Tavita ma Koliata, saunia e Steve Nethercott

13–19 Iuni

1 Samuelu 8–10; 13; 15–18

“O Loo Ia Ieova le Taua”

E ui o gaoioiga o loo i lalo ua fuafuaina mo tamaiti laiti pe matutua atu, e mafai ona e fetuunaʻia se tasi o ia mea ia fetaui ma manaʻoga o i latou o loo e aoaoina.

Tusi Faamaumau Ou Lagona Uunai

Valaaulia le Fefaasoaai

Faaali le ata o Tavita ma Koliata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Ia valaaulia tamaiti e faasoa mai ni mea ua latou iloa e uiga i le tala, ma fai atu ni fesili e fesoasoani ai ia i latou e manatuaina vaega ia latou te lei faamatalaina o le tala.

Aoao atu le Aoaoga Faavae: Tamaiti Laiti

1 Samuelu 16:1–13

E silafia e le Alii mea o loo i lo’u loto.

O le faasoaina atu o le tala i le ala na taʻu atu ai e le Alii ia Samuelu e filifili Tavita e fai ma tupu e mafai ona fesoasoani i tamaiti ia latou iloa ai e silafia lelei i tatou e le Alii.

Gaoioiga e Mafai Ona Fai

• Faasoa atu le ala na taʻu atu ai e le Alii ia Samuelu o Tavita o le a avea ma tupu o Isaraelu (tagai 1 Samuelu 16:1-13). A o e faamatala le tala, e mafai ona e tuu se tasi o tamaitiiti e fai ma sui o Samuelu. E mafai foi ona ia tuuina atu se pale i se isi tamaitiiti e fai ma sui o Tavita. Faasoa atu lau molimau na silafia e le Alii le loto o Tavita ma Na te silafia i tatou uma taitoatasi.

• Faasoa se mea na e lagonaina na silafia ai e le Alii oe. Usu se pese e aoao atu ai e silafia ma alofa le Faaola ia i tatou, e pei o le “Iesu O La Tatou Uo Pele” (Tusipese a Tamaiti,37).

1 Samuelu 17:10–54

O le faatuatua ia Iesu Keriso e mafai ona fesoasoani ia te aʻu ia maua le lototele.

E faigofie ona fesootai tamaiti ma le taulealea o Tavita talu ai ona e laitiiti Tavita, ae na ia manumalo i se luʻi tele. Fesoasoani ia latou iloa o le faapogai o lona lototele ma le malosi ona o lona faatuatua ia Iesu Keriso.

Gaoioiga e Mafai Ona Fai

• Iloilo faatasi ma tamaiti le tala ia Tavita ma Koliata (tagai i le “Tavita ma Koliata” i le Tala o le Feagaiga Tuai), ma tuu atu ia latou feauauai i le faatinoina o le tala. Uunai le tamaitiiti faafoliga o ia o Koliata ma fai atu, “Tuu mai ia te a’u se tagata ma te tau” (1 Samuelu 17:10). Uunai le tamaitiiti faafoliga o ia o Tavita ma fai atu, “Ou te alu atu ia te oe i le suafa o Ieova” (1 Samuelu 5:45). Molimau atu afai tatou te faatuatua i le Alii, o le a Ia fesoasoani mai ia tatou maua le lototele e pei o Tavita.

• Faaaoga le itulau o gaoioiga o le vaiaso lenei e faaali ai le umī na i ai Koliata faatusa i se taulealea e pei o Tavita. Faamatala atu o le autau a Isaraelu na fefefe ia Koliata. Fai i tamaiti e faafoliga ua fefefe. Ona faaali atu lea o le ata o Iesu Keriso, ma taʻu i tamaiti talu ai ona sa talitonu Tavita i le Alii, o lea na mafai ai ona lototele o ia. Fai atu ia i latou e tutu sa’o i luga, pei o i latou o tagata lototetele.

• Valaaulia tamaiti e savavali e pei o Tavita o le a tau ma Koliata ao usuina se pese e uiga i le lototele, e pei o le “O Le a Ou Lototoa” (Tusipese a Tamaiti,85).

1 Samuelu 18:1–4

O uo lelei e mafai ona avea ma faamanuiaga ia te aʻu.

O le faigauo a Ionatana ma Tavita o se faataitaiga sili lea o faamanuiaga e mafai ona maua mai i uo lelei.

Gaoioiga e Mafai Ona Fai

• Tusi ni ata se lua i luga o le laupapa, o le tasi e fai ma sui o Tavita ma le isi e fai ma sui o Ionatana. Faitau i tamaiti ni nai fasifuaitau mai le 1 Samuelu 18:1–4 o loo faamamafa ai le alofa na lagonaina e nei uo e toalua mo le tasi ma le isi. Tuu atu i tamaiti taitasi se fatu pepa, ma fesili ia i latou pe faapefea ona latou faaalia le alofa i se uo. A uma ona faasoa mai e se tamaitiiti se aitia, valaaulia le tamaitiiti e faapipii le fatu pepa i le laupapa.

• Tau atu i tamaiti e uiga i se uo lelei na fesoasoani ia te oe e ola i le talalelei pe fausia lou faatuatua ia Iesu Keriso, ma valaaulia tamaiti e faasoa mai po o ai na fesoasoani ia i latou. Tofi ni tamaiti e faatino ni taga o le faia o se mea lelei mo sau uo.

