Jeremias, ni Walter Rane

Oktubre 10–16

Jeremias 1–3; 7; 16–18; 20

“Sa Wala Pa Nako Ikaw Buhata diha sa Tag[o]angkan Nakaila Na Ako Kanimo”

“Ang tumong sa matag magtutudlo sa ebanghelyo … mao ang pagtudlo sa lunsay nga doktrina sa ebanghelyo, pinaagi sa Espiritu, aron sa pagtabang sa mga anak sa Dios sa pagpalambo sa ilang hugot nga pagtuo diha sa Manluluwas ug mahimong mas sama Kaniya” (Pagtudlo sumala sa Pamaagi sa Manluluwas, atubangan nga hapin).

Irekord ang Imong mga Impresyon

Dapita ang Pagpaambit

Isulat sa gagmay nga mga piraso sa papel ang pipila ka importanteng mga pulong gikan sa pagtuon karong semanaha sa Jeremias, sama sa propeta, tubig nga buhi, pagpundok, ug yuta nga kulonon. Ibutang ang mga papel sa usa ka sudlanan, ug dapita ang mga bata sa pagkuha og usa ug sa pagpaambit og bisan unsa nga mga hunahuna nga aduna sila mahitungod niini. Tabangi sila nga makakita kon sa unsang paagi ang pulong adunay kalabotan ngadto sa usa ka butang nga gitudlo ni Jeremias.

Itudlo ang Doktrina: Mas Gagmay nga mga Bata

Jeremias 1:5

Ang Langitnong Amahan nakaila kanako sa wala pa ako matawo.

Tungod kay mipuyo kita uban sa Dios sa wala pa kita mianhi sa yuta, nakaila Siya kanato, bisan kon dili kita makahinumdom Kaniya. Unsaon nimo sa pagtabang ang mga bata nga imong gitudloan nga makasabot niining importante nga kamatuoran?

Posible nga mga Kalihokan

• Basaha ngadto sa mga bata ang Jeremias 1:5, ug ipasabot nga ang Dios nakaila ni propeta Jeremias sa wala pa siya matawo. Sultihi ang matag bata, tagsa-tagsa, nga ang Langitnong Amahan nakaila usab kaniya sa wala pa siya matawo ug nga gipadala Niya ang matag usa kanato dinhi nga adunay katuyoan.

• Ipakita sa mga bata ang usa ka hulagway sa usa ka masuso, ug pangutan-a ang mga bata kon nakahibalo sila diin kini nga masuso nagpuyo sa wala pa siya matawo. Kantaha og dungan ang usa ka awit nga nagtudlo mahitungod sa atong kinabuhi sa wala pa dinhi sa yuta uban ang Dios, sama sa “Ako Anak sa Dios” o “Langit Gipuy-an Ko” (Songbook sa mga Bata 2–3, 140). Hisgoti ang mahitungod sa espirituhanon nga mga pagbati nga gidalit sa awit. Ipaambit ang imong pagpamatuod nga kitang tanan nagpuyo uban sa Langitnong Amahan kaniadto ug nga gipadala Niya kita dinhi sa yuta.

Jeremias 1:7

Ang mga propeta gitawag aron mamulong sa mga pulong sa Ginoo.

Ang pagtawag ni Jeremias nagpakita sa unsay gisugo sa Ginoo nga buhaton sa mga propeta. Sa unsang paagi nimo matabangan ang mga bata nga imong gitudloan nga mapalig-on ang ilang tinguha sa pagsunod sa buhi nga propeta?

Posible nga mga Kalihokan

• Ipakita sa mga bata ang usa ka hulagway sa buhi nga propeta, ug dapita sila sa pagpaambit sa unsay ilang nahibaloan mahitungod kaniya. Unsa ang buhat sa mga propeta? Basaha ngadto sa mga bata unsay gisulti sa Ginoo ngadto sa lain nga propeta, si Jeremias, sa Jeremias 1:7. Dapita ang mga bata nga maglakaw diha sa gitindogan kon imong basahon ang “adtoon mo gayod ang katawhan nga paadtoan ko kanimo” ug magpakaaron-ingnon nga mamulong kon imong basahon ang “isulti mo gayod ang akong ipasulti kanimo.” Ipaambit ang imong pagpamatuod nga buhaton ug isulti sa mga propeta kon unsay isugo sa Ginoo.

