tusitusiga a perofeta anamua

Ua Valoia e le Perofeta o Isaia le Soifua Mai o Keriso, saunia e Harry Anderson

5–11 Setema

Isaia 1–12

“O le Atua o Loʼu Olataga Lea”

O upu a Isaia e faigata ona malamalama i ai. A o e mafaufau pe faapefea ona aʻoaʻo tamaiti e uiga ia Isaia, taulai atu i mea moni faigofie e mafai ona faamalosia ai lo latou faatuatua ia Iesu Keriso.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ia valaaulia tamaiti e fetufaai mai se mea na latou faia talu ai nei e ola ai i le talalelei, e pei o le faia o se tatalo, faaalia le agalelei i se tasi, poʻo le usitaia o isi tulafono.

aikona o le aoao atu

Aoao atu le Aoaoga Faavae: Tamaiti Laiti

Isaia 2:2–3

I totonu o le malumalu tatou te aoao ai e uiga ia Iesu Keriso.

Na muai vaaia e Isaia le taimi o le malumalu, “le mauga o le maota o le Alii,” o le a tosina mai ai tagata mai “atunuu uma.” E mafai ona e faaaogaina lenei valoʻaga e fesoasoani ai i tamaiti e vaʻavaʻai i luma i le taimi e mafai ai ona latou o i le malumalu.

Gaoioiga e Mafai Ona Fai

• Fai i tamaiti e tusi se ata o lo latou fale. Ona faitau faatasi lea o le Isaia 2: 2, ma valaaulia i latou e tusi se ata o le “maota o le Alii,” o le malumalu lea. Faitau faatasi le fuaiupu3, ma valaaulia i latou e faaopoopo ia latou ata le toatele o tagata e o mai i le malumalu, e aofia ai o latou aiga. Aisea tatou te mananaʻo ai e o i le maota o le Aliʻi? Faasoa atu lau molimau i faamanuiaga e oo mai pe a tatou aoao e uiga i le Alii i Lona maota.

• Tuu atu i se tamaititi e uuina se ata o le malumalu, ma fai i tamaiti e talanoa e uiga i mea latou te vaaia i le ata. Fesili ia i latou pe o le a le mea latou te fiafia i ai e uiga i le malumalu. Faitau faatasi le Isaia 2:2–3 ma fai atu ia i latou e faalogologo mo nisi mafuaaga tatou te fiafia ai i le malumalu. Tau i tamaiti pe aisea e te fiafia ai i le malumalu.

• Usu faatasi ma tamaiti se pese e faatatau i le malumalu, e pei o le “Ou Te Fia Vaai i le Malumalu” (Tusipese a Tamaiti,99). Fesoasoani ia i latou e saili upu ma fuaitau i le pese e aoao ai pe o le a le malumalu ma mea tatou te faia iina.

• Tusi se auala i luga o le laupapa, ma tuu se ata o le malumalu po o le Faaola i le isi itu (tagai Atinaeina o le Tagata Lava Ia: Tusitaiala a Tamaiti, 2–3). Tuu atu i tamaiti e auauai i le tusiaina o i latou o loo savavali i luga o le auala. Ao latou faia, valaaulia i latou e toe fai lenei fuaitau mai le Isaia 2:3: “O le a matou savavali i ona ala.” O le a le mea e tatau ona tatou faia e savavali ai i ala o le Alii?

fafine o loo siiina se pepe

“Aua ua fanau mai mo i tatou le tama, ua foaiina mai mo i tatou le atalii” (Isaia 9:6).

Isaia 9:6

Sa vavalo Isaia e uiga ia Iesu Keriso.

O perofeta uma e molimau ia Iesu Keriso, e aofia ai ma i latou na soifua ao le i fanau mai o Ia, pei o Isaia. Mafaufau poʻo a mea e mafai ona aʻoaʻoina e tamaiti e uiga ia Iesu mai le valoʻaga a Isaia i le Isaia 9:6.

Gaoioiga e Mafai Ona Fai

• Faasoa atu i tamaiti “Isaia le Perofeta” (i le Tala o le Feagaiga Tuai). Fai ma taofi ina ia mafai e tamaiti ona talanoa e uiga i mea na iloa e Isaia e uiga ia Iesu Keriso i le tele o tausaga ae leʻi fanau mai o Ia. Faitau atu i tamaiti le Isaia 9:6, ma valaaulia i latou e toe fai ma oe “igoa” taʻitasi na fai mai Isaia “o le a valaauina” ai Iesu Keriso.

• Tusi i luga o fasipepa ni nai faalagiga o Iesu Keriso o loʻo maua i le Isaia 9:6 (tagai i le itulau o gaoioiga o lenei vaiaso). Valaaulia tamaiti taitasi e filifili se tasi, ma fesoasoani i le tamaitiiti e faitau le faalagiga i le vasega. Talanoa atu i tamaiti i faalagiga nei taitasi ma o latou uiga ia te oe. Tuʻu se ata o Keriso i se tasi o tamaiti, ma fai atu ia te ia e faasoa mai se mea e uiga ia Iesu ona tuu atu lea o le ata i se isi tamaititi. Toe fai le gaoioiga lea seia maua uma e tamaiti le avanoa e fetufaai ai.

aikona o le aoao atu

Aoao atu le Aoaoga Faavae: Tamaiti Matutua

Isaia 1:2–4, 16–19

Ona o Iesu Keriso, ua mafai ai ona ou salamo ma faamamaina.

