“Panangipaay kadagiti Kasapulan dagiti In-inaudi nga Ubbing,” Umaykayo, Sumurot Kaniak—Para iti Primary: Daan a Tulag 2022 (2021)
“Panangipaay kadagiti Kasapulan dagiti In-inaudi nga Ubbing,” Umaykayo, Sumurot Kaniak—Para iti Primary: 2022
Panangipaay kadagiti Kasapulan dagiti In-inaudi nga Ubbing
Nakasagana ken aggagar dagiti ubbing nga agsursuro iti ebanghelio no maidatag daytoy iti wagas a maawatanda. Nangnangruna no mangisuroka kadagiti in-inaudi nga ubbing, ibilangmo ti panangusar kadagiti sumaganad a kita ti aktibidad tapno matulongam ida nga agsursuro.
-
Agkanta. Dagiti himno ken kanta manipud iti Children’s Songbook ket mangisuro iti doktrina a sibibileg. Usarem ti topics index iti likud ti Children’s Songbook a mangsapul kadagiti kanta a mainaig kadagiti pagbatayan ti ebanghelio nga isursurom. Tulongam dagiti ubbing a manginaig iti mensahe dagiti kanta iti biagda. Kas pagarigan, mabalin nga agsaludsodka maipapan kadagiti balikas wenno ragup ti balikas kadagiti liriko. Kas nayon iti panagkanta, makaaramid dagiti ubbing kadagiti garaw a maigiddan kadagiti kanta wenno dumngeg laeng kadagiti kanta kas background a musika bayat ti panangaramidda kadagiti sabali pay nga aktibidad. Para iti dadduma pay a kapanunotan, kitaen dagiti benneg a “Panangusar iti Musika a Mangisuro iti Doktrina” ken “Panangtulong kadagiti Ubbing nga Agsursuro ken Manglagip kadagiti Kanta iti Primary ken Himno” iti “Dagiti Pangiturong para iti Oras ti Panagkanta ken Pabuya dagiti Ubbing iti Musika iti Sakramento” iti daytoy a resource.
-
Dumngeg wenno mangyakem iti estoria. Paggugusto dagiti babassit nga ubbing dagiti estoria—manipud kadagiti nasantuan a kasuratan, manipud iti biagmo, manipud iti pakasaritaan ti Simbaan, wenno manipud kadagiti magasin ti Simbaan. Mangsapul kadagiti wagas a mangiraman kadakuada iti panagestoria. Mabalinda ti agiggem kadagiti ladawan wenno banag, agdrowing kadagiti ladawan dagiti mangmangngegda, agyakem iti estoria, wenno tumulong nga agestoria. Tulongam dagiti ubbing a mangbigbig kadagiti kinapudno ti ebanghelio kadagiti estoria nga ibinglaymo.
-
Agbasa iti nasantuan a kasuratan. Mabalin a saan unay a kabaelan dagiti ubbing ti agbasa, ngem mabalinmo latta nga iraman ida iti panagsursuro manipud kadagiti nasantuan a kasuratan. Mabalin a kasapulam ti agpokus iti maysa a bersikulo, ti kangrunaan a ragup ti balikas, wenno balikas. Bayat iti napigsa a panangbasam iti nasantuan a kasuratan, mabalin nga awisem dagiti ubbing a tumakderda wenno ingato dagiti imada no mangngeganda ti maysa a balikas wenno ragup ti balikas a kayatmo nga ipokus. Mabalin a kabaelanda ti mangyulo kadagiti ababa a ragup ti balikas manipud kadagiti nasantuan a kasuratan no ulitenda dagitoy iti sumagmamano a gundaway. Bayat ti pannakangngegda iti balikas ti Dios, mariknadanto ti Espiritu.
-
Agbalin nga aktibo. Gapu ta masansan a naregta dagiti babassit nga ubbing, mangplano kadagiti wagas tapno mapalugodanda nga aggunay iti lawlaw—agmartsa, aglagto, aglagto-lagto, agrukob, magna, ken dadduma pay a garaw a mainaig iti pagbatayan wenno estoria nga isursurom. Mabalin nga epektibo dagitoy a panaggaraw bayat ti aggigiddan a panagkantayo.
-
Kumita iti maysa a ladawan wenno agbuya iti video. No ipakitam kadagiti ubbing ti maysa a ladawan wenno ipabuyam ti video, agdamagka kadagiti ubbing iti saludsod a makatulong kadakuada a mangkita no kasano a mainaig daytoy iti maysa a pagbatayan ti ebanghelio wenno estoria iti nasantuan a kasuratan. Kas pagarigan, mabalinmo a saludsoden, “Ania ti mapaspasamak iti daytoy a ladawan wenno video?” wenno “Kasano ti ipariknana daytoy kenka?” Ti Gospel Library app, MediaLibrary.ChurchofJesusChrist.org, ken children.ChurchofJesusChrist.org ket nasasayaat a pakakitaan kadagiti video.
-
Ibinglay dagiti padas. Awan unay ti maibinglay dagiti inaudi nga ubbing kas iti kaadu ti maibinglay dagiti in-inauna nga ubbing, ngem no mangtedka kadakuada iti nalawag a pannarabay, makaibinglayda kadagiti rikna ken padasda maipapan iti no ania ti nasursuroda.
