Napakawanen, ni Greg K. Olsen

Marso 9–15

Jacob 1–4

Makitunoskayo iti Dios babaen ti Pannubbot ni Cristo

Jacob 1–4 ket naglaon iti adu a pannursuro a mayaplikar iti aldawtayo. Bayat ti panangbasam kadagitoy a kapitulo, ibilangmo no kasano a matulongam dagiti sursuruam nga agtungpal iti doktrina nga insuro ni Jacob.

Isuratmo Dagiti Impresionmo

Yawis ti Panagbibinninglay

Tapno matulongan dagiti miembro ti klase a mangibinglay kadagiti nauneg a pannakaammo ken pannakaawat [insights] manipud iti Jacob 1–4, mabalinmo ti mangipasa kadagiti babassit a pedaso ti papel ket mangawis kadagiti miembro ti klase a mangisurat iti reperensia ti nasantuan a kasuratan manipud kadagitoy a kapitulo a natakuatanda a napateg kadakuada. Ikabil dagiti babassit a pedaso ti papel iti maysa a container, mangiruar iti sumagmamano, ken mangawis kadagiti tao a nangisurat kadagiti reperensia tapno ibinglayda dagiti nauneg a pannakaammo ken pannakaawatda [insights].

Isuro ti Doktrina

Jacob 1:6–8, 15–19; 2:1–11; 4:18

Agtrabaho a sireregta dagiti nalinteg a dadaulo wenno lider para iti pagimbagan dagiti kararua.

• Mabalin a rugiam ti panangilawlawag maipapan iti naregta a panagtrabaho ni Jacob ken dagiti taona babaen ti panangidawat kadagiti miembro ti klase a mangibinglay kadagiti padas idi naparaburanda babaen ti panagserbi ti maysa a lider ti Simbaan. Wenno ibilangmo ti panangidawat iti lokal a lider iti Simbaan—napalabas wenno agdama—tapno mangisarita ti maipapan iti maysa a panawen idi nariknana a naparegta nga agserbi iti maysa a tao. Kalpasanna mabalin a sapulen dagiti miembro ti klase dagiti balikas ken dagiti ragup ti balikas iti Jacob 1:6–8, 15–19; 2:1–11; ken 4:18 a makatulong kadatayo a makaawat no kasano ti rikna ni Jacob maipapan iti takemna ken dagiti tao a nagserbianna. Kasano a naimatangantayo dagiti lidertayo a mangipateg wenno mangpadakkel [magnify] kadagiti takemda? Ania ti isingasing dagitoy a bersikulo maipapan iti wagas a nasken a panangkanunongtayo kadagiti lidertayo?

Kas ken ni Jacob, dagiti lider ti Simbaan iti agdama “ipategda dagiti takem[da] iti Apo.”

Jacob 2:12–21

Nasken a liklikantayo ti kinapalangguad ken tulongantayo dagiti agkasapulan.

• Adda dagiti napigsa a ballaag ti Apo kadagiti Nephite maipapan iti kinapalangguad. Tapno matulongan a mangirugi iti panaglilinnawag iti daytoy a topiko, mabalinmo a kasarita iti nasapsapa ti sumagmamano a miembro ti klase ket idawatmo kadakuada a mangsapul kadagiti wagas a pangitandudo ti kabusor iti ayat iti kinabaknang iti lubongtayo iti agdama. Kalpasanna awisem ida a mangibinglay iti klase no ania ti nadlawda. Mabalin nga agtrabaho dagiti miembro ti klase iti sagpaparis a mangbasa iti Jacob 2:12–21 ket mangsapul no ania ti insuro ti Apo maipapan iti no kasano ti nasken a panangibilang kadagiti material a kinabaknang. Mabalinda kalpasanna ti mangaramid ken mangibinglay iti maysa a poster a mangitandudo iti dayta a pagbatayan. Mangted iti oras tapno saggaysa nga agutob dagiti miembro ti klase no ania ti maaramidda a mangyaplikar iti no ania ti masursuroda manipud iti mensahe ni Jacob.

