“Pebrero 24–Marso 1. 2 Nephi 26–30: ‘Datdatlag nga Aramid ken Pagsidsiddaawan,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Pebrero 24–Marso 1. 2 Nephi 26–30,” Umaykayo, Sumurot Kaniak—Para iti Sunday School: 2020
Kibinen nga Iturongnakanto, ni Sandra Rast
Pebrero 24–Marso 1
2 Nephi 26–30
“Datdatlag nga Aramid ken Pagsidsiddaawan”
Laglagipen a nasken a ti pagtaengan ti sentro a pagsursuruan iti ebanghelio. Ti bukod ken sangapamiliaan a panagadalyo iti 2 Nephi 26–30 ti nasken a batayan ti panagsaganam a mangisuro. Mangplanoka kadagiti wagas a mangpadur-as, mangpatibker ken mangparegta kadagiti bukod ken sangapamiliaan a panagadal dagiti tao iti klasem.
Isuratmo Dagiti Impresionmo
Yawis ti Panagbibinninglay
Iti rugi ti adalen, mangted kadagiti miembro ti klase iti gundaway a mangibinglay iti maysa a banag manipud iti 2 Nephi 26–30 a natakuatanda a napateg bayat ti panagadalda iti pagtaengan. Kas pagarigan, mabalinmo nga idawat kadakuada a mangiburay biit iti maysa a bersikulo a nakatulong kadakuada a makaawat iti aldawtayo ken dagiti karit a pakaipasanguantayo.
Isuro ti Doktrina
Maguyugoy amin a banag nga aramiden ti Apo babaen ti ayatna para kadatayo.
-
No mariknam a naparegtaka a mangilawlawag kadagiti pannursuro maipapan iti ayat ti Apo, mabalinmo a padasen daytoy: Kalpasan ti aggigiddan a panangbasada iti 2 Nephi 26:24 , mangawis kadagiti miembro ti klase a mangaramid iti listaan dagiti banag nga inaramid ni Jesucristo para kadakuada a naguyugoy babaen ti ayat. Kasano a “mayasideg[na] amin dagiti tao kenkuana”? Ania ti mariknatayo a naparegta nga aramiden kas sungbat kadagiti panangipeksana iti ayat?
-
Dagiti awis ti Apo iti 2 Nephi 26:24–28, 33 ket nabileg a pakakitaan iti ayatna. Maysa a wagas a mabalin a pakatulongam kadagiti miembro ti klase a mangtakuat kadagitoy nga awis ket panangidawat kadakuada a mangyababa kadagiti mensahe ti Apo kadagitoy a bersikulo iti maysa a binatog a pakagupgopan. Nalabit nga agtallugod iti sumagmamano a miembro ti klase a mangibinglay kadagiti pakagupgopanda. Kasano a makaimpluensia dagitoy a bersikulo iti wagas a pangawisantayo iti dadduma nga umasideg ken ni Cristo? Allukoyem ti klase a mangisurat iti sumagmamano kadagiti kapanunotan ken riknada. Tapno makatulong a maawis ti Espiritu, ibilangmo ti panangirekord iti maysa a himno maipapan iti ayat ti Mangisalakan “Come unto Jesus” (Hymns, no. 117), idinto nga agut-utob dagiti miembro ti klase.
Kasapulan unay ti Libro ni Mormon iti aramid ti Dios iti ud-udina nga aldaw.
-
Mabalin a kasapulan dagiti tao iti klasem ti bassit a tulong iti pannakaawat iti padto iti 2 Nephi 27 maipapan iti naserraan a libro ken ti deadal a tao. Mabalin a makatulong ti pakaammuan iti pakasaritaan iti “Dagiti Nainayon a Resources.” Mayobra kadi daytoy iti klasem no yakem biit ti sumagmamano a miembro ti klase dagiti pasamak a nailadawan iti daytoy a pakaammuan ken iti 2 Nephi 27:15–22? Apay a mabalin nga impakita ni Nephi dagitoy a pasamak iti nakaad-adu a tawen a nasapsapa? Ania ti isuro kadatayo ti padto ni Nephi maipapan iti kinapateg ti Libro ni Mormon? Allukoyem dagiti miembro ti klase a mangibinglay iti tunggal maysa no kasano a nagun-odda ti bukodda a pammaneknek maipapan iti Libro ni Mormon.
