Jesus in the Synagogue at Nazareth [Si Jesus diha sa Sinagoga sa Nazaret], ni Greg K. Olsen

Oktubre 3–9

Isaias 58–66

“Moabot sa Zion [ang] Manunubos”

Ang mga ideya sa kalihokan dinhi niini nga latid gituyo aron sa pagdasig sa imong pagkamamugnaon. Ayaw batia nga kinahanglan eksakto nimong sundon kini; sunda ang mga pag-aghat sa Espiritu sa dili pa ug atol sa imong leksiyon.

Irekord ang Imong mga Impresyon

Dapita ang Pagpaambit

Daghan sa mga pulong ni Isaias nagpamatuod ug nagtudlo kabahin sa Manluluwas. Ipakita ang usa ka litrato ni Jesukristo, ug dapita ang mga bata sa pagpaambit og usa ka butang nga ilang nakat-onan mahitungod Kaniya karong semanaha.

Itudlo ang Doktrina: Mas Gagmay nga mga Bata

Isaias 58:13–14

Ang Igpapahulay mahimong usa ka kahimuot alang kanako.

Ang adlaw nga Igpapahulay usa ka panahon alang kanato nga hinumdoman ang Ginoo ug mopahulay sa atong sinemana nga mga kalihokan. Sa unsang paagi nimo matabangan ang mga bata nga imong gitudloan nga himoon ang Igpapahulay nga usa ka kahimuot?

Posible nga mga Kalihokan

• Dapita ang mga bata sa pagsubli sa pipila ka higayon sa pulongan nga “Magtawag sa adlaw nga igpapahulay nga usa ka kahimut-an, ug ang balaan nga adlaw sa Ginoo” (Isaias 58:13). Ipasabot nga ang “kahimut-an” nagpasabot sa usa ka butang nga makahatag kanato og kalipay. Hangyoa ang mga bata sa pagpaambit og pipila ka butang nga makahatag kanila og kalipay. Pagpamatuod nga ang Ginoo mihatag kanato sa adlaw nga Igpapahulay tungod kay gusto Siya nga makabaton kita og kalipay. Sultihi ang mga bata kon nganong ang Igpapahulay usa ka kahimut-an alang kanimo.

• Basaha ngadto sa mga bata ang gikan sa Isaias 58:14: “Ikaw maglipay sa imong kaugalingon diha sa Ginoo.” Ipasabot sa mga bata nga ang Igpapahulay usa ka espesyal nga adlaw—usa ka panahon nga kita makahunahuna mahitungod sa mga butang nga gibuhat sa Langitnong Amahan ug ni Jesus aron sa pagtabang kanato nga mahimong malipayon. Tabangi ang mga bata sa paghunahuna og mga butang nga ilang mahimo sa Igpapahulay aron mahinumdoman ang Langitnong Amahan ug si Jesus. Dapita sila sa pagdrowing sa ilang mga ideya ug sa pagpaambit sa ilang mga hulagway sa usag usa ug sa ilang mga pamilya.

“Ang Ginoo mao na man ang inyong kahayag nga walay pagkapalong” (Isaias 60:19). A Gift of Light [Usa ka Gasa sa Kahayag], ni Eva Timothy

Isaias 60:1–3

Ako makasidlak sa kahayag sa Manluluwas alang sa uban.

Gipanagna ni Isaias nga sa kataposang mga adlaw, ang katawhan sa Ginoo mahimong usa ka kahayag alang niadtong kinsa anaa sa kangitngit. Hunahunaa kon unsaon nimo nga matabangan ang mga bata nga “[mo]bangon” ug “[mo]sidlak.”

Posible nga mga Kalihokan

• Dapita ang mga bata nga mopiyong samtang imong basahon ang Isaias 60:1–3. Hangyoa sila sa pagbuka sa ilang mga mata kon madungog nila ang pulong nga “kahayag” ug sa pagpiyong kon madungog nila ang pulong “kangitngit.” Ipasabot nga si Jesukristo ug ang Iyang ebanghelyo sama sa usa ka kahayag nga motabang kanato nga makaplagan ang atong agianan balik ngadto sa Langitnong Amahan.

