Saan a ti Pagayatak, No Di ti Pagayatam, ti Maaramid, ni Harry Anderson

Pebrero 10–16

2 Nephi 6–10

“O, Anian a Kinaindaklan ti Plano ti Diostayo!”

Maysa a wagas a panangisaganam iti bagim a mangisuro ket umuna a basaem ti 2 Nephi 6–10 para iti bagim. Isuratmo dagiti ania man nga impresion a maawatmo, ken usarem daytoy a balabala a mangsarak kadagiti nayon a nalawag a pannakaammo ken pannakaawat [insights] ken dagiti kapanunotan iti panangisuro.

Isuratmo Dagiti Impresionmo

Yawis ti Panagbibinninglay

Insuro ni Jacob kadagiti taona a dagiti pannursuro ni Isaias ket “mabalin a mayarig kadakayo” (2 Nephi 6:5). Mabalinmo ti mangrugi babaen ti panangidawat kadagiti miembro ti klase a mangibinglay kadagiti ania man a pannursuro ni Jacob iti 2 Nephi 6–10 a mariknada a mabalinda a yarig iti biagda. Mabalinda nga ilawlawag no apay a makitada a napateg ti pannursuro.

Isuro ti Doktrina

2 Nephi 6–8

Manangngaasi ti Apo kadagiti taona a mangipatungpalto kadagiti karina.

• Tapno mangted iti sumagmamano a konteksto kadagiti mensahe ti 2 Nephi 6–8, mabalin a makatulong para iti klasem a mangaramid iti simple a linia ti panawen dagiti pasamak a nailadawan iti 2 Nephi 6:8–15. Ania ti isingasing dagitoy a pasamak maipapan iti Apo ken dagiti riknana para kadagiti taona? (kitaen met iti 2 Nephi 7:1–3; 8:3). Mabalin a kayatmo nga ilawlawag a kas miembro ti Simbaan, datayo dagiti natulagan a tattao ti Dios, ket maum-ummongtayo iti ruar ti lubong nga agturong iti kinatalged ti ebanghelio. Ania dagiti mensahe nga adda kadagitoy a kapitulo a para kadatayo ita?

2 Nephi 9

Babaen ti Pannubbotna, isalakan ni Jesucristo ti amin a tao manipud iti pisikal ken naespirituan nga ipapatay.

• Maysa a wagas a panangpadakkel iti panagyamantayo iti Pannubbot ni Jesucristo ket panangpanunot maipapan iti no ania koma ti napasamak kadatayo no awan ti Pannubbot. Mabalin nga utoben dagiti miembro ti klase dagitoy a banag bayat ti panagadalda iti 2 Nephi 9. Mabalinmo nga awisen dagiti miembro ti klase a mangrugi babaen ti panagadalda kadagiti bersikulo 4–9 ket kalpasanna panangilista iti pisarra no ania koma ti napasamak no awan ti Pannubbot ni Cristo. Segun kadagiti bersikulo 10–14, kasano nga inispalnatayo ti Mangisalakan manipud iti daytoy a gasat? Makatulong ti mensahe ni Elder Jeffrey R. Holland iti “Dagiti Nainayon a Resources” tapno maawatan ti klasem ti panagkasapulan iti Pannubbot ni Jesucristo.   ( Mabalin nga ibinglay dagiti miembro ti klase dagiti ania man a kapanunotan wenno rikna a pinaregta ti mensahe ni Elder Holland maipapan iti Mangisalakan.

• Idawat kadagiti miembro ti klase a mangibilang no kasano a mailawlawagda ti Pannubbot ni Jesucristo iti maysa a tao a saanna pay nga ammo no ania daytoy ken no apay a kasapulan daytoy. Makatulong dagiti kinapudno a masarakan iti 2 Nephi 9 a makapagsagana dagiti miembro ti klase para iti kasta a panagsasarita. Nalabit a mabalinda a sukisoken dagiti bersikulo 4–12, a mangsapsapul iti no kasano a pinarmek ti Mangisalakan ti pisikal ken naespirituan nga ipapatay. Maibatay iti no ania ti masursurotayo manipud kadagitoy nasantuan a kasuratan, apay a maawagan iti sakripisio ti Mangisalakan iti “agnanayon a pannakasubbot”? (2 Nephi 9:7).