Ladawanubing nga agkolkolor iti siled ti klase iti simbaan -
Agpartuat. Mabalin dagiti ubbing ti agparnuay, agdrowing, wenno agkolor iti maysa a banag a mainaig iti estoria wenno pagbatayan a nasursuroda. Allukoyem ida a mangyawid iti partuatda iti pagtaengan ket ibinglayda daytoy kadagiti miembro ti pamiliada tapno makatulong kadagiti ubbing a manglagip iti no ania ti nasursuroda.
-
Makiraman kadagiti banag nga adalen [object lesson]. Makatulong kadagiti ubbing ti simple a banag nga adalen [object lesson] tapno maawatanda ti maysa a pagbatayan ti ebanghelio a narigat a maawatan. No agus-usarka kadagiti banag nga adalen [object lessons], mangsapul kadagiti wagas a pakairamanan dagiti ubbing. Ad-adunto ti masursuroda manipud iti padas iti pannakilangen ngem iti panangbuya laeng iti demonstrasion.
-
Mangyakem [role-play]. No mangyakem dagiti ubbing ti maysa situasion nalabit a mapadasandanto iti pudno a biag, nasaysayaat ti pannakaawatda no kasano a maaramat dagiti pagbatayan ti ebanghelio iti biagda.
-
Uliten dagiti aktibidad. Mabalin a kasapulan dagiti ubbing ti dumngeg kadagiti konsepto iti mamin-adu a gundaway tapno maawatanda dagitoy. Dika agbuteng a mangulit kadagiti estoria wenno aktibidad a masansan, uray pay kabayatan ti isu met laeng nga adalen. Kas pagarigan, mabalinmo nga ibinglay ti estoria iti nasantuan a kasuratan iti mamin-adu iti sabasabali a wagas kabayatan ti adalen—babaen iti panangbasa manipud kadagiti nasantuan a kasuratan, pananggupgop iti bukodmo a balikas, panangipabuya iti video, panagpatulong kadagiti ubbing iti panangestoriam, panangawismo kadakuada a mangyakem iti estoria, ken dadduma pay. No ti maysa nga aktibidad a nausar iti klase ket maulit iti pagtaengan, ti panangulit ti mangtulongto kadagiti ubbing a makasursuro ken makalagip.
-
Makilangen kadagiti dadduma. Padpadur-asen dagiti ubbing dagiti paglainganda iti pannakilangen ken masansan a magustuanda ti panagsursuro ken pannakiay-ayam kadagiti kapatadada. Mangparnuay kadagiti gundaway nga agbibinninglay, agsisinnublat, ken agtitinnulongda bayat ti panagsursuroda.
-
Makiraman kadagiti nadumaduma nga aktibidad. Gagangay nga ababa ti kapaut ti atension dagiti babassit nga ubbing, ken addaanda iti nadumaduma nga estilo ti panagsursuro. Usarem dagiti nadumaduma a kita ti aktibidad, ken ikasom dagiti pagilasinan a kasapulan dagiti ubbing ti napartak a panagbalbaliw. Kas pagarigan, mabalin a kasapulam a masansan a pagsisinnublaten dagiti naulimek wenno naragsak nga aktibidad.
Paset ti akemmo a kas maysa a mannursuro dagiti babassit nga ubbing—kas nayon iti panangisuro kadagiti pagbatayan ti ebanghelio—ket isu ti mangtulong kadagiti ubbing a maammuanda no kasano ti makiraman iti maysa a klase ti Simbaan a siuumno. Kas pagarigan, mabalin a kasapulanda ti agsursuro maipapan iti panagsisinnublat, panagibinglay, panagdayaw iti dadduma, ken dadduma pay. Agaramid dagiti sumagmamano a mannursuro kadagiti tsart nga addaan iti naidutok nga aramiden [assignment] para iti tunggal ubing a makiraman iti klase iti maitudo a wagas (kas iti panagkararag, panagiggem iti ladawan, wenno panangipasa kadagiti papel). Mabalin nga agbaliw dagiti naidutok nga aramiden iti tunggal lawas. Makatulong daytoy kadagiti ubbing nga agsisinnublat ken mangipokus iti umno a galad iti siled ti klase.
Dagiti ubbing—nangnangruna kadagiti in-inaudi nga ubbing—ket masansan a mairanud manipud iti regular, nalaka a madlaw nga aramid. Gapu ta ababa ti kapaut ti pasnek dagiti babassit nga ubbing ken no dadduma ket agkarigatanda a mangipamaysa iti pasnekda iti sibubukel a klase, gagangay a kasayaatan no daytoy a nakairuamam nga aramiden ket mangiraman iti masansan a panamagbalbaliw [transition] manipud iti maysa a kita ti aktibidad a mapan iti sabali. Kas pagarigan, mabalinmo nga iraman iti klasem ti sagpaminsan a panaginana babaen iti panagkolor iti maysa a ladawan, panagkansion iti maysa a kanta, ken dadduma pay.