dagiti pinanid a balitok

Disiembre 31–Enero 5

Dagiti pakauna a panid ti Libro ni Mormon

“Mainayon a Pammaneknek ken ni Jesucristo”

Adalen ti panid ti paulo ken pakaunati Libro ni Mormon; dagiti pammaneknek ti Tallo a Saksi, ti Walo a Saksi, ken ni Propeta Joseph Smith; ken “Ababa a Panangilawlawag maipapan iti Libro ni Mormon.” Bayat ti panangaramidmo, agkalikagum a manggun-od kadagiti parikna manipud iti Espiritu Santo maipapan no kasano a maparegtam ti klasem a mangirugi iti napateg a panagadal iti Libro ni Mormon.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno mangrugi, mabalinmo nga awisen ti sumagmamano a tao a mangibinglay iti maysa a banag a nasursuroda manipud kadagiti pakauna a panid ti Libro ni Mormon a nangpatibker iti pammaneknekda maipapan iti daytoy sagrado a libro.

icon iti panangisuro

Isuro ti Doktrina

Panid ti paulo ti Libro ni Mormon

Ti Libro ni Mormon ket makapapigsa iti pammatitayo ken ni Jesucristo.

• Ti panangbasa iti panid ti paulo ti Libro ni Mormon, nga insurat ni Moroni, ti makapagsagana kadagiti miembro ti klasem nga agadal iti Libro ni Mormon iti daytoy a tawen. Kasano a mangpadur-as iti panagadalda dagiti mensahe iti panid ti paulo? Mabalin a makapagsuratka iti maysa wenno ad-adu pay a saludsod iti pisarra—kas iti Apay nga addaantayo iti Libro ni Mormon? wenno Kasano a maigiddiat ti Libro ni Mormon manipud kadagiti dadduma pay a libro?—ket awisem dagiti miembro ti klase a mangsapul kadagiti sungbat bayat ti panangrebyuda iti panid ti paulo a saggaysa wenno sagpaparis. Kalpasanna mabalinda nga ibinglay dagiti impresion nga immay kadakuada. Mabalinmo pay nga allukoyen dagiti miembro ti klase a mangilawlawag kadagiti planoda iti panagadal iti Libro ni Mormon iti daytoy a tawen. Kas pagarigan, anianto ti sapsapulenda? Kasano a masursuruanda manipud iti Espiritu Santo bayat ti panagadalda?

• Maysa kadagiti kapatgan a panggep ti Libro ni Mormon ti nadakamat iti panid ti paulo daytoy: mangguyugoy iti “Judio ken Gentil a ni Jesus isu ti Cristo.” Mabalinmo nga awisen dagiti miembro ti klase a mangibinglay kadagiti binatog manipud iti Libro ni Mormon a nangpatibker iti pammatida ken ni Jesucristo (mabalinda pay a basaen ti sumagmamano a binatog a nakalista iti “Dagiti Nainayon a Resources”). Mabalin a basaen dagiti miembro ti klase ti sumagmamano kadagitoy a bersikulo iti maysa a tao a nakatugaw iti asideg ket ibinglayda no kasano nga inimpluensiaan ti Libro ni Mormon ti pammaneknekda iti Mangisalakan.

Pakauna iti Libro ni Mormon

Matulongannatayo ti Libro ni Mormon nga “umas-asideg iti Dios.”

• Ti pakauna iti Libro ni Mormon ket mangipaay iti impormasion a nasken a maawatan dagiti agbasbasa. Mabalin a pakairanudan dagiti miembro ti klasem manipud iti alisto a panangbasada iti pakauna ken panangilasinda iti tallo agingga iti lima a puntos a makatulongto nga iburay iti maysa a tao nga agbasbasa iti Libro ni Mormon iti umuna a gundaway. Kalpasanna mabalin nga iburay dagiti miembro ti klase no ania ti makitada. Mabalin a kayatda pay a yakem ti panangyam-ammo iti Libro ni Mormon iti maysa a tao. Mabalin a makatulong pay dagiti video a naisingasing iti “Dagiti Nainayon a Resources.”