• Nasdaaw unay ni Jacob iti plano ti Dios iti pannakasubbot gapu ta naiturong a mangipukkaw iti “O anian a kinaindaklan” ken “O ti kinaindaklan” kas panangiladawanna iti plano. Tapno matulongan dagiti miembro ti klase a maawatanda a nasaysayaat dagitoy a rikna para iti Mangisalakan ken ti Pannubbotna, ibilangmo ti panangawis kadakuada nga agsukisok iti 2 Nephi 9 para kadagiti panangipukkaw ni Jacob (masarakan ti kaaduan kadagitoy kadagiti bersikulo 8–20). Ania ti isuro dagitoy a bersikulo maipapan iti Dios ken ti planona? Ania dagiti padas a nakatulong kadatayo a mangrikna no ania ti narikna ni Jacob maipapan iti plano ti Dios para kadagiti annakna? Mabalinyo met ti agkansion iti maysa a kanta maipapan iti kinaindaklan ti Dios, kas iti “How Great Thou Art” (Hymns, no. 86), tapno mangpatibker iti daytoy a panaglilinnawag.

2 Nephi 9:27–54

Mabalintayo ti umasideg ken ni Cristo ken umawat kadagiti nagloriaan a bendision ti Pannubbotna.

• Mabalinmo a rugian ti panangilawlawag kadagiti pannursuro ni Jacob kadagitoy a bersikulo babaen ti panangidawat kadagiti miembro ti klase a mangpanunot no kasano koma nga awisenda ti maysa a tao nga agbabawi ken umasideg ken ni Cristo. Kasano nga inaramid daytoy ni Jacob iti 2 Nephi 9:50–53? Ania dagiti bendision a kinunana a sumangbayto iti biagtayo no awatentayo dagitoy nga awis?

• Iti 2 Nephi 9, inusar ni Jacob dagiti dua a nabileg ken aggidiat a ragup dagiti balikas: “ti manangngaasi a paggep ti mannakabalin a Namarsua” ken “ti nasikap a panggep dayta a sairo” (2 Nephi 9:6, 28). Tapno matulongan dagiti miembro ti klase a masursuruanda manipud iti daytoy a panaggidiat, mabalinmo ti mangidrowing iti dana iti pisarra ket suratam daytoy iti Plano ti Nailangitan nga Ama. Mangawis kadagiti miembro ti klase a mangsukisok iti 2 Nephi 9:27–52, a mangsapsapul iti balakad nga inted ni Jacob a makatulong kadatayo a mangsurot iti plano ti Nailangitan nga Ama. Paisurat kadakuada no ania ti makitada iti abay ti dana. Ania ti insuro ni Jacob maipapan iti no kasano a sulisogennatayo ni Satanas nga umadayo manipud iti plano ti Nailangitan nga Amatayo? Ania ti masursurotayo manipud kadagitoy a bersikulo maipapan no sadino ti pangituronganto kadatayo ti panangsurot iti plano ti Nailangitan nga Ama ken no sadino ti pangituronganto kadatayo ti panangsurot iti plano ni Satanas? (kitaen iti 2 Nephi 9:9, 18). Segun kadagitoy a bersikulo, ania ti maaramidtayo tapno ad-adda a naan-anay a sumurottayo iti plano ti Nailangitan nga Amatayo?

• Iti 2 Nephi 9:28–38, nagballaag ni Jacob a maibusor iti sumagmamano nga ugali ken tignay a manglapped kadatayo manipud iti panangsurottayo iti plano ti Dios para kadatayo. Ibilangmo ti panangawis kadagiti miembro ti klase a mangsapul kadagitoy. Ania kadagitoy nga ugali ken tignay ti kasla gagangayen a maipangpangruna iti agdama ? Ania dagiti mamagpeggad unay kadagitoy? Ania ti masursurotayo manipud iti 2 Nephi 9:50–53 maipapan iti no kasano a maliklikan dagitoy a peggad?