• Ipakita ang mga hulagway sa mga propeta gikan sa kasulatan (tan-awa ang Libro sa mga Hulagway sa Ebanghelyo, mga magasin sa Simbahan, ug Dali, Sunod Kanako—Alang sa mga Indibidwal ug mga Pamilya). Pasultiha ang mga bata kanimo kon unsay ilang nahibaloan mahitungod niini nga mga propeta. Sultihi og kadiyot ang mga bata mahitungod sa usa ka butang nga gibuhat sa matag usa nga propeta aron sa pagtabang sa buhat sa Dios. Ipaambit ang imong pagpamatuod nga ang mga propeta gitawag sa Dios aron mamulong sa Iyang mga pulong ug moserbisyo sa Iyang katawhan.

Jeremias 16:16

Ako makatabang sa mga anak sa Langitnong Amahan sa pagbalik ngadto Kaniya.

Nagkutlo sa Jeremias 16:16, si Presidente Russell M. Nelson miingon, “Ang atong mga misyonaryo nangita alang niadtong nagkatibulaag nga Israel; ila silang gisuhid sa mga ‘lungag sa mga kabatoan’; ug ila silang gipamukot sama sa gibuhat kaniadto sa karaang panahon” (“Ang Pagpundok sa Nagkatibulaag nga Israel,” Liahona, Nob. 2006, 81).

Posible nga mga Kalihokan

• Samtang imong basahon ang Jeremias 16:16, dapita ang mga bata nga magpakaaron-ingnon nga mangisda o mangayam. Ipasabot nga ang mga mangingisda ug mga mangangayam niini nga bersikulo mahimong nagrepresentar sa mga misyonaryo. Dapita ang mga bata nga magpakaaron-ingnon nga mga misyonaryo. Unsa ang buluhaton sa mga misyonaryo? Unsaon nato pagtabang kanila?

• Paghimo og pares-pares [matching] nga dula gamit ang pahina sa kalihokan karong semanaha. Kon ang usa ka bata makakaplag og pares nga mga hulagway, hisgoti kon unsay gipakita niana nga hulagway nga atong mabuhat aron sa pagtabang sa mga anak sa Langitnong Amahan nga makabalik ngadto Kaniya.

Itudlo ang Doktrina: Mas Dagko nga mga Bata

Jeremias 1:4–19

Gitawag ang mga propeta aron mamulong sa pulong sa Ginoo.

Unsaon nimo nga matabangan ang mga bata nga mapalig-on ang ilang hugot nga pagtuo ug pagsabot sa tahas sa mga propeta sa gingharian sa Dios?

Posible nga mga Kalihokan

• Pagpili og pipila ka mahinungdanon nga mga bersikulo gikan sa Jeremias 1 nga nagtudlo og importante nga mga kamatuoran mahitungod sa mga propeta, sama sa mga bersikulo 5, 7, 10, ug 19. Dapita ang matag bata sa pagpili og usa sa mga bersikulo, sa pagbasa niini, ug sa pagpaambit og usa ka butang nga iyang makat-onan mahitungod sa mga propeta gikan sa bersikulo. Dapita ang pipila ka bata sa pagpaambit sa ilang mga pagpamatuod bahin sa pagsunod sa propeta.