Na soifua Isaia i se taimi na liliu ese ai le toʻatele o ona tagata mai le Alii. Ae na folafola atu e le Alii ia latou agasala e mafai ona faamagaloina pe a latou salamo. Na ia faia foi lenei folafolaga ia i tatou.

Gaoioiga e Mafai Ona Fai

• Fai i tamaiti e faitau le Isaia 1:2–4 ma talanoa e uiga i nisi o mafuaʻaga na le fiafia ai le Aliʻi i tagata o Iutaia. Ona faitau faatasi lea o le Isaia 1: 16–19 e iloa ai le mea na valaʻaulia e le Aliʻi tagata e fai. A manaʻomia, fesoasoani i tamaiti ia malamalama i upu ma fuaitau faigata. Ina ia fesoasoani ia latou vaai faalemafaufau i le fuaiupu18, faaali se mea mumu ma se mea paʻepaʻe mama. O a mea ua tatou aoaoina e uiga ia Iesu Keriso mai nei fuaiupu? Ia valaaulia tamaiti e fetufaai mai ni o latou lagona e uiga i le meaalofa a Iesu Keriso o le faamagaloga, ma fetufaai mai foi ou lagona.

• Fesoasoani i tamaiti e tauloto le Isaia 1:18. Tusi le fuaiupu i luga o le laupapa, ma valaaulia tamaiti e tauloto mo ni nai taimi, faasolosolo ona tapeese le upu e tasi i taimi taitasi seia mafai ona latou taulotoina mai le mafaufau. E mafai foi ona e faaaogaina ni fasipepa o loʻo tusia ai upu mai le fuaiupu o loʻo tusia ai. Aisea e taua ai le manatua pea le mea o aʻoaʻo mai e lenei fuaiupu? Talanoaina pe faafefea ona avanoa lenei folafolaga mo i tatou pe a papatiso ma ‘ai ma inu i le faamanatuga.

Isaia 2:2–5

I totonu o le malumalu tatou te aoao ai e uiga ia Iesu Keriso.

O le valoʻaga a Isaia e uiga i “le mauga o le fale o le Alii” o loʻo faaalia ai nisi o faamanuiaga e maua mai le tapuaʻi i le malumalu, faatasi ai ma isi faamanuiaga e oʻo mai i aso mulimuli. Mafaufau loloto pe faafefea ona e musuia tamaiti e saili nei faʻamanuiaga.

Gaoioiga e Mafai Ona Fai

• Fai i tamaiti e faitau e uiga i le mea na vaai i ai Isaia i le Isaia 2: 2–3 ma tusi se ata o le mea latou te manatu atonu e faapeʻi. Faamalamalama atu na taua e Isaia le malumalu “o le mauga o le fale o le Alii.” Aisea ua avea ai se mauga ma faailoga lelei mo le malumalu?

• Ia valaaulia tamaiti e faitau le Isaia 2: 2–3,5 ma faailoa mai i nei fuaiupu se mea e musuia ai i latou e o atu i le malumalu i se aso. Ona faitau faatasi lea o le fuaiupu4, ma talanoaina pe faafefea ona fesoasoani le malumalu e aumaia le filemu o loʻo faamatala mai i lenei fuaiupu. Fesoasoani ia latou mafaufau i ni auala e mafai ai ona latou saunia nei e o atu i le malumalu i se aso.

Isaia 7:149:6–7

Sa vavalo Isaia e uiga ia Iesu Keriso.

Na valoia e Isaia le fanau mai o se tamaititi o le a nofo i le nofoalii o Tavita ma faatuina se malo e leai sona gataaga. E faapefea ona e fesoasoani i tamaiti o loʻo e aoaoina ia malamalama i nei valoaga e uiga ia Iesu Keriso?

Gaoioiga e Mafai Ona Fai

• Fesili i tamaiti e aumai ni faataʻitaʻiga o faalagiga o loʻo i ai i se tagata, pei o faalagiga e fesoʻotaʻi ma se galuega, se valaʻauga, se ‘au, poʻo se aiga. O a mea o tau mai e nei faalagiga e uiga i le tagata e onaina? Fesoasoani i tamaiti e saili faalagiga o Iesu Keriso i le Isaia 7:14 ma le 9:6–7. O a mea o loo aoao mai e nei faalagiga taitasi e faatatau ia te Ia? O a mea ua tatou aoaoina e uiga ia Iesu Keriso mai nei fuaiupu?

• Faitau faatasi le Mataio 1:21–23 ma le Luka 1:31–33, ma talanoaina pe faapefea ona faataunuuina valoaga a Isaia i le Isaia 7:14; 9:6–7 ina ua fanau mai Iesu Keriso.

aikona o le aoaoina

Uunaia le Aoaoina i le Aiga

Fai i tamaiti e mafaufau i se mea na latou aoaoina e uiga i le Faaola e mafai ona latou fetufaai i le fale ma o latou aiga, pei o se tasi o Ona igoa.

Faaleleia o Lo Tatou Aoao Atu

Fesoasoani i tamaiti ia atia’e le loto toa [confidence]. O nisi tamaiti atonu latou te le lagona e mafai ona latou aoaoina le talalelei na o latou lava. O se tasi o auala e atinae ai lo latou lototele o le viia o i latou pe a latou auai i talanoaga i le vasega. Folafola atu i tamaiti o le a fesoasoani le Agaga Paia ia i latou ao latou aoao.

itulau o gaoioiga: na vavalo Isaia e uiga ia Iesu Keriso