Yallukoy ti Panagsursuro iti Pagtaengan

Tapno matulongan dagiti miembro ti klase a makarikna iti panagtalek maipapan iti panagbasa kadagiti sinurat ni Isaias nga inadaw ni Nephi iti 2 Nephi 11–24, mabalinmo nga ilawlawag nga inraman ni Nephi dagitoy a sinurat a mangpapigsa iti pammati dagiti taona ken ni Jesucristo. Mangawis kadagiti miembro ti klase a mangkita iti panagbasa iti sumaruno a lawas kas maysa a gundaway a mangpatibker iti bukodda a pammati Kenkuana.

Dagiti Nainayon a Resources

Ti Panagkasapulantayo iti maysa a Mangisalakan

Insarita ni Elder Jeffrey R. Holland ti estoria maipapan iti maysa a parauli iti dakkel a bato [rock climber] a sipepeggad a nakabitin iti maysa a nasang-at a canyon ledge, nga awan ti manglapped kenkuana manipud iti pannakatnagna iti ipapatayna. Idi mangrugi nga agalus-os ti petpetna iti nadarat a rabaw ti ledge, nariknana dagiti ima ti inaudi nga adingna a lalaki a nangtengngel kadagiti pungupunguanna ken nangguyod kenkuana iti pannakasalaknib. Indilig ni Elder Holland ti padas ti parauli iti kasasaadtayo iti daytoy a natnag a lubong:

“Adda pudno nga Adan ken Eva a natnag manipud iti pudno nga Eden, nga addaan iti amin a bunga a karagpin daytoy. … Gapu ta kalpasanna naipasngaytayo iti dayta natnag a lubong ken gapu ta aglabsingtayo met kadagiti linteg ti Dios, makedngantayo pay kadagiti isu met laeng a pannusa a nakaipasanguan da Adan ken Eva.

“Anian a dawat! Ti sibubukel a puli ti sangkataw-an iti nawaya a pannakatnag—nga adda ditoy ti tunggal lalaki, babai, ken ubing a a mangitaptapuak ti bagina iti manayon nga ipapatay, a naespirituan a mairarrarem nga agturong iti agnanayon a panagleddaang. Dayta kadi ti kaipapanan ti biag? Daytoy kadi ti naindaklan a paggibusan ti padas ti sangkataw-an? Agbitbitintayo amin kadi laeng iti nalamiis a kanyon iti maysa a lugar iti sabali a lubong, nga agsapsapul ti tunggal maysa kadatayo iti pangikaptan iti ramay ti saka, nga agbirbirok ti tunggal maysa kadatayo iti maysa a banag nga iggeman—nga awanan no di laeng ti pannakarikna iti darat nga agayus kadagiti ramaytayo, awan ti mangisalakan kadatayo, awan ti pagkaptantayo, awan ania man a banag a mangtengngel kadatayo? …

“Ti sungbat dagita a saludsod ket kaskasdi ket agnanayon a saan! … [Ti] Pannubbot ti manggun-d iti naan-anay a balligi a maibusor iti ipapatay ti bagi, awan kondisionna a mangipapaay iti panagungar iti tunggal tao a nayanak wenno mayanakto iti daytoy a lubong. Siaasi daytoy a mangipaay iti pammakawan dagiti bukod a basol ti amin, manipud ken ni Adan agingga iti panungpalan ti lubong, iti kondision ti panagbabawi ken panagtungpal kadagiti nadiosan a bilin” (“Where Justice, Love, and Mercy Meet,” Ensign wenno Liahona, Mayo 2015, 105–6).

Panangpadur-as iti Panangisurotayo

Iburaymo a masansan ti pammaneknekmo. Ti simple, naimpusuan a pammaneknekmo iti kinapudno ket nabileg a makaimpluensia kadagiti sursuruam. Saan a kasapulan ti nalaing a panagsarita wenno atiddog daytoy. Ibilangmo ti panangibinglay iti bukodmo a pammaneknek maipapan iti Mangisalakan bayat ti panangilawlawagmo iti 2 Nephi 9.