Ni Jesus a mangisursuro kadagiti disipulona

Ni Cristo a Mangisursuro kadagiti Disipulona, ni Justin Kunz

Marso 2–8

2 Nephi 31–33

“Daytoy ti Dalan”

Bayat ti panagadalmo iti 2 Nephi 31–33, panunotem dagiti miembro ti klasem ket ibilangmo no ania dagiti mabalin a padasda kadagiti kinapudno nga insuro ni Nephi. Kasano ti panangawismo kadakuada a mangisuro iti tunggal maysa no ania ti nasursuro ken nariknada maipapan kadagitoy a doktrina?

Isuratmo Dagiti Impresionmo

icon iti panagbibinninglay

Yawis ti Panagbibinninglay

Adda kadi iti asino man iti klasem ti addaan iti maysa a napateg a padas iti maysa kadagiti adalen a singasing iti Umaykayo, Sumurot Kaniak—Para kadagiti Indibidual ken Pamilia? Mangted kadagiti miembro ti klase iti gundaway a mangibinglay kadagiti padasda.

icon iti panangisuro

Isuro ti Doktrina

2 Nephi 31–32

Ni Jesuscristo ken ti doktrinana ti kakaisuna laeng a dalan nga agturong iti agnanayon a biag.

• Nalabit a pagimbagan ti klasem a mangkita no kasano nga agkakanaig iti tunggal maysa ti pammati, panagbabawi, panagbuniag, ti sagut ti Espiritu Santo, ken panagibtur agingga iti panungpalan ken ti Pannubbot ni Jesucristo. Tapno maaramid daytoy, mabalinmo ti mangidrowing iti maysa a dana iti pisarra ket awisem dagiti miembro ti klase a mangisurat iti dana ti sumagmamano a pagbatayan a masarakan iti 2 Nephi 31. Mabalin a pumili iti maysa ti tunggal miembro ti klase iti maysa kadagitoy a pagbatayan ken mangsukisok iti 2 Nephi 31–32 a mangsapul iti maysa a banag nga insuro ni Nephi maipapan iti daytoy. Kalpasanna mabalinda nga ibinglay iti tunggal maysa no ania ti nasarakanda ket paglilinnawagan no kasano a makatulong daytoy kadakuada iti nasaysayaat a panagawatda kadagiti pagbatayan. Kasano a ti panagtungpal kadagitoy a pagbatayan ket mangisangbay kadagiti bendision ti Pannubbot ni Jesucristo iti biagtayo?

• Kasano a mairugim ti panangilawlawag iti nalawag ken simple a panangiladawan ni Nephi iti “dalan” nga agturong iti pannakaisalakan? (2 Nephi 31:21). Nalabit a mabalinmo a saludsoden kadagiti miembro ti klase no ania koma ti masaoda no addaanda laeng iti 60 segundo a mangilawlawag no ania ti nasken nga aramiden ti maysa a tao nga umawat iti pannakaisalakan. Kalpasanna mabalin a basaen biit dagiti miembro ti klase ti 2 Nephi 31–32, a mangsapsapul kadagiti palawag a makatulong. Ania ti masursurotayo manipud kadagitoy a kapitulo maipapan iti kangrunaan nga akem ti Mangisalakan iti pannakaisalakantayo? Mabalin a makatulong dagitoy a palawag iti “Dagiti Nayon a Resources” iti daytoy a pannakisarita.

• No dadduma makitatayo dagiti pagbatayan ti ebanghelio a kas naidumduma ken nagsisinada, ngem ti kinapudnona agkakanaigda. Tapno matulongan dagiti miembro ti klase a mangkita no kasano nga agkakanaig dagiti pagbatayan iti 2 Nephi 31 mangawis kadagiti miembro ti klase, saggaysa wenno iti babassit a grupo, tapno basaenda ti bersikulo 4–21 ket mangaramid iti maysa a diagram a mangipakita no kasano ti pammati ken ni Cristo, panagbabawi, panagbuniag, ti sagut ti Espiritu Santo, ken panagibtur agingga iti panungpalan ket agpipinnapigsa iti tunggal maysa, agkakanaig iti tunggal maysa, ken dadduma pay. Allukoyen ida nga agbalin a managpartuat. Bayat ti panangibinglayda kadagiti diagramda iti klase, idawat kadakuada a mangibinglay iti no ania ti nasursuroda maipapan kadagitoy a pagbatayan. Kasano a maaramidtayo dagitoy a paset ti inaldaw a panagbiagtayo?

