The Prophet Isaiah Foretells Christ’s Birth [Si Propeta Isaias Nanagna sa Pagkatawo ni Kristo], ni Harry Anderson

Septyembre 5–11

Isaias 1–12

“Ang Dios Mao ang Akong Kaluwasan”

Ang mga pulong ni Isaias mahimong lisod sabton. Samtang imong hunahunaon unsaon sa pagtudlo ang mga bata kabahin sa Isaias, tutoki ang yano nga mga kamatuoran nga makapalig-on sa ilang hugot nga pagtuo kang Jesukristo.

Irekord ang Imong mga Impresyon

Dapita ang Pagpaambit

Dapita ang mga bata sa pagpaambit og usa ka butang nga bag-ohay lang nila gibuhat aron sa pagsunod sa ebanghelyo, sama sa pag-ampo, pagpakita og kamabination sa usa ka tawo, o pagsunod sa ubang mga kasugoan.

Itudlo ang Doktrina: Mas Gagmay nga mga Bata

Isaias 2:2–3

Sulod sa templo makakat-on kita mahitungod ni Jesukristo.

Napanglantawan na daan ni Isaias ang panahon sa dihang ang templo, “ang bukid sa balay sa Ginoo,” modani og mga tawo gikan sa “tanang kanasoran.” Mahimo nimong gamiton kini nga panagna aron matabangan ang mga bata nga magmahinamon sa panahon nga sila makaadto sa templo.

Posible nga mga Kalihokan

• Hangyoa ang mga bata sa pagdrowing og hulagway sa ilang panimalay. Dayon basaha og dungan ang Isaias 2:2, ug dapita sila sa pagdrowing og hulagway sa “balay sa Ginoo,” nga mao ang usa ka templo. Basaha ang bersikulo 3 og dungan, ug dapita sila sa pagdugang ngadto sa ilang mga hulagway og daghang tawo nga nagpadulong sa templo, lakip sa ilang mga pamilya. Ngano nga gusto kitang moadto sa balay sa Ginoo? Ipaambit ang imong pagpamatuod bahin sa mga panalangin nga moabot samtang magkat-on kita mahitungod sa Ginoo sulod sa Iyang balay.

• Pagunita ang usa ka bata og hulagway sa templo, ug hangyoa ang mga bata nga maghisgot kabahin sa unsay ilang nakita diha sa hulagway. Pangutan-a sila kon unsa ang ilang naganahan mahitungod sa templo. Basaha og dungan ang Isaias 2:2–3 ug papaminawa sila og dugang nga mga rason kon nganong mahimo natong mahalon ang templo. Sultihi ang mga bata kon nganong gimahal nimo ang templo.

• Kantaha uban sa mga bata ang usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99). Tabangi sila sa pagpangita og mga pulong ug mga pulongan diha sa awit nga nagtudlo kon unsa ang templo ug unsa ang atong buhaton didto.

• Pagdrowing og agianan diha sa pisara, ug ibutang ang usa ka hulagway sa templo o ang Manluluwas sa usa ka tumoy (tan-awa sa Personal nga Kalamboan: Giya nga Basahon sa Kabataan, 2–3). Papuli-puliha ang mga bata sa pagdrowing sa ilang kaugalingon nga naglakaw diha sa agianan. Samtang buhaton nila, dapita sila sa pagsubli niini nga pulongan gikan sa Isaias 2:3: “Manglakaw kita sa iyang mga agianan.” Unsa ang atong mabuhat aron maglakaw sa mga agianan sa Ginoo?

“Natawo alang kanato ang usa ka bata; gihatag kanato ang usa ka anak nga lalaki” (Isaias 9:6).

Isaias 9:6

Si Isaias nanagna bahin ni Jesukristo.

Ang tanang propeta nagpamatuod ni Jesukristo, lakip niadtong kinsa dugay nang nabuhi sa wala pa Siya matawo, sama ni Isaias. Hunahunaa kon unsa ang makat-onan sa mga bata mahitungod ni Jesus gikan sa panagna ni Isaias sa Isaias 9:6.

Posible nga mga Kalihokan

• Ipakigbahin sa mga bata ang “Isaias ang Propeta” (diha sa Mga Istorya sa Daang Tugon). Hunong og panagsa aron ang mga bata maka-istorya bahin sa unsay nahibaloan ni Isaias mahitungod ni Jesukristo daghang katuigan sa wala pa Siya matawo. Basaha ngadto sa mga bata ang Isaias 9:6, ug dapita sila sa pagsubli uban kanimo sa matag “ngalan” nga si Isaias miingon nga “itawag” ni Jesukristo.”

• Isulat diha sa mga piraso sa papel ang pipila ka ngalan ni Jesukristo nga makita diha sa Isaias 9:6 (tan-awa ang pahina sa kalihokan niini nga semana). Dapita ang matag bata sa pagpili og usa, ug tabangi ang bata sa pagbasa sa ngalan ngadto sa klase. Hisgoti sa mga bata mahitungod kon unsay buot ipasabot alang kanimo sa matag ngalan. Hatagi og hulagway ni Kristo ang usa sa mga bata, ug hangyoa siya sa pagpaambit og usa ka butang mahitungod ni Jesus ug dayon ipasa ang hulagway ngadto sa lain nga bata. Sublia kini nga kalihokan hangtod ang tanang bata adunay kahigayonan sa pagpaambit.

Itudlo ang Doktrina: Mas Dagko nga mga Bata

Isaias 1:2–4, 16–19

Tungod ni Jesukristo, ako makahinulsol ug mahimong limpyo.