-
Adda kadi iti klasem ti nakapadasen iti panangawis iti maysa a tao a mangbasa iti Libro ni Mormon a mabalin nga ibinglayda? Ania dagiti sumagmamano a rason a mabalin a di awaten ti maysa a tao ti awis a mangbasa iti Libro ni Mormon? Masarakan ti sungbat ti Apo iti maysa a kasta a gapu iti 2 Nephi 29:6–11. Mabalinmo nga awisen dagiti miembro ti klase a mangbasa kadagitoy a bersikulo ket kalpasanna yakemda no kasano a mabalin siaayat a sumungbatda iti maysa a tao nga agkuna a saan a kasapulan ti Libro ni Mormon. Ania dagiti dadduma pay a kapanunotan nga adda kadagiti miembro ti klase maipapan no kasano a makatulong kadagiti dadduma a “maammuanda a [ti Libro ni Mormon] bendision kadakuada a naggapu iti ima ti Dios”? (2 Nephi 30:6).
Kalikaguman ni Satanas ti mangallilaw.
-
Ti balabalam iti daytoy a lawas iti Umaykayo, Sumurot Kaniak —Para kadagiti Indibidual ken Pamilia ket mangisingasing iti panagsukisok kadagiti kinaulbod ni Satanas a nailadawan iti 2 Nephi 28. Nalabit a mabalin nga ibinglay dagiti miembro ti klase no ania ti nasarakanda, wenno mabalinda a basaen biit 2 Nephi 28 iti klase ket ilistada dagiti kinaulbod ni Satanas a mailasinda. Mabalin pay a makatulong a pagtrabahuem ida iti babassit a grupo a mangsapul kadagiti nasantuan a kasuratan a mangilibak kadagitoy a panangallilaw (no kasapulanda ti tulong, mabalinmo nga ibinglay dagiti singasing iti “Dagiti Nainayon a Resources”). Kalpasanna mabalin nga agbibinninglay dagiti grupo iti no ania ti nasarakanda ket paglilinnawagan no kasano a mailasinda dagiti “inuulbod ken awan serbina ken minamaag a doktrina” ti kabusor (2 Nephi 28:9).
Yallukoy ti Panagsursuro iti Pagtaengan
Mabalin a maparegta a basaen dagiti miembro ti klase ti 2 Nephi 31–33 no ammoda a naglaon dagitoy a kapitulo kadagiti maudi a naisurat a balikas ni Nephi, agraman ti maysa kadagiti kasimplean ngem kangrunaan a komprehensibo a panangiladawan iti doktrina ni Cristo.
Dagiti Nainayon a Resources
“Sa kunanto ti masirib: diak mabasa” (2 Nephi 27:18).
Idi Pebrero 1828, nagbiahe ni Martin Harris, maysa a gayyem ni Joseph Smith, iti daya iti Siudad ti Nueva York nga intugotna ti sumagmamano a kitikit dagiti pinanid a [balitok] tapno ipakitana kadagiti iskolar. Nalabit a tinarigagayanna ti nayon pay a pammatalged a pudno dagiti pinanid, wenno mabalin a napanunotna a makatulong kadakuada ti pammaneknek tapno makabulodda iti kuarta nga usaren a pangipablaak iti patarus. Iti ania man a pasamak, impettengna a ti Apo ti nangiparikna kenkuana nga agbiahe.