• Hatagi ang matag bata og usa ka hulagway sa kahayag (sama sa adlaw, kandila, o bombilya). Tabangi sila sa paghunahuna og mga paagi nga ilang mapaambit ang kahayag sa Manluluwas ngadto sa uban. Samtang ipaambit ang matag ideya, dapita sila sa “[pag]bangon” ug “[pag]sidlak” sa ilang kahayag pinaagi sa pagpataas sa ilang hulagway. Sultihi ang mga bata mahitungod sa mga paagi nga nakita nimo sila nga nagpaambit sa kahayag sa Manluluwas.

• Kantaha og dungan ang usa ka awit mahitungod sa pagpaambit og kahayag, sama sa “Dan-ag” (Songbook sa mga Bata, 96). Tabangi ang mga bata nga makabantay og mga pulong diha sa awit nga nagpalig-on sa unsay ilang nakat-onan gikan sa Isaias 60:1–3.

Isaias 61:1–3

Si Jesukristo mao ang akong Manluluwas ug Manunubos.

Ang Isaias 61:1–3 naghatag og gamhanan nga paghulagway sa misyon sa Manluluwas sa pagtudlo ug pag-alim. Pangita og mga paagi aron matabangan ang mga bata nga makakita kon sa unsang paagi si Jesukristo personal nga makatudlo ug makaalim kanila.

Posible nga mga Kalihokan

• Pagunita ang mga bata og mga hulagway ni Jesus nga nagtudlo, nag-alim, ug nagtabang sa uban samtang imong basahon ang Isaias 61:1 (tan-awa ang Libro sa mga Hulagway sa Ebanghelyo). Ipasabot nga gipadala sa Dios si Jesukristo aron sa pagbuhat niining mga butanga alang kanatong tanan. Dapita ang mga bata sa pagpaambit sa ilang mga pagbati mahitungod ni Jesukristo. Pagpamatuod bahin sa gugma sa Manluluwas alang sa matag usa sa mga bata.

• Ang Isaias 61:3 naghulagway niadtong kinsa maminaw ug mosunod sa Ginoo isip “mga dagkong kahoy sa pagkamatarong.” Pagdrowing og kahoy diha sa pisara, ug dapita ang mga bata sa paghunahuna og matarong nga mga butang nga ilang mahimo. Alang sa matag ideya, padrowinga ang mga bata og dahon diha sa kahoy.

Itudlo ang Doktrina: Mas Dagko nga mga Bata

Isaias 58:6–11

Ang pagpuasa mopanalangin kanako ug sa uban nga nagkinahanglan.

Pipila sa mga bata nga imong gitudloan mahimong igo na ang pangidaron aron magpuasa. Apan bisan kadtong dili pa igo ang pangidaron mahimong makabenepisyo gikan sa pagkat-on mahitungod sa balaod sa Ginoo sa pagpuasa ug sa pagpangandam nga magpuasa kon sila andam na.

Posible nga mga Kalihokan

• Isulat sa pisara ang Nganong magpuasa kita? ug Sa unsang paagi magpuasa kita? Dapita ang mga bata sa pagsulat og posible nga mga tubag sa pisara. Awhaga sila sa pagrebyo sa “Pagpuasa, Puasa” diha sa Giya ngadto sa mga Kasulatan (scriptures.ChurchofJesusChrist.org) ug sa Isaias 58:6–11 aron makapangita og dugang nga mga tubag. Sa unsang paagi nga ang Isaias 58:6–11 makatabang kanato kon ang pagpuasa lisod?

• Pagpaambit sa mga bata og personal nga kasinatian bahin sa pagpuasa, o pagpaambit og istorya gikan sa usa ka magasin sa Simbahan mahitungod sa pagpuasa. Ipasabot pag-ayo ang mga panalangin nga moabot gikan sa pagpuasa nga adunay espitiuhanon nga katuyoan. Kon duna man sa mga bata ang nakapuasa, dapita sila sa pagpaambit sa ilang mga kasinatian. Awhaga ang mga bata nga makig-istorya sa ilang mga ginikanan sa sunod nga Dominggo sa puasa [fast Sunday] mahitungod kon unsay buot ipasabot sa pagpuasa. Tabangi sila nga makasabot kon unsay buot ipasabot sa pagpuasa nga adunay sinsero nga katuyoan ug mainampoon nga kasingkasing.