Si Isaias nagpuyo sa usa ka panahon dihang daghan sa iyang katawhan ang mipalayo sa Ginoo. Apan ang Ginoo misaad kanila nga ang ilang mga sala mapasaylo kon sila maghinulsol. Siya naghimo niini nga saad ngari kanato usab.

Posible nga mga Kalihokan

• Hangyoa ang mga bata sa pagbasa sa Isaias 1:2–4 ug hisgoti ang kabahin sa pipila ka rason nga ang Ginoo wala nalipay sa katawhan sa Judah. Dayon basaha og dungan ang Isaias 1:16–19 aron magkat-on kon unsay gidapit sa Ginoo sa katawhan nga buhaton. Kon gikinahanglan, tabangi ang mga bata nga makasabot sa lisod nga mga pulong ug mga pulongan. Aron matabangan sila nga mahulagway ang bersikulo 18, pagpakita og usa ka butang nga hayag nga pula ug usa ka butang nga lunsay nga puti. Unsay atong makat-onan mahitungod sa kaluoy ni Jesukristo gikan niini nga mga bersikulo? Dapita ang mga bata sa pagpaambit kon unsa ang ilang gibati mahitungod sa gasa ni Jesukristo sa kapasayloan, ug ipaambit usab ang imong mga pagbati.

• Tabangi ang mga bata nga makasag-ulo sa Isaias 1:18. Isulat ang bersikulo sa pisara, ug dapita ang mga bata sa pagsaysay [recite] niini og pipila ka higayon, nga papason ang usa ka pulong sa matag higayon hangtod nga ila kining masaysay gikan sa hunahuna. Mahimo usab mogamit ka og mga piraso sa papel nga adunay mga pulong gikan sa bersikulo nga gisulat niini. Nganong importante nga hinumdoman kanunay kon unsay gitudlo niini nga bersikulo? Hisgoti kon sa unsang paagi ang pagpabunyag ug pag-ambit sa sakramento mohimo niini nga saad nga mapuslan nato.

Isaias 2:2–5

Sulod sa templo makakat-on kita mahitungod ni Jesukristo.

Ang panagna ni Isaias mahitungod sa “bukid sa balay sa Ginoo” nagpadayag og pipila ka panalangin nga moabot gikan sa pagsimba diha sa templo, lakip sa ubang mga panalangin nga moabot sa kataposang mga adlaw. Hunahunaa kon unsaon nimo pagdasig ang mga bata sa pagtinguha niini nga mga panalangin.

Posible nga mga Kalihokan

• Hangyoa ang mga bata sa pagbasa kabahin sa unsay nakita ni Isaias sa Isaias 2:2–3 ug sa pagdrowing og hulagway nga ilang nahunahunaan kon unsa kahay hitsura niini. Ipasabot nga si Isaias mitawag sa templo nga “ang bukid sa balay sa Ginoo.” Nganong ang bukid usa ka maayo nga simbolo alang sa templo?

• Dapita ang mga bata sa pagbasa sa Isaias 2:2–3, 5 ug sa pagpangita og usa ka butang sa matag usa niini nga mga bersikulo nga makapadasig kanila nga moadto sa templo sa umaabot. Dayon basaha ang bersikulo 4 og dungan, ug hisgoti kon sa unsang paagi ang templo makatabang sa pagpahinabo sa kalinaw nga gihulagway niini nga bersikulo. Tabangi sila sa paghunahuna og mga paagi nga sila makapangandam karon sa pag-adto sa templo sa umaabot.

Isaias 7:14; 9:6–7

Si Isaias nanagna bahin ni Jesukristo.

Si Isaias nanagna bahin sa pagkatawo sa usa ka bata nga molingkod sa trono ni David ug motukod og gingharian nga walay kataposan. Unsaon nimo nga matabangan ang mga bata nga imong gitudloan nga makasabot niini nga mga panagna kabahin ni Jesukristo?

Posible nga mga Kalihokan

• Hangyoa ang mga bata sa paghatag og mga ehemplo sa mga ngalan sa usa ka tawo, sama sa mga ngalan nga may kalabotan sa usa ka trabaho, usa ka calling, usa ka team, o usa ka pamilya. Unsay gisulti niini nga mga ngalan mahitungod sa tawo nga naghupot niini? Tabangi ang mga bata nga mangita og mga ngalan ni Jesukristo sa Isaias 7:14 ug 9:6–7. Unsay gitudlo kanato sa matag usa niini nga mga ngalan mahitungod Kaniya? Unsa pay lain nga atong makat-onan mahitungod ni Jesukristo gikan niini nga mga bersikulo?

• Basaha og dungan ang Mateo 1:21–23 ug Lucas 1:31–33, ug hisgoti kon sa unsang paagi natuman ang mga panagna ni Isaias sa Isaias 7:14; 9:6–7 sa dihang natawo si Jesukristo.

Awhaga ang Pagkat-on diha sa Panimalay

Hangyoa ang mga bata sa paghunahuna og usa ka butang nga ilang nakat-onan mahitungod sa Manluluwas nga ilang mapaambit sa panimalay uban sa ilang pamilya, sama sa usa sa Iyang mga ngalan.

Pagpalambo sa Atong Pagtudlo

Tabangi ang mga bata sa pag-ugmad og pagsalig sa kaugalingon. Ang ubang mga bata tingali walay pagsalig nga makakat-on sa ebanghelyo sa ilang kaugalingon. Usa ka paagi sa pagtabang kanila sa pag-ugmad og pagsalig sa kaugalingon mao ang pagdayeg kanila kon sila moapil sa klase. Saari ang mga bata nga ang Espiritu Santo motabang kanila samtang sila magkat-on.