Iesu o loo uuina se molī

Saving That Which Was Lost [Faaola i Le Na Le Iloa], saunia e Michael T. Malm

15--21 Aokuso

Salamo 49–51; 61–66; 69–72; 77–78; 85–86

“Ona Ou Ta’u Atu ai Lea o Mea Na Na Faia mo Lo’u Agaga”

O lau faataitaiga o se tagata aoao o le talalelei e mafai ona i ai se faatosinaga malosi i luga o tamaiti. Faasoa atu ia i latou ni ou aafiaga faaleagaga i le aoaoina o le talalelei.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Faasoa atu i tamaiti se mau mai le salamo, se viiga, po o se pese a tamaiti lea e fesoasoani ia te oe ia lagona le alofa o le Faaola. Tuu atu ia tofu tamaiti ma se avanoa e faia ai foi faapena.

aikona o le aoao atu

Aoao atu le Aoaoga Faavae: Tamaiti Laiti

Salamo 51:10

A ou faia se filifiliga sese, e mafai ona fesoasoani mai Iesu Keriso ia te a’u ia suia.

Fesoasoani ia malamalama tamaiti o mea sese o se vaega o le olaga faitino ma e mafai ona tatou maua le fesoasoani mai ia Iesu Keriso e faatoilalo ai i latou.

Gaoioiga e Mafai Ona Fai

• Faasoa atu se tala faigofie, mai lou olaga pe mai le Uo po o le Liahona, e uiga i se tamaitiiti na faia se filifiliga sese ae na mauaina se fesoasoani mai le Faaola ina ia lelei atili (mo se faataitaiga, tagai i le vitio “The Shiny Bicycle” i le ChurchofJesusChrist.org). Faitau le Salamo 51:10, ma faasoa atu le olioli na e lagonaina i le taimi na fesoasoani ai le Faaola ia te oe ina ia maua “se loto mama” ma se “loto mau.”

• Faaali i tamaiti le itulau o gaoioiga o lenei vaiaso. Faasino i ata taitasi, ma fai atu i tamaiti e faamatala mai mea o loo latou vaai i ai. Faitau i ulutala o ata e fesoasoani ai i tamaiti ia aoao e uiga i le salamo ma le faamagaloga.

Salamo 71:8

E mafai ona ou faamatala atu i isi e uiga ia Iesu Keriso.

O upu e faatumulia i le faatuatua a se tamaitiiti e i ai se mana uigaese e pa’i atu i loto. Tuu atu i tamaiti le lototele o le a mafai e a latou molimau ia Iesu Keriso ona fesoasoani i isi.

tama e toalua o loo nonofo faatasi i se nofoa

E mafai ona tatou talanoa e uiga i mea na faia e Iesu mo i tatou.

Gaoioiga e Mafai Ona Fai

• Faitau i tamaiti le Salamo 71:8, ma tusi se gutu lapoa i luga o le laupapa. Fai atu ia i latou e “faatumu” le gutu i mea e mafai ona tatou ta’u atu i isi e uiga ia Iesu Keriso.

• Tufa faataamilo se ata o Iesu Keriso. Fai atu i tamaiti e auauai e uu le ata ma ta’u mai se mea e tasi latou te iloa e uiga ia te Ia. O le a le mea ua Ia faia mo i tatou? (O ata o i le Gospel Art Book e mafai ona aumai ai nisi manatu.)

Salamo 86:7

E faafofoga ma tali mai le Tama Faalelagi i a’u tatalo.

O le tele o salamo e tai pei o ni tatalo i le Atua mo se fesoasoani, taitaiga, po o le puipuiga. Mafaufau pe mafai faapefea ona e fesoasoani i tamaiti e fausia lo latou faatuatua e faapea, o loo faafofoga ma tali mai le Tama Faalelagi ia i latou pe a latou tatalo.

Gaoioiga e Mafai Ona Fai

• Fesili i tamaiti pe faapefea ona latou talanoa ma tagata e nonofo mamao. Faaali ia i latou mea e mafai ona tatou faaogaina e fesootai ai, pei o se telefoni po o se tusi. Faitau atu ia i latou le Salamo 86:7. E faapefea ona tatou “valaau atu” i le Tama Faalelagi? E faapefea ona Ia tali mai ia i tatou?

• Valaaulia tamaiti e faatino ni taga o mea latou te faia i aso uma, pei o le ala i luga, ‘ai i le taeao, alu i le aoga, po o le alu e moe. Fesoasoani ia i latou e saili taimi i le ao e mafai ai ona latou tatalo i le Tama Faalelagi. Molimau atu e mafai ona tatou tatalo atu ia te Ia i soo se taimi, ma o le a Ia faafofoga mai ia i tatou i taimi uma.

• Usu faatasi se pese e faatatau i le tatalo, e pei o le “O Le Tatalo A Le Tamaitiiti” (Tusipese a Tamaiti, 6--7). Faamatala e uiga i se taimi na tali mai ai le Atua i au tatalo.

Salamo 77:11

“Ou te manatua galuega a le Alii.”

E mafai e tusitusiga paia ona fausia lo tatou faatuatua ia Iesu Keriso e ala i le fesoasoani ia i tatou e manatua Ana “vavega anamua.”

Gaoioiga e Mafai Ona Fai

• Faitau atu i tamaiti le Salamo 77:11, ma taʻu i ai le auala e te taumafai ai e “manatua galuega a le Alii,” e aofia ai ma Ana galuega i lou olaga. Valaaulia tamaiti e tusi ni a latou ata e fesoasoani ai ia i latou e manatua mea sili na Ia faia.

