Sacred Grove [Sagrado nga Kakahoyan], ni Brent Borup

Septyembre 12–18

Isaias 13–14; 24–30;35

“Usa ka Kahibulongan nga Buhat ug usa ka Katingalahan”

Human nga mainampoong magtuon sa Isaias 13–14; 24–30;35, pagplano og mga kalihokan aron matabangan ang mga bata nga makakat-on. Ang mga ideya sa kalihokan sa ubos mahimong mapahiangay alang sa bisan unsang grupo sa edad.

Irekord ang Imong mga Impresyon

Dapita ang Pagpaambit

Dapita ang mga bata sa pagbarog kon gusto sila mopaambit og usa ka butang nga bag-ohay lang nila nakat-onan mahitungod sa ebanghelyo sa panimalay o sa simbahan. Hatagi ang matag bata og kahigayonan nga mopaambit.

Itudlo ang Doktrina: Mas Gagmay nga mga Bata

Isaias 14:12–14

Dihay usa ka gubat sa langit.

Sa wala pa gilalang ang kalibotan, ang atong Langitnong Amahan mipili kang Jesukristo nga mahimong Manluluwas nato. Ang Isaias 14:12–14 naghulagway sa garbo nga gipakita ni Satanas sa Konseho sa Langit sa wala pa dinhi sa yuta.

Posible nga mga Kalihokan

• Gamita ang “Pasiuna: Ang Plano sa Atong Langitnong Amahan” (sa Mga Istorya sa Bag-ong Tugon, 1–3) o ang awit “Langit Gipuy-an Ko” (Songbook sa mga Bata, 140) aron sa pag-istorya sa mga bata kabahin sa Gubat sa Langit sa wala pa kita matawo. (Samtang imong buhaton, ilakip ang mga pulongan gikan sa Isaias 14:12–14 nga naghulagway kang Satanas.) Dayon dapita ang mga bata nga magpuli-puli sa pagsaysay sa istorya nganha kanimo. Ipasabot pag-ayo nga si Jesukristo misunod sa plano sa Langitnong Amahan ug nahimong Manluluwas nato.

• Diha sa pisara, pagdrowing og kasingkasing nga adunay pulong nga Satanas ug usa ka magul-anon nga nawong sa sulod niini. Ipasabot nga si Satanas miingon sa iyang kasingkasing, “Ibabaw sa mga bituon sa Dios, ako magpahimutang sa akong trono sa itaas” (Isaias 14:13), nga nagpasabot nga gusto niyang molabaw sa Langitnong Amahan. Dapita ang usa ka bata sa pagdrowing og lain nga kasingkasing, kini nga adunay pulong nga Jesus ug usa ka malipayon nga nawong sa sulod niini. Tabangi ang mga bata nga makasabot nga gustong buhaton ni Jesus ang unsay gipabuhat kaniya sa Langitnong Amahan (tan-awa sa Moises 4:1–2). Unsaon nato nga masunod ang ehemplo ni Jesus?

“Iyang lamyon ang kamatayon hangtod sa kahangtoran” (Isaias 25:8).

Isaias 25:8

Si Jesukristo nabanhaw.

Si Jesukristo makahupay sa kasubo nga mabati nato mahitungod sa kamatayon. Tungod kay nakaangkon siya og kadaogan sa kamatayon, kitang tanan mabanhaw usab.

Posible nga mga Kalihokan

• Ipakita ang usa ka hulagway sa Pagkabanhaw ni Jesukristo, ug hangyoa ang mga bata sa pagpaambit sa unsay ilang nahibaloan mahitungod sa hulagway. Kon gikinahanglan, ipaambit kanila ang istorya ni Jesus nga nabanhaw (tan-awa ang “Jesus Nabanhaw,” sa Mga Istorya sa Bag-ong Tugon, 139–44). Ipatukar o kantaha ang awit kabahin sa Pagkabanhaw, sama sa “Si Jesus Nabanhaw” (Songbook sa mga Bata, 44), ug dapita ang mga bata sa pagpaambit kon unsay ilang gibati nga nasayod nga si Jesus mibangon gikan sa pagkamatay.

