Tama Faalelagi.

O nei fuaiupu o loo faamatalaina ai le tatalo a Tavita mo le taitaiga ma le faatonuga o le tupu o Isaraelu. E mafai faapefea ona e musuia tamaiti e liliu atu i le Alii i le tatalo pe a latou manaomia se fesoasoani?

Gaoioiga e Mafai Ona Fai

• Faamatala i tamaiti, a manaomia e Tavita le fesoasoani, na te “ole atu,” pe tatalo, mo ni tali. A o e faitauina le 2 Samuelu 5:19, 23, valaaulia tamaiti e faalogo mo le upu “fesili” ma piilima o latou lima pe a latou lagonaina. Ia molimau atu e mafai ona tatou tatalo e le aunoa i le Tama Faalelagi pe a tatou manaomia se fesoasoani.

• Ina ia fesoasoani i tamaiti ia mafaufau e uiga i mea e mafai ona latou fai atu pe a latou tatalo, e mafai ona e fai atu i ai pe faapefea ona latou faauma fuaiupu e pei o nei: “Matou te faafetai i Lau Afio mo …” ma le “Matou te ole atu i Lau Afio mo …” Tuu atu i tamaiti e tusi ni ata o mea atonu latou te avatu ai le faafetai pe ole atu ai i se tatalo.

  

  E mafai ona tatou tatalo i le Tama Faalelagi mo se fesoasoani ma le taitaiga.

• Tau atu i tamaiti e uiga i se taimi na e tatalo ai mo se fesoasoani a le Tama Faalelagi. Na faapefea ona Ia tali mai i lau tatalo? O le a le eseesega na i ai ona ua Ia fesoasoani ia te oe? Valaaulia tamaiti e faasoa mai o latou lava aafiaga.

2 Samuelu 7:16

O Iesu Keriso o lo tatou Tupu.

A o avea Tavita ma tupu o Isaraelu, na taʻu atu e le Alii ia te ia “e tumau lona nofoalii e faavavau” (2 Samuelu 7:16). O lenei folafolaga na faatatau ia Iesu Keriso, lo tatou Tupu Faavavau, o lē na fanau mai i le aiga o Tavita.

Gaoioiga e Mafai Ona Fai

• Valaaulia se tasi o tamaiti e faafoliga o se tupu po o se masiofo. Afai e mafai, ave i le tamaitiiti ni mea faitino faigofie na te uuina. O le a le tupu po o le masiofo? O a mea latou te faia? Tau atu i tamaiti o Tavita o se tupu, ma o ia o se tuaa o Iesu Keriso, o lē ua tatou taʻua o le “Tupu o tupu” (Faaaliga 19:16). Fesoasoani i tamaiti e mafaufau i ni auala e mafai ai ona tatou faaali atu tatou te talitonu o Iesu Keriso o lo tatou Tupu e Faavavau.

• A o faauma e tamaiti le itulau o gaoioiga o lenei vaiaso, usu pe tata se lipine o pese e faatatau ia Keriso o lo tatou Tupu, e pei o le “He Died That We Might Live Again,” “Tofia e Auauna,” “Fiafia, o le Alii o le Tupu!” po o le “Ou te Talitonu ia Iesu” (Tusipese a Tamaiti, 94; Viiga, nu. 38, 71). Fai i tamaiti e faalogologo mo le upu “Tupu” ma uu i luga se ata o Iesu pe a latou faalogo i ai. O a ni o tatou lagona pe a tatou pepese e uiga ia Iesu?

1 Tupu 8:57–58

E mafai ona ou savali i ala o le Atua.

Mo tagata Isaraelu, o le fausiaina ma le faapaiaina o le malumalu sa o se avanoa e liliu atu ai o latou loto i le Alii ma toe tautino atu e “savavali i ona ala uma” (1 Tupu 8:58). E faapefea ona e fesoasoani i tamaiti o loo e aoaoina ia “savavali i ona ala uma”?

Gaoioiga e Mafai Ona Fai

• Faaali atu i tamaiti se ata o le malumalu i ona po nei ma le malumalu na fausia e Solomona (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Faamatala atu ina ua fausia e Solomona se malumalu mo Isaraelu, sa ia fautuaina i latou e “savavali i ala uma [o le Alii]” (1 Tupu 8:58). Tau atu i tamaiti pe faapefea ona fesoasoani le malumalu e te savali ai i ala o le Alii. Valaaulia tamaiti e faasoa atu o latou lagona e uiga i le malumalu. Usu faatasi ma tamaiti se pese e faatatau i le malumalu, e pei o le “Ou Te Fia Vaai i le Malumalu” (Tusipese a Tamaiti,99).