2 Nephi 31:15–20

“Asino man a makapagibtur agingga iti panungpalan, isunto met laeng ti maisalakan.”

• Maawatan kadi dagiti miembro ti klase no ania ti kaipapanan ti agibtur agingga iti panungpalan? Adtoy ti maysa nga aktibidad a makatulong. Isuratmo iti pisarra ti Kasano a maammuak no agib-ibturak agingga iti panungpalan? Kalpasanna awisem dagiti miembro ti klase a mangsukisok iti 2 Nephi 31:15–20 tapno mangsapul kadagiti mabalin a sungbat iti daytoy a saludsod. Idawatmo kadagiti miembro ti klase a mangisurat iti pisarra iti ania man a makatulong a balikas wenno ragup dagiti balikas a masarakanda. Apay a ti panagibtur agingga iti panungpalan ket napateg a paset ti doktrina ni Cristo? Mabalinmo pay nga ibinglay ti palawag ni Elder Dieter F. Uchtdorf iti “Dagiti Nainayon a Resources” wenno ti palawag maipapan iti panagibtur agingga iti panungpalan iti panid 6 ti Preach My Gospel.

• Adda kadi am-ammo dagiti miembro ti klase a maysa a pagarigan ti panagibtur agingga iti panungpalan? Ania ti nakatulong iti daytoy a tao nga “agtultuloy a sitatalingenngen ken ni Cristo”? (bersikulo 20). Ibilangmo ti panangibinglay iti estoria dagiti dadduma pay a tao nga nadakamat kadagiti nasantuan a kasuratan a nagibtur agingga iti panungpalan.

2 Nephi 32:1–6

Ti Espiritu Santo ti mangipakitanto kadatayo no ania ti nasken nga aramidentayo.

• Iti 2 Nephi 32, insarita ni Nephi ti maysa a pakaseknan a nariknana nga adda kadagiti taona maipapan iti panangyaplikar iti doktrina ni Cristo. Mabalinmo nga awisen dagiti miembro ti klase a mangsapul iti daytoy a pakaseknan iti 2 Nephi 32:1 ket kalpasanna basaen ti sungbat ni Nephi iti 2 Nephi 32:2–26. Kasano nga ibaga dagiti miembro ti klase iti bukodda a balikas no ania ti insuro ni Nephi? Ania dagiti padas dagiti miembro ti klase idi impakita kadakuada ti Espiritu Santo wenno dagiti balikas ni Cristo no ania ti kasapulan nga aramidenda?

2 Nephi 33

Allukoyennatayo ti Libro ni Mormon a mamati ken ni Cristo.

• Ninamnama ni Nephi a dagiti balikasna ti manguyot kadatayo “nga agaramid iti nasayaat [ken] a mamati ken ni [Cristo]” (2 Nephi 33:4). Ania dagiti binatog wenno estoria manipud iti 1 ken 2 Nephi a a nanguyot kadatayo nga agaramid iti nasayaat ken mamati ken ni Cristo?     

icon iti panagsursuro

Yallukoy ti Panagsursuro iti Pagtaengan

Maysa a wagas a mangparegta kadagiti miembro ti klase a mangadal iti Jacob 1–4 iti sumaruno a lawas ket panangilawlawag a kadagitoy a kapitulo masarakandanto dagiti ballaag ni Jacob maipapan iti dua a basol a gagangayen iti aldawtayo.

resources icon

Dagiti Nainayon a Resources

Ti doktrina ni Cristo.