• Basaha og dungan ang Isaias 58:6–7, ug ipasabot nga usa ka paagi nga “hatagan [natog] pagkaon ang mga gigutom” kon kita magpuasa mao ang pagdonar sa kwarta nga atong gastohon unta sa pagkaon isip usa ka halad sa puasa. Ipakita sa mga bata ang usa ka sulatanan sa amot [donation slip] alang sa ikapulo ug mga halad sa puasa, ug ipasabot kon unsaon sa pagsulat niini. Dapita ang mga bata sa pagbasa sa Isaias 58:8–10, nga mangita sa mga panalangin nga gisaad kanato kon kita magpuasa. Sa unsang paagi nga ang pagpuasa mopanalangin kanato ug niadtong nanginahanglan?

Isaias 61:1–3

Si Jesukristo mao ang akong Manluluwas ug Manunubos.

Pamalandongi kon sa unsang paagi nimo labing maayong magamit ang mga pulong ni Isaias aron malig-on ang mga pagpamatuod sa mga bata kang Jesukristo isip ilang Manluluwas ug Manunubos.

Posible nga mga Kalihokan

• Hatagi ang mga bata og pipila ka minuto nga basahon ang Isaias 61:1–3 sa ilang kaugalingon. Dayon dapita sila sa pagsulat sa usa ka piraso nga papel o sa usa ka study journal kon unsay gitudlo kanila niini nga mga bersikulo mahitungod kang Jesukristo. Dapita ang pipila ka bata sa pagpaambit sa ilang mga hunahuna.

• Dapita ang mga bata sa pagpaambit og pulongan gikan niini nga mga bersikulo nga labing makahuluganon alang kanila ug sa pagpasabot kon ngano. Sa unsang paagi nga kini nga mga bersikulo motabang kanato nga makasabot kon unsa ang gisugo kang Jesukristo nga buhaton dinhi sa yuta?

Isaias 65:17–25

Ang Milenyum maoy usa ka panahon sa kalinaw ug kalipay.

Si Isaias nakakita og panahon sa dihang ang katawhan sa Dios makabaton og kalinaw ug kalipay. Kini nga panagna matuman sa panahon nga si Jesukristo mobalik sa yuta ug maghari sulod sa usa ka libo ka tuig—usa ka panahon nga gitawag og Milenyum.

Posible nga mga Kalihokan

• Ang Isaias 65:17–25 naghulagway kon unsa ang hitsura sa yuta sa panahon nga ang Manluluwas mobalik pag-usab. Bahina ang mga bata ngadto sa gagmay nga mga grupo, nga hatagan ang matag grupo og pipila niini nga mga bersikulo nga basahon. Human sa pipila ka minuto, pagdungan og himo og lista sa pisara kon sa unsang paagi ang kinabuhi mahimong lahi sa “bag-ong yuta” nga gihulagway niini nga mga bersikulo (bersikulo 17). Nganong mahimo kini nga usa ka panahon sa “paglipay pag-ayo hangtod sa hangtod”? (bersikulo 18).

• Sa dili pa ang klase, pag-andam og ginunting nga mga pulong [word strips] nga adunay mga pulong ug mga pulongan gikan sa ikanapulo nga artikulo sa hugot nga pagtuo. Dapita ang usa sa mga bata sa pagsaysay sa artikulo sa hugot nga pagtuo, ug hangyoa ang mga bata sa paghan-ay sa ginunting nga mga pulong. Tabangi ang mga bata nga makasabot kon unsay gitudlo kanato niini nga artikulo sa hugot nga pagtuo mahitungod sa Milenyum.

Awhaga ang Pagkat-on diha sa Panimalay

Dapita ang mga bata sa pagpaambit og usa ka butang nga ilang nakat-onan karon mahitungod sa Manluluwas ngadto sa ilang mga pamilya. Awhaga sila sa pagbasa sa mga kasulatan uban sa ilang mga pamilya niini nga semana.

Pagpalambo sa Atong Pagtudlo

Pangutana og dinasig nga mga pangutana. Pangutana sa paagi nga makadapit sa mga bata nga motubag og labaw pa kay sa pagpahayag og mga kamatuoran. Sama pananglit, paghunahuna og mga pangutana nga mag-awhag kanila sa pagpaambit sa ilang mga pagpamatuod ug mga kasinatian.