Ngaahi Fakahinohino ki he Taimi Hivá mo e Polokalama ʻa e Fānaú ʻi he Houalotu Sākalamēnití

Siʻi Kau Palesitenisī ʻo e Palaimelí mo e Kau Faihivá,

Ko e ngaahi hiva Palaimelí ko ha meʻangāue mālohi ia ke tokoni ki he fānaú ke nau ako fekauʻaki mo e palani ʻo e fiefia ‘a e Tamai Hēvaní mo e ngaahi moʻoni tefito ʻo e ongoongolelei ‘o Sīsū Kalaisí. ʻI he hiva ʻa e fānaú fekauʻaki mo e ngaahi tefitoʻi moʻoni ʻo e ongoongoleleí, ʻe fakamoʻoniʻi ʻe he Laumālie Māʻoniʻoní ʻa hono moʻoní. ʻE nofo ʻa e ngaahi leá mo e hivá ʻi he ʻatamai mo e loto ʻo e fānaú ʻi he kotoa ʻo ʻenau moʻuí.

Fekumi ki he tokoni ‘a e Laumālié ʻi hoʻo teuteu ke akoʻi ʻa e ongoongoleleí ʻo fakafou ʻi he hivá. Vahevahe hoʻo fakamoʻoní ki he ngaahi moʻoni ʻokú ke hivaʻí. Tokoniʻi e fānaú ke nau vakai ki he founga ʻoku fekauʻaki ai e hivá mo e meʻa ʻoku nau ako mo aʻusia ʻi ʻapí pea ʻi he ngaahi kalasi Palaimelí. ʻE tāpuekina e fānaú mo honau ngaahi fāmilí ʻi hoʻo ngaahi ngāue mateakí.

ʻOku mau ʻofa mo fakaaʻu atu ʻemau houngaʻia ʻi he ngāue līʻoa ʻokú ke fakahoko ke fakamālohia mo maluʻi ʻetau fānau ʻofeiná.

Ko e Kau Palesitenisī Lahi ʻo e Palaimelí

Ngaahi Fakahinohino ki he Taimi Hivá

Miniti ʻe 5 (kau palesitenisī Palaimelí): Fua lotu, folofola pe tefito ʻo e tuí, mo e lea pē ʻe taha

Miniti ʻe 20 (faihivá): Taimi hiva

ʻOku fili ʻe he kau palesitenisī Palaimelí mo e faihivá e ngaahi hiva ki he māhina takitaha ke fakamālohia ʻaki e ngaahi tefitoʻi moʻoni ʻoku ako ʻe he fānaú ʻi heʻenau ngaahi kalasí pea mo ʻapi. ʻOku fakakau ʻi he tohi fakahinohino ko ʻení ha lisi ʻo e ngaahi hiva ʻoku nau fakamamafaʻi ʻa e ngaahi tefitoʻi moʻoni ko ʻení. ʻOku toe fokotuʻu atu foki e ngaahi hiva ko ʻení ʻi he fokotuʻutuʻu ʻi he Haʻu, ʻo Muimui ʻIate Au—Maʻá e Palaimelí mo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.

ʻI hoʻo akoʻi ʻa e ngaahi hivá ki he fānaú, fakaafeʻi kinautolu ke nau vahevahe e meʻa kuo nau ako fekauʻaki mo e ngaahi talanoa mo e ngaahi tefitoʻi moʻoni fakatokāteline ʻi he ngaahi hiva ʻokú ke akoʻí. ʻE lava ke ke toe vakaiʻi ʻa e ngaahi fokotuʻutuʻú ʻi he Haʻu, ʻo Muimui ʻIate Au—Maʻá e Palaimelí ʻa ia ʻoku ako ʻe he fānaú ʻi heʻenau ngaahi kalasí. ʻE tokoni ʻeni ke ke ʻiloʻi ʻa e ngaahi talanoa mo e ngaahi tefitoʻi moʻoni ʻoku nau akó koeʻuhí ke ke lava ʻo fakakaukau ki he founga ʻe poupouʻi ai ʻenau akó ʻo fakafou ʻi he hivá.

