The Mocking of Christ [Ang Pagbugalbugal kang Kristo], ni Carl Heinrich Bloch

Septyembre 26–Oktubre 2

Isaias 50–57

“Gipas-an Gayod Niya ang Atong Kasakitan, ug Gipas-an ang Atong mga Kasub-anan”

Ang Isaias 50–57 naglangkob og pipila ka matahom nga pinulongan nga mahimong dili masabtan sa mga bata nga imong gitudloan. Samtang mangandam ka sa pagtudlo, pamalandongi ang yano nga mga kamatuoran nga gitudlo niini nga mga pulong ug sa unsang paagi ikaw mahimong makatabang sa mga bata nga makakat-on niini.

Irekord ang Imong mga Impresyon

Dapita ang Pagpaambit

Awhaga ang matag bata sa pagpaambit kon giunsa nila pagkahibalo nga si Jesukristo nahigugma kanila. Hangyoa sila sa pagpaambit sa unsay ilang gibuhat aron ipakita nga sila nahigugma ni Jesus.

Itudlo ang Doktrina: Mas Gagmay nga mga Bata

Isaias 53:4

Nag-antos si Jesukristo alang kanako tungod kay nahigugma Siya kanako.

Pinaagi sa Iyang maulaong sakripisyo, si Jesukristo nag-antos alang sa atong mga sala ug midala diha sa Iyang Kaugalingon sa “atong kasakitan” ug “atong mga kasub-anan.” Unsaon nimo sa pagpamatuod sa mga bata bahin sa Pag-ula sa Manluluwas?

Posible nga mga Kalihokan

• Ipakita ang mga hulagway sa Manluluwas nga nag-antos diha sa krus ug sa Tanaman sa Getsemani (tan-awa sa Libro sa mga Hulagway sa Ebanghelyo, nu. 56, 57, o mga kapitulo 51–53 sa Mga Istorya sa Bag-ong Tugon). Hangyoa ang mga bata sa paghulagway sa unsay ilang nakita diha sa mga hulagway ug sa pagpaambit sa unsay ilang nahibaloan maghitungod kon unsay nahitabo. Nganong nag-antos man si Jesus alang kanato?

• Basaha ngadto sa mga bata ang gikan sa Isaias 53:4: “Gipas-an gayod niya ang atong kasakitan, ug gipas-an niya ang atong mga kasub-anan.” Ipakita sa mga bata ang usa ka bug-at nga butang (o usa ka hulagway niini), ug dapita sila sa pagpakaaron-ingnon sa pag-alsa og usa ka butang nga bug-at. Ipasabot nga ang “kasakit” ug “kasub-anan” (o kaguol) mahimong bug-at nga bation ug lisod nga dad-on. Pagpamatuod nga si Jesukristo motabang kanato sa pagdala niini nga mga butang tungod kay nahigugma Siya kanato.

Isaias 55:6

Ako makapangita sa Ginoo ug makasangpit Kaniya.

Hunahunaa kon unsaon nimo nga matabangan ang mga bata nga makasabot kon unsay buot ipasabot sa “pagpangita” kang Jesus sa tibuok nilang kinabuhi.

Posible nga mga Kalihokan

• Tagoi ang usa ka hulagway ni Jesus diha sa usa ka dapit sa kwarto, ug dapita ang mga bata sa pagpangita niini. Basaha ang mga pulong “Pangitaa ang Ginoo samtang makaplagan pa siya” gikan sa Isaias 55:6. Hangyoa ang mga bata sa paghingalan og pipila ka paagi nga sila makapangita sa Ginoo—nga nagpasabot nga maningkamot gayod sila nga magkat-on kabahin Kaniya ug magpaduol Kaniya. Sa matag higayon nga mohatag og tubag ang usa ka bata, tagoi pag-usab ang hulagway, ug dapita ang bata sa “pagpangita” niini.