• Sultihi ang mga bata mahitungod sa usa ka tawo nga imong kaila kinsa namatay. Unsay atong bation kon mamatay ang usa ka tawo nga atong gihigugma? Dapita ang mga bata sa pagdrowing og dagway sa usa ka tawo nga naghilak. Dayon basaha ang Isaias 25:8 ngadto kanila. Unsay buhaton ni Jesus sa atong mga luha kon mingawon kita sa usa ka tawo nga namatay? Dapita ang mga bata sa pagdrowing og malipayon nga dagway. Pagpamatuod nga tungod kay nabanhaw si Jesukristo, mahimo kitang mahupay kon mamatay ang usa ka tawo ug masayod nga kitang tanan mabanhaw sa umaabot nga adlaw.

Isaias 29:12,14

Ang Ginoo mipahiuli sa Iyang Simbahan pinaagi ni Joseph Smith.

Ang Pagpahiuli sa ebanghelyo “usa ka kahibulongan nga buhat ug usa ka katingalahan” (Isaias 29:14). Ipaambit sa mga bata ang pipila sa kahibulongan nga mga butang nga gibuhat sa Ginoo—ug gipadayon sa pagbuhat—aron sa pagpahiuli sa ebanghelyo sa atong panahon.

Posible nga mga Kalihokan

• Dapita ang mga bata sa pagsulti kanimo kon unsay ilang nahibaloan mahitungod kang Joseph Smith. Kon gikinahanglan, ipaambit kanila ang “Ang Unang Panan-awon ni Joseph Smith” (sa Mga Istorya sa Doktrina ug mga Pakigsaad, 9–12). Basaha ang Isaias 29:12, ug ipasabot nga bisan og si Joseph Smith wala gikonsiderar nga “maantigo” sa daghang tawo, gipahiuli ni Jesukristo ang ebanghelyo pinaagi kaniya.

• Basaha ang Isaias 29:14 ngadto sa mga bata, ug ipaambit kanila ang ubang mga pulong nga sama og gipasabot sa “kahibulongan” ug “katingalahan.” Ipakita ang mga butang nga nagrepresentar sa pipila sa kahibulongan nga mga buhat sa Ginoo atol sa ulahing mga adlaw, sama sa usa ka hulagway sa Unang Panan-awon o kang Joseph Smith nga nagdawat sa pagkapari (tan-awa sa Libro sa mga Hulagway sa Ebanghelyo, nu. 90, 93, 94) o sa usa ka kopya sa Basahon ni Mormon. Dapita ang mga bata sa pagpili og usa ka butang ug sa pagpaambit kon nganong kahibulongan kini kanila.

Itudlo ang Doktrina: Mas Dagko nga mga Bata

Isaias 24:3–5; 29:7–10; 30:8–14

Ang hingpit nga pagbiya nagpasabot sa pagbiya gikan sa Ginoo ug sa Iyang mga propeta.

Ang pagbasa sa mga pasidaan ni Isaias mahitungod sa mga peligro sa hingpit nga pagbiya makatabang sa mga bata nga makahukom nga magpabilin nga matinud-anon ngadto sa Ginoo ug mosunod sa Iyang mga propeta.

Posible nga mga Kalihokan

• Isulat sa pisara ang pulong nga hingpit nga pagbiya. Dapita ang mga bata nga mangita og kahulogan sa “Hingpit nga Pagbiya” diha sa Giya ngadto sa mga Kasulatan (scriptures.ChurchofJesusChrist.org). Dapita sila sa pagbasa sa Isaias 24:5; 30:9–11 ug sa paghimo og lista sa mga butang nga gibuhat sa mga tawo sa panahon ni Isaias nga misangpot kanila sa hingpit nga pagbiya. Dayon dapita ang mga bata sa pag-usab sa mga butang diha lista ngadto sa mga butang nga atong mabuhat aron magpabilin nga matinud-anon ngadto sa Ginoo.

• Bahina ang klase nga magpares-pares, ug itudlo ang matag pares sa pagbasa sa usa sa mosunod nga mga tudling: Isaias 24:3–5; Isaias 29:7–10; o Isaias 30:8–14. Dapita sila sa pagdrowing og mga hulagway nga nagrepresentar sa unsay ilang nabasa. Samtang ipaambit nila ang ilang mga drowing, tabangi sila sa paghisgot kon unsay gitudlo sa mga pulong ni Isaias kabahin kon nganong kinahanglan kitang magpabilin nga matinud-anon ngadto sa Ginoo.

