Iesu o loo savavali ma mamoe

O Ieova o Lo’u Leoleo Mamoe, saunia e Yongsung Kim, havenlight.com

8–14 Aokuso

Salamo 1–2; 8; 19–33; 40; 46

“O Ieova o Lo’u Leoleo Mamoe o Ia”

O lenei otootoga o loo fautua mai ai nisi o fuaitau matagofie i totonu o le Salamo lea o le a faamanuiaina ai tamaiti, ae e le gata ai ii. Mulimuli i le taitaiga a le Agaga.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

I ni nai aso ao le’i faia le vasega, valaaulia ni nai tamaiti e aumai i le vasega ni ata tusi lea e suitulaga i mea na latou faitau ai ma o latou aiga i le Salamo i lenei vaiaso, e pei o se leoleo mamoe (tagai i le Salamo 23:1), o se ipu (tagai i le Salamo 23:5), po o se fatu (tagai i le Salamo 24:4). Valaaulia i latou e talanoa e uiga i a latou ata ma se mau mai le Salamo lea e ta’ua ai ia ata.

aikona o le aoao atu

Aoao atu le Aoaoga Faavae: Tamaiti Laiti

Salamo 19:1; 33:5

“Ua tala mai e le lagi le mamalu o le Atua.”

O leSalamo 19 ma le 33 o loo aoao mai e mafai ona tatou maua faamaoniga o le mamalu ma le agalelei o le Atua o siomia i tatou i Ana foafoaga matagofie. Fesoasoani i tamaiti e aoao e vaai i aao o le Atua i le lalolagi o siomia ai i latou.

Gaoioiga e Mafai Ona Fai

• Faaali atu i tamaiti ni ata o mea matagofie na foafoaina e le Atua, po o le tilotilo faatasi atu i fafo o se faamalama e vaai ai i nei mea. Fesili i tamaiti po o a mea latou te fiafia ai e uiga i foafoaga a le Tama Faalelagi. Faitau a lē o le Salamo 19:1 po o le 33:5, ma fesili i tamaiti po o a ni o latou lagona e uiga i le Tama Faalelagi pe a latou vaai i Ana foafoaga.

• Usu faatasi se pese e faatatau i foafoaga a le Atua, e pei o le “E Matagofie le Lalolagi” (Tusipese a Tamaiti,123). Valaaulia tamaiti e filifili se mea na foafoaina e le Atua (e pei o se mea na ta’ua i le pese) ma tusi se ata e faasoa atu i o latou aiga.

Salamo 23

“O Ieova o lo’u leoleo mamoe.”

Afai e mafai ona aoao tamaiti ao laiti e faapea, o le Alii o lo latou leoleo mamoe, atonu e foliga mai o le a latou mulimuli ia te Ia “i ala o le amiotonu.”

Gaoioiga e Mafai Ona Fai

• Tuu atu ia tofu tamaiti ma se kopi o le itulau o gaoioiga o lenei vaiaso, po o le tuu atu ia tofu i latou ma se ata o le itulau o gaoioiga. Valaaulia i latou e faalogologo a o e faitaua le Salamo 23. Fai atu ia i latou e faasino pe tuu i luga se ata o mea na latou faalogo o ta’ua i le salamo. Molimau atu e tausia i tatou e Iesu, e pei lava foi ona tausia e le leoleo mamoe ana mamoe.

• Tau atu i tamaiti ni auala e te iloa ai e alofa le Faaola ia te oe. Valaaulia tamaiti e tutu auauai ma faasoa mai ni auala latou te iloa ai e alofa Iesu ia i latou. Usu faatasi se pese atonu e tuu atu ai ia i latou ni manatu, e pei o le “Le Alofa o lou Faaola” (Tusipese a Tamaiti, 42--43).

Salamo 30:5

E mafai e Iesu Keriso ona liliu le faanoanoa i le olioli.

Mafaufau loloto pe faapefea ona e fesoasoani i tamaiti ia maua ni a latou lava molimau e uiga i le olioli e ofoina atu e Iesu Keriso ia i latou pe a latou faanoanoa.

Gaoioiga e Mafai Ona Fai

• Valaaulia tamaiti e faafoliga o loo fetagisi ao e faitau mai le Salamo 30:5, “E afe ane le tagi i le afiafi.” Ona fai atu lea ia i latou ia fiafia a o e faitau, “A o le alaga fiafia i le taeao.” Toe faitau le fasifuaitau lenei mo ni nai taimi, ma molimau atu i tamaiti e faapea, ona o Iesu Keriso, o le faanoanoa o loo tatou lagonaina i lenei olaga e mafai ona suia i le olioli.

• Faaali atu se ata o le Faaola, ma tau atu i tamaiti nisi o mea na Ia faia mo oe lea na aumai ai le olioli. Tuu atu ia tofu tamaiti ma se taimi e uu ai le ata ma faasoa atu mea na faia e Iesu lea e aumaia ai le olioli ia i latou.

aikona o le aoao atu

Aoao atu le Aoaoga Faavae: Tamaiti Matutua

Salamo 23; 27–28; 32; 46

Ua ofoina mai e le Faaola mo a’u le filemu, malosi, ma le taialaga.

O le tele o Salamo o loo molimau mai e uiga i faamanuiaga a le Alii i o tatou olaga. E mafai ona e faaaogaina Salamo e fesoasoani ai i tamaiti ina ia aoao e faalagolago ia te Ia ma liliu atu ia te Ia.

