Ni Lehi ken ti Liahona, ni Joseph Brickey

Enero 27–Pebrero 2

1 Nephi 16–22

“Isaganakto ti Dalan a Pagnaanyo”

Bayat ti panangbasam iti 1 Nephi 16–22, panunotem maipapan ti no kasano a makatulong kadagiti tao iti klasem ti pagwadan ni Nephi iti panangsarangetda kadagiti karit.

Isuratmo Dagiti Impresionmo

Yawis ti Panagbibinninglay

Nakita ni Nephi ti pateg ti panangyarig kadagiti nasantuan a kasuratan iti bagina ken kadagiti taona (kitaen iti 1 Nephi 19:23). Ibilang ti panangawis kadagiti miembro ti klase tapno mangiburay kadagiti pagbatayan a nasursuroda manipud iti pakaammuan iti panangdaliasat ni Nephi iti naikari a daga a mainaig iti bukodda a biag.

Isuro ti Doktrina

1 Nephi 16:10–16, 23–31; 18:10–13, 20–22

Usaren ti Dios dagiti babassit a pamuspusan a mangipatungpal kadagiti naindaklan a banag.

• Mabalinmo kadi, wenno ti maysa a tao iti klasem, ti mangpanunot iti maysa a banag a bassit a mabalin a mausar a mangisangbay iti maysa a banag a dakkel? (kitaen iti 1 Nephi 16:29). Mabalinmo nga awisen dagiti miembro ti klase a mangilawlawag no ania ti masursuroda maipapan iti daytoy a pagbatayan kalpasan ti panangbasa kadagitoy a nasantuan a kasuratan a saggaysa wenno sagsangagrupo: 1 Nephi 16:25–31; Alma 37:3–8; ken Doktrina ken Katulagan 64:33; 123:12–17. Kasano nga inusar ti Dios dagiti babassit a pamuspusan a mangipatungpal kadagiti dadakkel a banag iti biagtayo?

• Mabalin a pagimbagan ti klasem ti panangilawlawag no kasano nga iturong ti Nailangitan nga Ama dagiti danatayo. Tapno mangrugi, mabalin a pailawlawagmo iti klase dagiti pagbatayan a nangpagana iti Liahona (kitaen iti 1 Nephi 16:10–16, 23–31; 18:10–13, 20–22; kitaen met iti Alma 37:38–47). Kasano a maibilang dagitoy a pagbatayan a “babassit a pamuspusan”? Mabalin nga ilista iti pisarra dagiti miembro ti klase dagiti banag nga impaay ti Dios a mangiwanwan kadatayo (kitaen iti “Dagiti Nainayon a Resources” para kadagiti kapanunotan). Ania dagiti babassit a tignay a maaramidtayo tapno maawattayo ti pannarabay ti Dios?

No Nakasaganakayo Saankayto nga Agbuteng, ni Clark Kelley Price

1 Nephi 16:18–32; 17:7–16; 18:1–4

No agtungpaltayo kadagiti katulagan, tulongannatayto ti Dios a mangsango kadagiti karit.

• Mabalin a mapadpadasan dagiti miembro ti klasem dagiti aramiden ken karit a kasla imposible. Kasano a mausarmo ti padas ni Nephi kadagiti bukodna nga aramiden a kasla imposible—panangpakan ti pamiliana iti langalang ken panangbangon iti maysa a bapor—a mangtulong kadakuada? Nalabit a mabalin a basaen dagiti miembro ti klase ti 1 Nephi 16:18–32; 17:7–16; ken 18:1–4, amangsapsapul kadagiti pagbatayan a makatulong kadakuada no maipasangoda iti mapannubok a kinarigat (kas pagarigan, isuro ti 1 Nephi 16:24–26 a ti panagkararag ken panagpakumbaba ti mangpalugod kadatayo nga umawat iti inspirasion ken direksion manipud iti Apo). Mabalinmo nga irugi babaen ti panangted kadakuada iti pagarigan ti maysa a pagbatayan a nasarakam kadagitoy a bersikulo. Bayat ti panangibinglayda iti no ania ti nasarakanda, mabalinda pay nga iburay dagiti mainaig a bukod a padas.