Lolotonga e taimi hivá, te ke lava foki ʻo toe vakaiʻi e ngaahi hiva kuo ʻosi ako ʻe he fānaú mo e ngaahi hiva ʻoku nau fiefia ke hivaʻí. ʻI hoʻo toe vakaiʻí, fakaafeʻi ʻa e fānaú ke vahevahe ʻenau ngaahi fakakaukau mo e ngaahi ongo fekauʻaki mo e ngaahi moʻoni ʻoku maʻu ʻi he ngaahi hivá.

Ko e tefitoʻi maʻuʻanga tokoni ki he hiva ʻi he Palaimelí ʻa e Tohi Hiva ‘a e Fānaú. ʻOku lelei pē foki mo e ngaahi himi mei he tohi himí mo e ngaahi hiva mei he Kaumeʻá pe Liahona. ʻE ʻi ai ha ngaahi taimi, ʻe hivaʻi ai ʻe he fānaú ha ngaahi hiva fakafonua pe ngaahi hiva ʻo ha ʻaho mālōlō ʻoku taau mo e Sāpaté pea mo e taʻu motuʻa ʻo e fānaú. Kuo pau ke fakangofua ʻe he kau pīsopelikí hano fakaʻaongaʻi ha toe faʻahinga mūsika kehe ʻi he Palaimelí (vakai, Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 12.3.4, ChurchofJesusChrist.org).

Vakai Fakalūkufua ki he Palaimelí

‘I he uike takitaha, ʻoku fakakau ʻi he Palaimelí ʻa e:

Taimi hiva:miniti ʻe 25

Fetongí:miniti ʻe 5

Ngaahi kalasí:miniti ʻe 20

ʻE lava ʻe he kau taki ʻo e Palaimeli ʻoku tokolahi angé ʻo vahevahe ʻa e fānaú ki ha kulupu ʻe ua pea akoʻi ʻa e kulupu ʻe taha ʻi he ngaahi kalasi Palaimelí kae fakahoko ʻe he kulupu ʻe tahá ʻa e taimi hivá. ʻE toki fakafetongi leva ʻa e ongo kulupú. ʻI he ngaahi meʻa peheé, ʻe fie maʻu ʻa e kau taki ʻo e Palaimelí ke liliu ʻa e taimi ʻoku hā atu ʻi ʻolungá ke feʻunga mo honau tūkungá.

Ngaahi Hiva ʻoku Fokotuʻu Atu ki he Taimi Hivá

Sānuali

• “Fānau Au ʻa e ʻOtuá,” Tohi Hiva ʻa e Fānaú,2–3

• “ʻOku moʻui ʻEku Tamaí,” Tohi Hiva ʻa e Fānaú,8

• “ʻO Ka Ne Ka Toe Haʻu, ”Tohi Hiva ʻa e Fānaú, 46–47

Fēpueli

• “Muimui He Palōfitá,” Tohi Hiva ʻa e Fānaú, 58-59 (veesi 3)

• “Naʻá Ne Fekau Hono ʻAló,” Tohi Hiva ʻa e Fānaú,20–21

• “Fili ʻa e Moʻoní,” Ngaahi Himí, fika 146

Māʻasi

• “Ke Mou Feʻofaʻaki,” Tohi Hiva ʻa e Fānaú,74–75

• “Tokoniʻi Au Tamai,” Tohi Hiva ʻa e Fānaú,52

• “Pehē kiʻi Vaitafé ‘Foaki,’,” Tohi Hiva ʻa e Fānaú,116

ʻEpeleli

• “Huhuʻi ʻo ʻIsileli,” Ngaahi Himi, fika 5

• “Naʻe Toetuʻu Nai ʻa Sīsū?” Tohi Hiva ʻa e Fānaú,45

• “Tauhi ʻa e Ngaahi Fekaú,” Tohi Hiva ʻa e Fānaú,68–69

Mē

• “Te u ʻAʻeva mo Sīsū” (music.ChurchofJesusChrist.org)