Insuro ni Elder Jeffrey R. Holland: “Ti ‘doktrina ni Cristo’ kas insuro ni Nephi iti naindaklan, ken nagupgop a bitlana a naipamaysa iti pammati ken ni Apo Jesucristo, panagbabawi, panagbuniag, panangawat iti sagut ti Espiritu Santo, ken panagibtur agingga iti panungpalan. Iti daytoy a palawag, saan nga agpanggep daytoy a mangsakup iti sibubukel a plano ti pannakaisalakan, amin a saguday ti nakristianuan a biag, wenno dagiti gunggona nga agur-uray kadatayo iti nadumaduma a tukad ti nailangitan a gloria. Iti daytoy a palawag, awan ti pakainaiganna daytoy kadagiti takem ti priesthood, dagiti ordinansa ti templo, wenno adu a dadduma pay a pudno a doktrina. Napateg amin dagitoy, ngem kas nausar iti Libro ni Mormon, ‘ti doktrina ni Cristo’ ket simple ken natarus. Mangipamaysa daytoy kadagiti umuna a pagbatayan ti ebanghelio, agraman ti panangipeksa iti pammaregta nga agibtur, agipetteng ken agtultuloy. Kinapudnona, adda daytoy iti kinalawag ken kinasimple ti “doktrina ni Cristo’ a pakasarakan iti epektona” (Christ and the New Covenant: The Messianic Message of the Book of Mormon [1997], 49–50).

Kinuna ni Elder D. Todd Christofferson: “Ipakaasik iti amin … a sapulenyo babaen ti panagkararag ken panagadal kadagiti nasantuan a kasuratan ti [maysa] a saksi ti nadiosan a kinatao, ti Pannubbot, ken Panagungar ni Jesucristo. Awatenyo ti doktrinana babaen ti panagbabawi, pannakabuniag, panangawat iti sagut ti Espiritu Santo, ket kalpasanna panangsurot kadagiti paglintegan ken katulagan ti ebanghelio ni Jesucristo iti unos ti panagbiagyo” (“The Doctrine of Christ,” Ensign wenno Liahona, Mayo 2012, 89).

Panagibtur agingga iti panungpalan.

Inlawlawag ni Elder Dieter F. Uchtdorf:

“Idi ubingak, kayat a sawen kaniak ti ‘agibtur agingga iti panungpalan’ kangrunaanna a nasken nga ikarigatak ti agtalinaed a siririing agingga iti gibus dagiti mitingmi iti Simbaan. Idi agangay kas maysa a barito … inkonektak ti naubing a pannakipagriknak kadagiti aramid dagiti patpatgen a lallakay ken babbaket a miembro a sipupudno nga agbiag agingga iti gibus ti biagda. …

“… Ti panagibtur agingga iti panungpalan ket saan laeng a banag a yaannugot iti pannakapasamak dagiti narigat a kasasaad ti biag wenno ‘sipupudno nga agbiag agingga iti gibus ti biag.’ Pagrebbengantayo ti agbalin a naregta iti pammati, panangtulong kadagiti annak ti Dios nga agtalinaed iti nailet ken akikid a dana a mangpadur-as iti naan-anay a potensialda kabayatan daytoy a biag ken agsubli Kenkuana iti maysa nga aldaw. Makita manipud iti daytoy a pannirigan, ti panagibtur agingga iti panungpalan ket makaitan-ok ken nadayag, saan a naranggas ken naleddaang. Maysa daytoy a naragsak a relihion, maysa nga addaan iti namnama, pigsa, ken pannakaisalakan. …

“Ti panagibtur agingga iti panungpalan kaipapananna ti ‘agtalinaed iti panagaramid iti naimbag’ (Taga Roma 2:7), panangikarigatan nga agtungpal kadagiti bilin (kitaen iti 2 Nephi 31:10), ken panagaramid kadagiti aramid ti kinalinteg (kitaen iti DKK 59:23)” (“Have We Not Reason to Rejoice?” Ensign wenno Liahona, Nob. 2007, 20).

Panangpadur-as iti Panangisurotayo

Aggigiddantayo a masursuruan. Kas maysa a mannursuro, aramidem ti ad-adda pay ngem iti mangted laeng iti impormasion— makipagsursuroka kadagiti dadduma pay iti klase. Ibinglaymo kadakuada no ania ti ar-aramidem nga agsursuro manipud kadagiti nasantuan a kasuratan.