• Mabalin nga addan padas ti sumagmamano a miembro ti klasem a nangpatalged iti kinapudno dagiti balikas ni Joseph Smith: “Umas-asideg ti tao iti Dios babaen ti panagtungpal kadagiti linaon [ti Libro ni Mormon], ngem iti ania man a sabali a libro.” Mabalinmo a paibinglay kadagiti miembro ti klase no kasano a ti panagbiag kadagiti kinapudno a nasursuroda iti Libro ni Mormon ket nakatulong kadakuada nga umas-asideg iti Dios. Mabalinmo pay nga awisen dagiti miembro ti klase nga ibinglayda dagiti sungbat kadagitoy tallo a saludsod nga insingasing ni Presidente Russell M. Nelson: “Umuna, ania koma ti kayarigan ti biagmo no awan ti Libro ni Mormon? Maikadua, ania koma ti saanmo nga ammo? Maikatlo, ania koma ti awan kenka?” (“The Book of Mormon: What Would Your Life Be Like without It?” (Ensign wenno Liahona, Nob. 2017, 61).

• Binasa kadin ti asino man iti klasem dagiti binatog iti Libro ni Mormon a naglaon iti agduduma a nagnagan para iti plano ti pannakaisalakan, kas naisingasing iti Umaykayo, Sumurot Kaniak—Para kadagiti Indibidual ken Pamilia? No kasta, awisen ida a mangibinglay no ania ti nasursuroda.

“Ti Pammaneknek dagiti Tallo a Saksi”; “Ti Pammaneknek dagiti Walo a Saksi”

Makapagbalintayo amin a saksi ti Libro ni Mormon.

• Ti panagadal kadagiti pammaneknek dagiti Tallo ken Walo a Saksi ket mangpapigsa iti pammaneknek dagiti miembro ti klasem ken makatulong kadakuada a mangutob no kasano a maibinglayda dagiti bukodda a pammaneknek. Mabalinmo nga idawat iti kagudua ti klase a mangbasa iti “Ti Pammaneknek dagiti Tallo a Saksi” ket ti sabali pay a kagudua a mangbasa iti “Ti Pammaneknek dagiti Walo a Saksi” ket mangibinglay kadagiti impresion wenno detalye a napateg kadakuada. Kasano nga aggiddiat ti dua a pammaneknek? Kasano nga agpada dagitoy? Ania ti masursurotayo manipud kadagitoy a pammaneknek maipapan iti panangiburay kadagiti pammaneknektayo? Tapno mangirugi iti panaglilinnawag maipapan no apay a napateg dagiti Tallo a Saksi, mabalinmo nga iburay ti palawag ni Presidente Dallin H. Oaks wenno ti pammaneknek ni John Whitmer iti “Dagiti Nainayon a Resources.

Ni Joseph Smith ken dagiti Tallo a Saksi nga agkarkararag a sangkamaysa

Nagpaneknek dagiti Tallo a Saksi maipapan iti Libro ni Mormon.

“Ti Pammaneknek ni Propeta Joseph Smith”

Ni Joseph Smith ti inaramat ti Dios a mangisangbay iti Libro ni Mormon.

• Mabalin a pamiliaren dagiti miembro ti klase kadagiti pasamak a nailadawan iti “Ti Pammaneknek ni Propeta Joseph Smith,” ngem nalabit a makatulongka kadakuada a mangsapul kadagiti baro a nauneg a pannakaammo ken pannakaawat [insights]. Kas pagarigan, mabalinmo nga awisen ida a mangilista kadagiti kangrunaan a pasamak iti pakaammuan ni Joseph Smith. Ania ti maigibustayo manipud iti padasna maipapan iti kinapateg nga inkabil ti Apo iti Libro ni Mormon?