• Ipakita ang usa ka hulagway sa buhi nga propeta, ug kantaha og dungan ang usa ka awit mahitungod sa mga propeta, sama sa “Maminaw Kita sa Propeta” (Mga Himno, nu. 16). Tabangi ang mga bata nga mohimo og lista sa mga butang nga gihangyo sa buhi nga propeta nga buhaton nato. Pagpili og bag-o nga mensahe sa komperensiya gikan sa propeta, ug tabangi ang mga bata nga makapangita og tambag sa iyang mensahe. Sa unsang paagi nga kita nagsunod sa propeta? Hisgoti kon sa unsang paagi ang tambag gikan sa mga propeta makatabang kanato nga mas maayong mosunod sa Langitnong Amahan ug ni Jesukristo.

• Pangutan-a ang mga bata kon unsaon nila sa pagpasabot ngadto sa usa ka higala ngano nga usa ka panalangin nga makabaton og buhi nga propeta (tan-awa ang Mga Artikulo sa Hugot nga Pagtuo 1:6, 9). Dapita ang mga bata sa pagpaambit sa ilang mga pagbati mahitungod sa buhi nga propeta.

Jeremias 16:14–15

Mahimo akong kabahin sa pagpundok sa Israel.

Ang mensahe mahitungod sa pagpundok sa Israel nga makita sa Jeremias 16:14–15 makahatag og nindot nga kahigayonan nga hisgotan ngadto sa mga bata ang mahitungod sa buhat sa misyonaryo ug family history. Kini usa ka paagi nga kita “mobar[o]g ingon nga mga saksi sa Dios” (Mosiah 18:9).

Posible nga mga Kalihokan

• Basaha og dungan ang Jeremias 16:14, ug hangyoa ang mga bata sa pagpaambit og mga detalye nga ilang nahinumdoman mahitungod kon sa unsang paagi “ang Ginoo … nagdala sa katawhan sa Israel gikan sa yuta sa Ehipto” (tan-awa sa Exodo 14). Dapita sila sa pagbasa sa Jeremias 16:15 aron mahibaloan kon unsa nga panghitabo ang giingon ni Jeremias nga mahimong mas halandomon kay sa niana. Ipasabot nga ang Israel nagkatibulaag sa tibuok kalibotan, apan ang Dios misaad sa pagpundok kanila og balik ngadto Kaniya ug sa Iyang Simbahan. Mao kini ang gitawag nga pagpundok sa Israel. Sa unsang paagi kini susama sa pagluwas sa mga tawo gikan sa pagkabihag?

• Ipaambit kini nga pahayag gikan ni Presidente Russell M. Nelson: “Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel” (Russell M. Nelson ug Wendy W. Nelson, “Pagla[o]m sa Israel” [tibuok kalibotan nga debosyonal sa kabatan-onan, Hunyo 3, 2018], dugang ngadto sa New Era ug Ensign, Ago. 2018, 15, ChurchofJesusChrist.org). Sa unsang paagi makatabang kita sa pagpundok sa Israel?

• Kantaha og dungan ang usa ka awit mahitungod sa misyonaryo nga buhat, sama sa “Unta Tawgon Ko Nila sa Misyon” o “Gitawag sa Pagserbisyo” (Songbook sa mga Bata, 91, 94). Pangutan-a ang mga bata kon unsay ilang nakat-onan gikan sa awit kabahin kon nganong ang usa ka tawo mopili sa pagserbisyo og misyon.

Awhaga ang Pagkat-on diha sa Panimalay

Dapita ang mga bata nga magdala sa balay og kopya sa pahina sa kalihokan karong semanaha ug sa pagdula uban sa ilang mga pamilya sa pares-pares nga dula. Awhaga sila nga maghisgot ngadto sa ilang mga pamilya kabahin kon sa unsang paagi ang misyonaryo nga buhat mipanalangin kanila.

Pagpalambo sa Atong Pagtudlo

Tabangi ang mga bata nga makaila sa Espiritu. Ang sagrado nga musika kasagaran modapit sa impluwensiya sa Espiritu Santo. Kon mokanta ka uban sa mga bata, paggahin og panahon sa pagtabang kanila nga makaila sa espirituhanon nga mga pagbati nga nagmatuod sa kamatuoran sa unsay ilang gikat-onan.