Gaoioiga e Mafai Ona Fai

• Tusi i luga o le laupapa O le Alii e . Tuu atu i tamaiti e filifili se tasi po o le sili atu o mau nei e faitau: Salamo 23:1; 27:1; 28:1; 28:7; 32:7; 46:1. Fai atu ia i latou e faauma le fuaiupu i luga o le laupapa e faaaoga ai mea na latou aoaoina mai a latou mau. Fesoasoani i tamaiti e talanoaina po o a mea o aoao mai e nei faatusa ia i tatou e uiga i le Alii.

• Faaali atu i tamaiti se ata o se mamoe. Fai atu ia i latou e tau mai ni mea e manaomia e se mamoe ina ia saogalemu ma soifua maloloina ai, ma uunaia i latou e tagai i le Salamo 23:1–4 mo ni manatu. Ona faaali atu lea o se ata o se tamaitiiti. O le a le mea tatou te manaomia ia saogalemu ai faaleagaga ma soifua maloloina? Faitau faatasi le Salamo 23, ma fesili atu i tamaiti pe faapefea ona faatusatusa mea na faia e le leoleo mamoe i le salamo lenei ma mea na faia e Iesu Keriso mo i tatou.

Malumalu o Concepción Chile

E tatau ona tatou mama ma mama a’ia’i faaleagaga e ulufale atu ai i luma o le Alii.

Salamo 24:3–4

Ina ia ulufale atu i le malumalu, tatou te manaomia ni “lima mama, ma se loto mama.”

Ao tulimatai atu tamaiti i le ulufale atu i le malumalu i se aso, fesoasoani ia i latou ia malamalama e mafai ona latou saunia e ala i le mama faaleagaga e ala i le Togiola a le Faaola.

Gaoioiga e Mafai Ona Fai

• Faaali atu i tamaiti se ata o se malumalu. Valaaulia i latou e faitau le Salamo 24:3 ma saili upu ia e faamanatu atu ai ia i latou e uiga i le malumalu. Ona faitau faatasi lea o le fuaiupu 4 e aoao ai po o ai e mafai ona ulu i le malumalu (sue uiga o soo se upu e le masani ai). E faapefea ona palapala faaletino o tatou lima? E faapefea ona palapala faaleagaga o tatou lima ma loto? E faapefea ona tatou faamamaina faaletino o tatou lima? E faapefea ona fesoasoani le Faaola ia i tatou e faamama faaleagaga o tatou lima ma o tatou loto? (Afai e fesoasoani, faamatala atu faapea o “lima” i lenei fuaiupu e mafai ona suitulaga i a tatou faatinoga ao “loto” e mafai ona suitulaga i o tatou manaoga.)

• Iloilo faatasi ma tamaiti ia mea manaomia e maua ai se pepa faataga o le malumalu (tagai Russell M. Nelson, “Malelega Faaiu,” Liahona, Nov. 2019, 120–22; po o le valaaulia o se sui o le au epikopo e talanoa i nei tulaga manaomia ma le vasega). Valaaulia ia tamaiti e filifili se tasi o mea latou te lagona le uunaia e faia ia saunia ai ina ia agavaa e ulu atu i le malumalu.

Salamo 46:10

“Ina soia, ma ia outou iloa o A’u lava o le Atua.”

O le faaaluina o sina taimi ina ia migao ma filemu, e ui i le pisi o loo siomai ai i tatou, e mafai ona fesoasoani ia i tatou e fausia a tatou molimau e faapea o loo soifua le Atua.

Gaoioiga e Mafai Ona Fai

• Fesoasoani i tamaiti e tauloto le laina muamua mai le Salamo 46:10: “Ina soia, ma ia outou iloa o A’u lava o le Atua.” Talanoa ma i latou e uiga i le mea e ono faauigaina o le “ia filemu,” i le faaletino ma le faalemafaufau. Ia faasoa atu i tamaiti se aafiaga na faamalosia ai lou faatuatua ia Iesu Keriso. Fai atu i tamaiti e faasoa mai soo se aafiaga sa latou oo i ai. Aisea e avea ai le ia filemu o se auala taua ia iloa ai o loo soifua le Atua?

• Valaaulia tamaiti tou te iloiloina faatasi ma oe mea latou te faia i se aso masani. Fesoasoani ia i latou e mafaufau i taimi i le aluga o o latou aso e mafai ai ona latou taumafai ina “ia filemu” ma lagona le latalata i le Tama Faalelagi. Uunaia i latou e faatu se sini e faaaoga ai ia taimi i le aluga o le vaiaso a sau e faamalosia ai a latou molimau i le Tama Faalelagi.

• Valaaulia tamaiti e lisi nisi o mea e mafai ona tatou faia ia iloa ai mo i tatou lava e moni le Tama Faalelagi ma e alofa o Ia ia i tatou. Valaaulia i latou e filifili se mea mai le lisi latou te mananao e fai.

aikona o le aoaoina

Uunaia le Aoaoina i le Aiga

Valaaulia ia tamaiti e filifili se mau latou te fiafia i ai mai le salamo na latou talanoaina i le asō. Fautuaina i latou e faasoa atu lena mau ma se tagata o le aiga po o se uo.

Faaleleia o Lo Tatou Aoao Atu

Taulai atu i manaoga o tamaiti. I le avea ai ma se faiaoga, ua e i ai i se tulaga uiga ese ina ia malamalama i manaoga o i latou o loo e aoaoina. O ou aafiaga, lou masani i tamaiti, ma le taitaiga o le Agaga o le a fesoasoani ia te ia e iloa ai po o fea o gaoioiga e aoaoina e sili ona fausia ai lo latou faatuatua i le Tama Faalelagi ma Iesu Keriso.

itulau o gaoioiga: “O Ieova o lo’u leoleo mamoe”