• Tabangi ang mga bata nga makakat-on sa mga pulong sa awit “Sayo kong Mangita sa Ginoo” (Songbook sa mga Bata, 67) o lain nga awit mahitungod sa pagpaduol ngadto sa Manluluwas. Gamita ang pahina sa kalihokan karong semanaha aron sa pagtabang sa mga bata nga mopili og usa ka butang nga ilang buhaton aron “pangita[on] ang Ginoo.”

• Basaha ang pulongan “Sangpita siya samtang anaa pa siya sa duol” gikan sa Isaias 55:6. Sa unsa nga paagi kita mosangpit sa Langitnong Amahan? Hangyoa ang mga bata sa paghisgot mahitungod sa unsay ilang isulti sa ilang mga pag-ampo. Pagpamatuod nga ang Langitnong Amahan nahigugma kanila ug nakadungog kanila kon mag-ampo sila.

Itudlo ang Doktrina: Mas Dagko nga mga Bata

Isaias 51–52

Ang Ginoo nagdapit kanako nga “lig-on[on] ang [akong] kaugalingon.”

Sa Isaias 51 ug 52, ang Ginoo migamit og mga pulongan sama sa “pagmata,” “tindog,” ug “lig-ona ang imong kaugalingon” aron sa pagdasig sa Iyang katawhan sa pagkab-ot sa ilang balaan nga potensyal. Hunahunaa kon sa unsang paagi kini nga mga pulongan makadasig sa mga bata nga imong gitudloan.

Posible nga mga Kalihokan

• Sa dili pa ang klase, isulat sa pisara ang pipila ka pulongan gikan sa Isaias 51–52 nga nagpahayag sa mga aksiyon nga gusto sa Ginoo nga buhaton sa Iyang katawhan, sama sa “Iyahat ang inyong mga mata,” “Pagmata,” “Tindog,” “Yabyabi ang imong kaugalingon gikan sa abog,” ug “Panghugyaw kamo” (Isaias 51:6, 17; 52:2, 9). Papuli-puliha ang mga bata sa pag-akting sa usa sa mga pulongan samtang ang nahibilin sa klase mosulay sa pagtag-an kon unsa ang aksiyon. Human sa matag turno, ipakita sa mga bata ang pulongan diha sa mga kasulatan, ug hisgoti ngadto kanila ang espirituhanon nga kahulogan sa pulongan. Unsa ang gisugo sa Ginoo nga atong buhaton? Sa unsang paagi nga mabuhat nato ang matag usa niining mga butanga?

• Dapita ang mga bata sa pagbasa sa Isaias 51:1, 4, 7 ug sa pag-ila kon kinsa ang gikaestorya sa Ginoo ug unsa ang gusto Niya nga buhaton nila. Unsay buot ipasabot sa “[pag]pamati” sa Ginoo? Aron mahulagway, hangyoa ang usa sa mga bata nga mohatag og yano nga mga instruksiyon nga kinahanglang sundon sa uban. Nganong usahay lisod mamati ug mosunod sa Ginoo? Unsaon nato nga mapakita ngadto sa Ginoo nga kita “mamati” Kaniya?

Because of Love [Tungod sa Gugma], sa tigkulit nga si Angela Johnson

Isaias 53:3–9

Gidala ni Jesukristo sa Iyang Kaugalingon ang akong mga sala ug mga kasub-anan.

Sa unsang paagi nimo magamit ang mga pulong ni Isaias aron matabangan ang mga bata nga mas lawom nga makasabot sa unsay gibuhat sa Manluluwas alang kanila?

Posible nga mga Kalihokan

• Ipakita ang pipila ka litrato nga naghulagway sa pag-antos ug kamatayon ni Jesukristo (tan-awa, pananglitan sa, Libro sa mga Hulagway sa Ebanghelyo, nu. 56, 57, 58). Basaha og dungan ang Isaias 53:3–6, 9, ug dapita ang mga bata nga mangita og mga pulongan nga naghulagway sa mga hitabo diha sa mga litrato. Pagpamatuod nga gatosan ka tuig sa wala pa mag-antos si Jesukristo alang kanato, ang mga propeta sama ni Isaiah nagtudlo kabahin niining importante nga mga hitabo. Ngano kaha nga importante alang sa mga tawo nga mahibalo niini nga mga butang sa nag-una nga daghang katuigan? (tan-awa sa Alma 39:15–19).