• “Fekumi, Fifili, pea mo Lotu,” Tohi Hiva ʻa e Fānaú,66

• “Fie Siofia ha Temipale,” Tohi Hiva ʻa e Fānaú,99

Sune

• “Te u Loto-toʻa,” Tohi Hiva ʻa e Fānaú,85

• “Lotu ʻa ha Kiʻi Tamasiʻi,” Tohi Hiva ʻa e Fānaú,6–7

• “ʻOku ou Feinga ke Hangē ko Sīsuú,” Tohi Hiva ʻa e Fānaú,40–41

Siulai

• “Ko e Laumālie Māʻoniʻoní,” Tohi Hiva ʻa e Fānaú,56

• “ʻOku moʻui ʻEku Tamaí,” Tohi Hiva ʻa e Fānaú,8

• “Fie Siofia ha Temipale,” Tohi Hiva ʻa e Fānaú,99

ʻAokosi

• “Ko Hoku Huhuʻí,” Ngaahi Himi, fika 67

• “ʻOku Ongo ʻa e ʻOfá,” Tohi Hiva ʻa e Fānaú,42–43

• “Ako’i Au Ke u ‘Eva He Māmá,” Tohi Hiva ʻa e Fānaú,70

Sepitema

• “Ko e Anga-ʻofá ʻe Kamata ʻIate Au,” Tohi Hiva ʻa e Fānaú,83

• “Tauhi ʻa e Ngaahi Fekaú,” Tohi Hiva ʻa e Fānaú,68–69

• “Te u ʻAʻeva mo Sīsū” (music.ChurchofJesusChrist.org)

ʻOkatopa

• “ʻOku Ongo ʻa e ʻOfá,” Tohi Hiva ʻa e Fānaú,42–43

• “ʻOku Ou ʻAmanaki ʻe Ui Au Ke u ʻAlu ʻo Ngāue Fakafaifekau,” Tohi Hiva ʻa e Fānaú91

• “Ko e Fāmilí ke Taʻengata,” Tohi Hiva ʻa e Fānaú,98

Nōvema

• “Muimui He Palōfitá,” Tohi Hiva ʻa e Fānaú, 58-59 (veesi 7)

• “Fakamālō ki he ʻOtuá ,” Ngaahi Himi,fika 10

• “Te u Moʻui ʻAki e Kosipelí,,” Tohi Hiva ʻa e Fānaú,72

Tīsema

• “ʻO Ka Ne Ka Toe Haʻú,” Tohi Hiva ʻa e Fānaú,46–47

• “Fekumi Kei Siʻi Ki he ʻEikí,” Tohi Hiva ʻa e Fānaú,67

• “Naʻe ʻAloʻi Mai ʻa Sīsū Kalaisi,” Tohi Hiva ʻa e Fānaú,26–27

Ko Hono Fakaʻaongaʻi ʻo e Hivá ke Akoʻi ʻa e Tokāteliné

ʻOku fakataumuʻa ʻa e taimi hivá ke tokoni ki he fānaú ke nau ongoʻi ʻa e ivi tākiekina ʻo e Laumālie Māʻoniʻoní ʻi heʻenau ako e ngaahi moʻoni ʻo e ongoongoleleí. ʻE lava ke ueʻi koe ʻe he ngaahi fakakaukau ko ʻení ʻi hoʻo palani ha ngaahi founga ke akoʻi ai e ngaahi tefitoʻi moʻoni ʻo e ongoongoleleí ʻoku maʻu ʻi he ngaahi himí mo e ngaahi hiva Palaimelí.

Lau e ngaahi potufolofola ʻoku fekauʻakí. ʻI he Tohi Hiva ʻa e Fānaú mo e Ngaahi Himí, ʻoku fakakau ʻi ha ngaahi hiva mo ha ngaahi himi lahi ʻa e ngaahi veesi folofola ʻoku nau felāveʻí. Tokoniʻi e fānaú ke lau ha niʻihi ʻo e ngaahi potufolofola ko ʻení, pea talanoa ki he founga ʻoku fekauʻaki ai ʻa e ngaahi potufolofolá mo e foʻi hivá. Te ke lava foki ʻo hiki ha ngaahi fakamoʻoni fakafolofola ʻi he palakipoé pea fakaafeʻi ʻa e fānaú ke nau fakatauhoa ʻa e potufolofola fakafekauʻaki takitaha ki ha foʻi hiva pe ko ha veesi mei ha foʻi hiva.