Aoao atu le Aoaoga Faavae: Tamaiti Matutua

1 Samuelu 8:6; 9:15–17; 10:1–24; 16:1–13

O i latou e auauna atu i le Ekalesia e valaauina e le Atua.

O tala i le filifilia e le Atua o Saulo ma Tavita e fai ma tupu e mafai ona fesoasoani i lau vasega ia malamalama pe faapefea ona valaauina tagata e auauna atu i le Ekalesia i aso nei. O nei tala e mafai ona fausia ai le faatuatua e faapea, o valaauga e sau mai le Atua e ala mai i Ana auauna faatagaina.

Atatusi o Samuelu o loo faauuina Saulo, © Lifeway Collection/licensed mai le goodsalt.com

Gaoioiga e Mafai Ona Fai

• I ni fasipepa eseese, tusi ai faamatalaga ma mau nei: sa mananao le nuu i se tupu (1 Samuelu 8:6); Sa taʻu atu e le Alii ia Samuelu o le a fai Saulo ma tupu (1 Samuelu 9:15–17); Sa faauuina e Samuelu ia Saulo (1 Samuelu 10:1); Sa tuu atu e Samuelu Saulo i le nuu (1 Samuelu 10:24). Fai i tamaiti e faitau fuaitau o mau ma tuu i le faasologa saʻo.

• Aoao faatasi le mataupu faavae lona lima o le faatuatua. Otooto atu i tamaiti pe faapefea ona e mauaina lou valaauga e faiaoga i le Peraimeri. E faapefea ona e iloa na valaauina oe e le Atua? Ia molimau atu o le Atua e musuia taitai e valaauina tagata e auauna atu.

1 Samuelu 16:1–13

“E silasila le Alii i le loto.”

O se mea masani le faamasino o isi e fua i mea tatou te vaai atu i ai, ae o se vaega o le avea atili ai faapei o Iesu o le aoao o le ala e vaai atu ai e pei ona Ia faia—e ala i le vaai atu i “le loto” (1 Samuelu 16:7).

Gaoioiga e Mafai Ona Fai

• Valaaulia tamaiti e vaai faalemafaufau faapea na faatonuina i latou e filifili se tasi e avea ma se tupu. O a ni uiga lelei o le a latou vaavaai i ai? Faitau faatasi le 1 Samuelu 16:6-7 e iloa ai pe o le a le fetalaiga a le Alii ia Samuelu a o ia saili mo se tupu fou mo Isaraelu. O le a se mea ua tatou aoao mai faatonuga a le Alii?

• Tuuina atu se lesona faatino e faamatala ai i tamaiti o faaiuga tatou te faia e fuafua i “le tino” (fuaiupu 7) atonu e le saʻo. Mo se faataitaiga, e mafai ona e faaali atu ia i latou ni meaai po o se tusi ma se afifi po o se ufiufi e le fetaui ma le mea o loo i totonu. O le a le mea o loo fautua mai i le 1 Samuelu 16:7 ma le lesona faatino e uiga i le auala tatou te vaai ai ia i tatou lava ma isi tagata?

• Faasoa atu se mea na tupu na e iloa ai le mafuaaga e tatau ai ona e “vaai i le loto,” ae le na o “le vaai i le tino” (fuaiupu 7). Tuu atu i tamaiti e faasoa mai ni aafiaga talitutusa na latou maua. Usu se pese e faamamafaina ai lenei mataupu faavae, e pei o le “Ou te Savali ma Oe” po o le “We Are Different” (Tusipese a Tamaiti, 78–79, 263).

1 Samuelu 17:20–54

E mafai e Iesu Keriso ona fesoasoani ia ou manumalo i soo se luitau.

Atonu o feagai tamaiti ma luitau e foliga faigata pei o le faatoilaloina o se tagata tino ese e pei o Koliata. O le faataitaiga a Tavita e mafai ona avatu ai ia i latou le faamoemoe o le a fesoasoani le Alii e tau a latou taua.

Gaoioiga e Mafai Ona Fai

• Tofi tamaiti e tusi ni ata o vaega eseese o le tala i le 1 Samuelu 17:20–54. Faaali atu ata i le faasologa i luga o le laupapa, ma valaaulia tamaiti e fetufaai mai le tala i le talanoa e uiga i ata taitasi na latou tusia. O le a se mea e finagalo le Alii tatou te aoaoina mai lenei tala?

• Fesoasoani i tamaiti e fai se lisi i luga o le laupapa o nisi o luitau faigata e ono feagai ma se tagata. Valaaulia i latou e saili ni mea na fai mai Tavita e mafai ona faamalosia ai se tasi e feagai ma luitau pei o nei (tagai 1 Samuelu 17:26, 32, 34–37, 45–47). Tau atu i tamaiti le auala na fesoasoani ai Iesu Keriso ia te oe i taimi o luitau.

Uunaia le Aoaoina i le Aiga

Fai atu i tamaiti se fesili e uiga i se mea na latou aoaoina nei. Tusi le fesili i lalo, ma tufa atu i tamaiti uma se kopi e ave i le fale ma talanoa ma lona aiga.

Faaleleia o Lo Tatou Aoao Atu

Fesoasoani i tamaiti e vaai faalemafaufau i tusitusiga paia. E masani ona uaʻi atili tamaiti i se lesona pe a mafai ona latou vaai i ata e fesootai ma tala o tusitusiga paia poo aoaoga. Mafaufau e faaaoga ata o loo i totonu o le Tusi Ata o le Talalelei po o luga o le ChurchofJesusChrist.org.