tattao a mangmangan iti bunga ti kayo ti biag

Nasamsam-it ngem iti Amin a Kinasam-it, ni Miguel Ángel González Romero

Enero 20–26

1 Nephi 11–15

“Naarmasan iti Kinalinteg ken Bileg ti Dios”

Irugim ti panagsaganam a mangisuro babaen ti panangbasam iti 1 Nephi 11–15. Isuratmo dagiti kapanunotam ken impresionmo maipapan kadagiti binatog ken pagbatayan a yallukoymonto a paglilinnawagan dagiti miembro ti klase. Makatulong dagiti kapanunotan iti baba.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Naglaon dagitoy a kapitulo kadagiti pagbatayan a mabalin a kayat nga ibilang dagiti miembro ti klase bayat ti panangibinglayda iti ebanghelio kadagiti dadduma. Ibilangmo ti panangisurat kadagiti saludsod kas iti sumaganad iti pisarra ken panangawis kadagiti miembro ti klase a mangibinglay kadagiti banag a nasarakanda iti panagbasada itoy a lawas a makatulong a mangsungbat kadagitoy a saludsod:

• Ania ti Ikakalilis iti Kinapudno ken ti Pannakaisubli?

• Apay a napateg ti Libro ni Mormon?

• Kasano a maammuak dagiti kinapudno ti Dios para iti bagik?

icon iti panangisuro

Isuro ti Doktrina

1 Nephi 11:1–5, 13–33

Imbaon ti Dios ni Jesucristo kas maysa a panangipeksa iti ayatna.

• Impakita ti anghel ken ni Nephi dagiti simbolo ken pasamak manipud iti biag ti Mangisalakan a mangipakita iti ayat ti Dios. Mabalin a makitam a makatulong daytoy a mangamiris kadagitoy a simbolo ken pasamak kas maysa a klase ket paglilinnawagan no kasano nga ipakitada ti ayat ti Dios para kadatayo. Adda kadi dagiti ania man a ladawan, video, wenno dadduma pay a pangtulong a ladawan a maipakitam a mangiladawan iti sumagmamano a pasamak kadagitoy a bersikulo? (kitaen, kas pagarigan ti, ,biblevideos.ChurchofJesusChrist.org). Kasano a makatulong kenka ti biag ken Pannubbot ti Mangisalakan tapno maawatam ti ayat ti Dios para kenka?

1 Nephi 12–15

Tulongannatayonto ti Dios a mangkedked iti impluensia ni Satanas.

• Mabalin a no dadduma marikna dagiti miembro ti klasem kas iti narikna dagiti tao iti parmata ni Nephi a nagalla-allada iti nangisit nga angep wenno napadpadasanda ti pananguyaw dagiti adda iti dakkel ken nalawa a pasdek. Mabalin a kayatmo a saludsoden iti klase no apay a dagiti angep ti kasipngetan ti nasayaat a simbolo para iti sulisog (kitaen iti 1 Nephi 12:17) ken apay a ti dakkel ken nalawa a pasdek ti nasayaat a simbolo para kadagiti awan kaes-eskanna nga arapaap ken pagtangtangsit ti lubong (kitaen iti 1 Nephi 12:18). Kalpasanna mabalinmo a bingayen dagiti kapitulo 12–15 kadagiti miembro ti klase ket awisem ida a mangsukisok kadagiti bersikulo a mangisuro no kasano a tulongannatayonto ti Dios a mangparmek iti sulisog, kinaparammag, ken kinapalangguad (kitaen, kas pagarigan iti, 1 Nephi 13:34–40; 14:14).

• Kasano a matulongam dagiti miembro ti klasem a nasaysayaat a makaawat iti bileg a sumangbay manipud iti balikas ti Dios? (Kitaen iti 1 Nephi 15:24). Mabalinmo ida nga awisen a mangilawlawag kadagiti saludsod kas iti sumaganad: Ania ti nasursuro ni Nephi maipapan iti bileg ti balikas ti Dios? Kasano a dadaelen ni Satanas ti balikas ti Dios? (kitaen iti 1 Nephi 13:26–29). Ania ti inaramid ti Apo ken dagiti propetana tapno mataginayon ti balikasna? Kas paset ti panangilawlawagmo, mabalin a paibinglaymo iti sumagmamano a miembro ti klase no kasano nga adalenda dagiti nasantuan a kasuratan ken no ania ti aramidenda a mamagbalin iti balikas ti Dios a paset ti inaldaw a panagbiagda.