Fakafonu ʻa e konga ʻataá. Hiki ha veesi ‘o e foʻi hivá ʻi he palakipoé pea tuku ke pulia ha ngaahi foʻi lea mahuʻinga. Kole leva ki he fānaú ke nau hivaʻi ʻa e foʻi hivá, ʻo fakafanongo ki he ngaahi lea ke fakafonu ʻaki ʻa e ngaahi konga ʻoku tuʻu ʻataá. ʻI heʻenau fakafonu e konga takitaha ʻoku tuʻu ʻataá, aleaʻi pe ko e hā ʻa e ngaahi tefitoʻi moʻoni ʻo e ongoongoleleí oku nau ako mei he ngaahi lea ʻoku puliá.

Fakaʻaongaʻi e ngaahi lea mei he kau taki ʻo e Siasí. Fakaafeʻi ʻa e fānaú ke nau fakafanongo ki ha kupuʻi lea mei ha taki ʻo e Siasí ʻokú ne akoʻi ʻa e tefitoʻi moʻoni ʻo e ongoongolelei tatau pē mo e hiva ʻa e Palaimelí. Kole ange ke nau hiki honau nimá ‘i he taimi ʻoku nau fanongo ai ki ha meʻa ʻokú ne tokoniʻi kinautolu ke mahino ʻa e foʻi moʻoni ʻoku nau hiva ʻo kau ki aí. Kole ange ke nau vahevahe ʻa e meʻa naʻa nau fanongo ki aí.

Fakamoʻoní. Fai ha fakamoʻoni nounou ki he fānaú ʻo kau ki he ngaahi moʻoni ʻo e ongoongoleleí ʻoku maʻu ʻi he hiva ʻa e Palaimelí. Tokoni ke mahino ki he fānaú ko e hivá ko ha founga ia ʻe taha te nau lava ai ʻo fai ha fakamoʻoni mo ongoʻi ʻa e Laumālié.

Tuʻu ko ha fakamoʻoni. Fakaafeʻi ʻa e fānaú ke nau taufetongi ʻi he tuʻu mo vahevahe ʻa e meʻa ʻoku nau ako mei he foʻi hiva ʻoku nau hivaʻí pe ko e ongo ʻoku nau maʻu fekauʻaki mo e ngaahi moʻoni ʻoku akoʻi ʻi he foʻi hivá. ʻEke ange pe ko e hā e ongo ʻoku nau maʻu ʻi heʻenau hivaʻi ʻa e foʻi hivá, mo tokoni ke nau fakatokangaʻi ʻa e ivi tākiekina ʻo e Laumālie Māʻoniʻoní.

Fakaʻaongaʻi e ngaahi fakatātaá. Kole ki he fānaú ke nau tokoni atu ke kumi pe faʻu ha ngaahi fakatātā ʻoku fekauʻaki mo e ngaahi foʻi lea pe ngaahi kupuʻi lea mahuʻinga ʻi he foʻi hivá. Fakaafeʻi kinautolu ke nau vahevahe ʻa e founga ʻoku fekauʻaki ai ʻa fakatātaá mo e foʻi hivá pea mo e meʻa ʻoku akoʻi ʻe he foʻi hivá. Hangē ko ʻení, kapau ʻokú ke akoʻi e foʻi hiva, “ʻO Ka Ne Ka Toe Haʻu” (Tohi Hiva ʻa e Fānaú,46–47), te ke lava ʻo fokotuʻu ha ngaahi fakatātā takatakai ʻi he lokí ʻoku nau fakatātaaʻi e ngaahi foʻi lea mahuʻinga mei he hivá (hangē ko e kau ʻāngeló, sinoú, mo e fetuʻú). Kole ki he fānaú ke nau tānaki ʻa e ngaahi fakatātaá ʻo puke hake ki ʻolunga ʻi he hokohoko totonú lolotonga hono hivaʻi fakataha ʻa e foʻi hivá.

