Pebrero 17–23

2 Nephi 11–25

“Agrag-otayo ken ni Cristo”

Kas nayon iti panangyarig iti 2 Nephi 11–25 iti bagim, ibilangmo no kasano a matulongam dagiti tao a sursuruam a mangyarig kadagitoy a kapitulo iti bagbagida (kitaen iti 2 Nephi 11:8). No iparikna kenka ti Espiritu dagiti kapanunotan ken ideya, isuratmo dagitoy.

Isuratmo Dagiti Impresionmo

Yawis ti Panagbibinninglay

Sakbay ti panangilawlawag kadagiti maitudo a binatog manipud iti 2 Nephi 11–25, mabalin a makatulong nga idawatmo kadagiti miembro ti klase a mangipapan nga adda maysa a gayyemda a mangikarkarigatan nga agsapul iti maysa a banag a napateg wenno makaparegta kadagiti sinurat ni Isaias. Ania dagiti bersikulo nga ibinglayda iti daytoy a gayyem?

Isuro ti Doktrina

2 Nephi 11–24

Pinaneknekan ni Isaias ni Jesucristo.

• Mabalin a nalaklaka a maawatan dagiti padto ni Isaias no ammotayo no apay a naisurat dagitoy. Tapno mangirugi ti panaglilinnawag maipapan kadagiti padto ni Isaias iti 2 Nephi, mabalinmo nga awisen dagiti miembro ti klase a mangsukisok iti kapitulo 11 ken mangilista iti sumagmamano a panggep ni Nephi iti napalaus unay a panangadawna iti Isaias. Mabalin pay nga ibinglayda dagiti binatog a nasarakanda iti bukod ken sangapamiliaan a panagadalda iti 2 Nephi 12–24 a mariknada a nagun-odda dagita a panggep. Kasano a nakatulong kadagiti miembro ti klase ti pannakaawat kadagiti panggep ni Nephi tapno makasursuroda iti ad-adu pay manipud kadagiti sinurat ni Isaias? Allukoyem ida a mangpanunot kadagitoy a panggep bayat ti panangilawlawagda kadagiti sinurat ni Isaias iti klase.

• Gapu ta inusar ni Isaias ti kasta unay a naisimbolo a pagsasao, mabalin a nalaka a mangtannawag iti nabileg a pammaneknekna ken ni Jesucristo. Daytoy ti maysa nga aktibidad a makatulong iti klase a mangipamaysa iti daytoy a saksi. Mabalinmo nga isagana ti sumagmamano a papel a nasuratan kadagiti reperensia iti nasantuan a kasuratan manipud iti 2 Nephi 12–24 a mangisuro maipapan iti Mangisalakan (kas pagarigan, 2 Nephi 13:13; 14:4–6; 15:1–7; 16:1–7; 17:14; 18:14–15; 19:6–7; 21:1–5; 22:2). Mabalin a pumili ti tunggal miembro ti klase iti maysa kadagiti papel, adalenna dagiti bersikulo a nakasurat ditoy, ket isuratna iti papel no ania ti nasursurona maipapan ken Jesucristo. Kalpasanna mabalin a makisinnukat iti papel dagiti miembro ti klase iti maysa a tao ket mangnayon iti ania man nga ad-adu pay a kapanunotan wenno nalawag a pannakaammo ken pannakaawat [insights] a nasursuroda maipapan iti Mangisalakan manipud kadagiti isu met la a bersikulo. Mabalin kalpasanna nga ikkam dagiti miembro ti klase iti gundaway a mangibinglay no ania ti nasursuroda manipud iti Isaias ken manipud iti tunggal maysa a nangpauneg iti panagdayawda ken ni Jesucristo.

• Ti padto iti 2 Nephi 19:6 ket mangilista iti sumagmamano a pangawag ken ni Jesucristo. Ibilangmo ti panangidawat iti maysa a tao a mangilista kadagitoy iti pisarra ken panangawis kadagiti miembro ti klase a mangilawlawag no apay a tunggal maysa kadagitoy a pangawag ket maibagay a panangiladawan iti Mangisalakan. Kasano nga impatungpalna dagitoy nga akem iti biagtayo? Tapno masursuro ti ad-adu pay maipapan iti sumagmamano kadagitoy a pangawag, mabalin a makatulong a sapulen dagiti reperensia kadagiti listababa [footnote] para iti 2 Nephi 19:6.