1 Nephi 13

Insagana ti Apo ti dalan para iti Pannakaisubli ti Simbaanna.

• Nalabit a makatulong ti linia ti panawen tapno maawatan dagiti miembro ti klase ti parmata ni Nephi maipapan kadagiti pasamak ti Pannakaisubli. Mabalinmo nga awisen dagiti miembro ti klase a mangidrowing iti maysa iti pisarra, nga addaan kadagiti pasamak a nailadawan iti 1 Nephi 13. Ania kadagitoy a pasamak ti naipatungpalen? Ania dagiti mapaspasamak iti agdama? Ibilangmo ti panangibinglay iti adaw iti “Dagiti Nainayon a Resources” ni George Washington, umuna a presidente ti Estados Unidos, a mangipakita a binigbigna ti impluensia ti Dios iti Panagalsa ti America, maysa a pasamak a nangisagana iti dalan para iti Pannakaisubli.

• Kasano nga usaren dagiti miembro ti klase ti 1 Nephi 13 a mangilawlawag iti maysa a tao a sabali ti pammatina no apay a kasapulan ti Pannakaisubli? (kas pagarigan, kitaen iti 1 Nephi 13:26–29, 35–42). Ania dagiti dadduma pay a nasantuan a kasuratan a mabalin nga usaren dagiti miembro ti klase a mangtulong a mangipaawat kadagiti dadduma no apay a kasapulan ti Pannakaisubli? (para iti sumagmamano a pagarigan, kitaen iti Pangiwanwan iti Nasantuan a Kasuratan, “Pannakaisubli ti Ebanghelio”). Mabalin a mairanud dagiti miembro ti klase manipud iti panangyakem no kasano a mailawlawagda iti maysa a tao ti panagkasapulan iti Pannakaisubli ken no kasano a nangparabur daytoy kadakuada.

1 Nephi 13:20–41

Isuro ti Libro ni Mormon dagiti nalawag ken napateg a kinapudno.

• Mabalin a makatulong nga usaren ti 1 Nephi 13:20–41 a mangirugi iti panaglilinnawag maipapan no apay a kasapulantayo ti Libro ni Mormon. Mabalin nga ilista dagiti miembro ti klase ti sumagmamano kadagiti “nalawag ken napateg a banag” a napukaw manipud iti Biblia ken naisubli babaen ti Libro ni Mormon (para iti sumagmamano a pagarigan, kitaen kadagiti bersikulo 26 ken 39 wenno dagiti listaan iti “Dagiti Nainayon a Resources”). Mabalin a kayatmo pay nga awisen dagiti miembro ti klase a mangibinglay no kasano a nakatulong kadakuada dagitoy naisubli a “nalawag ken napateg a banag” a naas-asideg iti Dios.

  pamilia nga agbasbasa kadagiti nasantuan a kasuratan

  Matulongannatayo ti Espiritu a mangtakuat kadagiti “nalawag ken napateg a kinapudno” para iti bagbagitayo.

• Ibilang ti panangipabuya iti video “The Book of Mormon—a Book from God” (ChurchofJesusChrist.org), ket awisem dagiti miembro ti klase a mangibinglay no ania ti isuro daytoy a video maipapan no apay a kasapulantayo ti Libro ni Mormon. Mabalinmo nga awisen ti maysa a miembro ti klase a mangidrowing iti pisarra iti ilustrasion a nailadawan iti adaw ni Elder Tad R. Callister iti “Dagiti Nainayon a Resources.” Mabalin kalpasanna nga ibinglay dagiti miembro ti klase no kasano a nakatulong kadakuada ti Libro ni Mormon a nasaysayaat a maawatanda ti ebanghelio ni Jesucristo.

icon iti panagsursuro

Yallukoy ti Panagsursuro iti Pagtaengan

Tapno maparegta a basaen dagiti miembro ti klase ti 1 Nephi 16–22 kabayatan ti umay a lawas, mabalinmo a dakamaten nga iraman daytoy ti maysa a pakaammuan a mabalin a mangparegta ken mangtulong kadakuada no maidawat a kasapulanda nga aramiden ti maysa a banag a kasla imposible.

resources icon

Dagiti Mainayon a Resources

Dagiti Video iti Libro ni Mormon.