Vahevahe ha lēsoni fakataumuʻa. Te ke lava ʻo fakaʻaongaʻi ha meʻa ke ne tākiekina ha fealēleaʻaki fekauʻaki mo ha foʻi hiva. Hangē ko ʻení, ʻoku talanoa e foʻi hiva “Fekumi Kei Siʻi ki he ʻEikí” (Tohi Hiva ʻa e Fānaú 67) fekauʻaki mo e fekumi ki he ʻEikí. Te ke lava ʻo fufuuʻi ha fakatātā ʻo e Fakamoʻuí ʻi he lokí pea fakaafeʻi ha kiʻi leka ke ne kumi ia. Hili hono maʻu ʻe he kiʻi leká e fakatātaá, aleaʻi e ngaahi meʻa naʻá ne fakahoko ke maʻu ai iá. ʻE malava ke iku ʻeni ki ha fealēleaʻaki fekauʻaki mo e ngaahi meʻa ʻoku ʻasi ʻi he foʻi hivá ʻa ia te tau lava ʻo fakahoko ke fekumi ai ki he ʻEikí.

Fakaafeʻi e vahevahe ʻo e ngaahi aʻusia fakatāutahá. Tokoniʻi e fānaú ke fakafehokotaki ʻa e ngaahi tefitoʻi moʻoni naʻe akoʻi ʻi he hivá mo e ngaahi aʻusia kuo nau maʻu ʻi he ngaahi tefitoʻi moʻoni ko iá. Hangē ko ʻení, kimuʻa hono hivaʻi ʻo e “Fie Siofia Ha Temipalé” (Tohi Hiva ʻa e Fānaú,99), ʻe lava ke ke kole ki he fānaú ke hiki honau nimá ʻo kapau kuo nau sio ki ha temipale. Fakaafeʻi kinautolu ke nau fakakaukau ʻi heʻenau hivá fekauʻaki mo e anga ʻo e ongo ʻoku nau maʻú ʻi he taimi ʻoku nau mamata ai ki ha temipalé.

Fai ha ngaahi fehuʻi. ʻOku lahi ʻa e ngaahi fehuʻi te ke lava ʻo fakahoko ʻi hoʻo hivaʻi ʻa e ngaahi hivá. Hangē ko ʻení, ʻe lava ke ke ʻeke ki he fānaú pe ko e hā e meʻa ne nau ako mei he veesi takitaha ʻi he foʻi hivá. ʻE lava foki ke ke kole ange ke nau fakakaukau ki he ngaahi fehuʻi ʻoku tali ʻe he foʻi hivá. ʻE lava ke iku ʻeni ki ha fealēleaʻaki fekauʻaki mo e ngaahi moʻoni ʻoku akoʻi ʻi he hivá.

Fakafanongo ki he ngaahi talí. Kole ki he fānaú ke nau fakafanongo ki he tali ki he ngaahi fehuʻí. Hangē ko ʻení, ʻoku ʻi he foʻi hiva “Naʻá Ne Fekau Hono ʻAló” (Tohi Hiva ʻa e Fānaú,20–21) ha ngaahi fehuʻi ʻe niʻihi mo ha ngaahi tali. Te ke lava ʻo ʻeke ki he fānaú e ngaahi fehuʻí pea ʻai ke nau fakafanongo ki he ngaahi talí ʻi heʻenau hivá.

Tokoniʻi e Fānaú ke Ako mo Manatuʻi ʻa e Ngaahi Hiva Palaimelí mo e Ngaahi Himí

ʻOku ako ʻe he fānaú ha foʻi hiva ʻaki ʻenau fakafanongo mo hivaʻi tuʻo lahi iá. Hivaʻi maʻu pē ʻa e ngaahi lea ʻo ha hiva foʻou ki he fānaú—ʻoua ʻe lau pe lau maʻuloto pē kinautolú. ʻOku tokoni ʻeni ke fakafehokotaki ʻe he fānaú ʻa e fasí ki he ngaahi leá. Hili hono akoʻi ʻo ha foʻi hiva, toe vakaiʻi ia ʻi ha ngaahi founga fakafiefia kehekehe lolotonga e taʻú. ʻOku ʻoatu ʻi lalo ha ngaahi fakakaukau ke tokoni ki hono ako mo toe vakaiʻi ʻe he fānaú ʻa e ngaahi hivá.

Faʻu ha ngaahi pousitā. Fakaʻaliʻali ʻa e ngaahi pousitaá mo e ngaahi lea mei he veesi takitaha pe ngaahi fakatātā ʻoku nau fakafofongaʻi e ngaahi leá. Lolotonga e hiva ʻa e fānaú, fufuuʻi ʻa e ngaahi foʻi leá pe ngaahi fakatātaá kae ʻoua kuo nau lava ʻo hivaʻi e foʻi vēsí kakato taʻe-kau ai ʻa e pousitaá. ʻE lava foki ke ke fakaafeʻi ʻa e fānaú ke nau tokoni atu ʻi hono faʻu e ngaahi pousitaá.