Isaias 29:13–15, 18, 24

Ang Pagpahiuli sa ebanghelyo usa ka “kahibulongan nga buhat.”

Unsaon nimo nga matabangan ang mga bata nga makasabot nga kabahin sila sa “kahibulongan nga buhat” sa Ginoo (Isaias 29:14) sa ulahing mga adlaw?

Posible nga mga Kalihokan

• Ipakita ang mga hulagway sa pipila ka kahibulongan nga mga hitabo samtang gipahiuli ang ebanghelyo (tan-awa sa Libro sa mga Hulagway sa Ebanghelyo, nu. 90–95, o ang kalihokan nga pahina niining semanaha). Basaha og dungan ang Isaias 29:14, 18, 24, ug dapita ang mga bata nga mangita og mga pulong ug mga pulongan nga may kalabotan sa mga hitabo diha sa mga hulagway. Pangutan-a ang mga bata kon sa unsang paagi sila makatabang sa “kahibulongan nga buhat” sa Ginoo (bersikulo 14).

• Pagpaambit og mubo nga kasinatian aron matabangan ang mga bata nga makasabot kon unsay gipasabot sa pagpahiuli. Sama pananglit, paghisgot og usa ka butang nga nawala ug sa unsang paagi nakit-an nimo kini. Tabangi ang mga bata sa pagtandi niini ngadto sa Pagpahiuli sa ebanghelyo. Sumala sa Isaias 29:13–15, nganong gikinahanglan nato ang Pagpahiuli? Unsa nga kahibulongan nga mga buhat ang gihimo sa Ginoo aron ipahiuli ang Iyang ebanghelyo?

Isaias 14:3; 25:8; 28:16

Ang mga pagtulun-an ni Isaias nagpunting kanako kang Jesukristo.

Ang mga pagtulun-an ni Isaias mahimong mopunting sa mga bata nga imong gitudloan ngadto sa Manluluwas ug motabang kanila nga makahinumdom sa mga butang nga Iyang gibuhat alang kanila.

Posible nga mga Kalihokan

• Isulat ang mosunod nga mga pakisayran sa kasulatan sa managlahi nga mga piraso sa papel: Isaias 14:3; Isaias 25:8; Isaias 28:16; Mateo 11:28–30; 1 Mga Taga-Corinto 15:53–57; Helaman 5:12. Ihatag ang mga papel ngadto sa mga bata, ug dapita sila sa pagsulat diha sa mga papel sa mga kamatuoran nga ilang nakat-onan gikan sa mga bersikulo ug sa pagtinabangay aron mapares ang mga bersikulo nga nagtudlo sa susama nga mga kamatuoran. Sumala niini nga mga bersikulo, unsa nga talagsaon nga mga butang ang gibuhat sa Ginoo alang kanato?

• Hangyoa ang mga bata nga mopili og pulongan gikan sa Isaias 14:3; 25:8; o 28:16 nga nagpahinumdom kanila kang Jesukristo. Dapita sila sa pagsulat sa pulongan diha sa usa ka piraso nga papel ug sa pagdrowing og hulagway sa Manluluwas nga ilang ma-display sa ilang mga panimalay.

Awhaga ang Pagkat-on diha sa Panimalay

Dapita ang mga bata nga maghimo og mubo nga sulat o magdrowing og hulagway sa usa ka butang nga ilang nakat-onan sa klase karon. Awhaga sila sa pagpaambit niini sa ilang mga pamilya o sa usa ka sakop sa klase nga wala mitambong sa Primary karon.

Pagpalambo sa Atong Pagtudlo

Ipahiangay ang mga kalihokan aron sa pagpaapil sa mga bata nga may kakulangan. Ang gamay nga pagpahiangay sa mga kalihokan makaseguro nga ang tanan nga mga bata makakat-on. Sama pananglit, kon ang usa ka kalihokan nagsugyot sa pagpakita og usa ka hulagway, mahimo kamong manganta hinuon aron sa pagpaapil sa mga bata nga may mga kakulian sa panan-aw.