• Mabalin nga irebyu dagiti miembro ti klasem ti Jacob 2:12–21 ket isuratda dagiti bukodda a saludsod a mainayon iti listaan ni Elder Perry. Ania ti inayon ti palawag ni Elder Perry iti “Dagiti Nainayon a Resources” iti pannakaawattayo kadagiti pannursuro ni Jacob?

Jacob 2:23–35

Maragsakan ti Apo iti kinadalus ti dayaw.

• Insuro ni Elder David A. Bednar nga agbibiagtayo “iti maysa a lubong nga umad-adu ti panangumsi iti kinasagrado ti kabaelan nga agparsua iti biag [procreation] ken bumasbassit ti kinapateg ti biag ti tao” (“We Believe in Being Chaste,” Ensign wenno Liahona, Mayo 2013, 41–44). Kasano a matulongam dagiti miembro ti klase a mangusar iti Jacob 2:23–35 a mangsuppiat kadagiti mensahe ti lubong maipapan iti kinadalus ti dayaw? Maysa a mabalin a wagas ket mangisurat iti pisarra ti Kasano ti rikna ti Apo maipapan iti kinadalus ti dayaw? ken mangawis kadagiti miembro ti klase a mangsapul kadagiti sungbat iti saludsod. Mabalin a sukisoken ti sumagmamano kadakuada ti Jacob 2:23–35, ken mabalin a sapulen dagiti dadduma pay ti bitla ni Elder Bednar kas naibasar iti ngato. Mabalinda nga ilista iti pisarra dagiti sungbat a masarakanda. Tapno mailawlawag dagiti pagrukodan ken bendision a mainaig iti panagtungpal iti linteg ti kinadalus ti dayaw, mabalinmo nga irebyu ti “Kinadalus iti Seks” (Para iti Pigsa dagiti Agtutubo, 35–37). wenno ipabuya ti maysa kadagiti video a nailista iti “Dagiti Mainayon a Resources.” Ania dagiti bendision ti panagbiag a nadalus iti dayaw?

Jacob 4:4–11

Namati dagiti Nephite ken ni Jesucristo.

• Tinarigagayan ni Jacob a mangammo a nupay nagbiag isuna ken dagiti taona iti ginasgasut a tawen sakbay ti panagserbi ti Mangisalakan iti daga, ammoda ti maipapan Kenkuana ken kimmitada Kenkuana para iti pannakaisalakan. Segun iti Jacob 4:4–5, apay a tinungpal dagiti Nephite ti paglintegan ni Moises? Ania ti adda kadatayo iti panawentayo a mangiturong iti kararuatayo iti Mangisalakan? Ania dagiti simbolo wenno pagpapadaan nga inusar ni Jacob a mangisuro maipapan ken ni Jesucristo? (Kitaen met iti Genesis 22:1–13).

Jacob 4:8–18

Maliklikak iti naespirituan a kinabulsek babaen ti panangipamaysa iti Mangisalakan.

• Adda kadi asino man iti klasem a nagpaamiris iti mata itay nabiit? No kasta, mabalinmo nga idawat iti daytoy a tao a mangiladawan no kasano nga inamiris ti doktor ti panagkitana. Mabalin nga ibinglay dagiti miembro ti klase no ania iti panagkunada ti kaipapanan ti agbalin a naespirituan a bulsek. Kasano a maipada ti naespirituan a kinabulsek iti pisikal a kinabulsek? Mangawis kadagiti miembro ti klase a mangisingasing kadagiti wagas a mabalin a pangamirisantayo no naespirituan a bulsektayo. Mabalinda pay nga irebyu ti Jacob 4:8–18 ken mangisingasing iti sumagmamano a banag a maaramidtayo a mangpadur-as iti kabaelantayo a “mangkita” kadagiti naespirituan a banag.