Fakahinohino hono māʻolunga pe maʻulalo ʻo e notá. Ke tokoni ke ako ʻe he fānaú e fasi ʻo ha hiva, ʻai ho nimá ʻi muʻa, mei hema ki mataʻu pea lolotonga hono hivaʻi ʻo e ngaahi leá, ʻalu ki ʻolunga ho nimá ke fakahā ʻa e nota māʻolungá pea ki lalo ke fakahā ʻaki ʻa e nota maʻulaló.

Fetaliaki (Echo). Fakaafeʻi ʻa e fānaú ke nau hiva fetaliaki ʻaki haʻanau angimui ʻi he meʻa ʻokú ke hivaʻí. Hivaʻi ki he fānaú ha kiʻi konga lea pe laine, pea tuku ke nau hivaʻi mai ia kiate koe.

Fulifulihi e founga hivá. Hivaʻi e ngaahi hivá ʻi ha ngaahi founga kehekehe, hangē ko e fanafaná, ngūnguú, pasipasi ki he taimí, feliliuaki e vave mo e tuai e hivá, pe hiva lolotonga ʻoku tuʻu pe tangutu. ʻE lava foki ke ke ngaohi ha kiʻi puha pepa, pea ʻi he tafaʻaki takitaha ʻo e puhá, tohiʻi ai ha founga ʻe taha ke fakahoko ai e hivá. Fakaafeʻi ha tamasiʻi/taʻahine ke ne tekaʻi e kiʻi puhá ke fili ai e founga ʻe hivaʻi ai ʻe he fānaú ʻa e foʻi hivá.

Hiva fakakulupu. ʻOange ki he kalasi takitaha pe ha taha ʻa e kupuʻi lea ke tuʻu ʻo hivaʻi, pea tuku ke nau taufetongi ʻi he ngaahi kupuʻi leá kae ʻoua kuo nau kakato ʻi hono hivaʻi e kupuʻi lea takitaha.

Fakatātā ʻaki honau nimá. Fakaafeʻi ʻa e fānaú ke nau fakakaukau ki ha ngaahi fakatātā faingofua ʻo ngāue ʻaki honau nimá ke tokoni ke nau manatuʻi ʻa e ngaahi foʻi leá mo e ngaahi pōpoaki ʻo ha foʻi hiva. Hangē ko ʻení, ʻi hoʻomou hivaʻi e “Loto ʻApasiá” (Tohi Hiva ʻa e Fānaú,11), ʻe lava ke ke fakaafeʻi e fānaú ke nau kūnima, punou honau ʻulú, pea ala ki honau fatafatá (mafú) ʻi heʻenau hivaʻi ʻa e ngaahi foʻi laine mahuʻinga ko ia ʻo e foʻi hivá.

Hiva e tamaiki fefiné, hiva e tamaiki tangatá. Tā ha fakatātā ʻo ha kiʻi tamasiʻi mo ha fakatātā ʻo ha kiʻi taʻahine, pea kuluuʻi pe tepiʻi ʻa e fakatātaá ki ha ongo vaʻakau kehekehe. Lolotonga hono toe vakaiʻi ʻo ha foʻi hivá, hiki hake ha taha ʻo e ongo fakatātaá ke fakahaaʻi ko hai ʻoku totonu ke ne hivaʻi ʻa e konga ko ia ʻo e foʻi hivá.

Tolo kató. Fokotuʻu ha ngaahi kato pe faʻoʻanga meʻa kuo ʻosi fakafika ʻi muʻa ʻi he lokí—ʻo fakatatau ki he lahi e ngaahi veesi ʻi ha foʻi hiva. Fakaafeʻi ha taha ʻo e fānaú ke tolo ha tangai piini pe laʻi pepa kuo nusinusiʻi ki loto pe ofi ki ha faʻoʻanga meʻa kuo fakafika. ‘Ai e fānaú ke nau hivaʻi ʻa e veesi ʻoku fika tatau mo e faʻoʻanga meʻa ko iá.