1 Nephi 16:18–32; 17:7–22

Mangiturong ti pammati iti panagtignay.

• Dagiti padas ni Lehi ken ti pamiliana iti langalang ti mangiladawan iti bileg ti pammati ken dagiti bunga ti kinaawan pammati. Tapno matulongan a matakuatan dagiti miembro ti klase dagitoy a kinapudno, mabalinmo nga isurat dagitoy a saludsos iti pisarra: Kasano a nagtignay ni Nephi iti pammatina? Kasano a naparaburan isuna kas bunga daytoy? Ania dagiti bunga ti kinaawan pammati da Laman ken Lemuel? Awisem dagiti miembro ti klase kas sagsangagrupo tapno mangsukisok kadagiti sungbat kadagitoy a saludsod iti 1 Nephi 16:18–32 wenno 17:7–22 ket ibinglayda no ania ti masarakanda.

1 Nephi 19:22–24

Mayarig wenno maaramattayo dagiti nasantuan a kasuratan iti bagbagitayo.

• Tapno matulongan a masursuruan dagiti miembro ti klase no kasano a yarig wenno aramaten dagiti nasantuan a kasuratan iti bagbagida, mabalinda a basaen dagiti pagarigan no kasano nga inaramid ni Nephi daytoy. Kas pagarigan, iti 1 Nephi 4:1–3 ken 17:23–32, 41–45, ania dagiti pagbatayan nga insuro ni Nephi babaen ti panangyarig wenno panangaramatna kadagiti nasantuan a kasuratan iti kasasaad ti pamiliana? Ti pakaammuan ni Elder Robert D. Hales iti “Dagiti Nainayon a Resources” ti mangiladawan no kasano a mangbendision kadatayo ti panangyarig wenno panangaramat kadagiti nasantuan a kasuratan iti bagbagitayo. Ibilangmo ti panangawis kadagiti miembro ti klase a mangilasin kadagiti karit a pakaipaspasanguanda wenno dagiti miembro ti pamiliada ket kalpasanna sapulem dagiti pakaammuan iti nasantuan a kasuratan a makaited kadakuada kadagiti nalawag a pannakaammo ken pannakaawat [insights] ken tulong para kadagita a situasion. Segun iti 1 Nephi 19:22–24, kasano a makabendision kadatayo ti panangyarig wenno panangaramat kadagiti nasantuan a kasuratan iti bagbagitayo?

• Ti panangilawlawag iti 1 Nephi 19:22–24 ket mabalin a naindaklan a gundaway a panangibinglay dagiti miembro ti klase no kasano a “yarigda wenno aramatenda dagiti nasantuan a kasuratan iti bagbagida ken ti pamiliada, kasta met dagiti bendision a naawatda iti panangaramidda iti kastoy. Ibilang ti panangilista iti pisarra dagiti kapanunotan dagiti miembro ti klase maipapan no kasano ti panangyarig wenno panangaramat kadagiti nasantuan a kasuratan iti bagbagida (para iti sumagmamano a singasing, kitaen iti listaan iti “Dagiti Nainayon a Resources”). Iti masakbayan a klase, mabalinmo nga awisen dagiti miembro ti klase a mangibinglay kadagiti padas idi inusarda dagiti kapanunotan iti listaan.

1 Nephi 20–21

Ummongento ti Apo ti balay ti Israel kadagiti maudi nga aldaw.

• Tapno maallukoy dagiti miembro ti klase a mangibinglay kadagiti napapateg a pannursuro a nasarakanda iti 1 Nephi 20–21, ibilangmo ti panangisurat kadagiti paulo kas kadagitoy iti pisarra: Annak ti Israel, Pamilia ni Lehi, ken Dagiti tao iti Aldawtayo. Ikkam ida iti gundaway a mangrebyu iti 1 Nephi 20–21 ket ilistam iti baba ti tunggal paulo no kasano a mayaplikar dagiti padto ni Isaias kadagitoy a grupo.