Mangsapul kadagiti video a mangiladawan kadagiti pasamak manipud iti 1 Nephi 11–15 iti Book of Mormon Videos collection iti ChurchofJesusChrist.org wenno iti Gospel Library app.

Ti aramid ti Apo iti Panagalsa ti America.

Kinuna ni George Washington: “Pudno a nasken nga agbalin a dakes ti tao a mangibilang kadagiti pasamak ti Panagalsa ti America a saan a makarikna iti napudnuan unay a panagyaman iti naindaklan nga Akin-aramid iti Lubong a ti mangsalsalaknib nga impluensiana ket masansan unay a maiparangarang a maipaay kadatayo” (Surat ken ni Samuel Langdon, Sept. 28, 1789, founders.archives.gov/documents/Washington/05-04-02-0070).

Listaan ni Presidente Russell M. Nelson iti Libro ni Mormon.

Manipud iti “The Book of Mormon: What Would Your Life Be Like?” (Ensign wenno Liahona, Nob. 2017, 60–63).

Saan a paneknekan ti Libro ni Mormon dagiti pagarup a:

• Naggibus ti paltiing iti Biblia.

• Masapul a mabuniagan dagiti maladaga.

• Mabalin a masarakan ti ragsak iti kinadangkes.

• Umdasen ti kinasayaat ti tao para iti pannakaitan-ok (kasapulan dagiti ordinansa ken katulagan).

• Ti Pannakatnag ni Adan ti nangtulaw iti sangkataw-an iti “nakaisigudan a basol.”

Lawlawagan ti Libro ni Mormon ti pannakaawat maipapan iti:

• Ti biagtayo sakbay daytoy a biag.

• Ipapatay. Daytoy ti kasapulan a banag ti naindaklan a plano ti kinaragsak.

• Biag kalpasan daytoy a biag, a mangrugi iti paraiso.

• No kasano a ti panagungar ti bagi, a maitipon manen iti espirituna, agbalin a maysa nga imortal a kararua.

• No kasano a maibatayto ti panangukom ti Apo kadagiti aramid ken tarigagay dagiti puspusotayo.

• No kasano a siuumno a maannong dagiti ordinansa: kas pagarigan, panagbuniag, sakramento, pannakaited ti Espiritu Santo.

• Ti Pannubbot ni Jesucristo.

• Ti Panagungar.

• Ti napateg nga akem dagiti anghel.

• Ti agnanayon a saguday ti priesthood.

• No kasano a ti galad ti tao ket ad-adda nga inaringan ti bileg ti balikas ngem iti bileg ti espada.

Kasapulantayo ti Libro ni Mormon.

Insuro ni Elder Tad R. Callister:

“Ti Biblia ti maysa a saksi ni Jesucristo; ti Libro ni Mormon ti sabali pay. Apay a napateg unay daytoy maikadua a saksi? Makatulong ti sumaganad a panangiladawan: Mano a nalinteg a linia ti maidrowingmo iti maysa a punto iti maysa a piraso ti papel? Awan patinggana ti sungbat. Iti apagkanito, ipapan a ti maysa a punto ti mangibagi iti Biblia ken dagiti ginasgasut kadagiti nalinteg a linia a naidrowing iti dayta a punto ti mangibagi iti nadumaduma a kayulogan ti Biblia ken tunggal maysa kadagita a kayulogan ti mangibagi iti sabali a simbaan.

“Nupay kasta, ania ti mapasamak no iti dayta a piraso ti papel adda maysa a maikadua a punto a mangibagbagi iti Libro ni Mormon? Mano a nalinteg a linia ti maidrowingmo iti nagbabaetan dagitoy a dua a pagibasaran a punto: ti Biblia ken ti Libro ni Mormon? Maysa laeng. Maysa laeng a kayulogan dagiti doktrina ni Cristo ti makapagbiag iti pammaneknek dagitoy dua a saksi” (“The Book of Mormon—a Book from God,” Ensign wenno Liahona, Nob. 2011, 75).

Panangpadur-as iti Panangisurotayo

Mangidaulo kadagiti naparegta a panaglilinnawag. Adda banag a maited ti tunggal maysa kadagiti panaglilinnawag iti klase, ngem no dadduma saan a maikkan ti amin iti gundaway. Agsapul kadagiti wagas a mangpadur-as kadagiti gundaway dagiti miembro ti klase a mangibinglay kadagiti pammaneknekda. (Kitaen iti Panangisuro iti Wagas ti Mangisalakan, 33.)