Fakatauhoa ha fakatātā ki ha kupuʻi lea. Tohiʻi e laine takitaha ʻo ha foʻi hiva ʻi ha laʻi pepa kehekehe, pea kumi ha fakatātā ʻokú ne fakafofongaʻi ʻa e laine takitaha. Fokotuʻu e ngaahi fakatātaá ʻi he tafaʻaki ʻe taha ʻo e lokí pea ko e ngaahi laʻi pepá ʻi he tafaʻaki ʻe tahá. Hivaʻi ʻa e foʻi hivá, pea kole ki he fānaú ke nau fakatauhoa e ngaahi fakatātaá ki he ngaahi leá.

Fakahinohino ki he Polokalama ʻi he Houalotu Sākalamēnití

ʻOku angamaheni ʻaki ke fakahoko e polokalama houalotu sākalamēniti ʻa e fānaú ʻi he kuata hono fā ʻo e taʻú, fakatatau ki he fakahinohino ʻa e pīsopé. ʻI hoʻomou hoko ko e kau palesitenisī ‘o e Palaimelí mo e faihivá, fokotuʻutuʻu ke fakahoko ha fakataha ʻi he kamataʻanga ʻo e taʻú mo e tokoni ʻi he kau pīsopelikí ʻa ia ʻokú ne tokangaʻi ʻa e Palaimelí ke kamata hono aleaʻi ʻa e ngaahi palani ki he polokalamá. ʻI hoʻo fakakakato e ngaahi palaní, kole ke maʻu ‘a ʻene fakangofuá.

ʻOku totonu ke fakaʻatā ʻe he polokalamá ʻa e fānaú ke nau fakahā ʻa e meʻa naʻa nau ako mo honau ngaahi fāmilí mei he Fuakava Motuʻá ʻi ʻapí pea ʻi he Palaimelí, ʻo kau ai ʻa e ngaahi hiva Palaimeli kuo nau hivaʻi ʻi he lolotonga ʻo e taʻú. Fakakaukauʻi ʻi he faʻa lotu ʻa e ngaahi tefitoʻi moʻoni ʻo e ongoongoleleí mo e ngaahi hiva ʻoku nau poupouʻi ʻa e meʻa kuo nau akó. Lolotonga e taʻú, tauhi ha ngaahi fakamatala ʻo e ngaahi lea ne fakahoko ʻe he fānaú pea pehē ki he ngaahi meʻa ne nau aʻusiá, naʻa lava ke fakaʻaongaʻi ʻi he polokalamá. Fakaafeʻi ʻa e fānaú ke nau vahevahe ha ngaahi folofola, talanoa, mo ʻenau fakamoʻoní ʻi he polokalamá. ʻI hoʻo palani ʻa e polokalamá, fakakaukau ki ha ngaahi founga ʻe lava ke tokoniʻi e haʻofangá ke nofotaha ʻenau tokangá ʻi he Tamai Hēvaní mo e Fakamoʻuí mo ʻEna ngaahi akonakí.

ʻE lava ke fakakaukauʻi ʻe he ngaahi ʻiuniti ʻoku tokosiʻi ai e fānaú ha ngaahi founga ʻe lava ke kau ai ʻa e kau mēmipa ʻo e fāmilí mo ʻenau fānaú. Tuku ki ha mēmipa ʻo e kau pīsopelikí ke ne fakaʻosi ʻa e fakatahá ʻaki ha kiʻi lea nounou.

ʻI hoʻo teuteu ʻa e polokalamá, manatuʻi ʻa e ngaahi fakahinohino ko ʻení:

• ʻOku ʻikai totonu ke toʻo ʻe he ngaahi ako polokalamá ha taimi lahi mei he ngaahi kalasi Palaimelí pe fāmilí.

• ʻOku ʻikai taau ke fai ha polokalama ʻi he houalotu sākalamēnití ʻoku fakaʻaongaʻi ai e naunau ki he sió, ngaahi teungá mo e ngaahi fakamatala ʻa e mītiá.

(Vakai, Tohi Tuʻutuʻuni Fakakātoá): Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 12.2.1.2, ChurchofJesusChrist.org