• Ni Elder Quentin L. Cook ket nangbalabala iti uppat a wagas a mabalin a pangkitaan ti tao iti “labes ti marka” iti aldawtayo (kitaen iti “Dagiti Mainayon a Resources”). Ania ti inayon dagiti balikasna iti pannakaawattayo iti Jacob 4:13–15? Ania ti kayat a sawen ti kumita iti labes ti marka? Kasano a maliklikantayo ti panangkita iti labes ti marka?

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti Jacob 5–7, ibagam kadakuada a masarakandanto ti sungbat iti saludsod iti Jacob 4:17 bayat ti nainkararagan a panangbasada iti sumaruno a tallo a kapitulo.

Dagiti Mainayon a Resources

Dagiti ugalitayo iti material a kinabaknang

Iti panangibasar iti Jacob 2:13–19, insuro ni Elder L. Tom Perry: “Nasken nga ipapusotayo ti balakad ni Jacob. Nasken a basaentayo daytoy nasantuan a kasuratan a kasla naisurat a nangnangruna a para kadatayo kadagitoy nga aldaw, gapu ta kasta. Nasken a dagiti balikasna ti mangigapu iti panagdamagtayo iti bagbagitayo kadagiti saludsod kalpasan ti atiddog ken naannad a panangamiristayo iti panunot ken riknatayo maipapan iti biagtayo. Ipangpangrunatayo kadi dagiti kapatgan a banag iti bukodtayo a biag? Ipangpangrunatayo kadi, nga umuna ken kapatgan, dagiti banag nga adda pakainaiganna iti kinaagnanayon? Addaantayo kadi iti agnanayon a pannirigan? Wenno nagbidduttayo kadi iti panangipangpangruna kadagiti banag iti daytoy a lubong ket kalpasanna pananglipattayo iti Apo? ” (“United in Building the Kingdom of God,” Ensign, Mayo 1987, 34).

Dagiti video maipapan iti Kinadalus ti Dayaw (ChurchofJesusChrist.org)

• “Piliek ti Agbalin a Nadalus”

• “Kinadalus ti Dayaw: Ania dagiti Limitasion?”

• “Ti Paglintegan ti Kinadalus ti Dayaw”

Panangkita iti labes ti marka

Ni Elder Quentin L. Cook insurona no kasano a mabalin a kumitatayo iti “labes ti marka”:

“Panangsukat kadagiti pilosopia ti tattao kadagiti kinapudno ti ebanghelio”

“Sumagmamano a tattao ti kasla mapabainan iti kinasimple ti mensahe ti Mangisalakan. Kayatda a laokan ti kinapudno iti nariro ken narigat a maawatan tapno maaramid daytoy a nakarkarit iti kinasaririt wenno maipada kadagiti agdama nga ayo ti akademika. … Kumitatayo iti labes ti marka no agkedkedtayo a mangawat kadagiti simple a kinapudno ti ebanghelio.”

“Nalaus a panagkasapulan iti ebanghelio”

“Kumitkitatayo iti labes ti marka no itag-aytayo ti maysa a pagbatayan, uray no kasano ti pateg daytoy, iti kinalatak a mangpabassit iti panagkumittayo iti dadduma pay a maipada a napapateg a prinsipio wenno no umawattayo iti maysa a posision a maisuppiat kadagiti pannursuro dagiti Kakabsat a Lallaki.”

“Dagiti nabanuaran a panagipasimudaag [gestures] kas pangsukat iti inaldaw a panagidaton iti Dios”

“Imbaga ti sumagmamano a miembro a sireregget nga ikumitda ti bagbagida no maikkanda iti sumagmamano a dadakkel a takem, ngem dida makita a napateg ti home teaching ken visiting teaching [maawagan itan iti ministering] para iti nakanunongan a panagkagumaanda.”

“Panangitag-ay kadagiti annuroten iti doktrina”

“Dagiti nagkumit iti panangsurot kadagiti annuroten a saanda nga agibasbasar iti doktrina ken prinsipio ket al-alistoda iti panangkita iti labes ti marka” (“Looking Beyond the Mark,” Ensign wenno Liahona, Mar. 2003, 42–44).