• Faaali atu ata mai lenei tusi pe mai le Sau, Mulimuli Mai ia te A’u—Mo Tagata Taitoatasi ma Aiga e faamanatu ai i tamaiti tala ua latou aoaoina i le Feagaiga Tuai e uiga i mea silisili na faia e le Alii mo Ona tagata. Fesili atu ia i latou po o fea o nei tala latou te fiafia tele i ai ma pe aisea foi.

aikona o le aoao atu

Aoao atu le Aoaoga Faavae: Tamaiti Matutua

Salamo 51

O le salamo o se suiga o le loto.

O leSalamo 51 o loo i ai le tele o upu moni e uiga i le salamō. E mafai faapefea ona e fesoasoani i tamaiti ia iloa nei upumoni?

Gaoioiga e Mafai Ona Fai

• Tofi tamaiti taitoatasi e faitau se tasi o mau i le itulau o gaoioiga o lenei vaiaso. Fai atu ia i latou e saili ni upu e aoao ai i latou i se mea e uiga i le salamo. Tuu atu ia i latou e tusi upu i luga o le laupapa. A uma ona fefaasoaai tagata uma, fesili i tamaiti pe faapefea ona latou tali atu i se uo e fesili, “O le a le uiga o le salamō?”

• Tusi se fatu i luga o le laupapa. Fai i tamaiti e taʻu mai ni agasala e faaosoosoina ai i tatou e Satani e fai. Tusi na agasala i totonu o le fatu. Fai atu i tamaiti e sue le upu fatu i le Salamo 51:10, 17. O le a le mea ua aoao mai e nei fuaiupu ia i tatou e uiga ile salamō? (tagai foi fuaiupu 6). Fesoasoani i tamaiti ia malamalama e tusa lava pe tatou te le toe faia se agasala, e tatau lava ona suia o tatou loto ina ia tatou salamo. Fai i tamaiti e tape agasala o loo i totonu o le fatu i luga o le laupapa ma tusi upu fou e faamatala ai le suiga i o tatou loto pe a tatou salamō. Faasoa atu lau molimau e mafai e le Atua ona “foafoaina i totonu o i [tatou] se loto mama” pe a tatou salamo (fuaiupu 10).

Salamo 66:16; 77:11; 78:7

“O le a ou manatuaina galuega a le Alii.”

Sa aoao e tagata Isaraelu a latou fanau e uiga i vavega na faia e le Atua mo i latou ina ia mafai ai e tamaiti ona “faamoemoe i le Atua” (Salamo 78:7).

Gaoioiga e Mafai Ona Fai

• Fai i tamaiti e faasoa mai ia te oe nisi o a latou tala e fiafia i ai mai tusitusiga paia (o ata mai le Tusi Ata o le Talalelei atonu e fesoasoani latou te mafaufau ai i tala). Aisea latou te fiafia ai i nei tala? O le a se mea o aoao mai e nei tala ia i tatou e uiga i le Alii? Faitau faatasi Salamo 77:11; 78:7. Aisea e taua ai le “manatua galuega a le Alii”?

• Fai i tamaiti e faitau le Salamo 66:16 ma mafaufau e uiga i ai pe tusi i lalo tali i le fesili “O le a le mea ua faia e le Alii mo loʻu agaga?” Ona tuu atu lea ia latou e faasoa mai a latou tali, pe a latou mananao i ai. O le a se mea e mafai ona tatou faia e “manatua ai pea” (Moronae 4: 3; 5:2) mea na faia e le Alii mo i tatou?

Salamo 86:5, 13, 15

E finagalo le Alii e faamagalo.

A tatou agasala, e manao Satani ia tatou mafaufau e le faamagaloina lava i tatou e le Alii. Fesoasoani i tamaiti ia faatupuina lo latou faatuatua e faapea, o le Alii ua “faamagalo sala; ma e tele foi lou alofa” (Salamo 86:5).

Gaoioiga e Mafai Ona Fai

• Faaali atu se ata o le Faaola (e pei o le ata o loo i le Sau, Mulimuli Mai ia te A’u—Mo Tagata Taitoatasi ma Aiga), ma fesili i tamaiti po o a upu latou te faaaogaina e faamatala ai o Ia. Valaaulia i latou e saili ni upu e faamatala ai Ia i le Salamo 86: 5, 13, 15. Afai e manaomia, fesoasoani ia i latou e faauiga upu nei. O le a sa tatou tala e fai i se uo e lagona e toʻasā le Atua ia i latou pe a latou agasala?

• Usu faatasi ma tamaiti se pese e te lagona o le a fesoasoani latou te malamalama ai i le natura faamagalo o le Faaola, e pei o le “Ou te Tu ma Ofo” (Viiga, nu. 107). Faasoa atu lau molimau e finagalo Iesu Keriso e faamagalo i tatou.

aikona o le aoaoina

Uunaia le Aoaoina i le Aiga

Valaaulia tamaiti taitasi e taʻu mai se mafuaaga se tasi latou te alolofa ai i le Tama Faalelagi ma Iesu Keriso. Fautuaina i latou e faasoa atu lena mafuaaga i se tasi i le fale. Molimau atu o a latou upu o le a faamanuia ai lena tagata.

Faaleleia o Lo Tatou Aoao Atu

Faaalia le talitonuina. “Afai e lagona e [tamaiti] e te faatuatuaina i latou, o lo latou talitonuga i lo latou gafatia paia o le a tuputupu ae. … Ia fesootai atu ma le alofa e te iloa ai e mafai ona latou nafa mo lo latou lava aoaoina” (Aoao Atu i le Ala a le Faaola, 28).

itulau o gaoioiga: Pe a ou faia se filifiliga sese, e mafai ona fesoasoani mai Iesu Keriso ia te a’u ia suia