“Iti dayta a panawen, saan nga ammo unay ni Joseph wenno ni Martin maipapan iti pagsasao nga adda kadagiti pinanid. Ammoda laeng kas imbaga ni anghel Moroni ken ni Joseph: a daytoy ti nagkauna a kasuratan ti America. Iti kasta, imbes nga agbirok iti iskolar nga addaan iti pannakaammo iti Egipsio (naammuan ni Joseph idi agangay a ti pagsasao kadagiti pinanid ket maawagan iti ‘nabalbaliwan nga Egipsio’), binisita ni Martin ti sumagmamano nga iskolar nga addaan interes kadagiti nagkauna a panawen, nangnangruna kadagiti nagkauna a panawen ti America.
“… [Maibilang kadagiti iskolar a binisita ni Martin ket ni] Charles Anthon, maysa nga agtutubo a propesor ti grammar ken linguistics iti Columbia College. Agur-urnong ni Anthon kadagiti estoria ken bitla nga Amerikan Indian para iti pablaak ken naggagar a mangamiris iti dukomento nga inyeg kenkuana ni Martin.
“Kinuna ni Martin nga imbaga ni Anthon a pudno dagiti kitikit agingga a naammuanna no kasano a nagun-od ni Joseph Smith dagitoy. Insingasingna nga ipan ni Martin kenkuana dagiti pinanid. Nagkedked ni Martin, ket insungbat ni Anthon, iti panangadawna iti maysa a bersikulo iti Isaias, ‘diak mabasa ti maysa a naserraan a libro.’ Nupay inlibak idi agangay ni Anthon dagiti detalye ti estoria ni Martin iti panagsarakda, daytoy ti ammomi: Dimteng ni Martin manipud iti isasarungkarna kadagiti iskolar iti daya a nakomkombinsi ngem iti kaano man a ni Joseph Smith ket inawagan ti Dios ken kadaanan dagiti pinanid ken kitikit. Imbilangda ken Joseph ti isasarungkar ken ni Anthon kas pannakaipatungpal ti padto ni Isaias (nadakamat pay iti Libro ni Mormon mismo) ti maysa a libro a naserraan, nga inted dagiti lallaki iti maysa a deadal, a kunkunana, Basaenyo daytoy, ikararagko: ket kinunana, diak mabasa; ta naserraan’ [Isaias 29:11; kitaen met iti 2 Nephi 27: 15–18]” (“The Contributions of Martin Harris,” Revelations in Context [2016], 3–4, history.ChurchofJesusChrist.org).
Dagiti nasantuan a kasuratan a mangilibak kadagiti pangallilaw ni Satanas.
|
Palso a doktrina |
Pudno a doktrina |
|---|---|
|
“Saan nga isu ti Dios dagiti milagro; nalpasnan ti aramidna” (2 Nephi 28:6). | |
|
“Ti Dios … pakawanennanto ti bassit a naaramid a basol” (2 Nephi 28:8). | |
|
“Nasayaat ti amin iti Zion” (2 Nephi 28:21). | |
|
“Saanak a sairo, ta awan ti kasta” (2 Nephi 28:22). | |
|
“Saanmin a kasapulan ti balikas ti Dios, ta addan umdas kadakami” (2 Nephi 28:29). |
Panangpadur-as iti Panangisurotayo
Saan nga agbuteng iti panagulimek. “Agkasapulan iti oras dagiti napipintas a saludsod tapno masungbatan. Agkasapulan dagitoy iti panagutob, panagsukisok, ken inspirasion. Ti oras a bubosem iti panagur-uray kadagiti sungbat iti maysa a saludsod ket mabalin a maysa a sagrado nga oras ti panagutob. Liklikam ti sulisog a mangigibus iti daytoy nga oras a nasapa unay babaen ti panangsungbatmo iti bukodmo a saludsod wenno ipapanmo iti sabali pay a topiko” (Panangisuro iti Wagas ti Mangisalakan, 31).