2 Nephi 12:2–5; 21:10–12; 22

Kadagiti ud-udina nga aldaw, maummongto ken mangsagrap iti talna dagiti tao ti Dios.

• Naipangpangruna nga adda pakainaiganda kadatayo dagiti masinunuo a paset ti padto ni Isaias gapu ta dagitoy ti mangiladawan kadagiti aspekto ti aramid ti Dios iti ud-udina nga aldaw. Kas pagarigan, mabalinmo nga amirisen ti 2 Nephi 21:10–12, a mangiladawan iti “wagayway” (bandera wenno wagayway) a maibayogto tapno mangummong kadagiti tao ti Dios. Kasano a naimatangantayon ti Apo a naespirituan a mangummong kadagiti taona? Nalabit a mabalin nga isarita ti sumagmamano a miembro ti klase maipapan no ania ti mamagtarigagay kadakuada a makiummong wenno makipagkaykaysa kadagiti tao ti Dios iti Simbaan. Mabalin a paggugustoda pay nga aramiden ti bukodda a wagayway a mangilista wenno mangiladawan iti sumagmamano a kinapudno ti ebanghelio a mariknada a “sapulen” dagiti tao ken mangtulongto nga “urnongen” ken “pagsangsangkamaysaen” (dagiti bersikulo 10 ken 12) dagiti annak ti Dios iti aldawtayo. Kasano a tumulongtayo iti panaguummong?

• Sabali pay a wagas iti panangilawlawag iti daytoy a doktrina ket panangisurat kadagiti sumaganad a tema iti pisarra: Pannakasayyasayya ti Israel, Pannakaummong ti Israel, ken Dagiti Padto ni Cristo. Mabalinmo ti mangidutok kadagiti kapitulo manipud iti 2 Nephi 12–24 kadagiti grupo dagiti miembro ti klase ket awisem ida a mangsapul kadagiti bersikulo a mangisuro maipapan kadagitoy a banag ket isurat dagitoy a bersikulo iti baba ti maitutop a paulo iti pisarra. Ania dagiti mensahe dagitoy a bersikulo para kadatayo? (Mabalin a makatulong a mangibaga kadagiti miembro ti klase a ti Doktrina ken Katulagan 113:1–6 ket makatulong a mangipaawat kadakuada iti 2 Nephi 21:1–5, 10.)

• Dagiti himno a kas iti “Iti Tuktok ti Bantay” (Dagiti Himno , blng. 5) wenno “The Lord is My Light” (Dagiti Himno, blng. 89), a maibatay iti paset kadagiti padto iti 2 Nephi 12:2–5 ken 2 Nephi 22, ket mabalin a mangpatibker kadagiti mensahe ken kaipapanan dagiti balikas ni Isaias.

2 Nephi 14:4–6

Dagiti pagtaengantayo ken dagiti “ummong” ti Zion ket mabalin a lugar a pagtalgedan ken pagkamangan.

• Iti 2 Nephi 14:4–6 impadto ni Isaias maipapan iti talged ken talna a sagrapento dagiti nalinteg kalpasan a “maugasan” ken “maikkaten ti naimansa” kadagiti basbasolda. Nupay iladawan dagitoy a bersikulo dagiti kasasaad nga addanto iti Milenium, matulonganda dagiti miembro ti klase a mangsapul iti naespirituan a talged iti baet ti kinadangkes iti ud-udina nga aldaw. Awisen ida a mangutob ken paglilinnawagan no ania ti kaipapanan ti kaadda ti “ulep ken asuk” ken “gumilgil-ayab nga apuy” iti “pagnaedan[da]” ken “ummong[da]” (bersikulo 5; kitaen met iti Exodo 13:21–22). Ania dagiti sumagmamano a banag a mabalin a maipada iti pudot, bagyo, ken tudo a nadakamat iti bersikulo 6? Kasano a masarakantayo ti pagkamangan? (Kitaen met iti D&K 115:6). Nalabit a mabalin nga isingasing dagiti miembro ti klase dagiti wagas tapno mapennek a dagiti pagtaengantayo ken panagguummong iti Simbaan ket dagiti lugar a naespirituan a pannakasaluad.