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti 2 Nephi 1–5, awisen ida a mangpanunot maipapan iti no ania ti isaoda kadagiti pamiliada no ababa koma ti panawenda iti daga. Ilawlawag a dagiti umuna a sumagmamano a kapitulo ti 2 Nephi ket naglaon iti maudi a mensahe nga inted ni Lehi iti pamiliana.

Dagiti Nainayon a Resources

 

  

Dagiti “Liahonatayo.”

Insuro ni Elder David A. Bednar: “Siiiget nga agobra ti Espiritu Santo iti biagtayo kas iti inaramid ti Liahona para ken ni Lehi ken ti pamiliana, a maibatay iti pammati ken kinapasnek ken idedengngegtayo” (“That We May Always Have His Spirit to Be with Us,” Ensign wenno Liahona, Mayo 2006, 31).

Idi Oktubre 2005 sapasap a komperensia, kinuna ni Elder Lowell M. Snow ti Pitupulo: “Daytoy mismo a sapasap a komperensia ti moderno a Liahona, maysa a panawen ken lugar a pangawatan iti naparegta a pannarabay ken panangiturong a mangparang-ay kadatayo” (“Compass of the Lord,” Ensign wenno Liahona, Nob. 2005, 97).

Insuro ni Presidente Thomas S. Monson: “Ti isu met la nga Apo a nangipaay iti maysa a Liahona ken ni Lehi ti mangipaay kadakayo ken mangipaay kaniak ita iti manmano ken napateg a sagut tapno mangted iti pangiturong iti biagtayo. … Ti sagut a pagibasarak ket maam-ammo a ti bendisionyo iti patriarka” (Thomas S. Monson, “Your Patriarchal Blessing: A Liahona of Light,” Ensign, Nob. 1986, 65).

Panangyarig wenno panangaramat kadagiti nasantuan a kasuratan iti bagbagitayo.

Insuro ni Elder Robert D. Hales:

“Sumagmamano a tawen ti napalabas mangisursuroak idi iti agtutubo nga anakko a lalaki maipapan iti biag ken padas ti kabsat a lalaki ni Jared. Nupay makaay-ayo unay ti estoria, awan ti pakainaiganna kenkuana. Kalpasanna sinaludsodko no ania ti personal a kaipapanan kenkuana ti estoria. Napnuan kaipapanan unay daytoy no saludsodentayo dagiti annaktayo ti, ‘Ania ti kaipapanan kenka daytoy?’ Kinunana, ‘Ammom, saan a maigiddiat iti inaramid ni Joseph iti kakaywan idi nagkararag ken nakagun-od iti sungbat.’

Kinunak, ‘Kaedadmo ni Joseph idi. Panagkunam kadi a makatulong kenka ti kararag a maipada iti kararagna?’ Kellaat, a saanmin a napagsaritaan maipapan iti estoria iti nabayagen a panawen iti maysa nga adayo a daga. Nagsaritaanmi maipapan iti anakko a lalaki—maipapan iti biagna, dagiti kasapulanna, ken ti wagas a pakatulongan kenkuana ti kararag.

“Kas nagannak, addaantayo iti pagrebbengan a mangtulong kadagiti annaktayo a ‘mangyarig wenno mangaramat iti amin a nasantuan kasuratan [kinapudnona, tunggal paset ti ebanghelio ni Jesucristo] kadatayo [ken kadagiti annaktayo], … para iti pagimbagan ken pakasursuruan [dagiti pamiliatayo]’” (“With All the Feeling of a Tender Parent: A Message of Hope to Families,” Ensign wenno Liahona, Mayo 2004, 90).

Dagiti singasing para iti panangyarig kadagiti nasantuan a kasuratan.

• Panunotem maipapan kadagiti pasamak wenno kasasaad iti panawentayo a maipada kadagiti adda iti nasantuan a kasuratan a basbasaem.

• Sapulem no ania ti ammo, adalen, wenno aramiden dagiti tao kadagiti nasantuan a kasuratan a makatulong kenka iti agdama a personal a problema wenno saludsod.

• Ilasinmo dagiti pagbatayan manipud iti dayta nga estoria a makatulong kenka kadagiti bukodmo a kasasaad.