• Isarita ti himno “An Angel from on High” (Hymns, no. 13) maipapan iti idadateng ti Libro ni Mormon. Kalpasan ti panangkanta wenno panagdengngeg iti daytoy a himno, masarakan dagiti miembro ti klase dagiti palawag iti “Ti Pammaneknek ni Propeta Joseph Smith” a mangparis wenno mangpatibker kadagiti ragup ti balikas iti kanta.

icon iti panagsursuro

Yallukoy ti Panagsursuro iti Pagtaengan

Tapno maparegta dagiti miembro ti klase a mangbasa iti 1 Nephi 1–7, awisen ida a mangsapul kadagiti kapanunotan a mangtulong kadakuada kadagiti agdama a kasasaadda iti biag—kas pagarigan, maysa a karit ti pamilia wenno maysa a takem wenno calling iti Simbaan.

resources icon

Dagiti Nainayon a Resources

Dagiti binatog iti Libro ni Mormon a mangpaneknek ken ni Jesucristo.

• Mosiah 3:5–8

• Alma 5:48; 7:10–13

• Helaman 5:12

• 3 Nephi 9:13–18; 11:6–14

• Moroni 10:32–33

Ti kinapateg dagiti Tallo a Saksi.

Inlawlawag ni Presidente Dallin H. Oaks no apay a makaidarirag unay dagiti Tallo a Saksi:

“Ti pammaneknek dagiti Tallo a Saksi iti Libro ni Mormon ket mangibagi iti naindaklan a pigsa. Aduan iti gapu ken gundaway ti tunggal maysa kadagiti tallo a mangrubsi iti pammaneknekna no palso koma daytoy, wenno pagduaduaan dagiti detalye no adda man saan a nalawag. Kas iti ammo ti kaaduan, gapu iti saan a panagkikinnaawatan wenno panagilem maipanggep kadagiti dadduma pay a dadaulo ti Simbaan, naekskumonikado ti tunggal maysa kadagitoy tallo a saksi manipud iti Ti Simbaan ni Jesucristo dagiti Santo iti Ud-udina nga Aldaw babaen iti agarup walo a tawen kalpasan ti pannakaipablaak ti pammaneknekda. Nagsisina ti amin a tallo iti dalanda, nga awan napagkaykaysaan nga interes tapno mangsuporta iti napagkukumplotan nga aramid. Ngem agingga iti gibus ti biagda—kadagiti panawen manipud iti 12 agingga iti 50 a tawen kalpasan dagiti pannakaekskomunikadoda—awan uray maysa kadagitoy a saksi ti nangbalbaliw iti naipablaak a pammaneknekna wenno nagsao iti ania man a banag a namagduadua iti kinapudno daytoy” (“The Witness: Martin Harris,” Ensign, Mayo 1999, 36).

Ti pammaneknek ni John Whitmer.

Ni John Whitmer, maysa kadagiti Walo a Saksi iti Libro ni Mormon, ti nangipakdaar: “Diak kaano man nangngegan nga inlibak ti asino man kadagiti tallo wenno walo a saksi ti pammaneknek nga imburayda. … Naiwarnak dagiti nagantayo iti amin a nasion, pagsasao ken tattao kas nadiosan a paltiing manipud iti Dios. Ket mapasamakto dagiti panggep ti Apo a mayannurot iti palawag a naglaon ditoy” (iti Noel B. Reynolds, ed., Book of Mormon Authorship Revisited: The Evidence for Ancient Origins [1997], 55–56).

Panangpadur-as iti Panangisurotayo

Ikarigatam a manggun-od iti bukodmo a pammaregta. Imbes a panangkita kadagitoy a balabala a kas pangiturong a nasken a surotem, usarem dagitoy kas maysa a pangalaan kadagiti kapanunotan a mangpataud iti bukodmo nga inspirasion bayat ti panangutobmo kadagiti kasapulan dagiti sursuruam.