Maysaka a Mannursuro dagiti Ubbing

Inawagannaka ti Dios a mangisuro kadagiti annakna iti wagas ti Mangisalakan. Nai-set apartka iti daytoy a takem [calling] babaen ti turay ti nasantuan a priesthoodna. Uray no awananka iti padas a kas maysa a mannursuro, no agbiagka a maikari, agkararag iti inaldaw, ken agadal kadagiti nasantuan a kasuratan, ikkannakanto ti Nailangitan nga Ama iti impluensia ken bileg ti Espiritu Santo nga agballigi (kitaen iti 2 Nephi 33:1).

Dagidiay naitalek kenka nga aywanam ti annak ti Nailangitan nga Ama, ken ammona no ania ti kasapulanda ken no kasano ti kasayaatan a makatulong kadakuada. Babaen ti Espiritu Santo, tarabayennakanto ti Dios bayat ti panagsaganam ken bayat ti panangisurom. Ipalgaknanto kenka no ania ti nasken nga isaom ken no ania ti nasken nga aramidem (kitaen iti 2 Nephi 32:5).

Ti napateg a panggep ti panangisuro ken panagsursuro iti ebanghelio ket mangpauneg iti pannakapasurot wenno kumbersion iti Nailangitan nga Ama ken ni Jesucristo. Panggepmo a tun-oyen kas maysa a mannursuro ti mangtulong kadagiti sursuruam nga aramidenda ti amin a kabaelanda nga agbalin a napasurot [converted] iti ebanghelio ni Jesucristo—maysa a panagkagumaan a mayatiddog iti labes ti oras ti panagklase. Awisem dagiti sursuruam a sireregta a makiraman iti panagsursuro maipapan ken ni Jesucristo ken ti ebangheliona ken agtignayda a mayannurot iti no ania ti masursuroda. Allukoyem ida nga aramidenda ti bukod ken sangapamiliaan a panagadalda iti ruar ti klase a kangrunaan a pokus ti panagsursuroda iti ebanghelio. Bayat ti panagtignayda a sipapammati babaen ti panagadalda nga agmaymaysa ken sangapamiliaan, maawisdanto ti Espiritu iti biagda, ken ti Espiritu ti mangisangbay iti pudno a pannakapasurot wenno kumbersion. Nasken a maiturong iti daytoy sagrado a panggep ti amin a banag nga aramidem kas maysa a mannursuro.

Isurom laeng ti doktrina ti naisubli nga ebanghelio ni Jesucristo a kas masarakan kadagiti nasantuan a kasuratan ken balikas dagiti propeta iti ud-udina nga aldaw. Ti natarnaw a doktrina—agnanayon, saan nga agbalbaliw a kinapudno nga insuro ti Dios ken dagiti katulonganna—ket mangawis iti Espiritu ken addaan iti bileg a mangbalbaliw kadagiti biag.

Sagrado a panagtalek ti takem [calling] a mangisuro, ken gagangay a marikna ti talipupos no dadduma. Ngem laglagipem nga inawagannaka ti Nailangitan nga Ama, ken saannakanto a baybay-an iti kaano man. Daytoy ti aramid ti Apo, ken bayat ti panagserbim “iti amin a pusom, kabaelam, panunotmo ken pigsam” (Doktrina ken Katulagan 4:2), padakkelennanto dagiti kabaelam, sagutmo, ken talentom, ken ti serbisiom ket mangparaburto iti biag dagiti sursuruam.