• Dapita ang mga bata sa pagbasa sa Isaias 53:4–7 ug mangita og mga pulong nga naghulagway sa unsay giantos sa Manluluwas alang kanato. Hangyoa sila sa pagsulat niini nga mga pulong diha sa pisara. Nganong giantos Niya ang atong “kasakitan,” “kasub-anan,” ug “pagkadaotan”? (tan-awa usab sa Alma 7:11–12). Ipaambit sa mga bata kon giunsa sa Manluluwas sa pagtabang kanimo og dala sa imong mga kasakit ug kasub-anan. Tugoti sila sa pagpaambit kon unsa ang ilang gibati mahitungod sa Manluluwas ug unsa ang Iyang nahimo alang kanila.

Isaias 55:7–9

Ang mga pamaagi sa Ginoo mas labaw kay sa akong mga pamaagi.

Kon makasabot kita nga ang mga hunahuna ug mga pamaagi sa Ginoo mas labaw kay sa atoa, mahimong mas sayon nga mosalig Kaniya.

Posible nga mga Kalihokan

• Pangutan-a ang mga bata kinsa ang ilang dangpan kon sila adunay lisod nga problema, ug ngano. Basaha uban sa mga bata ang Isaias 55:8–9, ug hangyoa sila nga maminaw kon nganong kinahanglan natong tinguhaon ang giya sa Ginoo kon nagkinahanglan kita og tabang.

• Drowinga sa pisara ang panganod ug ang yuta, ug nganli kini nga ang Kalangitan ug Kalibotan. Dayon dapita ang mga bata sa pagbasa sa Isaias 55:9 aron mahibaloan kon unsay gitandi sa Ginoo sa kalangitan ug sa kalibotan, ug hangyoa sila sa pagdugang niining uban nga mga label ngadto sa mga drowing. Unsa man ang gipasabot nga ang mga pamaagi ug mga hunahuna sa Ginoo “mas labaw” kay sa atoa? Nganong importante nga mahibalo niini?

• Hisgoti sa mga bata ang pipila sa mga pamaagi sa Ginoo nga mas labaw kay sa atong mga pamaagi. Sama pananglit, unsa man ang Iyang pamaagi sa pagtratar sa mga makasasala? (tan-awa sa Marcos 2:15–17). Unsa man ang Iyang pamaagi sa pagpangulo sa uban? (tan-awa sa Mateo 20:25–28). Sa unsang paagi nga ang iyang mga pamaagi lahi kay sa mga pamaagi sa uban? Sultihi ang mga bata kon sa unsang paagi nakakat-on ka sa pagsalig sa mas labaw nga mga pamaagi ug mga hunahuna sa Ginoo.

Awhaga ang Pagkat-on diha sa Panimalay

Isugyot sa mga bata nga magtakda sila og tumong nga makatabang kanila nga mas mahiduol kang Jesukristo, base sa usa ka butang nga ilang nakat-onan sa klase karon. Dapita sila sa pagpaambit niana nga tumong ngadto sa usa ka sakop sa pamilya.

Pagpalambo sa Atong Pagtudlo

Tabangi ang gagmay nga mga bata nga makakat-on gikan sa mga kasulatan. Aron matabangan ang gagmay nga mga bata nga makat-on gikan sa mga kasulatan, tutoki ang usa ka bersikulo o bisan usa lamang ka importanting pulongan. Usahay mahimo nimong basahon ang usa ka tudling ug dapiton ang mga bata sa pagbarog o pagpataas sa ilang mga kamot kon madungog nila ang piho nga pulong o pulongan nga gusto nimong tutokan.