• Tufa i isi tamaiti ni fatu pepa ma tulagavae pepa i isi tamaiti. Faitau le 1 Tupu 8:58, ma fai atu i tamaiti e uu i luga fatu pe a e taʻuina le upu “loto” ma tulagavae pe a e fai atu le faaupuga “savali i ona ala uma.” Fesoasoani i tamaiti ia malamalama e faapea, tatou te savavali i ala a le Alii pe a tatou mulimuli ia Iesu ma taumafai e avea faapei o Ia. Fesili i tamaiti po o a mea latou te faia e savavali ai i ala o le Faaola. E mafai ona e usuina se pese e uiga i le mulimuli ia Iesu e pei o le “O Loo Ou Taumafai e Avea e Pei o Iesu” (Tusipese a Tamaiti, 40).

Aoao atu le Aoaoga Faavae: Tamaiti Matutua

2 Samuelu 7:16-17

O Iesu Keriso o lo tatou Tupu.

O tupu tatou te faitau i ai i le Feagaiga Tuai na tofu uma lava ma faaletonu ma na faia ni mea sese—e oo lava i tupu lelei. Ae o le Tupu o lē na valoia e sau mai le gafa o Tavita, o Iesu Keriso, e atoatoa ma o le a nofotupu e faavavau.

Gaoioiga e Mafai Ona Fai

• Valaaulia tamaiti e faitau i le mea na tau atu e Natano i le Tupu o Tavita i le 2 Samuelu 7:16–17, ma fesili i ai po o le a so latou manatu i le uiga o lenei valoaga. E faapefea ona leai se mutaaga o le malo o Tavita? Fesoasoani i tamaiti e sue ma faitau fuaitau o mau lea e aoao atu o Iesu Keriso, o se e tupuga mai ia Tavita, o se Tupu, e pei o le Luka 1:32–33; Ioane 18:33–37; ma le Faaaliga 19:16. E faapefea ona faapei Iesu Keriso o se tupu? O a ni auala e mafai ona tatou faaali atu o Iesu Keriso o lo tatou Tupu e Faavavau?

• Usu faatasi ma tamaiti ni pese lea e faasino ia Keriso o lo tatou Tupu e pei o le “Le Tupu o Tupu, Afio Mai,” “Fiafia, o le Alii o le Tupu!” po o le “Sa Fanau Maulalo Iesu” (Viiga, nu. 25, 38, 110). O a mea o aoao mai e nei viiga ia i tatou e uiga i le i ai o Iesu Keriso o so tatou Tupu?

2 Samuelu 11

E mafai ona ou manumalo i faaosoosoga.

O tamaiti o loo e aoaoina e faia ni faaiuga laiti ae taua i aso taitasi. E faapefea ona e fesoasoani ia i latou ia malamalama i le taua o le filifili o mea e sao e tusa pe faigata?

Gaoioiga e Mafai Ona Fai

• Iloilo faatasi ma tamaiti le 2 Samuelu 11 , faasino i filifiliga na faia e Tavita. Fesili atu i tamaiti po o a ni filifiliga lelei sa tatau ona faia e Tavita. O a ni mea e mafai ona tatou faia pe a faaosoosoina i tatou lea e mafai ona fesoasoani ia i tatou e filifili le mea sa’o?

• Ina ia faasoa atu se faataitaiga o se tasi o lē, e le pei o Tavita, na tetee i faaosoosoga, fesili i tamaiti pe latou te manatua le tala ia Iosefa ma le avā a Potifara (tagai i le Kenese 39:7–12). Atonu e mafai ona e toe iloiloina faatasi ma tamaiti lenei tala ma fesoasoani ia i latou e faatusatusa i le tala ia Tavita. O a mea e mafai ona tatou aoao mai tala ia Tavita ma Iosefa e uiga i auala e tetee atu ai i faaosoosoga?

Uunaia le Aoaoina i le Aiga

Fesoasoani i tamaiti e mafaufau i se mea e mafai ona latou faia e faaaoga ai mea na latou aoaoina i le asō. Ona uunaia lea o i latou e faatino a latou fuafuaga.

Faaleleia o Lo Tatou Aoao Atu

Tulitatao ia valaaulia e faatino. A e valaaulia ia tamaiti e faatino se mea ua latou aoaoina, ia tulitatao lau valaaulia i le taimi o le isi vasega e sosoo ai. O lena mea e faaali atu ai i tamaiti e te manatu atu ia i latou i le faamanuiaina o o latou olaga i le talalelei. A o latou faasoa mai o latou aafiaga, o le a faamalosia i latou ma o le a fesoasoani ai le tasi i le isi e ola i le talalelei.