2 Nephi 25:19–29

“Ti umno a dalan isu ti panamati ken ni Cristo.”

• Mabalin a kasla maka-relate dagiti miembro ti klase iti tarigagay ni Nephi “tapno magutugot dagiti annaktayo, ken kasta met dagiti kakabsattayo, a mamati ken ni Cristo.” Kasano a “nagtrabaho a sireregta” ni Nephi tapno mangipatungpal iti daytoy a panggep a tun-oyen? (2 Nephi 25:23). Nalabit a mabalin a sukisoken dagiti miembro ti klase ti 2 25:19–29 a mangsapul kadagiti kinapudno maipapan iti Mangisalakan ken ti ebangheliona a kayat ni Nephi a maammuan dagiti taona. Kalpasanna mabalinda nga ibinglay no ania ti inaramidda a mangisuro kadagitoy a kinapudno iti pamilia wenno gagayyemda. Kas pagarigan, kasano a naisuroda ti kinapudno a “maisalakantayo babaen ti parabur, kalpasan ti amin a maaramidtayo”? (Ti palawag ni Presidente Dieter F. Uchtdorf iti “Dagiti Nainayon a Resources” ket makaipaay iti sumagmamano a nalawag a pannakaammo ken pannakaawat iti daytoy a kinapudno.) Kasano a natulonganda dagiti dadduma nga “agrag-o ken ni Cristo”?

Yallukoy ti Panagsursuro iti Pagtaengan

Mabalin nga agessem dagiti miembro ti klase a mangammo a ti 2 Nephi 26–30 ket makatulong kadakuada a sumungbat kadagiti tao nga agkuna, “Saanmi a kasapulan ti Libro ni Mormon.”

Dagiti Mainayon a Resources

“Ta mayanak kadatayo ti maladaga.”

Tapno mangsuplemento iti panangilawlawagmo iti 2 Nephi 19:6, agbuya wenno dumngegka iti Tabernacle Choir iti Temple Square a mangkanta iti “For unto Us a Child Is Born” (ChurchofJesusChrist.org).

“Maisalakantayo babaen ti parabur, kalpasan ti amin a maaramidtayo.”

Iti panangted iti masao kadagiti balikas ni Nephi iti 2 Nephi 25:23, kinuna ni Presidente Dieter F. Uchtdorf:

“Ania ngata no dadduma ditay matarusan dagiti ragup ti balikas a ‘kalpasan ti amin a maaramidtayo.’ Nasken a maawatantayo a ti balikas a ‘kalpasan’ ket saan a maipada iti balikas a ‘gapu.’

“Saantayo a maisalakan ‘gapu’ iti amin a maaramidtayo. Naaramid kadin ti asino man kadatayo ti amin a maaramidtayo? Agur-uray kadi ti Dios agingga a maibus ti amin a panagkagumaan sakbay a makibiangto Isuna iti biagtayo babaen ti pangisalakan a paraburna? …

“Siguradoak nga ammo ni Nephi a ti parabur ti Mangisalakan ti mangipalubos ken mangpabalin kadatayo a mangparmek iti basol [kitaen iti 2 Nephi 4:19–35; Alma 34:31]. Daytoy ti gapu no apay a nagtrabaho ni Nephi a sireregta a manggutugot kadagiti annakna ken kakabsatna ‘a mamati ken ni Cristo, ken makikinnaawatan iti Dios’ [2 Nephi 25:23].

Kalpasan ti amin, dayta ti maaramidtayo! Ken dayta ti trabahotayo iti mortalidad!” (“The Gift of Grace,” Ensign wenno Liahona, Mayo 2015, 110).

Panangpadur-as iti Panangisurotayo

Agdamag kadagiti saludsod a mangyawis iti pammaneknek. “Ti panagdamag kadagiti saludsod a mangallukoy kadagiti agad-adal nga agpaneknek maipapan kadagiti prinsipio a maisursuro ket mabalin a maysa a nabileg a wagas tapno maawis iti Espiritu. … Dagiti pammaneknekda—ken dagiti pammaneknek dagiti dadduma iti klase—dumakkelto bayat ti panangipaneknek ti Espiritu iti kinapudno” (Panangisuro iti Wagas ti Mangisalakan, 32).